Atali dí Ziida kuorí
11
1 Kuóro Akaziya maá Atali há nóú rʋʋ bio sʋ́wɔ́, ʋ ɓʋ́ kuóro dunɩɛ wuu. 2 Kuóro Zoramɛ toló Zoseba há ká Akaziya netolo, pi Akaziya bio Zʋasɛ, kuóro bɛlɛ ná ɓa háá ɓʋ́ʋ́sɛ sɩɛrʋ, a kánʋ́ rɩ́rʋ́ bikannɔ, a zʋʋ féŋsi Wɩɩsɛ jaa sɩɛrʋ, sɩ́ɛ́rɩ́ gódówa jaa sɩɛrʋ. Ɓa kenú féŋsi Atali sɩ́ɛ́ mɛ́, ʋ wʋ́ʋ́ ɓʋ́ɛ́. 3 Ʋ rɩ́ bikannɔ́ ná féŋsi Nyuutɩna Wɩɩsɛ jaa ná sɩɛrʋ bɩŋsɛ balgo. Ɛ́ tɛ́ŋ mɛ́ wuu, rɩ Atali níí dí kuorí tɔ́ɔ́ ná mɛ́.Zʋasɛ dí Ziida kuorí
4 Bɩŋsɛ balpɛ nyúú mí, Yehoyada ɔ́ɔ́ ɓa yɩ́rɛ Kaari tɔ́ɔ́ sóójizɔlɔwa nyúútɩ́nawa arɩ́ sóójiwa ná náŋa há pɔ́ kuóro mí, rɩ́wɔ́ kóú rɩ́, Wɩɩsɛ jaa mɛ́. Ʋ bil nʋtʋmɛ ʋ rɩ́wɔ́ pɛ́kɛ́, ká ɓa ŋmɩ́ɛ́sɛ Nyuutɩna Wɩɩsɛ jaa ná sɩɛrʋ. Kɔ́ʋ́ makɛ kuóro bio a pɔ́wɔ́. 5 Ká ʋ baa bʋl pɔ́wɔ́: «Nóú ná ɩ́ há sɩ́ a: ɩ́ kánɩ́wa púl ná háá tʋ́ŋ fɩɛlɛ́ tápʋl, a ɓa púlli botoro, rɩ́ púlwie balá nɛ́ pɔ́ kuóro jaa mɛ́, 6 bʋllɛ nyúú mí púlwie ná nɩ́ɩ́ pɔ́ Suur dánnʋɔ ná mɛ́; ká rɩ́ botoro nyúú mí púlwie ná pɔ́ dánnʋɔ ná há mɩŋ pʋ́pɔ́ɔ́ra har rɩ́. Púlwiisi nyáŋ botoro sɩ́ pɔ́ kuóro zʋ́ɔ́ ná mɛ́, aá la náŋá mɛ́. 7 Púlli ná bɛllɛ há waá tʋŋ fɩɛlɛ́ tápʋl, ɓa sɩ́ ko pɔ́ kuóro mí, Nyuutɩna Wɩɩsɛ jaa sɩɛrʋ. 8 Sóóji wuu sɩ́ pɔ́ʋ́ lalyóórícɩksɛ a kánʋ́ nɛ́sɛ mɛ́, rɩ́ɩ́wa wuu kíl kuóro. Nɛ́ŋ ná wuu háá já rʋ́ʋ́ fɩkɛ a zʋ́ɩ́wa pɛkɛ, ɩ́ ɓʋ́ʋ́. Kuóro háá mʋ́ ráŋ ná wuu, ɩ́ kánʋ́ mʋ́.» 9 Sóójizɔlɔwa nyúútɩ́nawa ná tʋ́ŋ ɛ́ ná wuu vʋk'ɔɔsɔ Yehoyada fa há mákɛ́ pɔ́wɔ́. Nyúútɩ́na wuu hóú sóójiwa náŋá mɛ́, ɓa ná háá púl tʋtʋmɛ́ fɩɛlɛ́ tápʋl arɩ́wɔ́ ná háá tenni fɩɛlɛ́ tápʋl, ɓa mʋ́ vʋk'ɔɔsɔ Yehoyada rɩ́. 10 Vʋk'ɔɔsɔ ná pa kuóro Davidi cɔlma ná rɩ́rʋ́ hɔkɛ́rɛ ná fa há mɩ́ŋ Nyuutɩna Wɩɩsɛ jaa ná sɩɛrʋ a pá sóójizɔlɔwa nyúútɩ́nawa ná. 11 Sóójiwa ná há pɔ́ kuóro mí, pɔ́wɔ́ lalyóórícɩksɛ a káŋwɔ́ nɛ́ŋsa mɛ́, a pɔ́ jaa ná néduu rɩ́ ká pɩɛrɛ a mʋ́ a yákʋ́ nɛ́gʋɔ rɩ́, vʋ́k'ɔ́ɔ́sɩ́koro ná arɩ́ jaa ná laka, a cɛ́ a kíl kuóro. 12 Ká vʋ́k'ɔɔsɔ Yehoyada sɩɛ́ a kuóro bio lɛ, ʋ cú kuónéŋcú pɔ́ʋ́, a pi kuorí malla ná pɔ́ʋ́. Ʋ ɔ́ŋsɛ lɩ́sɛnʋʋ a hóú mí, a bílú rʋ́ʋ́ dí kuorí. Nɩɛ ŋmɔwɛ nɛ́ŋsa a pɔ́ʋ́ ká cáási a bʋlɛ́: «Rɩ́ kuóro ka mɩ́gbó!» 13 Atali há nɛ̃ nɩɛ ná háá valɛ́ kʋɔllɛ, ʋ ísó a mʋ́wɔ́ rɩ́ Nyuutɩna Wɩɩsɛ jaa ná mɛ́. 14 Ʋ beló, rɩ kuóro nɛ́ cɛ́ koro daha, anɛ ɛ́ há bíle; ká nyúútɩ́náwa ná arɩ́ nɩɛ ná há mú nyɩ́sɛ cɛ́ kuóro laka. Tɔ́ɔ́ ná nɩɛ wuu fa mɩ́ŋ satɔrɔ́ mɛ́ nɛ́, ɓa múmú nyɩ́sɛ. Atali cɔ́nnʋ́ gɛnnɛ ká cáási a bʋlɛ́: «Gɩ́ŋgɩ́rmʋ nɛ́! Gɩ́ŋgɩ́rmʋ nɛ́!» 15 Vʋ́k'ɔɔsɔ Yehoyada pá sóójizɔlɔwa nyúútɩ́náwa ná há ká lalyoore sɩ́dííre ŋmɛ́nɔ, a bʋlɛ́: «Ɩ́ lɩ́sʋ́ á sɩɛrʋ! Nɛ́ŋ ná wuu há tɩ́ŋʋ́ mɛ́, ɩ́ ɓʋ́ʋ́ rɩ́ tókowí!» Bee wɩ́ɛ́, vʋk'ɔɔsɔ fa sɛ́: «Ɩ́ sʋ́ʋ́ ɓʋ́ Nyuutɩna Wɩɩsɛ jaa sɩɛrʋ.» 16 Ɓa kenú tɩ́ŋ záksɛ dánnʋɔ, aá zʋ́ kuóro wuolo. Ráŋ nɛ́ ɓa ɓʋ́ʋ́. 17 Yehoyada bíl nʋtʋmɛ Nyuutɩna Wɩɩsɛ rɩ́ kuóro arɩ́ nɩɛ pɛ́kɛ, a makɛ rɩ́ nɩɛ ná a Nyuutɩna Wɩɩsɛ nɩɛ. Ʋ bíl nʋtʋmɛ kuóro rɩ́ nɩɛ má pɛ́kɛ. 18 Tɔ́ɔ́ ná nɩɛ wuu mʋ́ Baal jaa, a zɔ́kʋ́, a búksú korsi arɩ́rʋ́ veŋgúlli. Ká ɓʋ́ Mataŋ há ká Baal vʋk'ɔɔsɔ korsi ná sɩ́ɛ́. Ká vʋk'ɔɔsɔ Yehoyada bil nɩɛ rɩ́wɔ́ pʋ́pɔ́ Nyuutɩna Wɩɩsɛ jaa ná mɛ́. 19 Ká Yehoyada baa hé sóójizɔlɔwa nyúútɩ́náwa ná rɩ́ Kaari nɩɛ, sóójiwa ná háá pɔ́ kuóro mí arɩ́ tɔ́ɔ́ ná nɩɛ wuu náŋá mɛ́; rɩ́wɔ́ ka kuóro lɛ́ Nyuutɩna Wɩɩsɛ jaa mɛ́, a tɩŋ dánnʋɔ ná sóójiwa ná náŋa há pɔ́ kuóro mɛ́, a mʋ́ʋ́ jaa. Zʋasɛ sɩɛ́ ké kuóɓasa mɛ́. 20 Tɔ́ɔ́ nɩɛ wuu sɩɛnnɛ tɔ́rɛ. Tɔ́ɔ́ ná wuu mɩŋ tɛŋfɩ́ɛ́l mɛ́. Ɓa ɓʋ́ Atali é kuóro zʋ́ɔ́ mɛ́ nɛ́ arɩ́ tókowí.