Bʋllɛ kuóre kɛnɔ
Wɩɩsɛ vɛ́ Ahaziya wɩ́'aalɩ́
1
1 Kuóro Akaabɛ sʋʋ har mɛ́, Mʋwabɛ nɩɛ isó a cɛ́ Ɩzɩrayɛl nɩɛ mɛ́.2 Kal oro Samari mí, kuóro Ahaziya lʋ́ʋ́ jaa sɩ́ɛ́rɩ́, tuko daha, a tɩŋ tokoro a ɓal, a caasɛ pɩrɛ. Ɛ́ nɛ́ ʋ tʋŋ nɩɛ a bʋlɛ́: “Ɩ́ mʋ́ vʋrɛ veno ná ɓa haá yɩ́rɛ Balzebu, Ɩkɩrɔŋ nɩɛ wɩɩsɛ, a ná, ŋ sɩ́ duóri”. 3 Ɛ́ nɛ́ Nyuutɩna Wɩɩsɛ malka bʋl Eli há lɛ́ Tisibe rɩ́ a bʋlɛ́: “Isi, a mʋ́ a céŋ Samari kuóro nɩtʋmɛ́ nyáŋ a bʋlwɔ́ rɩ́ a bʋlɛ́: 'Ɩzɩrayɛl nɩɛ wɩ Wɩɩsɛ kené nɛ́ tɛ, ɩ́ mʋ́mʋ́ rɩ́ɩ́wa vʋrɛ Ɩkɩrɔŋ nɩɛ wɩɩsɛ Balzebu>>' 4 Ɛ́ nɛ́ tɛ Nyuutɩna Wɩɩsɛ sɛ́: Gódó ná mɛ́ ɩ há pɩ́nɛ́, ɩ báá wʋ́ʋ́ mɛ́ isí, bee wɩ́ɛ́ ɩ sɩ́ sʋwɛ.” Ká Eli col.
5 Nɩtʋmɛ́ ná bɩrko Ahaziya rí, ɛ́ nɛ́ ʋ bɔ́sɩ́wɔ́ a bʋlɛ́: “Beé rí tɛ ɩ́ bɩrko>>” 6 Ɓa bʋl a pɔ́ʋ́ a bʋlɛ́: “Bál oro kuó céŋrá a bʋl párá a bʋlɛ́: Ɩ́ bɩr mʋ́ kuóro ná há tʋ́mɩ́wa rɩ́, a bʋl pɔ́ʋ́ bʋlɛ́: Ná Nyuutɩna Wɩɩsɛ liŋó: Wɩɩsɛ to Ɩzɩrayɛl mɛ́ nɛ́ tɛ, ɩ tʋŋ nɩɛ rɩ́wɔ́ mʋ́ vʋrɛ Balzebu, Ɩkɩrɔŋ nɩɛ wɩɩsɛ>> Ɛ́ nɛ́ tɛ́, gódó ná mɛ́ ɩ há pɩ́nɛ́, ɩ baa wʋ́ʋ́ mɛ́ isi, bee wɩ́ɛ́, ɩ sɩ́ sʋwɛ.”
7 Ahaziya baa bɔ́sɩ́wɔ́ a bʋlɛ́: “Báálɔ ná há cémíwa, a bʋl wɩ́ɛ́ nyáŋ pɛ́ɩ́wa fá nɩhɛ̃́ ɛrɛ́ɛ́wa rɛ́>>” 8 Ɓa bʋl a pɔ́ʋ́ a bʋlɛ́: “Ɛ́ báálɔ gɛrɔ fá ká pʋna pʋ́sɛ gɛrɔ nɛ́, kɔ́ʋ́ tɩŋa vɔwɛ́ a pʋkɛnɔ.” Ɛ́ nɛ́ Ahaziya sɛ́: “Eli ná há lɛ́ Tisibe ní!”
Ahaziya díŋ Eli kánɛ́
9 Ɛ́ nɛ́ Ahaziya tʋŋ sóójiwa mɛɛ́sɛllɛ rí fí nyúútɩ́na arɩ́rʋ́ sóójiwa mɛɛ́sɛllɛ rí fí Eli rí. Sóójiwa nyúútɩ́na ná zɛ́ Eli rí, paalɔ nyúú ɓóŋɓóŋ, a bʋlʋ́ rɩ́ a bʋlɛ́: Wɩɩsɛ báálɔ, “tuwi”, kuóro nɛ́ sɛ́! 10 Amá Eli bʋlɔ́ pá sóójiwa mɛɛ́sɛllɛ rɩ́ fí nyúútɩ́na ná a bʋlɛ́: “Rɩ́ŋ nɛ́ ɓɩ́ɛ́na ká Wɩɩsɛ báálɔ, rɩ́ níŋ lɛ bána nyúú tuwi a díí rɩ́rɩ́ɩ́ sóójiwa mɛɛ́sɛllɛ rɩ́ fí nyáŋ!” Ɛ́ nɛ́ níŋ ɓɩ́ɛ́na lɛ bána a tuwi dúú rɩ́rʋ́ sóójiwa mɛɛ́sɛllɛ rɩ́ fí ná.
11 Kuóre baa tʋŋ sóójiwa mɛɛ́sɛllɛ rɩ́ fí nyúútɩ́na nɔ́ŋɔ arɩ́rʋ́ sóójiwa mɛɛ́sɛllɛ rɩ́ fí, Eli rí. Ɛ́ nyúútɩ́na bʋl Eli rí a bʋlɛ́: Wɩɩsɛ báálɔ, “tuwi kɩ́kɛ́lɛ́!”, kuóro nɛ́ sɛ́. 12 Eli lɩ́sɛ nʋɔ a pɔ́wɔ́ a bʋlɛ́: “Rɩ́ŋ nɛ́ ɓɩ́ɛ́na ká Wɩɩsɛ báálɔ, rɩ́ níŋ lɛ bána a tuwi díí rɩ́rɩ́ɩ́ sóójiwa mɛɛ́sɛllɛ rɩ́ fí nyáŋ!” Ɛ́ nɛ́ Wɩɩsɛ níŋ lɛ baná rɩ́ tuwi a dúú rɩ́rʋ́ sóójiwa mɛɛ́sɛllɛ rɩ́ fí ná. 13 Ahaziya baa tʋŋ sóójiwa mɛɛ́sɛllɛ rɩ́ fí nyúútɩ́na nɔ́ŋɔ arɩ́rʋ́ sóójiwa mɛɛ́sɛllɛ rɩ́ fí, naasɩ́ botoro nyúú mí. Ɛ́ botoro nyúú mí sóójiwa mɛɛ́sɛllɛ rɩ́ fí nyúútɩ́na zɛ́ Eli rí, amá ʋ há mʋ́ɛ́ a peri Eli, ʋ ɓírmú sɩ́ɛ́, ká jɛ́nnʋ́ a bʋlɛ́: “Wɩɩsɛ báálɔ, ŋŋ́ sʋ́lɩ́ rɛ́, lo rɩ́ŋ rɩ́rɩ́ŋ sóójiwa nyáŋ mɛɛ́sɛllɛ rɩ́ fí há kɛ́ɩ́ tʋtʋnna, ráá ká mɩɩsɛ! 14 Ná, níŋ ní lɛ́ bána a tuwi a dí dʋŋdʋ́ʋ̃́ sóójiwa mɛɛ́sɛllɛ arɩ́ fíwa nyúútɩ́nawa ná bɛllɛ arɩ́wɔ́ sóójiwa mɛɛ́sɛllɛ arɩ́ fíwa ná. Amá, mʋ́l né mí, lo rɩ́ŋ ká mɩɩsɛ!” 15 Nyuutɩna Wɩɩsɛ malka ná bʋl Eli rɩ́ a bʋlɛ́: “Tɩ́ŋʋ́ mɛ́ a tuwi! Sʋ́ʋ́ héwíŋ fá!” Eli isi a tɩ́ŋʋ́ mɛ́ a mʋ́ kuóro rí, 16 a bʋlʋ́ rɩ́ a bʋlɛ́: «Ná Nyuutɩna Wɩɩsɛ liŋó: “Ɩ tʋ́ŋ nɩɛ rɩ́wɔ́ mʋ́ vʋrɛ Balzebu, Ɩkɩrɔŋ nɩɛ veno, anɛ Wɩɩsɛ há to Ɩzɩrayɛl mɛ́, ɓa wóllú aá bɔsɛ rɩ́ wɩ́ɩ́. Ɛ́ wɩ́ɛ́, gódó ná daha ɩ há pɩ́nɛ́, ɩ́ báá wʋ́ʋ́ mɩ́ɩ́ isi, bee wɩ́ɛ́, ɩ sɩ́ sʋwɛ.” » 17 Ahaziya ɓɩɛ́na sʋ́wɔ́ anɛ ɛ́ Nyuutɩna Wɩɩsɛ fá há tɩ́ŋ Eli mí a bʋl. Ʋ sɩɛ́ fá wɩ bio kené, ʋ maábio Yoraŋ nɛ́ dí kuorí ʋ nyúú mí; Ziida kuóro Yoraŋ há ká Zozafa bio, ʋ kuorí díí bɩŋsɛ bɛllɛ nyúú mí. 18 Ahaziya wɩ́'állɛ ná káánɛ, arɩ́rʋ́ tʋtʋmɛ́ mɩŋ Ɩzɩrayɛl kuóre wɩ́'állɛ kɛnɔ sɩɛrʋ nɛ́.