Zʋakaaze dí Ɩzɩrayɛl kuorí
13
1 Ahaziya bio Zʋasɛ há dí Ziida dɩtɩ́llɛ kuorí, bɩŋsɛ mɛrɛ́ rɩ́ botoro nyúú mí ní, ká Zehu bio Zʋakaaze dí Ɩzɩrayɛl kuorí a ké Samari mí. Ʋ dí kuorí bɩŋsɛ fí rɩ́ balpɛ. 2 Ʋ ɔ́ɔ́ zɔkɛ Nyuutɩna Wɩɩsɛ mɛ́. Ʋ tʋ́ŋ wɩ́bɔma ná tɩɩ Nebatɛ bio Zerobowamɛ fa há yíkí Ɩzɩrayɛl nɩɛ a héwó sɩɛrʋ. Ʋ wɩ cʋ́rɛ́ ká tɔ́wɔ́. 3 Ɛ́ nɛ́ Nyuutɩna Wɩɩsɛ cɔ́ɛ́ wɛ Ɩzɩrayɛl nɩɛ nyúú, ʋ píwó hé Siiri kuóro Hazayɛl rɩ́rʋ́ bio Bɛnɛhadadɛ nɛ́sɛ mɛ́, tɛ́ŋ wuu mí. 4 Amá Zʋakaazɛ jɛnnɛ Nyuutɩna Wɩɩsɛ, rʋ́ʋ́ ló rʋ́ʋ́ cɔ́ɛ́ pɔrɛ, ɛ́ nɛ́ ʋ sáŋʋ́ sʋlɛ́, bee wɩ́ɛ́, ʋ ná Siiri kuóro háá bɛŋsɛ Ɩzɩrayɛl nɩɛ ɛ́. 5 Ɛ́ nɛ́ Nyuutɩna Wɩɩsɛ tʋŋ laatáárɔ ʋ mʋ́ la Ɩzɩrayɛl nɩɛ Siiri nɩɛ nɛ́sɛ mɛ́ tá, ɓa mɩ́ŋwɔ́ táŋtɛwa mɛ́ anɛ fól wuu. 6 Amá, ɓa wɩ Zerobowamɛ rɩ́rʋ́ jaa nɩɛ wɩ́bɔma ná ɓa há yíkí Ɩzɩrayɛl nɩɛ héwó sɩɛrʋ vɛ́ tá, ɓa tʋ́ŋwɔ́; dapékisi ná má tɩɩ fa ha cɔ́ŋsɛ Samari mí. 7 Zʋakaasɛ lalyóóre kúó káánɛ zákzɩ́nna mɛɛ́sɛllɛ rɩ́ fí dʋŋɔ nɛ́, lalyóórítórkowa fí arɩ́ lalyoore ná há ká navalla má nɩɛ bʋ́ɩ́ fí. Bee wɩ́ɛ́ Siiri kuóro fa ɓʋ́ʋ́sɛ naŋá, ʋ ɔ́ɔ́ ɓa nɛ́ kuŋkulo ɓa háá nʋɔsɛ́ nɛ́. 8 Zʋakaazɛ wɩ́'állɛ ná naŋá, wɩ́ɛ́ ná wuu ʋ há ɛ́ɛ́, ʋ ballɩ́ tʋtʋmɛ́ mɩ́ŋ Ɩzɩrayɛl kuóre wɩ́'állɛ kɛnɔ sɩɛrʋ. 9 Zʋakaazɛ há kúé sʋwɛ, ɓa húú Samari mí ní, ʋ ánáwa lɛlbule sɩɛrʋ. Ʋ bio Zʋasɛ nɛ́ lɔ́ʋ́ nyúú mí, a dí kuorí.Zʋasɛ dí Ɩzɩrayɛl kuorí
10 Zʋasɛ há dí Ziida kuorí bɩŋsɛ mɛrɛ́ arɩ́ fí rɩ́ balpɛ nyúú mí ní, ká Zʋakaazɛ bio Zʋasɛ má dí Ɩzɩrayɛl kuorí, a ké Samari mí. Ʋ dí kuorí bɩŋsɛ fí arɩ́ balgo ní ráŋ. 11 Ʋ ɔ́ɔ́ zɔkɛ Nyuutɩna Wɩɩsɛ sɩɛrʋ, ká Nebatɛ bio Zerobowamɛ fa há yíkí Ɩzɩrayɛl nɩɛ a hé wɩ́bɔma ná sɩɛrʋ, ʋ má báá ɔ́wɔ́ tɩɩ nɛ́, ʋ wɩ balá má tɩɩ cóké tá.
12 Zʋasɛ wɩ́'állɛ ná náŋa, wɩ́ɛ́ ná wuu ʋ há ɛ́ɛ́, ʋ ballɩ́ tʋtʋmɛ́, lalwa ná ʋ rɩ́ Ziida kuóro Amasiya há yóé mɩ́ŋ Ɩzɩrayɛl kuóre wɩ́'állɛ kɛnɔ sɩɛrʋ. 13 Zʋasɛ há sʋ́wɛ́, ɓa húú Samari mí, Ɩzɩrayɛl kuóre lɛlbule sɩɛrʋ. Zerobowamɛ nɛ́ dí kuorí ʋ nyúú mí.
Elize sʋʋ wɩ́ɛ́
14 Elize há kúé pɩ́nʋ́ sʋ́ʋ́rɩ́pʋɔlɩ́, Ɩzɩrayɛl kuóro Zʋasɛ mʋ́ɔ́ rʋ́ʋ́ nóú. Ʋ há mʋ́ɛ́ nóú, ʋ wíó hóú mí, a bʋlɛ́: «Ŋ áná! ŋ áná! Ɩ nɛ́ ká Ɩzɩrayɛl zákzɩ́nna arɩ́wɔ́ lalyóórítórkowa wuu dóé!» 15 Elize bʋ́lʋ́ rɩ́ a bʋ́lɛ́: «Pi túó arɩ́ túhɛmɛ.» Zʋasɛ pi túó arɩ́ túhɛmɛ. 16 Elize bʋl Ɩzɩrayɛl kuóro rɩ́ a bʋlɛ́: «Zɛ́ túó ná», ʋ zɛ́ túó ná. Elize pɔ́ʋ́ nɛ́ŋsa a sakɛ kuóro nɛ́ŋsa daha, 17 ká bʋ́lʋ́ rɩ́ bʋlɛ́: «Wúri tókóró ná há cáásɛ wɩɩsɛ dɩpomí rɩ́. Zʋasɛ wúri. Elize bʋ́lʋ́ rɩ́ a bʋlɛ́: «Yo!», ɛ́ nɛ́ ʋ yo. Elize bʋ́lʋ́ rɩ́ a bʋlɛ́: «Nyuutɩna Wɩɩsɛ ballɩ́ hɛŋ nɛ́, hɛŋ ná há dí ballɩ́ Siiri nɩɛ nyúú.» Ɩ sɩ́ yoo díwó, a zɔ́kwɔ́ wuu Afɛkɛ mɛ́.» 18 Elize baa bʋl Zʋasɛ rɩ́, a bʋlɛ́: «Pa túhɛmɛ ná!” Ɛ́ nɛ́ ʋ pa. Elize bʋ́lʋ́ rɩ́ bʋ́lɛ́: «Pii fɩ́rɛ tíé!» Kuóro fɩ́rɛ tíé naasɩ́ botoro ká cɛ́. 19 Wɩɩsɛ wɩ́laabʋllɔ cɔ́ɛ́ wʋ́ʋ́, ʋ bʋ́lʋ́ rɩ́ a bʋlɛ́: «Rɩɩ fa fɩ́rɛ tíé ná naasɩ́ bɔmmʋ́ɔ́ ɛ́ ráá má naasɩ́ balgo rí, ɩ fa sɩ́ dí dóé Siiri nɩɛ nyúú a zɔ́kwɔ́ tenni. Mʋ́l né mí sɩɛ́, naasɩ́ botoro dʋŋɔ nɛ́ ɩ sɩ́ wóllíwó a ŋmɔwɛ. 20 Elize sʋ́wɔ́, ɓa húú. Ká bɩ́na ná há tʋ́kɛ́, gabɩbara púlli lɛ́ Mʋwabɛ, a ko zʋ tɔ́ɔ́ ná. 21 Kal oro nɩɛ há kéŋ lɛl mʋ́ aá hu, ɓa ná gabɩbara púl nɔ́ŋɔ. Ɓa pi lɛ́l ná yoo hé Elize lɛlbule sɩɛrʋ ká fá. Lɛl ná há tɩ́kɛ́ Elize heŋgbele mí, ʋ bɩ́rɔ́ ná mɩɩsɛ, a isi cɩ́nʋ́ naasɛ mɛ́.
Ɩzɩrayɛl nɩɛ yóó dí Siiri nɩɛ
22 Zʋakaazɛ kuorí díí tɛ́ŋ wuu mí, Siiri kuóro Hazayɛl bɛ́ŋsɛ Ɩzɩrayɛl nɩɛ. 23 Amá Nyuutɩna Wɩɩsɛ sawér ná yɩr mɛ́, ɓa susu kenú; ɛ́ nɛ́ ʋ bɩ́rʋ́ sɩ́ɛ́ cáásɩ́wɔ́ a tɩŋ nʋtʋmɛ ná ʋ há bílú rɩ́ Abɩrahaŋ rɩ́ Ɩzakɛ arɩ́ Zakɔbɛ pɛ́kɛ; a báá wɩ có rʋ́ʋ́ zɔ́kwɔ́, a ko aá lɛ zaa, ʋ wʋ́ɔ́ kíré rɩ́wɔ́ kɛ́kʋ́ mɛ́. 24 Siiri kuóro Hazayɛl há sʋ́wɛ́, ʋ bio Bɛnɛhadaadɛ nɛ́ lɔ́ʋ́ nyúú mí a dí kuorí. 25 Ɛ́ nɛ́ Zʋakaazɛ bio Zʋasɛ bɩrla tɔ́nɛ ná Hazayɛl bio Bɛnɛhadaadɛ rɩ́. Hazayɛl nɛ́ fa lá ɛ́ tɔ́nɛ ʋ áná Zʋakaazɛ rɩ́ lal tɛ́ŋ mɛ́. Zʋasɛ yóó dí Bɛnɛhadaadɛ naasɩ́ botoro ká lá Ɩzɩrayɛl tɔ́nɛ.