Nabɔtɛ sʋʋ naasɛ
21
1 Ɛ́ wɩ́ɛ́ har mɛ́, ná wɩ́ɩ́ ná báá há tʋ́mɛ́: «Nabɔtɛ há lɛ́ Zɩzɩrɛyɛl fá kéŋ vínyi baka Zɩzɩrɛyɛl mɛ́ ráŋ, Samari kuóro Akaabɛ kuójaa laka. 2 Akaabɛ bʋ́l Nabɔtɛ rɩ́ a bʋ́lɛ́: «Píí vínyi baka ná páŋ rɩ́ŋ píí a dɩŋsa záádɛ, bee wɩ́ɛ́, ʋ mɩ́nɩ́ŋ kuójaa laka nɛ́. Ká rɩ́ŋ já nɔ́ŋɔ wér há kʋ́ʋ̃́ a pɛ́ɩ́, ɛ́ ráá má rɩ́ɩ́ nɛ́ có, ɩ makʋ́ meéwie rɩ́ŋ túŋ a pɛ́ɩ́.» 3 Amá Nabɔtɛ bʋ́l Akaabɛ rɩ́ a bʋ́lɛ́: «Rɩ́ Nyuutɩna Wɩɩsɛ pɔ́ rɩ́ŋ sɩ́ŋ ánáwa liwe píí pɛ́ɩ́.»4 Akaabɛ bɩ́rɔ́ col jaa rɩ́ sazɔkɔ́ arɩ́ cɔwɩɩlɔ́ a tɩ́ŋ Zɩzɩrɛyɛl tɩ́náwa Nabɔtɛ há bʋ́lʋ́ rɩ́ a bʋ́lɛ́: «Ŋ wɩ́ŋ ánáwa liwe píí pɛ́ɩ́.» Ɛ́ nʋ́ʋ́ vɛ́ ɓɩdííle ká zʋ́ʋ́ pɩ́nʋ́ gódó daha a kánʋ́ sɩ́ɛ́ bɩ́r caasɛ zeŋ. 5 Ʋ háálɔ Zɩzabɛl zʋ́ nóú, a bɔ́sʋ́ bʋ́lɛ́: «Beé rí kení ɩ sɩɛrʋ zɔkɛ, a mɔ́ rɩ́ɩ́ vɛ́ ɓɩdííle má tɩɩ díí>>» 6 Ʋ sɛ́: «Ŋ bʋ́l Nabɔtɛ ná há lɛ́ Zɩzɩrayɛl rɩ́, a bʋ́lɛ́: “Píí vínyi baka ná yɛllɛ a páŋ, ɛ́ rá má rɩ́ɩ́ nɛ́ có, ŋ sɩ́ já nɔ́ŋɔ a pɛ́ɩ́, ʋ gbel mí.” Amá ʋ sɛ́: «Ŋ wɩ́ŋ vínyi baka píí pɛ́ɩ́.”» 7 Ɛ́ nʋ́ʋ́ háálɔ Zɩzabɛl bʋ́lʋ́ rɩ́ a bʋ́lɛ́: «Ɩ rá tó Ɩzɩrayɛl kuóro rí>> Isi dí ɓɩɛ, ká lo rɩ́ɩ́ sɩɛrʋ tɔrɛ; ŋ nɛ́ sɩ́ la Nabɔtɛ há lɛ́ Zɩzɩrɛyɛl vínyi baka ná a pɛ́ɩ́.»
8 Zɩzabɛl pʋ́ŋsɛ kɛnnɛ Akaabɛ yɩr mɛ́, a pi kuóro nɛ́cíkó a ciki ɛ́ kɛnnɛ mɛ́, ká paa tʋŋ nɩɛ ɓa ká mʋ́ a pá Nabɔtɛ tɔ́ɔ́ nɩhɩ́ɛ̃́sɛ arɩ́rʋ́ sɩ́dííre. 9 Ʋ fa pʋ́ŋsɛ ɛ́ kɛnnɛ sɩɛrʋ a bʋ́lɛ́: «Ɩ́ hé tɔ́ɔ́ nɩɛ náŋá mɛ́, rɩ́wɔ́ vɔwɛ nʋʋsɛ. Ɩ́ lɩsɛ Nabɔtɛ rʋ́ʋ́ nɛ́ a ceme ná sɩ́dííro. 10 Ká rɩ́ɩ́wa a rɩ nɩlaama bɛllɛ kénú sɩ́ɛ́, a nyɛ nyɩ́ɛ́rʋ hóú nʋɔ mɛ́, a bʋ́lɛ́: “Ɩ tʋksɛ Wɩɩsɛ, a tʋksɛ kuóro má.” Ɛ́ har mɛ́, rɩ́ɩ́wa kánʋ́ a lɛ́ tɔ́ɔ́ sɩɛrʋ, a yósú ɓʋ́ arɩ́ dɔ́wʋ́ɔ́.»
11 Nabɔtɛ tɔ́ɔ́ nɩhɩ́ɛ̃́sɛ arɩ́rʋ́ sɩ́dííre ɓɩɛ́na tʋŋ ɛ́ ná Zɩzabɛl fa há pʋ́ŋsɛ́ a hé kɛnɔ ná sɩɛrʋ a pɔ́wɔ́. 12 Ɓa yɩ́rɛ nɩɛ wuu a hé náŋá mɛ́, a a ɓa vɔsɛ nʋʋsɛ ká lɩsɛ Nabɔtɛ ʋ a ceme ná sɩ́dííro. 13 Nɩlaama bɛllɛ ko a ké Nabɔtɛ sɩ́ɛ́, a nyɛ nyɩ́ɛ́rʋ aá hóú nʋɔ mɛ́, nɩɛ ná wuu sɩ́ɛ́ mɛ́, a bʋ́lɛ́: «Nabɔtɛ tʋ́ksɛ Wɩɩsɛ, a tʋ́ksɛ kuóro má.» Ká ɓa kánʋ́ a lɛ́ tɔ́ɔ́ sɩɛrʋ, a yósú ɓʋ́ rɩ́ dɔ́wʋ́ɔ́. 14 Sɩ́dííre ná tʋŋ pá Zɩzabɛl a bʋ́lɛ́: «Ɓa yósi Nabɔtɛ rɩ́ dɔ́wʋ́ɔ́ a ɓʋ́.» 15 Zɩzabɛl há nɩ́ɛ́ rɩ́ ɓa yósi Nabɔtɛ arɩ́ dɔ́wʋ́ɔ́ ɓʋ́, ʋ bʋ́lɔ́ a pá Akaabɛ a bʋ́lɛ́: «Isi mʋ́ a tɩ́llɛ Nabɔtɛ vínyi baka ná, ʋ fa há vɛ́ rʋ́ʋ́ yɛ́llɛ a pɛ́ɩ́, bee wɩ́ɛ́ Nabɔtɛ báá tó, ʋ sʋ́wɔ́.» 16 Akaabɛ há nɩ́ɛ́ rɩ́ Nabɔtɛ sʋ́wɔ́, ʋ ísó a mʋ́ la Nabɔtɛ vínyi baka ná a tɩ́llʋ́.
Nyuutɩna Wɩɩsɛ sɩɛrʋ zɔkɛ Akaabɛ arɩ́rʋ́ háálɔ Zɩzabɛl wɩ́'aalɩ́ ná wɩ́ɛ́
17 Nyuutɩna Wɩɩsɛ bʋ́l Eli há lɛ́ Tisibe rɩ́ a bʋ́lɛ́: 18 «Isi mʋ́ céŋ Ɩzɩrayɛl kuóro Akaabɛ há mɩŋ Samari mí. Ʋ mɩŋ Nabɔtɛ vínyi baka ná sɩɛrʋ a jɩ́já rʋ́ʋ́ tɩ́llʋ́. 19 Bʋ́lʋ́ rɩ́ a bʋ́lɛ́: Ná Nyuutɩna Wɩɩsɛ há bʋ́lʋ́ ná: “Ɩ ɓʋ́ nɛrɔ, ká jɩ́já rɩ́ɩ́ lɔ́ʋ́ baka mʋ́l né mí!” Ká súúri pɔ́ʋ́ a bʋ́lɛ́: Ná Nyuutɩna Wɩɩsɛ báá há bʋ́lʋ́ ná: “Ráŋ ná vásɛ há lenni Nabɔtɛ cɛ́l, ráŋ tɩɩ nɛ́ vásɛ sɩ́ lénní má cɛ́l.”»
20 Akaabɛ bʋ́l a pá Eli a bʋ́lɛ́: «Ŋ dɩŋdɔŋbɩ́nɛ́, ɩ néŋ rí>>» Ɛ́ nɛ́ Eli sɛ́: «Óó, ŋ néí rí, bee wɩ́ɛ́, ɩ ɔ́ɔ́ zɔkɛ Nyuutɩna Wɩɩsɛ sɩɛrʋ. 21 Ɛ́ nɛ́ tɛ Nyuutɩna Wɩɩsɛ sɛ́: “Ŋ sɩ́ a rɩ́ wɩɩla pérí. Ŋ sɩ́ a rɩ́ɩ́ nyɩ́ɩ́kɛ, rɩ́ɩ́ jaa sɩɛrʋ báála wuu nyɩ́ɩ́kɛ Ɩzɩrayɛl mɛ́, yósi arɩ́ nɩɛ ná há tɩ́wɔ́ tɩɩ. 22 Ŋ sɩ́ a rɩ́ɩ́ jaa nɩ́ɛ́sɛ Nɩbatɛ bio Zerobowamɛ jaa arɩ́ Ahiya bio Basa jaa, bee wɩ́ɛ́, ɩ cáásɔ́ a ŋ cɔ́ɛ́ wɛ, ká yiki Ɩzɩrayɛl nɩɛ a hé wɩ́bɔmɔ sɩɛrʋ.” 23 Eli sɛ́ rɩ́ Nyuutɩna Wɩɩsɛ bʋ́l Zɩzabɛl má wɩ́ɛ́ a bʋ́lɛ́: “Vásɛ sɩ́ dí Zɩzabɛl, Zɩzɩrɛyɛl tɔ́ɔ́ zekúme laka.” 24 Akaabɛ jaa nɛrɔ ná wuu há sɩ́ sʋwɛ tɔ́ɔ́ sɩɛrʋ, vasɛ sɩ́ dúú, ká rɩ́ duune má dúú jaa nɛrɔ ná wuu há sɩ́ sʋwɛ gɩr mɛ́.»
25 Ɓa ha wɩ nɛ́ŋ néé rʋ́ʋ́ nɩhɩ̃́ Akaabɛ, a caasɛ cólli Nyuutɩna Wɩɩsɛ mɛ́ aa zɔkɛ́ nyɛ ná. Amá ʋ háálɔ Zɩzabɛl nɛ́ sɩɛ́ fá yíkú ʋ tʋtʋŋ ɛ́. 26 Ʋ cáásɔ́ aa zɔkɛ, a ɓaarɛ venni anɛ Amɔɔrɛ duó nɩɛ ná Nyuutɩna Wɩɩsɛ fá há kíre ká láwɔ́ tɔ́ɔ́ a pá Ɩzɩrayɛl nɩɛ.
Akaabɛ múúrú tɩɩ Wɩɩsɛ sɩ́ɛ́
27 Akaabɛ há nɛ́ ɛ́ wɩ́ɛ́, ʋ kénú gɛnnɛ a cɔ́nnɛ, a pi bɔ́tɔ́kɔsɔ́ a laalɛ, ká vɔ́wʋ́ nʋɔ. Ʋ fáá pɛ́ ɛ́ bɔ́tɔ́kɔsɔ́ daha nɛ́, ká rʋ́ʋ́ nɩ́ɩ́ válɛ́, ʋ naa báá tó dólóŋ. 28 Nyuutɩna Wɩɩsɛ bʋ́l Eli há lɛ́ Tisibe rɩ́ a bʋ́lɛ́: 29 «Ɩ ná Akaabɛ há múúrú tɩɩ a mɔ ɛ́ rɛ́ ŋ sɩ́ɛ́>> Ʋ sɩɛ́ há múúrú tɩɩ nyɛ ná, ŋ báá waá ló rɩ wɩɩla pérú jaa rʋ́ʋ́ há wómó, amá ʋ bio tɛ́ŋ mɛ́ nɛ́, ŋ sɩ́ a rɩ́ wɩɩla zʋ́ʋ́ jaa.»