Zʋasɛ dí Ziida kuorí
12
1 Zʋasɛ kúó aá dí kuorí, rʋʋ fa kéŋ bɩŋsɛ balpɛ nɛ́. 2 Zehu há dí kuorí, ʋ bɩŋsɛ balpɛ nyúú mí ní ká Zʋasɛ kuorí díí. Zʋasɛ ké Zerizalɛmɛ mɛ́ a dí kuorí bɩŋsɛ mɛɛ́sɛllɛ nɛ́. Ʋ maá yɩr nɛ́ fa ká Sibiya, ʋ lɛ́ Bɛrsɛba nɛ́. 3 Zʋasɛ hiẽsó wuu mí, ʋ tʋ́ŋ Nyuutɩna Wɩɩsɛ cólle, bee wɩ́ɛ́ vʋk'ɔɔsɔ Yoyada fa kármʋ́ wérí. 4 Amá ʋ wɩ dúŋdúóme ná ɓa haá ɓaarɛ́ venni ráŋ zɔ́kɛ́. Ká nɩɛ há mʋ́ ráŋ aá ɔsɛ vʋka kaá nyɩkɛ tulaaléwa.Zʋasɛ ɔ́ɔ́ ɓa bɩrmɛ Nyuutɩna Wɩɩsɛ jaa
5 Zʋasɛ bʋl vʋk'ɔɔsa ná rɩ́ a bʋlɛ́: «Ɩ́ lá meéwíé ná wuu ɓa há kené aá ko Nyuutɩna Wɩɩsɛ jaa sɩɛrʋ, rɩ́wɔ́ ɔ́ʋ́ tɩ́llɛ, nɩyɔwlaalɛ́ meéwíé a tɩ́ŋ ɛ́ ɓa há makɛ, arɩ́ nɩɛ satɔ́rɛpallɛ meéwíé. 6 Vʋ́k'ɔɔsɔ oro wuu mɔhɔ̃́ rʋ́ʋ́ láwɔ́, ʋ nɩzɩmɛ́ rɩ́, rɩ́wɔ́ pii bɩrmɛ Wɩɩsɛ jaa ráŋ ná wuu há zɔ́kɛ́.»
7 Amá kuóro Zʋasɛ dí kuorí a mʋ́ peri bɩŋsɛ mɛrɛ́ arɩ́ botoro, rɩ vʋk'ɔɔsa ná ha wɩ Wɩɩsɛ jaa ná dɩzɔkɛ́ bɩ́rmɛ́. 8 Ɛ́ nɛ́ Zʋasɛ yɩ́rɛ Yoyada arɩ́ vʋk'ɔɔsa ná náŋa a bɔ́sɩ́wɔ́ a bʋlɛ́: «Beé rí tɛ ɩ́ wɩ Wɩɩsɛ jaa dɩzɔkɛ́ ná bɩ́rmɛ́>> Ɛ́ wɩ́ɛ́, a mɔ nyɛ mɛ́, ɩ́ báá sɩ́ meéwíé ná la ɩ́ nɩzɩmɛ́ rɩ́, amá ɩ́ mɔhɔ̃́ rɩ́ɩ́wa pii tɛ Wɩɩsɛ jaa dɩzɔkɛ́ ná bɩ́rmɛ́ wɩ́ɛ́. 9 Vʋk'ɔɔsa ná saŋ rɩ́wɔ́ báá sɩ́ nɩɛ meéwíé lá, a sɩ́ Wɩɩsɛ jaa dɩzɔkɛ́ ná má bɩ́rmʋ. 10 Wɩɩsɛ vʋk'ɔɔsɔ Yoyada ja dáka, a lúri bʋɔ, ʋ cúl ná daha. Ká pi ɛ́ dáka a bil koro ná laka, Wɩɩsɛ jaa dánnʋzʋʋlɩ́ néduu rí. Vʋk'ɔɔsa ná háá pɔ́ dánnʋɔ ná mɛ́, ɓa nɛ́ lá meéwíé ná wuu ɓa há kené aá ko Wɩɩsɛ jaa, aá hé ɛ́ dáka sɩɛrʋ. 11 Rɩ ɓa nɛ́ kóé zɩŋ rɩ meéwíé ná kánɔ́ dáka ná sɩɛrʋ, kuóro kɛŋpʋ́ŋsɔ́ arɩ́ vʋk'ɔɔsa nyúútɩ́na nɩ́ɩ́ ko, dɩɩsɛ Wɩɩsɛ jaa meéwíé ná a hé pur mí. 12 Rɩ ɓa nɛ́ dɩ́ɩ́sɛ́ tenni, ɓaá pii pá Wɩɩsɛ jaa tʋtʋmɛ́ sɩ́dííre ní. Ɛ́ meéwíé ní ɓa pi aá túŋ dakʋnna rɩ́ nɩɛ ná háá bɩ́rmɛ Nyuutɩna Wɩɩsɛ jaa ná dɩkɔŋsa, 13 rɩ́ jɩsɔɔra arɩ́ dɔ́wɩ́cɔ́ɔ́ra. Ɓa nɩ́ɩ́ yɔwɛ dole arɩ́ dɔ́wɩ́cɔ́ɔ́lɛ, ɓa káá bɩrmɛ Nyuutɩna Wɩɩsɛ jaa ná dɩkɔŋsa káá túŋ Nyuutɩna Wɩɩsɛ jaa bɩrmɛ́ kɩma wuu. 14 Amá ɛ́ meéwíé ɓa há kené aá ko Nyuutɩna Wɩɩsɛ jaa, ɓa wʋ́ɔ́ píé bɩrmɛ wárɛ gbaŋsɛ, siisi, loŋŋni, nyɩ́sɛ, salmɛ onni ɛ́ ráá má wárɛ óŋ wuu hé Nyuutɩna Wɩɩsɛ jaa sɩɛrʋ. 15 Ɓa píwó pá tʋtʋnna, rɩ́wɔ́ pii bɩrmɛ Nyuutɩna Wɩɩsɛ jaa ná. 16 Nɩɛ ná ɓa fa há pí ɛ́ meéwíé pá, rɩ́wɔ́ tútúŋ tʋtʋnna ná, nɛ́ŋ fa wʋ́ɔ́ nʋbili wɩ́ɛ́ bɔsɛ, bee wɩ́ɛ́, ɓa faá tʋ́mʋ́ rɩ́ taŋá nɛ́. 17 Cʋɔla vʋk'ɔsɔ́ arɩ́ wɩ́bɔmɔ vʋk'ɔsɔ́ meéwíé ná é fa tó Nyuutɩna jaa ɓɩɛ, amá vʋk'ɔɔsa nɛ́ tɩ́wɔ́.
Zʋasɛ kuorí tenné wɩ́ɛ́
18 Ɛ́ tɛ́ŋ mɛ́, Siiri kuóro Hazayɛl kúó a yoo dí Gatɛ tɔ́ɔ́, ká lɔ́ʋ́. Hazayel kenú tɩɩ rʋ́ʋ́ mʋ́ yo Zerizalɛmɛ. 19 Ɛ́ nɛ́ Ziida kuóro Zʋasɛ isi pá cɩ́ksɛ ná wuu há ká Wɩɩsɛ tɩ́llɛ, ʋ naabálwa há ká Ziida kuóre Zozafa rɩ́ Zoramɛ arɩ́ Akaziya arɩ́ cɩ́ksɛ ná ʋ tɩɩ há píé pá Nyuutɩna Wɩɩsɛ, arɩ́ salmɛ ná wuu há mɩ́ŋ Wɩɩsɛ jaa kuócɩ́ksɛ sɩɛrʋ, arɩ́ kuóro jaa sɩɛrʋ; a tɛ́ ɓa kaa mʋ́ pá Siiri kuóro Hazayɛl. Ɛ́ nɛ́ ʋ báá wɩ kúó yó Zerizalɛmɛ. 20 Zʋasɛ wɩ́'állɛ ná náŋa, rɩ́ wɩ́ɛ́ ná wuu ʋ há ɛ́ɛ́ mɩŋ Ziida kuóre wɩ́'állɛ kɛnɔ sɩɛrʋ. 21 Ʋ tʋtʋnna ísó hé záŋba, a cɩ́nʋ́ mɛ́. Tɛ́ŋ ná mɛ́ Zʋasɛ haá mʋ́ Sila, ɓa ŋmɔ́wʋ́ ɓʋ́ Bɛtɛmilo mí. 22 Ʋ tʋtʋnna Simeyatɛ bio Yozabadɛ arɩ́ Somɛɛrɛ bio Yehazabadɛ nɛ́ fa ŋmɔ́wʋ́ ɓʋ́ ɛ́. Ɓa húú ʋ ánáwa lɛlbule sɩɛrʋ nɛ́, kuóro Davidi tɔ́ɔ́ mɛ́. Ʋ bio Amasiya nɛ́ dí kuorí ʋ nyúú mí.