Ahaazɛ dí Ziida kuorí
16
1 Remaliya bio Peka há dí kuorí bɩŋsɛ fí arɩ́ balpɛ nyúú mí ní, ká Yotaŋ, bio Ahaazɛ má dí Ziida kuorí. 2 Ʋ fa kéŋ bɩŋsɛ mɛrɛ́ nɛ́ ká dí kuorí bɩŋsɛ fí rɩ́ balgo Zerizalɛmɛ mɛ́. Amá ʋ wɩ ɛ́ɛ́ tɔrɛ Nyuutɩna Wɩɩsɛ, ʋ Wɩɩsɛ sɩɛrʋ, anʋ́ʋ́ naabál Davidi. 3 Ʋ taŋa pí Ɩzɩrayɛl kuóre naa nɛ́. Ʋ púú bio má tɩɩ a físi, a tʋŋ wɩ́tɩɛnnɛ anɛ ɛ́ duowa ná náŋa fa háá ɛ́ɛ́, Nyuutɩna Wɩɩsɛ kíríwó tɔ́ɔ́ ná mɛ́ ká Ɩzɩrayɛl nɩɛ ké. 4 Ʋ ɔ́sɛ́ vʋka ká nyɩ́kɛ tulaaléwa dúŋdúóme ná daha ɓa háá ɓáárɛ venni, palwiisi daha arɩ́ tulɔ́ɔ́ é wuu mʋ́l.5 Siiri kuóro Resiŋ arɩ́ Ɩzɩrayɛl kuóro Peka há ká Remaliya bio, mʋ́ rɩ́wɔ́ yo Zerizalɛmɛ. Ɓa tɔ́ Ahaaze hé, amá ɓa wɩ wóllé a yóú. 6 Ɛ́ tɛ́ŋ tɩɩ mɛ́ nɛ́, Siiri kuóro Resiŋ yó la Ela tɔ́ɔ́ a pá Siiri. Ʋ há kírí Ziida nɩɛ wuu ráŋ a tenni, ʋ púú pá Edoŋ nɩɛ nɛ́ ɓa ké ráŋ, a ko aá lɛ́ zaa wuu. 7 Ahaazɛ tʋ́ŋ nɩɛ rɩ́wɔ́ ká liŋó né a mʋ́ pá Asiiri kuóro Tigilatɛfalasar a bʋlɛ́: «Ŋ kɛ́ɩ́ tʋtʋnnɔ nɛ́, a ɛ́ɩ́ bio má. Kó láŋ tá Siiri kuóro arɩ́ Ɩzɩrayɛl kuóro há ísé cɩ́nɩ́ŋ mɛ́, nɛ́sɛ mɛ́.» 8 Ahaazɛ pá salmɛ arɩ́ wárɛ ná há mɩ́ŋ Nyuutɩna Wɩɩsɛ jaa mɛ́ arɩ́ kuóro zʋ́ɔ́ cɩksɛjaa sɩɛrʋ náŋá mɛ́, a tɛ́ ɓa kaá mʋ́ dí zile a pá Asiiri kuóro. 9 Asiiri kuóro sáŋ, a tɩɩ isi a mʋ́ yoo dí Damaasɛ, a kɛ́sʋ́ nɩɛ a kaa mʋ́ Kiir, ká ɓʋ́ Resiŋ é. 10 Kuóro Ahaazɛ ísó a mʋ́ Damaasɛ rʋ́ʋ́ céŋ Asiiri kuóro Tigilatɛfalasar. Ʋ ná koro ná há mɩŋ Damaasɛ mɛ́. Kuóro Ahaazɛ ɔ́ɔ́ ɓa túúrú nɩɩsɔ́ arɩ́rʋ́ sɔɛ naasɛ a hé kɛnɔ mɛ́, ʋ tɛ́ ɓa kaa mʋ́ Zerizalɛmɛ a pá vʋk'ɔɔsɔ Uriya rʋ́ʋ́ ɔ́ʋ́ nɔ́ŋɔ tɩɩ. 11 Vʋk'ɔɔsɔ Uriya má korfɛlɔ́ a tɩ́ŋ ɛ́ ná kuóro Ahaazɛ há mákɛ́, ɓa kaa lɛ Damaasɛ ko pɔ́ʋ́, ʋ mɔ́ʋ́ tenni rɩ kuóro Ahaazɛ há wɩ bɩrɛ lɛ Damaasɛ rɩ ko má tɩɩ. 12 Kuóro há bɩrɛ lɛ́ Damaasɛ a ko, ʋ ná koro ná, a tuupérú; a zɩ́nʋ́ daha, 13 a tɩɩ ɔsɛ vʋk'físi, rɩ́ satɔ́ɔ́rɩ́pálɔ, a ɔ́ŋsɛ dɩvɛ́ŋ tá, a súúri tɛŋfɩ́ɛ́l vʋk'ɔ́sɔ́ cɛ́l ná ʋ há píé gáárɛ koro ná mɛ́. 14 Ká a ɓa pí kɔmɔ́ koro ná fa há mɩŋ Nyuutɩna Wɩɩsɛ sɩ́ɛ́. Ɛ́ koro fa mɩŋ Nyuutɩna Wɩɩsɛ jaa dánnʋ́ɔ́ mɛ́ nɛ́, korfɛlɔ ná rɩ́ Nyuutɩna Wɩɩsɛ jaa ná pɛ́kɛ. Ʋ a ɓa púú a bíl korfɛlɔ́ ná laka, wɩɩsɛ dɩpomí nɛ́gʋɔ rɩ́. 15 Ká kuóro Ahaazɛ sɩɛ́ pá vʋk'ɔɔsɔ Uriya ŋmɛ́nɔ: «Ɩ sɩ́ ɔsɛ kal wuu cɩ́cʋɔ vʋk'fisí rɩ́ gbaanɛ satɔ́ɔ́rɩpalɔ́, kuóro vʋk'fisi rɩ́rʋ́ satɔ́ɔ́rɩpalɔ́, tɔ́ɔ́ ná nɩɛ wuu satɔ́ɔ́rɩpalɔ́ arɩ́ dɩvɛ́ŋ ɔ́ŋsɛ táálɛ korzeno né daha. Ká pi vʋk'físé pʋsɛ ná wuu cɛ́l, arɩ́ vʋka ná wuu cɛ́l gáárʋ́ mɛ́. Kɔmɔ́ koro ná é, ŋ nɛ́ ɩ̃́ŋ há sɩ́ púú tʋ́mʋ́ ná.» 16 Ɛ́ nɛ́ vʋk'ɔɔsɔ Uriya tʋŋ kuóro Ahaazɛ wɩ́makɛ́ ná wuu. 17 Kuóro Ahaazɛ báá ɔ́ɔ́ ɓa ŋmɔsɛ naŋtáŋŋsɛ dɩsakɛ ná bónni, ká lɩ́sɛ kɔmɔ́ gbaŋsɛ ná ɓá mʋ́ʋ́la mɛ́. Ʋ ɔ́ɔ́ ɓa pi kɔmɔ́ gbaŋjɛlɔ́ ná má fa há sakɛ kɔmɔ́ nɔɓallɛ ná daha, a sakɛ dɔ́wʋ́ɔ́ daha. 18 Ɛ́ har mɛ́, ʋ tɩ́ŋ Asiiri kuóro wɩ́ɛ́, a bɩ́rsɛ Saba dánnʋɔ Nyuutɩna Wɩɩsɛ jaa sɩɛrʋ, arɩ́ dánnʋɔ ná kuóro fa há tɩ́ŋɛ aá zʋ Nyuutɩna Wɩɩsɛ jaa sɩɛrʋ.