Azariya dí Ziida kuorí
15
1 Zerobowamɛ há dí Ɩzɩrayɛl kuorí, bɩŋsɛ mɛrɛ́ arɩ́ balpɛ nyúú mí ní, Amasiya bio Azariya má dí Ziida kuorí. 2 Ʋ fa kéŋ bɩŋsɛ fí rɩ́ balgo ní ká dí kuorí, a a bɩŋsɛ mɛɛ́sɛllɛ rɩ́ fí arɩ́ bɛllɛ Zerizalɛmɛ mɛ́. Ʋ maá yɩr nɛ́ fa ká Yekoliya, a lɛ Zerizalɛmɛ. 3 Azariya tʋ́ŋ Nyuutɩna Wɩɩsɛ satɔrɔ́ anɛ ɛ́ ná tɩɩ ʋ áná Amasiya há tʋ́mɛ́. 4 Amá ʋ fa wɩ dúŋdúóme ná ɓa háá ɓaarɛ venni ráŋ zɔkɛ́. Ká nɩɛ fa há mʋ́ ráŋ, aá ɔsɛ vʋka, kaá nyɩkɛ túlaaléwa. 5 Nyuutɩna Wɩɩsɛ pí dayɛ́lmʋ hé kuóro mɩ́, ɓa lɩ́sʋ́ ja jaa hé ʋ mɩŋ ráŋ a káá jɔ́ʋ́ sʋʋ. Ʋ bio Yotamɛ fa há ká kuóro zʋ́ɔ́ sɩ́dííro, ʋ nɛ́ kué dí tɔ́ɔ́ ná nɩɛ sɩ́ɛ́. 6 Azariya wɩ́'állɛ ná náŋa, ʋ tʋtʋmɛ́ wuu mɩ́ŋ Ziida kuóre wɩ́'állɛ kɛnɔ sɩɛrʋ nɛ́. 7 Ʋ há sʋ́wɛ́, ɓa húú ʋ ánáwa lɛ́lbule sɩɛrʋ nɛ́, Davidi zʋ́ɔ́ mɛ́. Ʋ bio Yotamɛ nɛ́ lɔ́ʋ́ nyúú mí, a dí kuorí.Zakari dí Ɩzɩrayɛl kuorí
8 Azariya há dí Ziida kuorí bɩŋsɛ mɛrɛ́ arɩ́ fí rɩ́ córí nyúú mí ní, Zerobowamɛ bio Zakari má dí Ɩzɩrayɛl kuorí Samari mí, caŋsɛ balgo. 9 Ʋ ɔ́ɔ́ zɔkɛ Nyuutɩna Wɩɩsɛ sɩɛrʋ anʋ́ ánáwa. Ʋ wʋ́ʋ́ tɩɩ lɩ́sɛ́ ká tá wɩ́bɔma ná Nebatɛ bio Zerobowamɛ fa há yikí Ɩzɩrayɛl nɩɛ a héwó sɩɛrʋ. 10 Yabɛsɛ bio oro, ɓaá yɩrɛ Salumi, ísó a cɛ́ Zakari mí, a ɓʋ́ʋ́ nɩɛ sɩ́ɛ́ mɛ́ ká la kuorí ná. 11 Zakari wɩ́'állɛ ná naŋá mɩŋ Ɩzɩrayɛl kuóre wɩ́'állɛ kɛnɔ sɩɛrʋ nɛ́. 12 Wɩ́ɩ́ ná Nyuutɩna Wɩɩsɛ fa há bʋl Zehu rɩ́ nɛ́ nyɛ́: «Ɩ dunɩɛ sɩ́ dí Ɩzɩrayɛl kuorí, ɩ nyúú mí a mʋ́ peri woówá baná.» Ɛ́ nɛ́ ɓɩɛ́na cɩ́nɛ́.
Salumi dí Ɩzɩrayɛl kuorí
13 Azariya há dí Ziida kuorí bɩŋsɛ mɛrɛ́ arɩ́ fí rɩ́ nɛ́mɛ́ nyúú mí ní, ká Yabɛsɛ bio Salumi má dí Ɩzɩrayɛl kuorí cana balá dʋŋɔ Samari mí. 14 Gadi bio Menahɛmɛ nɛ́ lɛ́ Tirisa ko Samari, a ɓʋ́ Salumi há ká Yabɛsɛ bio ká lá kuorí ʋ nyúú mɩ́. 15 Salumi wɩ́'állɛ ná náŋa, ʋ zaŋbá wɩ́ɛ́ ná ʋ há ɛ́ɛ́ mɩ́ŋ Ɩzɩrayɛl kuóre wɩ́'állɛ kɛnɔ sɩɛrʋ nɛ́. 16 Ɛ́ tɛ́ŋ mɛ́ nɛ́ Menahɛmɛ mʋ́ a yo Tifisa tɔ́ɔ́; a ɓʋ́ʋ́sʋ́ nɩɛ ká lá tíé ná há pɔ́ Tirisa mɛ́ ká mʋ́ a yakɛ Tifisa mɛ́. Ʋ yó ɛ́ tɔ́ɔ́ nɩɛ, beé wɩ́ɛ́, ɓa wɩ tɔ́ɔ́ ná dánnʋʋsɛ wúré a pɔ́ʋ́. Ká kɩɛsɛ ɛ́ tɔ́ɔ́ hápuuke wuu.
Menahɛmɛ dí Ɩzɩrayɛl kuorí
17 Azariya há dí Ziida kuorí bɩŋsɛ mɛrɛ́ arɩ́ fí rɩ́ nɛ́mɛ́ nyúú mí ní, Gadi bio Menahɛmɛ má dí Ɩzɩrayɛl kuorí, a ké Samari mí bɩŋsɛ fí. 18 Ʋ ɔ́ɔ́ zɔkɛ Nyuutɩna Wɩɩsɛ mɛ́, ʋ hiẽso wuu mí, ʋ wʋ́ʋ́ tɩɩ lɩ́sɛ ká tá wɩ́bɔma ná Nebatɛ bio Zerobowamɛ há yikí Ɩzɩrayɛl nɩɛ héwó sɩɛrʋ.
19 Puul há ká Asiiri kuóro, kúó la tɔ́ɔ́ ná. Ɛ́ nɛ́ Menahɛmɛ pá Puul wárɛ zɩ́ŋ há peri kíló bʋ́ɩ́, ká rʋ́ʋ́ pɔ́ʋ́ mɛ́, rʋ́ʋ́ kuorí ká dóé werí. 20 Menahɛmɛ sɩɛ́ ɓá loŋpo a pá Ɩzɩrayɛl nɩɛ wuu, a makɛ rʋ́ʋ́ wolli ɛ́ kɩŋ túŋ a pá Asiiri kuóro. Tɔ́ɔ́ ná nɩpíŋí wuu túŋ meéwícaaka mɛɛ́sɛllɛ arɩ́ fí ní. Asiiri kuóro há lá meéwíé ná wuu tenni, ʋ bɩrɔ́ mʋ́ʋ́ tɔ́ɔ́. 21 Menahɛmɛ wɩ́'állɛ ná náŋa, ʋ tʋtʋmɛ́ wuu mɩ́ŋ Ɩzɩrayɛl kuóre wɩ́'állɛ kɛnɔ sɩɛrʋ nɛ́. 22 Menahɛmɛ há kúó sʋwɛ, ʋ bio Pekahiya nɛ́ lɔ́ʋ́ nyúú mí, a dí kuorí.
Pekahiya dí Ɩzɩrayɛl kuorí
23 Ahaziya há dí Ziida kuorí bɩŋsɛ mɛɛ́sɛllɛ rɩ́ fí nyúú mí ní, Menahɛmɛ bio Pekahiya má dí Ɩzɩrayɛl kuorí Samari mí, bɩŋsɛ bɛllɛ. 24 Ʋ ɔ́ɔ́ zɔkɛ Nyuutɩna Wɩɩsɛ sɩɛrʋ. Ʋ wʋ́ʋ́ tɩɩ lɩ́sɛ wɩ́bɔma ná Nebatɛ bio Zerobowamɛ fa há yíkí Ɩzɩrayɛl nɩɛ ɓa a sɩɛrʋ. 25 Pekahiya tʋtʋnnɔ ná háá cɩ́ɩ́nʋ́ láála, ʋ yɩr a Peka, Remaliya bio, ísó cɩ́nʋ́ mɛ́, a ɓʋ́ʋ́ rɩ́ Argɔɔbɛ arɩ́ Ariye, kuóro zʋ́ɔ́ jaa nɔ́ŋɔ sɩɛrʋ. Galaadɛ báála mɛɛ́sɛllɛ rɩ́ fí nɛ́ fa mɩ́nʋ́ har. Ʋ ɓʋ́ Pekahiya ká lɔ́ʋ́ nyúú mɩ́ a dí kuorí. 26 Pekahiya wɩ́'állɛ ná naŋá, ʋ tʋtʋmɛ́ wuu mɩ́ŋ Ɩzɩrayɛl kuóre wɩ́'állɛ kɛnɔ sɩɛrʋ nɛ́.
Peka dí Ɩzɩrayɛl kuorí
27 Azariya há dí Ziida kuorí bɩŋsɛ mɛɛ́sɛllɛ rɩ́ fí rɩ́ bɛllɛ nyúú mí ní, Remaliya bio Peka dí Ɩzɩrayɛl kuorí Samari mí, bɩŋsɛ mɛrɛ́. 28 Ʋ ɔ́ɔ́ zɔkɛ Nyuutɩna Wɩɩsɛ sɩɛrʋ, ʋ wʋ́ʋ́ tɩɩ lɩ́sɛ wɩ́bɔma ná Nebatɛ bio Zerobowamɛ há yíkí Ɩzɩrayɛl nɩɛ ɓa a sɩɛrʋ.
29 Tɛ́ŋ ná mɛ́ Peka há dí Ɩzɩrayɛl kuorí, Asiiri kuóro Tigɩltɛfalasar kúó lɔ́ʋ́ tɔ́nɛ, Ɩyɔŋ, Abɛlbɛtɛmaaka, Yanʋa, Kɛdɛsɛ arɩ́ Hasɔrɛ. Ʋ la Galaadɛ dɩtɩ́llɛ, Galiile dɩtɩ́llɛ arɩ́ Nɩfɛtali tíé wuu; a kɛ́sɩ́wɔ́ nɩɛ kaa mʋ́ Asiiri. 30 Ela bio Oze ísó cɛ́ Remaliyahu bio Peka mɛ́, a ɓʋ́ʋ́ ká la kuorí. Azariya bio Yotaŋ há dí kuorí, ʋ bɩŋsɛ mɛrɛ́ nyúú mí ní ɛ́ tʋŋ.
31 Peka wɩ́'állɛ ná náŋa, ʋ tʋtʋmɛ́ wuu mɩŋ Ɩzɩrayɛl kuóre wɩ́'állɛ kɛnɔ sɩɛrʋ nɛ́.
Yotaŋ dí Ziida kuorí
32 Remaliya bio Peka há dí Ɩzɩrayɛl kuorí, ʋ bɩŋsɛ bɛllɛ nyúú mí ní, Azariya bio Yotaŋ má dí Ziida kuorí. 33 Ʋ fa kéŋ bɩŋsɛ mɛrɛ́ arɩ́ bɔmmʋ́ɔ́ nɛ́ ká dí kuorí bɩŋsɛ fí arɩ́ balgo Zerizalɛmɛ mɛ́. Ʋ maá yɩr nɛ́ fa ká Yerusa, Sadɔkɛ toló. 34 Yotaŋ tʋ́ŋ Nyuutɩna Wɩɩsɛ satɔrɔ́. Ʋ áná Oziyaasɛ há tʋ́ŋ ɛ́ ná tɩɩ nɛ́ ʋ tʋŋ. 35 Amá ʋ wɩ dúŋdúóme ná ɓa háá ɓaarɛ́ venni ráŋ zɔ́kɛ́, ká nɩɛ ha mʋ́ ráŋ aá ɔsɛ vʋka, kaá nyɩkɛ tulaaléwa. Ɛ́ Yotaŋ nɛ́ sɔ́ Nyuutɩna Wɩɩsɛ jaa a hé nyúú rí dánnʋɔ. 36 Yotamɛ wɩ́'állɛ ná naŋá, ʋ tʋtʋmɛ́ wuu mɩŋ Ziida kuóre wɩ́'állɛ kɛnɔ sɩɛrʋ nɛ́. 37 Yotaŋ kuorí dí tɛ́ŋ mɛ́ nɛ́, Nyuutɩna Wɩɩsɛ púl a tʋŋ Siiri kuóro Resɩŋ arɩ́ Remaliya bio Peka, rɩ́wɔ́ mʋ́ a yo Ziida tɔ́ɔ́. 38 Yotaŋ há sʋ́wɛ́, ɓa húú ʋ ánáwa lɛ́lbule mí ní, ʋ naabál Davidi zʋ́ɔ́ mɛ́. Ʋ bio Ahazɛ nɛ́ lɔ́ʋ́ nyúú mí a dí kuorí.