Sunɛɛmɛ nɩɛ háálɔ wɩ́ɛ́ dɩtenni
8
1 Elize fa bʋl háálɔ ná, ʋ fa há íllú heŋbóle sʋʋ mɛ́ rɩ́, a bʋlɛ́: «Ɩ rɩ́rɩ́ɩ́ jaa nɩɛ, ɩ́ isi rɛ́ɛ́, a mʋ́ ké ráŋ ná, ɩ há wúóle aá mʋ́. Beé wɩ́ɛ́, Nyuutɩna Wɩɩsɛ já rʋ́ʋ́ hé losu há sɩ́ dáánɛ bɩŋsɛ balpɛ tɔ́ɔ́ ná mɛ́.» 2 Háálɔ ná tʋ́ŋ ɛ́ ná Wɩɩsɛ báálɔ há bʋlɛ́ pɔ́ʋ́: Ʋ rɩ́rʋ́ʋ́ jaa nɩɛ ísó mʋ́ ké Filisti nɩɛ tɔ́ɔ́ mɛ́ bɩŋsɛ balpɛ. 3 Bɩŋsɛ balpɛ ná há cesé, háálɔ ná bɩrɔ́ lɛ́ Filisti nɩɛ tɔ́ɔ́ a ko mʋ́ kuóro rɩ́ a sʋ́lʋ́ jaa arɩ́rʋ́ʋ́ baka.4 Kuóro rɩ́ Wɩɩsɛ báálɔ Elize tʋtʋnnɔ Geyazi faá bʋl wɩ́ɛ́. Kuóro fa sɛ́: Ŋŋ́ sʋ́lɩ́ rɛ́, máŋsɛ wɩ́nyɩ́nɛ́wa ná wuu Elize há ɛ́ɛ́, a páŋ. 5 Geyazi sɩɛ́ fa haá máŋsɛ bio ná há sʋ́wɛ́ ká Elize íllú sʋʋ mɛ́ wɩ́ɛ́ aá pá kuóro, rɩ ɛ́ bio maá tɩɩ nɛ́ kó kuóro rí, rʋ́ʋ́ sʋl lɔ́ʋ́ jaa arɩ́rʋ́ʋ́ baka. Geyazi sɛ́: «Kuóro, ŋ nyúútɩ́na, ná háálɔ ná tɩɩ nɛ́, nóú bio ná má Elize há ílli sʋʋ mɛ́ nɛ́.» 6 Kuóro bɔsɛ háálɔ ná, ʋ pi wɩ́ɩ́ naasɛ wuu cesi pɔ́ʋ́. Ɛ́ nɛ́ kuóro lɩ́sʋ́ tʋtʋnnɩhɔ̃́ ná nɔ́ŋɔ a bʋlʋ́ rɩ́ a bʋlɛ́: «A rɩ́wɔ́ pí óŋ ná wuu há ká háálɔ né tɩ́llɛ́ a pɔ́ʋ́, arɩ́ óŋ ná má wuu há kɔ́ʋ́ baka óŋ, a pɔ́ tɛ́ŋ ná wuu mí ʋ há lɛ́ tɔ́ɔ́ ná mɛ́, a ká ko aá lɛ́ zaa, a pɔ́ʋ́.»
Elize arɩ́ Azayɛl wɩ́ɛ́
7 Elize mʋ́ Damaasɛ. Rɩ Siiri kuóro Bɛnɛhadad faá wɩ́ɩ́lʋ́. Ɓa bʋlʋ́ rɩ́ bʋlɛ́: Wɩɩsɛ báálɔ kó rɛ́ɛ́wa. 8 Kuóro bʋl Azayɛl rɩ́ a bʋlɛ́: «Ká satɔ́ɔ́rɩ́pálɔ a mʋ́ céŋ Wɩɩsɛ báálɔ. Ká a rʋ́ʋ́ bɔsɛ Nyuutɩna Wɩɩsɛ a ná: Ŋ sɩ́ isi pʋɔlɩ́ né mí>>» 9 Azayɛl mʋ́ rʋ́ʋ́ céŋ Elize, a pɛ́ ká satɔ́ɔ́rɩ́pállɛ arɩ́ Damaasɛ tɔ́ɔ́ óŋwéré wuu a mɔ́ nyʋ́kmawa mɛɛ́sɛllɛ cɩ́ɩ́nɛ. Ʋ há mʋ́ɛ́ peri, ʋ kénú tɩɩ mʋ́ a cáánʋ́ ká bʋlʋ́ rɩ́ bʋlɛ́: «Ɩ bio Bɛnɛhadaadɛ, Siiri kuóro nɛ́ tʋ́mɩ́ŋ ɩ rɩ́, rɩ́ŋ ko bɔsɛ a ná, rʋ́ʋ́ sɩ́ ísí pʋɔlɩ́ né mí>>» 10 Elize bʋlʋ́ rɩ́ a bʋlɛ́: «Mʋ́ bʋlʋ́ rɩ́, a bʋlɛ́: «Ɩ sɩ́ dúóri!» Amá taŋá, Nyuutɩna Wɩɩsɛ mákɔ́ páŋ rʋ́ʋ́ sɩ́ sʋwɛ. 11 Ká Wɩɩsɛ báálɔ de fírkú sɩ́ɛ́, ʋ wɩ kené kɩ́ŋsɛ, ká púl wíwi. 12 Ɛ́ nɛ́ Azayɛl bɔ́sʋ́: «Beé rí tɛ, ɩ wíwi, ŋ nyúútɩ́na>>» Ɛ́ nɛ́ Elize sɛ́: «Bee wɩ́ɛ́, ŋ ɛ̃ bɔ́ŋbɔ́ŋ ná ɩ háá ja rɩ́ɩ́ pii tʋŋ Ɩzɩrayɛl nɩɛ mɛ́, ɩ sɩ́ nyɩ́kwɔ́ tɔ́ɔ́sɔ́kɛ́rɛ, a ɓʋ́ʋ́sɩ́wɔ́ heŋbiwafɛlɛ rɩ́ tókowí, a tɩ́ksɛ heŋbiisi ká kɩ́ɛ́sɩ́wɔ́ hápuuke.» 13 Azayɛl sɛ́: «Ŋ ká beé, ŋ é ɩ tʋtʋnnɔ, ŋ váá né nɔ́ŋɔ sɩ́ wólli wɩ́zenó né tʋŋ>> Elize bʋl pɔ́ʋ́ a bʋlɛ́: «Nyuutɩna Wɩɩsɛ mákɔ́ páŋ, rɩɩ sɩ́ dí Siiri kuorí.»
14 Azayɛl tá Elize ká bɩrkóú nyúútɩ́na rɩ́, ʋ bɔ́sʋ́ a bʋlɛ́: «Elize sɛ́ beé rí a pɛ́ɩ́>>» Azayɛl sɛ́: «Ʋ sɩ́ɩ́ sɩ́ duóri.» 15 Amá tɔ́ɔ́ há pʋ́lɛ́, Azayɛl pí gɛbasa a liwi nyii mí, a pii tɔ́ kuóro sɩ́ɛ́ mɛ́. Kuóro sʋwɛ ká Azayɛl lɔ́ʋ́ nyúú mí a dí kuorí.
Zoramɛ dí Ziida kuorí
16 Akaabɛ bio Zoramɛ há dí Ɩzɩrayɛl kuorí bɩŋsɛ bɔmmʋ́ɔ́ nyúú mí ní ká Zozafa bio Zoramɛ má dí Ziida kuorí, ɛ́ tɛ́ŋ mɛ́ rɩ́ Zozafa nɛ́ fa ká Ziida kuóro. 17 Ʋ fa kéŋ bɩŋsɛ mɛrɛ́ rɩ́ fí arɩ́ bɛllɛ nɛ́ ká dí kuorí, a dí kuorí bɩŋsɛ córi Zerizalɛmɛ mɛ́. 18 Ʋ césí Ɩzɩrayɛl kuóre wɩ́bɔma, anɛ ɛ́ Akaabɛ jaa nɩɛ há ɛ́ɛ́, a aa zɔkɛ Nyuutɩna Wɩɩsɛ mɛ́, bee wɩ́ɛ́, ʋ já Akaabɛ toló. 19 Amá Nyuutɩna Wɩɩsɛ fa wɩ Ziida dɩtɩ́llɛ zɔkɛ́ có, a tɩ́ŋʋ́ tʋtʋnnɔ Davidi yɩr mɛ́, ʋ fa há bʋlʋ́ rɩ́, a bʋlʋ́ dunɩɛ nɛ́ sɩ́ dídí kuorí Zerizalɛmɛ mɛ́, tɛ́ŋ wuu mí. 20 Ɛ́ tɛ́ŋ mɛ́, Edomi nɩɛ ísó vɛ́ rɩ́wɔ́ tɩ́ŋ Ziida kuóro mí ká má bílwó kuóro. 21 Zoramɛ rɩ́rʋ́ lalyóórítórkowa wuu mʋ́ Sayiiri. Ʋ isi tɩ́táŋ a ŋmasɛ Edomi nɩɛ ná fa há kílwó arɩ́ lalyóóritórkowa nyúútɩ́náwa ná, Zoramɛ lalyóóre bɩrfá a mʋ́wɔ́ jɩɩsɛ. 22 A pɔ́ ɛ́ tɛ́ŋ mɛ́ nɛ́, Edomi nɩɛ cɛ́ Ziida nɩɛ mɛ́ a ko aá lɛ́ zaa. Ɛ́ tɛ́ŋ tɩɩ mɛ́ nɛ́, Libna nɩɛ má isi a cɛ́ Ziida mɛ́. 23 Zoramɛ wɩ́'állɛ ná náŋa, ʋ tʋtʋmɛ́ wuu mɩŋ kɛnɔ ná ɓa háá yɩ́rɛ Ziida kuóre wɩ́'állɛ kɛnɔ sɩɛrʋ nɛ́. 24 Zoramɛ há sʋ́wɛ́ a mʋ́ʋ́ ánáwa rɩ́, ɓa húú ʋ ánáwa lɛlbule sɩɛrʋ nɛ́, Davidi zʋ́ɔ́ mɛ́. Ʋ bio Akaziya nɛ́ lɔ́ʋ́ nyúú mí a dí kuorí.
Akaziya dí Ziida kuorí
25 Akaabɛ bio Zoramɛ há dí Ɩzɩrayɛl kuorí, ʋ bɩŋsɛ fí arɩ́ bɛllɛ nyúú mí ní ká Zoramɛ bio Akaziya má dí Ziida kuorí. 26 Akaziya fa kéŋ bɩŋsɛ mɛrɛ́ arɩ́ bɛllɛ nɛ́, ká dí kuorí bɩna balá, Zerizalɛmɛ mɛ́. Ʋ maá yɩr nɛ́ fa ká Atali, Ɩzɩrayɛl kuóro Omri dunɛrɔ nɛ́. 27 Akaziya má césí Akaabɛ jaa nɩɛ wɩ́'állɛ, a aa zɔkɛ Nyuutɩna Wɩɩsɛ mɛ́, anɛ Akaabɛ jaa nɩɛ, bee wɩ́ɛ́, ʋ fa já Akaabɛ jaa nɩɛ toló. 28 Akaziya arɩ́ Akaabɛ bio Zoramɛ mʋ́ɔ́ yo Siiri kuóro Azayɛl, Ramɔtɛ mɛ́, Galaadɛ dɩtɩ́llɛ. Amá Siiri nɩɛ pɩ́rɛ́ kuóro Zoramɛ. 29 Ʋ bɩrmʋ́ Zizireyɛl rʋ́ʋ́ váárʋ́ fʋrʋ ná Siiri nɩɛ há héé pɔ́ʋ́ Rama mɛ́ tɛ́ŋ ná mɛ́ ʋ háá yo Siiri kuóro Azayɛl. Ɛ́ nɛ́ Zoramɛ bio Akaziya há ká Ziida kuóro mʋ́ ráŋ, rʋ́ʋ́ ná Akaabɛ bio Zoramɛ Zizireyɛl mɛ́, beé wɩ́ɛ́, ʋ fáá ná wɩɩla.