Amasiya dí Ziida kuorí
14
1 Zʋakaazɛ bio Zʋasɛ há dí Ɩzɩrayɛl kuorí, bɩŋsɛ bɛllɛ nyúú mí ní ká Amasiya má lɔ́ʋ́ áná Zʋasɛ nyúú mí, a dí Ziida kuorí. 2 Ʋ kúó aá dí kuorí, rʋʋ fa kéŋ bɩŋsɛ mɛrɛ́ arɩ́ bɔmmʋ́ɔ́ nɛ́, ká ké Zerizalɛmɛ mɛ́ a dí kuorí bɩŋsɛ mɛrɛ́ arɩ́ nɛ́mɛ́. Ʋ maá yɩr nɛ́ fa ká Yohadaŋ, a lɛ Zerizalɛmɛ. 3 Amasiya tʋ́ŋ yɛ́rɛ́ Nyuutɩna Wɩɩsɛ sɩ́ɛ́ mɛ́, ká taŋa wʋ́ʋ́ naabal Davidi há tʋ́ŋ ɛ́ ná nɛ́ tʋmɛ́, amá, ʋ áná Zʋasɛ há tʋ́ŋ ɛ́ ná tɩɩ nɛ́, ʋ má tʋŋ. 4 Ʋ taŋa wɩ dúŋdúóme ná ɓa haá ɓaarɛ́ venni ráŋ zɔ́kɛ́; ká nɩɛ ha mʋ́ ráŋ aá ɔsɛ vʋka kaá nyɩkɛ tulaaléwa. 5 Tɛ́ŋ ná mɛ́, Amasiya há néé rʋʋ nɛ́sɛ kuorí ná kéŋ dóé, ʋ ɔ́ɔ́ ɓa ɓʋ́ʋ́sɛ tʋtʋnna ná fa há ɓʋ́ʋ́ áná Zʋwasɛ fa há ká kuóro. 6 Amá ʋ wɩ nɩɓʋ́ʋ́ra ná bɛlɛ ɓʋ́ʋ́sɛ, anɛ ɛ́ Nyuutɩna há máŋsɛ́ Moyizi wɩ́bilé kɛnɔ sɩɛrʋ a bʋlɛ́: Ʋ wɩ mɔhɛ̃́ rɩ́wɔ́ ɓʋ́ʋ́sɛ ánáwa ɓa bɛlɛ yɩr mɛ́, ɓa wɩ mɔhɛ̃́ rɩ́wɔ́ ɓʋ́ʋ́sɛ bɛlɛ má ɓa ánáwa yɩr mɛ́; nɛrɔ wuu sʋ́wʋ́ tɩɩ wɩ́bɔmɔ yɩr mɛ́ nɛ́.» 7 Ɛ́ Amasiya nɛ́ yóé dí Edomi nɩɛ bʋ́ɩ́ fí Yɛsɛ polo sɩɛrʋ. Lal ná tɛ́ŋ mɛ́, ʋ lá Sela tɔ́ɔ́, a kánʋ́ aá yɩ́rɛ Yɔktɩyɛl, ɛ́ tɔ́ɔ́ yɩr nɛ́ ɛ́, a ko aá lɛ́ zaa.Ɩzɩrayɛl kuóro Zʋasɛ yoo dí Amasiya
8 Ká Amasiya sɩɛ́ tʋŋ nɩɛ Ɩzɩrayɛl kuóro Zʋasɛ rɩ́, ʋ ká Zʋakaazɛ bio ní ká a Zehu nihĩ. Ʋ sɩ́wɔ́ bʋ́lʋ́ rɩ́ a bʋlɛ́: «A céŋ náŋá, a yo náŋá!» 9 Ɛ́ nɛ́ Ɩzɩrayɛl kuóro Zʋasɛ tɛ liŋó né, rɩ́wɔ́ pá Ziida kuóro Amasiya: «Lɩbaŋ sɔkóle tʋ́mɔ́ rɩ́wɔ́ bʋl Lɩbaŋ sɛɛdɩrɛ rɩ́ a bʋlɛ́: «Píí toló páŋ bio rʋ́ʋ́ ja.» Amá, Libaŋ ballɔ oro kúó aá daarɛ a nʋɔsɛ ɛ́ sɔkóle.» 10 Ʋ ká nyaamɩ́, ɩ tɛŋ pɔ́rɔ́, ɩ há yóé dí Edoŋ nɩɛ! Dí ɛ́ yɩr, amá taŋa kaa mɔ́ɩ́ jaa! Beé rí ɩ jɩ́ja wɩhála lal né sɩɛrʋ, há sɩ́ zɔ́kɩ́ tɩɩ, ká zɔkɛ Ziida nɩɛ a súúrí mí>>” 11 Amá Amasiya wʋ́ʋ́ rɩ́ zésé. Ɛ́ nɛ́ Ɩzɩrayɛl kuóro Zʋasɛ ísi mʋ́, ʋ rɩ́ Ziida kuóro Amasiya yo náŋá Bɛtsɛmɛɛsɛ mɛ́, Ziida dɩtɩ́llɛ. 12 Ɩzɩrayɛl yóó dí Ziida nɩɛ, ɓa oro wuu fá a mʋ́ʋ́ jaa. 13 Ɩzɩrayɛl kuóro Zʋasɛ kéŋ Ziida kuóro Amasiya a tɔ́ bɩnajaa Bɛtsɛmɛɛsɛ mɛ́. Amasiya áná nɛ́ ká Zʋasɛ, ká a Ahaziya é nihĩ. Kuóro Zʋasɛ lɛ Bɛtsɛmɛɛsɛ ná mɛ́ a mʋ́ Zerizalɛmɛ, a zɔ́kʋ́ tɔ́ɔ́ zenaa, ʋ gbési há pérí mɛ́ɛ́tɩr zɔwɛllɛ, a pɔ́ Ɩfɩrayɩŋ dánnʋɔ mɛ́ ká mʋ́ yakɛ nagbáŋjɛ́ dánnʋɔ mɛ́. 14 Ká pa salmɛ wuu rɩ́ wárɛ wuu arɩ́ cɩkpiŋe ná wuu fa há mɩ́ŋ Nyuutɩna Wɩɩsɛ jaa mɛ́, arɩ́ kuóro cɩkpiŋe jaa ná sɩɛrʋ. Ká kɛsɛ nɩɛ a bɩ́rmʋ́ Samari. 15 Zʋasɛ wɩ́'állɛ ná náŋa (káánɛ à harmoniser), ʋ tʋtʋmɛ́, ʋ bállɩ́wa, ʋ rɩ́ Ziida kuóro Amasiya pɛ́kɛ lal ná ʋ há yóé, mɩ́ŋ «Ɩzɩrayɛl kuóre wɩ́'állɛ kɛnɔ» sɩɛrʋ nɛ́. 16 Zʋasɛ há sʋ́wɛ́, ɓa húú Samari mí ní, Ɩzɩrayɛl kuóre lɛlbule sɩɛrʋ. Ʋ bio Zerobowamɛ nɛ́ lɔ́ʋ́ nyúú mí a dí kuorí. 17 Ɩzɩrayɛl kuóro Zʋasɛ há ká Yokaaze bio sʋʋ har mɛ́, Ziida kuóro Amasiya há ká Zʋasɛ bio dí bɩŋsɛ fí arɩ́ bɔmmʋ́ɔ́ nɛ́ tɔ́ɔ́ mɛ́. 18 Amasiya wɩ́'állɛ ná náŋa mɩŋ «Ziida kuóre wɩ́'állɛ kɛnɔ» sɩɛrʋ nɛ́. 19 Nɩɛ ísí Zerizalɛmɛ mɛ́, a vʋʋrɛ cɩ́nʋ́ mɛ́, ʋ fá a mʋ́ Lakiisi. Amá ɓa ɔ́ɔ́ nɩɛ kírú har a mʋ́ ɓʋ́ʋ́ Lakiisi ná mɛ́. 20 Záksɛ nɛ́ cɩ́ɩ́nʋ́ lɛlɔ kaa mʋ́ hú Zerizalɛmɛ mɛ́, Davidi tɔ́ɔ́ mɛ́, ʋ ánáwa lɛlbule sɩɛrʋ. 21 Ziida nɩɛ wuu lɩ́sɛ Azariya há kéŋ bɩŋsɛ fí arɩ́ balgo, ʋ nɛ́ lɔ́ʋ́ áná Amasiya nyúú mí a dí kuorí. 22 Kuóro Amasiya sʋʋ har mɛ́, ʋ nɛ́ lá Elatɛ tɔ́ɔ́, a bɩrsɔ́ʋ́ a pá Ziida.
Bʋllɛ Zerobowamɛ dí Ɩzɩrayɛl kuorí
23 Zʋasɛ bio Amasiya há dí Ziida kuorí bɩŋsɛ fí arɩ́ bɔmmʋ́ɔ́ nyúú mí ní, Ɩzɩrayɛl kuóro Zʋasɛ bio Zerobowamɛ má dí kuorí Samari mí, a dáánɛ bɩŋsɛ mɛɛ́sɛllɛ arɩ́ balá. 24 Ʋ ɔ́ɔ́ zɔkɛ Nyuutɩna Wɩɩsɛ sɩɛrʋ, ká wɩ Nebatɛ bio Zerobowamɛ ná fa há yíkí Ɩzɩrayɛl nɩɛ ɓa aa zɔkɛ, ʋ wɩ́bɔma ná balá má cóké tá.
25 Ʋ nɛ́ bɩ́rɛ́ la tɔ́nɛ́ ná wuu fa há ká Ɩzɩrayɛl dɩtɩ́llɛ, a pɔ́ Lebohamatɛ mɛ́, ká mʋ́ yakɛ Mʋsʋwɩ́ mɛ́. Anɛ ɛ́ Nyuutɩna Wɩɩsɛ, Ɩzɩrayɛl Wɩɩsɛ fa há lá sɩ́ɛ́ bʋl a tɩ́ŋʋ́ tʋtʋnnɔ ná há kɔ́ʋ́ wɩ́labʋllɔ Zonasɛ mɛ́ há ká Amitayi bio, a lɛ́ Gatɛhefɛɛrɛ. 26 Bee wɩ́ɛ́, Nyuutɩna Wɩɩsɛ fa ná wɩhálzeno ná Ɩzɩrayɛl há mɩnʋ́ sɩɛrʋ. Ká nɛ́ŋ wuu fa tó aá lɩ́sʋ́ ráŋ; yomó tóó, tɩ́ŋtɩɩ nɛ́ŋ má wuu toó, aá la Ɩzɩrayɛl. 27 Amá Nyuutɩna Wɩɩsɛ fa wɩ sɛ́ rʋ́ʋ́ sɩ́ dʋsɛ Ɩzɩrayɛl yɩr tíé nyúú. Ɛ́ nɛ́ tɛ́ ʋ tɩ́ŋ Zʋasɛ bio Zerobowamɛ mɛ́ láwɔ́ tá. 28 Zerobowamɛ wɩ́'állɛ ná naŋá, ʋ tʋtʋmɛ́, ʋ bállɩ́wa, ʋ lalwa, ɛ́ ná ʋ há lá Damaasɛ arɩ́ Hamatɛ fa há ká Ziida tɩ́llɛ́ a pá Ɩzɩrayɛl, mɩ́ŋ Ɩzɩrayɛl kuóre wɩ́'állɛ kɛnɔ sɩɛrʋ nɛ́. 29 Zerobowamɛ há sʋ́wɛ́, ɓa húú Samari mí ní, Ɩzɩrayɛl kuóre lɛlbule sɩɛrʋ. Ʋ bio Zakari nɛ́ lɔ́ʋ́ nyúú mí a dí kuorí.