Eli baná zɩ́nɛ́ arɩ́ Elize tʋtʋmɛ́ púle
2
1 Tɛ́ŋ ná mɛ́ Nyuutɩna Wɩɩsɛ há pí Eli a tɩŋ povílmí mí a zɩ baná, rɩ Eli arɩ́ Elize fá lɛ́ Gɩlgal mɛ́ aá col ní. 2 Eli bʋl Elize rí a bʋlɛ́: “Ŋŋ́ sʋ́lɩ́, káánɛ rɛ́ɛ́, bee wɩ́ɛ́ Nyuutɩna Wɩɩsɛ tʋ́mɩ́ŋ Betɛl mɛ́.” Ɛ́ nɛ́ Elize sɛ́: “Nyuutɩna Wɩɩsɛ há wómmó wɩ́ɛ́, arɩ́rɩ́ɩ́ má tɩɩ há wómmó wɩ́ɛ́, ŋ wɩ́ɩ́ har bɩrɛ!” Ká ɓa mʋ́ Betɛl.3 Wɩɩsɛ wɩ́laabʋlla púl ná fá há mɩ́ŋ Betɛl mɛ́, lɩ́ɔ́ céŋ Elize a bʋlʋ́ rɩ́ a bʋlɛ́: «Ɩ ɩ́ɔ̃́ rɩ́ zaa nɛ́ Nyuutɩna Wɩɩsɛ sɩ́ píí nyúútɩ́na, a tɩ́ŋɩ́ nyúú rí zɛ́ báná>>» Ʋ sɛ́: «Ŋ má tɩɩ ɩ́ɔ̃́ rɛ́; ɩ́ sikli!» 4 Eli bʋlʋ́ rɩ́ a bʋlɛ́: «Elize, ŋŋ́ sʋ́lɩ́, káánɛ rɛ́ɛ́, bee wɩ́ɛ́, Nyuutɩna Wɩɩsɛ tʋ́mɩ́ŋ Zeriko mí.» Amá Elize sɛ́: «Nyuutɩna Wɩɩsɛ há wómmó wɩ́ɛ́, arɩ́rɩ́ɩ́ má tɩɩ há wómmó wɩ́ɛ́, ŋ wɩ́ɩ́ har bɩrɛ!» Ká ɓa hé náŋá a mʋ́ peri Zeriko.
5 Wɩɩsɛ wɩ́laabʋlla púl ná há mɩŋ Zeriko mí, tuó peri Elize a bʋlʋ́ rɩ́ a bʋlɛ́: «Ɩ ɩ́ɔ̃́ rɩ́ zaa nɛ́ Nyuutɩna Wɩɩsɛ sɩ́ píí nyúútɩ́na, a tɩ́ŋɩ́ nyúú rí zɛ́ bána>>» Ɛ́ nɛ́ ʋ sɛ́: «Ŋ má tɩɩ ɩ́ɔ̃́ rɛ́; ɩ́ sikli!» 6 Eli baa bʋlʋ́ rɩ́ a bʋlɛ́: «Ŋŋ́ sʋ́lɩ́, kaanɛ rɛ́ɛ́, beé wɩ́ɛ́, Nyuutɩna Wɩɩsɛ tʋmɩ́ŋ Zʋrdɛŋ mɛ́.» Ɛ́ nɛ́ Elize sɛ́: «Nyuutɩna Wɩɩsɛ há wómmó wɩ́ɛ arɩ́rɩ́ɩ́ má tɩɩ há wómmó wɩ́ɛ́, ŋ wɩ́ɩ́ har bɩrɛ!» Ká ɓa wuu bɛllɛ hé náŋá mɛ́ aá va.
7 Wɩɩsɛ wɩ́laabʋlla púl ná sɩɛrʋ, wɩ́laabʋlla mɛɛ́sɛllɛ rɩ́ fí fá tɩŋwɔ́ mɛ́ a mʋ́ a cɩ, ɓa sɩ́ɛ́ caasɛ Eli arɩ́ Elize fá há mʋ́ɛ́ a peri a cɩ Zʋrdɛŋ fuo nʋɔ; ká ɓa rɩ́wɔ́ pɛ́kɛ a ból mʋɔ́. 8 Ɛ́ nɛ́ Eli wúrkú kápóti, a mɩlmɛ mɩlmɛ ká pii ŋmɔwɛ nyii ná, ɓa conni bɛllɛ. Ká ɓa bɛllɛ daarɛ, nyii wʋ́ɔ́ naasɛ mɛ́ tɩkɛ́. 9 Ɓa háá daarɛ, Eli bʋl Elize rí a bʋlɛ́: «Sʋl oŋ ná ɩ háá jɛ́ɛ́ rɩ́ŋ aá pɛ́ɩ́ ká rɩ́ Nyuutɩna Wɩɩsɛ zɩ́ŋ píŋ ká tɛ́ɩ́!» Ɛ́ nɛ́ Elize sɛ́: «Ŋ sʋlɩ́, pí Wɩɩsɛ dóé ná há mɩ́nɩ́ bʋllɛ a páŋ!» 10 Eli sɛ́: «Ɩ sʋl omo ná wɩ́ɛ́ há duóko ní. Rɩ́ɩ́ nɛ́ néŋ tɛ́ŋ ná mɛ́ Nyuutɩna Wɩɩsɛ há sɩ́ píŋ ká tɛ́ɩ́, ɩ sʋlɛ́ ná nʋɔ sɩ́ sú, rɩ́ ɛ́ ráá, ɩ sʋlɛ́ ná nʋɔ waá sú.” 11 Ɓa há va ŋmɛnɔ mɛ́ kaá bʋl wɩ́ɛ́ ɛ́, rɩ tórko há ká níŋ arɩ́ záksɛ há ká níŋ kuó zʋ́wɔ́ pɛ́kɛ, a caksɩ́wɔ́ bɛllɛ náŋá mɛ́. Eli tɩŋ povilmi mí a zɩ bána. 12 Amá Elize nóú a caasi yɩ́rʋ́: “Ŋ áná! Ŋ áná! Ɩ nɛ́ fá ká Ɩzɩrayɛl lalyóórítórkowa arɩ́wɔ́ zakzɩnna dóé!» Ká baa wʋ́ʋ́ néé. Ɛ́ nɛ́ Elize kánʋ́ tɩɩ gɛnnɛ a lɩɩsɛ bɛllɛ. 13 Ká pi Eli kápóti ná ʋ há tɛ́ɛ́ ʋ ɓal, a bɩrko cɩ Zʋrdɛŋ fuo nʋɔ. 14 Ʋ pi Eli kápóti ná, ʋ fá há tɛ́ɛ́ ʋ ɓal, a ŋmɔwɛ nyii ná ká bʋlɛ́: «Nyuutɩna Wɩɩsɛ, Eli Wɩɩsɛ mɩŋ nɛ́ɛ́>>» Elize má há ŋmɔwɛ fuo ná nyii ná ɛ́, ɓa conni bɛllɛ kɔ́ʋ́ daarɛ.
15 Zeriko Wɩɩsɛ wɩ́laabʋlla púl ná cɛ́ sɩ́ɛ́rɩ́ ká nóú, ɛ́ nɛ́ ɓa sɛ́: “Eli Wɩɩsɛ dóé ná mʋ́l né mí mɩŋ Elize mí ní.” Ɓa céŋ Elize, a ɓírmí tíé ʋ sɩ́ɛ́, a káŋwɔ́ sɩ́ɛ́ cú. 16 Ká bʋlʋ́ rɩ́ a bʋlɛ́: “Ná, báála mɛɛ́sɛllɛ rɩ́ fí mɩŋrá sɩɛrʋ, ɩ tʋtʋnna nɛ́, a a baŋcɩ́pɩrtɩ́ɩ́na. Ɓa sɩ́ mʋ́ jɛ́ɩ́ nyúútɩ́na ná. Nyɛ́ mɛ́ Nyuutɩna Wɩɩsɛ Sabɩɩna kénú mʋ́ yoo tá paalɔ nɔ́ŋɔ daha, ɛ́ ráá má polo nɔ́ŋɔ sɩɛrʋ.” Amá Elize sɛ́: Ɩ́ sɩ́wɔ́ tʋ́mʋ́. 17 Amá ɓa háárɛ Elize mí kɩ́ŋkáŋ, ʋ gúl ká bʋlɛ́: Ɩ́ tʋŋwɔ́. Ɓa tʋŋwɔ́ nɩɛ ná mɛɛ́sɛllɛ rɩ́ fí, ɓa mʋ́ a já Eli tápʋlɛ́ botoro ká wʋ́ʋ́ néé. 18 Ɓa bɩrkó, rɩ Elize há mɩŋ Zeriko mí. Ɛ́ nɛ́ ʋ bʋlwɔ́ rɩ́ a bʋlɛ́: «Ŋ fá caasɔ́ bʋl pɛ́ɩ́wa rɩ́ɩ́wa sɩ́ ráŋ mʋ́!»
Elize ɔsɛ Zeriko nyii
19 Tɔ́ɔ́ ná nɩɛ bʋl Elize rí a bʋlɛ́: «Anɛ ɛ́ ɩ tɩɩ sɩ́ɩ́ há nóú, nyúútɩ́na, á tɔ́ɔ́ dɩcɩnɛ́ wéró, amá ʋ nyii bɔmɔ́, kɔ́ʋ́ tíé má mɛ́, oŋ'nyʋʋlɛ wɩ ráŋ ɔsɛ.» 20 Ɛ́ nʋ́ʋ́ sɛ́: «Ɩ́ hé yɛsɛ gbaŋfɛlɔ mɛ́, a kaa ko páŋ.» Ɓa kaa ko pɔ́ʋ́. 21 Elize mʋ́ nyibulsɩ́ɩ́ dɩhɩ̃́, a mɩsɛ yɛsɛ ná hé nyii ná sɩɛrʋ ká bʋlɛ́: «Ná Nyuutɩna Wɩɩsɛ há sʋ́ʋ́ ná: “Ŋ ɔsɛ nyii nyáŋ; ɓa baa wɩ nɛ́ŋ ɓʋ́, a baa wɩ tíé maá sol.”» 22 Nyii ná há bɩrmɛ, ɓa nɩ́ɩ́sɔ nɛ́, a ko aá lɩ zaa anɛ ɛ́ Elize fá há bʋlɛ́.
Elize bʋ́rɔ́ ɓʋ́ʋ́sɛ heŋbolwiisi ná há lɔ́rʋ́
23 Elize lɛ́ Zeriko mí a mʋ́ Bɩtɛl. Ʋ há zʋ ŋmɛ́nɔ ɛ́, heŋbolwiisi lɩ tɔ́ɔ́ ná sɩɛrʋ a lɔ́rʋ́ a bʋlɛ́: “Kaa mʋ́ nyúɓɩl, kaa mʋ́ nyúɓɩl!” 24 Ɛ́ nɛ́ ʋ bɩrɛ bélwó ká bʋrɛ a héwó mí Nyuutɩna Wɩɩsɛ yɩr mɛ́. Ɛ́ nɛ́ baka vasɛ bɛllɛ lɩ gɩr sɩɛrʋ a cɔ́nnɛ ɛ́ heŋbiisi nɩɛ mɛɛ́sɛllɛ arɩ́ bɛllɛ. 25 Ká Elize lɩ ráŋ a mʋ́ Karmɛl paalɔ, a lɩ ráŋ a bɩrko Samari.