Zoramɛ dí Ɩzɩrayɛl kuorí
3
1 Zozafatɛ há dí Ziida kuorí bɩŋsɛ fí rɩ́ córí nyúú mí ní, Akaabɛ bio Zoramɛ má dí Ɩzɩrayɛl kuorí. Ʋ ké Samari mí, a dí kuorí bɩŋsɛ fí arɩ́ bɛllɛ. 2 Ʋ ɔ́ɔ́ zɔkɛ Nyuutɩna Wɩɩsɛ mɛ́, amá ʋ wʋ́ʋ́ áná rɩ́rʋ́ maá wɩ́bɔma cesé. Beé wɩ́ɛ́, ʋ ɔ́ɔ́ dɔ́wɩ́ɓaarɩ́ ná ʋ áná fá há cíksé Baal yɩr mɛ́, ʋ nyɩ́ɩ́kɛ. 3 Amá ʋ cesi Nebatɛ bio Zerobowamɛ wɩ́zɔkɩ́ ná, ʋ nɛ́ fa há yikí Ɩzɩrayɛl nɩɛ ɓa aá zɔkɛ. Zoramɛ wɩ Zerobowamɛ wɩ́bɔmɔ ná cesé tɛ́ɛ́.Zoramɛ mʋ́ɔ́ a yo Mʋwabɛ tɔ́ɔ́
4 Meesa há ká Mʋwabɛ kuóro faá dɩ́ɛ́sɛ pʋ́sɛ. Bɩna wuu, ʋ mɔhɔ̃́ rʋ́ʋ́ lɩ́sɛ pewiisi bʋ́ɩ́ zɔlɔ (100 000) arɩ́ peɓallɛ má bʋ́ɩ́ zɔlɔ (100 000) arɩ́wɔ́ pʋsɛ, a tuŋ loŋpo a pá Ɩzɩrayɛl kuóro. 5 Amá Akaabɛ sʋʋ har mɛ́, Mʋwabɛ kuóro isó cɛ́ Ɩzɩrayɛl kuóro mɛ́. 6 Ɛ́ nɛ́ kuóro Zoramɛ lɛ́ Samari mí, a a ɓa dɩɩsɛ Ɩzɩrayɛl sóójiwa wuu. 7 Ʋ isí aá va ká tʋŋ nɩɛ rɩ́wɔ́ mʋ́ a bʋl Ziida kuóro Zozafa rí a bʋlɛ́: «Mʋwabɛ kuóro isó cɩ́nɩ́ŋ mɛ́. Ɩ waá ko pɛ́ŋ mɛ́ rá yó Mʋwabɛ>>» Ɛ́ nɛ́ Zozafa sɛ́: «Ŋ sɩ́ mʋ́, ŋ rɩ́rɩ́ɩ́ wuu ká balá nɛ́, ŋ nɩɛ rɩ́rɩ́ɩ́ nɩɛ má a balá, ŋ záksɛ arɩ́rɩ́ɩ́ záksɛ má a balá. 8 Ʋ báá sɛ́: «Ŋmɛ́ŋ orí rí, ráá tɩŋ>>» Zoramɛ sɛ́: «Á tɩŋ Edɔŋ gɩrbétéke ŋmɛ́nɔ nɛ́.»
9 Ɛ́ nɛ́ Ɩzɩrayɛl kuóro rɩ́ Ziida kuóro arɩ́ Edɔŋ kuóro isi a zʋ ŋmɛ́nɔ. Ɓa pi ŋmɛ́ŋgólli oro a va tapʋ́lɛ́ balpɛ, nyii báá tóó rɩ́wɔ́ sóójíwa arɩ́wɔ́ pʋsɛ nyɔ. 10 Ɛ́ nɛ́ Ɩzɩrayɛl kuóro caasi a bʋlɛ́: «Nyúbɔ́ŋ rɛ́! Nyuutɩna Wɩɩsɛ kéŋrá é kuóre nyáŋ botoro ko rɛ́ɛ́, rʋ́ʋ́ pírá hé Mʋwabɛ nɩɛ nɛ́sɛ mɛ́ nɛ́!» 11 Ɛ́ nɛ́ Zozafatɛ sɛ́: «Nyuutɩna Wɩɩsɛ wɩ́laabʋllʋ́ to rɛ́ɛ́, ráá a rʋ́ʋ́ bɔsɛ Nyuutɩna Wɩɩsɛ a ná>> Ɩzɩrayɛl kuóro wuolo tʋtʋnna ná sɩɛrʋ nɔ́ŋɔ sɛ́: «Safa bio Elize mɩ́ŋ rɛ́, ʋ nɛ́ fa kéŋ nyii ká Eli sɩ́sɛ́mʋ́ nɛ́ŋsa.» 12 Ɛ́ nɛ́ Zozofatɛ báá sɛ́: «Ɛ́ báálɔ sɩ́ zɩŋ wɩ́ɩ́ ná Nyuutɩna Wɩɩsɛ háá já rʋ́ʋ́ bʋlrá rɩ́. Ɛ́ nɛ́ Ɩzɩrayɛl kuóro rɩ́ Zozafatɛ arɩ́ Edoŋ kuóro mʋ́ʋ́ rɩ́. 13 Elize bʋl Ɩzɩrayɛl kuóro rɩ́ a bʋlɛ́: «Bee mɩ́nɩ́ŋ rɩ́rɩ́ɩ́ pɛ́kɛ́>> Mʋ́ bɔ́sɩ́ áná arɩ́rɩ́ maá wɩ́laabʋlla nɛ́!» Ɛ́ nɛ́ Ɩzɩrayɛl kuóro bʋlʋ́ rɩ́ a bʋlɛ́: «Aɩ́! Beé wɩ́ɛ́, Nyuutɩna Wɩɩsɛ tɩɩ nɛ́ kéŋrá é kuóre nyáŋ botoro ko rɛ́ɛ́, rʋ́ʋ́ pírá hé Mʋwabɛ nɩɛ nɛ́sɛ mɛ́.» 14 Elize báá sɛ́: «Nyuutɩna Wɩɩsɛ há wómmó yɩr mɛ́, Wɩɩsɛ ná há ká Doewuutɩna, káŋ ɔ́ʋ́ tʋtʋ́nnʋ́, rɩ́ Ziida kuóro Zozafatɛ wɩ́ɛ́ rá, ŋ fa waá a rɩ́ŋ tɔ́wɩ́ rɩ́, ŋ fa waá a rɩ́ŋ bélí rɩ́ má tɩɩ. 15 Mʋ́l né mí, ɩ́ ka gɔkɔ́ páŋ rɛ́.» Tɛ́ŋ ná mɛ́ gɔkɔ́ ná háá dúú gɔk'omo ná, Nyuutɩna Wɩɩsɛ dóé túwí Elize nyúú. 16 Ɛ́ nɛ́ ʋ sɛ́: «Ná Nyuutɩna Wɩɩsɛ há sʋ́ʋ́ ná: Ɩ́ lú polcʋ́ɔ́rɛ né sɩɛrʋ, ɩ́ lú butuonni, ɩ́ lú ɓɩkaná. 17 Beé wɩ́ɛ́, ná Nyuutɩna Wɩɩsɛ há sʋ́ʋ́ ná: Ɩ́ wáá a rɩɩ́wa ná poo, ɩ́ wáá a rɩ́ɩ́wa ná duóŋ, amá nyii sɩ́ sú polcʋ́ɔ́rɛ né, rɩ́ɩ́wa tɩɩ nyɔ ká rɩ́ɩ́wa jaa pʋwɩɛla arɩ́ rɩ́ɩ́wa pʋzeŋsi má nyɔ. 18 Amá ŋ né é ká wɩ́wíé rí Nyuutɩna Wɩɩsɛ sɩ́ɛ́ mɛ́, ʋ sɩ́ pi Mʋwabɛ tɔ́ɔ́ héíwa nɛ́sɛ mɛ́. 19 Ɩ́ sɩ́ zɔkɛ tɔ́nɛ ná wuu ɓa há sɔ́ɛ́ kɛ́rɛ, arɩ́ tɔ́piŋe ná wuu, a ɓʋ́ tuuni ná wuu háá nɔnɛ́, a fɛsɛ nyibulsɩ́ɛ́ wuu, ká pa dáwʋ́ɔ́ jɛrɛ bakparɛ́ wuu sɩɛnnɛ a zɔ́kwɔ́.» 20 Cɩ́cʋɔ, tɛ́ŋ ná mɛ́ ɓa háá ɔsɛ vʋk, ɓa ná nyii há pálɛ́ a lɛ Edɔŋ, a ko tɔ́ tɔ́ɔ́ wuu mí. 21 Mʋwabɛ nɩɛ wuu há nɩ́ɛ́ rɩ kuóre nyáŋ botoro kó rɩ́wɔ́ yówó, ɓa hé báála ná wuu bɩŋsɛ há pérí lal yoe náŋá mɛ́, a a ɓa mʋ́ pɔ́ tɔ́ɔ́ súsúbʋɔ mɛ́. 22 Mʋwabɛ nɩɛ sóójiwa kúó aá isi cɩ́cʋɔ, rɩ wɩpomí cúólí nyii. Ɓa bélwó sɩ́ɛ́ rɩ́, rɩ nyii ní fɛ́lɛ́ anɛ cɛ́l. 23 Ɛ́ nɛ́ ɓa cáási a bʋlɛ́: «Cɛ́l nɛ́! Nyɛ mɛ́ kuóre ná arɩ́wɔ́ lalyoore ná nɛ́ gɩ́rɛ yo náŋá, a ɓʋ́ʋ́sɛ náŋá. Mʋwabɛ nɩɛ, ɩ́ isí dahá mʋ́l né mí, ráá fá mʋ́ páwɔ́ ɓɩɛ! 24 Amá ɓa há mʋ́ɛ́ peri Ɩzɩrayɛl púl, Ɩzɩrayɛl lalyoore lɩ́ɔ́ ŋmásɩ́wɔ́. Ɛ́ nɛ́ Mʋwabɛ nɩɛ fá. Ɩzɩrayɛl nɩɛ kiri tɩ́ŋwɔ́ mɛ́, a mʋ́ zʋ́wɔ́ tɔ́ɔ́, a zɔ́kwɔ́. 25 Ɓa zɔkɛ tɔ́nɛ, nɛrɔ wuu pi dɔ́wɩ́, ɓa yoo tɔ́ bakwéré wuu mí, a fɛsɛ nyibúlsɩ́ɛ́ wuu ká ɓʋ́ʋ́sɛ tuuni ná wuu háá nɔnɛ́. Kiirherɛsɛtɛ tɔ́ɔ́ dʋŋɔ nɛ́ fa kúé káánɛ ɓa wʋ́ʋ́ mɛ́ tɩ́kɛ́, amá sóójiwa ná fa há kéŋ dɔ́wɩ́yoolé má kúó kílú a zɔ́kʋ́ má. 26 Mʋwabɛ kuóro há kúé ná rʋʋ dɩŋdɔma dí dóé ʋ nyúú, ʋ hé sóójiwa zɔwalpɛ (700) há kéŋ tókowíé náŋá mɛ́, rɩ́wɔ́ hé ŋmɛ́nɔ a mʋ́ yakɛ Edoŋ kuóro mí, amá ɓa wɩ wóllé. 27 Ɛ́ nɛ́ ʋ kánʋ́ bihɔ̃́ ná há sɩ́ ko lɔ́ʋ́ nyúú mí dí kuorí, a ɔsɛ vʋk'físi tɔ́ɔ́ ná zenaa nyúú. Cɔwɩɩlɔ́ caasɛ ka Ɩzɩrayɛl nɩɛ, ɓa isi kɛ́kʋ́ mɛ́, a bɩr mʋ́wɔ́ tɔ́ɔ́.