Elize pɛ́ yúháálɔ mɛ́
4
1 Kal oro, Wɩɩsɛ wɩ́laabʋlla ná sɩɛrʋ, nɔ́ŋɔ háálɔ cáásó hé Elize mí a bʋlɛ́: «Ŋ balá, ɩ tʋtʋnnɔ sʋ́wɔ́, kɛ́ɩ́ ɩ́ɔ̃́ rʋ́ʋ́ faá fá Nyuutɩna héwíŋ. Sɩɛ́ ná kɩŋ tɩ́na nɛ́ kóé rʋ́ʋ́ kɛ́sɩ́ŋ bɛlɛ ná bɛllɛ a kaa mʋ́ rɩ́wɔ́ bɩ́rmʋ́ yosí.» 2 Elize bʋlʋ́ rɩ́ɩ́ bʋlɛ́: «Ɩɩ́ já rɩ́ŋ a beé rí pɛ́ɩ́>> Makɛ omo ná há mɩ́nɩ́ jaa mɛ́ páŋ>>» Ɛ́ nɛ́ ʋ sɛ́: «Ŋ é, ɩ tʋtʋnnɔ, ŋ wɩ óŋ nɔ́ŋ kené jaa mɛ́, rɩ nʋʋ rɩ́ɩ́ loŋo rá.» 3 Ɛ́ nɛ́ Elize sɛ́: «Mʋ́ɩ́ kénnináŋa wuu rɩ́ɩ́, a sʋl viwuole a kaa ko. Sʋl ɓɩkaná. 4 Rɩ́ɩ́ nɛ́ kóé zʋ́ɩ́ jaa sɩɛrʋ, ɩ ká dánnʋ́ɔ́ tɔ́ɩ́ rɩ́rɩ́ɩ́ bɛlɛ mɛ́. Ká pi nʋʋ ná a cʋ́ɔ́rɛ a hé ɛ́ viini wuu sɩɛnnɛ, ɓa ná há sɩ́ sú, ɩ kaa gɩɩkɛ aá bil laka.»5 Ɛ́ nɛ́ háálɔ ná mʋ́ʋ́ jaa, a ká dánnʋɔ tɔ́ʋ́ rɩ́rʋ́ bɛlɛ mɛ́. Bɛlɛ ná sɩɛ́ ká viini ná aá tɛ́rʋ́ mɛ́, ʋ ɔ́ŋsɛ aá hé. 6 Viini ná há súé, ʋ bʋlʋ́ bio rɩ́ a bʋlɛ́: «Baa ká vie nɔ́ŋɔ tɛ.» Ɛ́ nʋ́ʋ́ sɛ́: viwuoli báá tó. Ɛ́ nɛ́ nʋʋ ná má toki. 7 Ɛ́ nɛ́ ʋ mʋ́ cesi wɩ́ɩ́ ná wuu a pá Wɩɩsɛ báálɔ. Ɛ́ nɛ́ ʋ sɛ́: «Mʋ́ yɛ́llɛ ɛ́ nʋʋ a túmí kɩŋ; ká rɩ́ɩ́ rɩ́rɩ́ɩ́ bɛlɛ pí káánɛ dɩ́ɛ́sɩ́wa tɩɩ.»
Elize rɩ́ Sunɛɛmɛ tɩ́náwa háálɔ wɩ́ɛ́
8 Kal oro, Elize fá tɩ́ŋ Sunɛɛmɛ tɔ́ɔ́ aá daarɛ. Háálɔ oro sɩɛ́ fá mɩŋ ɛ́ tɔ́ɔ́ mɛ́, ʋ nɛ́sɛ ká ɓɩɛ wérí. Ʋ caasɛ sʋ́lʋ́ rʋ́ʋ́ dí ɓɩɛ. A pɔ́ ɛ́ tɛ́ŋ mɛ́, rʋʋ nɛ́ tɩŋ ɛ́ tɔ́ɔ́ sɩɛrʋ aá daarɛ wuu, ʋ mʋ́ʋ́ rɩ́ɩ́ aá dí ɓɩɛ. 9 Ʋ bʋlʋ́ bála rɩ́ a bʋlɛ́: «Ŋ ɩ́ɔ̃́ pʋmmɩ́ rɩ báálɔ né háá kó ráá dɩhɩ̃́ tɛ́ŋ wuu mí, ká Wɩɩsɛ nɩtɩllɛ́ nɛ́. 10 Ŋŋ́ sʋlɩ́ rɛ́, á sɔ́ túkwie, a hé gódó rɩ́ táábɩl rɩ́ dacaka arɩ́ cáánɔ́ ráŋ pɔ́ʋ́. Ʋ sɩ́ wólli ráŋ aá pɛ́, rʋʋ nɛ́ kúé kó ráá rɩ́.»
11 Ɛ́ nɛ́ kal oro, Elize ko ráŋ, a zɩ́ pɩ túkwie ná sɩɛrʋ. 12 Ká bʋlʋ́ tʋtʋnnɔ Geyazi rɩ́ a bʋlɛ́: Yɩ́rɛ Sunɛɛmɛ tɩ́náwa háálɔ ná. Geyazi yɩ́rʋ́, ʋ ko cɩ́nʋ́ sɩ́ɛ́. 13 Elize bʋl Geyazi rɩ́ a bʋlɛ́: Ŋŋ́ sʋ́lɩ́, bʋlʋ́ rɩ́ bʋlɛ́: «Ɩ á wɩ́ɛ́ ɓɩkána a párá. Beé rí sɩɛ́, á má sɩ́ wólli aa pɛ́ɩ́>> Ɩ kéŋ wɩ́ɩ́ rɛ́, a cólli ráá laa bʋl pá kuóro, ɛ́ ráá má sóójiwa nɔhɔ̃́>> Ɛ́ nɛ́ ʋ sɛ́: «Áɩ́, ŋ mɩ́nɩ́ŋ nɩɛ sɩɛrʋ nɛ́, ŋ wɩ oŋ wuu jɛ́ɛ́ aá gúl.» 14 Elize sɛ́: «Beé rí á sɩ́ aa pɔ́ʋ́>>» Ɛ́nɛ́ Geyazi sɛ́: «Ʋ ná há wɩ́ɩ́ nɛ́ ká, ʋ wɩ bio kené, kɔ́ʋ́ balá nɩ́ɩ́nɛ́.» 15 Ɛ́ har mɛ́, Elize sɛ́: «Yɩ́rʋ́!» Geyazi yɩ́rʋ́, ʋ ko cɛ́ dánnʋɔ mɛ́. 16 Elize bʋlʋ́ rɩ́ a bʋlɛ́: «Wɩ́ɩ́rɛ, cɛ́rɛ́ né tɩɩ mɛ́, rɩ́ɩ́ kéŋ bio ɩ nɛ́sɛ mɛ́.» Amá ʋ sɛ́: « Aɩ́, ŋ nyúútɩ́na, Wɩɩsɛ báálɔ. Sɩ́ŋ nyɩ́sʋ́, ŋ é, ɩ tʋtʋnnɔ!» 17 Amá ɛ́ háálɔ kéŋ puo, a lʋl heŋbóle bɩna ná há tʋ́kɛ mɛ́, tɛ́ŋmakɩ́ ná tɩɩ mɛ́, anɛ ɛ́ Elize fá há bʋlɛ́ a pɔ́ʋ́.
Sunɛɛmɛ tɩ́náwa háálɔ bio sʋʋ wɩ́ɛ́
18 Bio ná wɔ́ʋ́. Kal oro, ʋ isi mʋ́ʋ́ áná rɩ́, mɩ́kʋ́rsa dɩhɩ̃́. 19 Ʋ bʋlʋ́ áná rɩ́ a bʋlɛ́: «Ŋ nyúú nɩ́ɩ́ wɩ́ɛ́! ŋ nyúú nɩ́ɩ́ wɩ́ɛ́!» Ʋ áná bʋlʋ́ tʋtʋnnɔ́ rɩ́ a bʋlɛ́: «Kánʋ́ mʋ́ pɔ́ʋ́ maá!» 20 Ʋ púú kaa mʋ́ pɔ́ʋ́ maá. Bio ná pɩ́nʋ́ maá naasɛ daha, a peri wɔhɔ ká sʋwɛ. 21 Ʋ maá ná kánʋ́ zɛ́ túko, a bíl Wɩɩsɛ báálɔ gódó daha, a lɛ́ ká ká dánnʋɔ tɔ́ʋ́ mɛ́. 22 Ʋ yɩ́rʋ́ bála a bʋlʋ́ rɩ́ a bʋlɛ́: «Ŋŋ́ sʋ́lɩ́, lɩ́sɛ tʋtʋnnɔ nɔ́ŋɔ rʋ́ʋ́ ká kokúmaá páŋ, rɩ́ŋ fá mʋ́ ná Wɩɩsɛ báálɔ, ká bɩrko.» 23 Ʋ bála bɔ́sʋ́ a bʋlɛ́: «Beé rí tɛ, ɩ mʋ́mʋ́ rɩ́ nóú zaa>> Caŋfɛlɔ tápʋ́l rá, fɩ́ɛ́lɛ má tápʋ́l rá.» Ɛ́ nʋ́ʋ́ sɛ́: «Ʋ fɩ́ɛ́lɔ́ rɛ́!» 24 Kɔ́ʋ́ a ɓa hé kokúmaá ná ŋmɛ́ŋ kɔ́ʋ́ bʋlʋ́ tʋtʋnnɔ ná rɩ́ a bʋlɛ́: «Hé kokúmaá ná cɩksɛ a va; sɩ́ŋ káá cɛ́ ŋmɛ́nɔ mɛ́ rɩ́ŋ nɛ́ wɩ sɩ́ɩ́ cɛ́.»
25 Ɛ́ nɛ́ Háálɔ ná mʋ́ɔ́ ná Wɩɩsɛ báálɔ Karmɛl paalɔ mɛ́. Wɩɩsɛ báálɔ há tɩ́ɛ́nɛ́ a nóú dɩbólí, ʋ bʋlʋ́ tʋtʋnnɔ Geyazi rɩ́ a bʋlɛ́: «Sunɛɛmɛ tɩ́náwa háálɔ ná nɛ́. 26 Ŋŋ́ sʋ́lɩ́ rɛ́, fá mʋ́l né mí cémú, a bɔ́sʋ́ bʋlɛ́: Ɩ tɛŋ fɩ́ɛ́lɔ́ rɛ́>> Ɩ bála tɛŋ fɩ́ɛ́lɔ́ rɛ́>> Bio ná tɛŋ fɩ́ɛ́lɔ́ rɛ́>>» Háálɔ ná sɛ́: Tɛŋfɩ́ɛ́l mɩnɔ́ rɛ́. 27 Ʋ há mʋ́ɛ́ peri Wɩɩsɛ báálɔ Karmɛl paalɔ ná mɛ́, ʋ ɓálʋ́ naasɛ mɛ́. Geyazi tuuperi rʋ́ʋ́ kírú, amá Wɩɩsɛ báálɔ sɛ́: «Lóú! Bee wɩ́ɛ́, sazɔkɔ́ nɛ́ súú, ká Nyuutɩna Wɩɩsɛ kaa féŋsíŋ mí, a wɩ lóé rɩ́ŋ zɩŋ ɛ́ mɛ́.» 28 Ɛ́ nɛ́ háálɔ ná tɔ́wʋ́ nʋɔ mɛ́ a bʋlɛ́: «Ŋ nyúútɩ́na, ŋ sʋ́l bio ɩ rɩ́>> Ŋ wɩ bʋlɛ́ pɛ́ɩ́ a bʋlɛ́: Sɩ́ŋ nyɩ́sʋ́.”» 29 Ɛ́ nɛ́ Elize bʋl Geyazi rɩ́ bʋlɛ́: «Vɔ́wɩ́ tɩŋa vɔ́wɛ́, píŋ deŋtuke ná a zʋ ŋmɛ́nɔ. Rɩɩ céŋ nɛ́ŋ, ɩ sʋ́ʋ́ bɔ́llʋ́. Rɩ nɛ́ŋ má bɔ́llɩ́, ɩ sɩ́ lá. Rɩ́ɩ́ mʋ́ɔ́ peri, ɩ píŋ deŋtuke ná sakɛ heŋbólwie ná sɩ́ɛ́ mɛ́.» 30 Biwie ná maá sɛ́: «Nyuutɩna Wɩɩsɛ wómmó wɩ́ɛ́, arɩ́rɩ́ɩ́ má tɩɩ há wómmó wɩ́ɛ́, ŋ wɩ́ɩ́ mɩ́ɩ́ kɛkɛ.» Ɛ́ nɛ́ ʋ isi a tɩ́ŋʋ́ mɛ́. 31 Geyazi fa láwɔ́ sɩ́ɛ́ a peri, a pi deŋtuke ná a sakɛ heŋbólwie ná sɩ́ɛ́ mɛ́, amá ʋ liŋó wɩ lɩ́ɛ́, ʋ wɩ gʋ́ʋ́nɛ́ má. Ɛ́ nɛ́ Geyazi bɩrko céŋ Elize a hé duosi pɔ́ʋ́ a bʋlɛ́: «Biwie ná wɩ sʋʋ mɛ́ ísé.»
Elize illi bio ná sʋʋ mɛ́
32 Elize mʋ́ɔ́ zʋ́ jaa, rɩ heŋbolwie ná há sʋ́wɛ́ nɛ́ pɩ́nʋ́ gódó daha. 33 Elize zʋ, a ká dánnʋɔ tɔ́wɔ́ bɛllɛ mɛ́, ká sɩ́sʋl Nyuutɩna Wɩɩsɛ. 34 Ʋ zɩ́nɔ́ pɛ́ bio ná daha, a púú nʋɔ a cú bio ná nʋɔ mɛ́, ʋ sɩ́ɛ́ cú bio ná sɩ́ɛ́ mɛ́, ká tɩ́ɛ́nʋ́ nɛ́ŋsa, bio ná nɛ́ŋsa daha. Ʋ pɛ́ bio ná daha ɛ́, lʋmɔ zʋ bio ná tɛŋ. 35 Elize tuwi, a gʋɔrɛ jaa ná sɩɛrʋ, ká bɩrko zɛ́ a pɛ́ bio ná daha. Ɛ́ nɛ́ bio ná cɩ́sɛ naasɩ́ balpɛ, ká wúrú sɩ́ɛ́. 36 Ɛ́ nɛ́ Elize yɩrɛ Geyazi a bʋlʋ́ rɩ́ a bʋlɛ́: «Yɩrɛ Sunɛɛmɛ tɩ́náwa háálɔ ná.» Geyazi yɩ́rʋ́ ʋ ko Elize rɩ́, ʋ bʋlʋ́ rɩ́ bʋlɛ́: «Lɛ́ɩ́ bio ná.» 37 Ʋ mʋ́ a ɓálʋ́ naasɛ mɛ́, a kánʋ́ sɩ́ɛ́ cú tíé. Ká isi kánʋ́ bio lɛ.
Dɩsɛ ná há gɩrɛ díí wɩ́ɛ́
38 Elize bɩ́rɔ́ ko Gɩlgal. Rɩ losu fa zʋ́ tɔ́ɔ́. Wɩ́laabʋlla púl sɩɛ́ ko kénú sɩ́ɛ́. Ɛ́ nʋ́ʋ́ bʋlʋ́ tʋtʋnnɔ rɩ́ a bʋlɛ́: «Bɩ́rmɛ vizeno a cɔ́ dɩsɛ pá wɩ́laabʋlla púl ná.» 39 Ká ɓa nɔ́ŋɔ zʋ gɩr rʋ́ʋ́ já dɩsɛ, a ná tuu nɔ́ŋɔ há nɩhɩ̃́ baka víínyi, a ɓɔ́rʋ́ nɔnɔ há nɩhɩ̃́ kabɛlɛ a sú gɛrɔ. Ʋ há kóé, ʋ conníwó a hé dɩsɛ vie ná sɩɛrʋ, bee wɩ́ɛ́, nɛ́ŋ fá wʋ́ɔ́ oŋduo ɛ̃. 40 Amá ɓa há a ɛ́ ɓɩdííle a pá nɩɛ, ɓa mɩŋ díí mí, rɩ́ ɓa cáásó a bʋlɛ́: «Wɩɩsɛ báálɔ, sʋʋ mɩ́ŋ ɓɩdííli ná sɩɛrʋ!» Ɓa fa wʋ́ɔ́ wuó dí. 41 Ɛ́ nɛ́ Elize sɛ́: Ɩ́ ka míŋ ko páŋ. Ʋ laa hé ɓɩdííli ná sɩɛrʋ, ká bʋlɛ́: «Ɩ́ aa pá nɩɛ nyáŋ, rɩ́wɔ́ dí!» Oŋbɔ́ŋ baa to ɓɩdííli ná sɩɛrʋ.
Ɓɩdííle pulé wɩ́ɛ́
42 Ɛ́ tɛ́ŋ tɩɩ mɛ́, rɩ báálɔ nɔ́ŋɔ má lɛ́ Balsalisa ko. Ʋ kéŋ oŋparɛ́ oŋbʋʋrɛ dɩpɛ́ŋ ko pá Wɩɩsɛ báálɔ: ɔ́rzɛ dɩpɛ́ŋwie mɛrɛ́, arɩ́ bilé ɓɩfɛlɛ ʋ bɔ́tɔ́ sɩɛrʋ. Elize bʋlʋ́ tʋtʋnnɔ rɩ́, a bʋlɛ́: Pi ɛ́ ɓɩdííle a ɓaa pá nɩɛ nyáŋ rɩ́wɔ́ dí. 43 Ɛ́ nʋ́ʋ́ tʋtʋnnɔ ná sɛ́: «Ŋŋ́ a ɛrɛɛ́ rɛ́, kaá dɩ́ɛ́sɛ nɩɛ zɔlɔ arɩ́ nyáŋ>>» Amá Elize báá sɛ́: «Ɓaa pá nɩɛ nyáŋ, rɩ́wɔ́ dí. Beé wɩ́ɛ́, ná Nyuutɩna Wɩɩsɛ há sʋ́ʋ́ ná: “Ɓa sɩ́ dí, ká rɩ́wɔ́ káánɛ.”» 44 Ʋ pi dɩpɛ́ŋwa ná bílwó sɩ́ɛ́; ɓa dí ká káánɛ, anɛ ɛ́ Nyuutɩna Wɩɩsɛ fa há bʋlɛ́.