Eli naasɛ yʋ́ɔ́rɔ́
19
1 Akaabɛ césí wɩ́ɛ́ ná wuu Eli há ɛ́ɛ́ a pɔ́ʋ́ háálɔ Zɩzabɛl arɩ́ ɛ́ ná ʋ há pí tókówi a ɓʋ́ʋ́sɛ Baal wɩ́laabʋ́lla wuu. 2 Zɩzabɛl tʋŋ nɛrɔ rʋ́ʋ́ mʋ́ bʋ́l Eli rí a bʋ́lɛ́: «Rɛ́ rɩ́ cíé, cɛ́rɛ né mí, rɩŋ nɛ́ wɩ́ɩ́ ɛ́ɛ́, anɩ́ɩ́ há á Baal wɩ́laabʋ́lla nyáŋ ɛ́ ná, rɩ́ venni bɛ́ŋsɩ́ŋ, a báá bɩr bɛ́ŋsɩ́ŋ!» 3 Eli há nɛ ɛ́, ʋ isó a fá rʋ́ʋ́ lɔ́ʋ́ mɩɩsɛ. Ʋ há mʋ́ɛ́ peri Ziida dɩtɩ́llɛ Bɛrsɩba, ʋ tɔ́ʋ́ tʋtʋnnɔ ráŋ. 4 Ká tɩɩ va tápʋl pírmí, a mʋ́ gɩrbétéke sɩɛrʋ, a ké tuwie oro mʋ́l, ká sʋl sʋʋ a bʋ́lɛ́: «Nyuutɩna Wɩɩsɛ, ŋ bɔlɔ́! Mʋ́l né mí, láŋ mɩɩsɛ! Bee wɩ́ɛ́, ŋ wɩ́ŋ ánáwa mɛ́ cícó.»5 Ká pɛ́ dóŋ tuwie ná mʋ́l. Amá malɩka nɔ́ŋɔ kúó tɩ́kʋ́ mɛ́ ká bʋ́lɛ́: «Isi a dí ɓɩɛ!» 6 Ʋ bélú nyúú rí, rɩ mɩ́ŋhalɩ́ nɛ́ sákɛ dɔ́wʋ́lʋma daha, nyii rɩ́ baŋgʋrɛ lɛ́l. Ʋ pii dí, a pi nyii ná nyɔ a sakɛ ká bɩr pɛ́. 7 Nyuutɩna Wɩɩsɛ malɩka ná bɩrko a tɩ́kʋ́ mɛ́ ká bʋ́lɛ́: «Isi a dí ɓɩɛ, bee wɩ́ɛ́, ŋmɛ́nɔ ná ɩ há sɩ́ pi, ʋ bol.» 8 Eli isi a dí ɓɩɛ ká nyɔ nyii. Ɓɩdííle ná pɔ́ʋ́ dóé, ʋ wólli a va wɔhɔwa mɛɛ́sɛllɛ arɩ́ tɩ́taŋa má mɛɛ́sɛllɛ ká mʋ́ pérí Hɔrɛbɛ, Wɩɩsɛ paalɔ ná.
Nyuutɩna Wɩɩsɛ duóri Eli naasɛ
9 Eli há pérí Hɔrɛbɛ, ʋ zʋ́ɔ́ a cɔ paalɔbʋɔ sɩɛrʋ. Nyuutɩna Wɩɩsɛ bɔ́sʋ́ a bʋ́lɛ́: «Eli, ɩɩ́ já bee rɛ́ɛ́>>» 10 Ɛ́ nɛ́ Eli sɛ́: «Nyuutɩna Wɩɩsɛ, Doe wuu tɩna Wɩɩsɛ, ŋ cóí kɩ́ŋkáŋ, ɛ́ nɛ́ tɛ ŋ báá wɩ Ɩzɩrayɛl nɩɛ wɩ́'állɛ ná wúó nyammɛ. Bee wɩ́ɛ́, ɓa zɔ́kɩ́ rɩ́wɔ́ pɛ́kɛ nʋtʋmɛ ná, a zɔ́kɩ́ korsi ná, ká ɓʋ́ɩ́ wɩ́laabʋ́lla ná arɩ́ tókówi. Ŋ dʋŋɔ nɛ́ káánɛ, ká ɓa jɩ́ja rɩ́wɔ́ lɩ́sɩ́ŋ má mɩɩsɛ.»
11 Nyuutɩna Wɩɩsɛ sɛ́: «Lɛ́, a cɩ́nɩ́ŋ sɩ́ɛ́, paalɔ ná daha, ŋ sɩ́ ko a daarɛ.» Pozeno lú arɩ́ dóé, aá cɛsɛ pallɛ, aá céŋi bʋ́ɔ́ Nyuutɩna Wɩɩsɛ sɩ́ɛ́, amá Nyuutɩna Wɩɩsɛ fa to poo ná sɩɛrʋ. Poo ná há dáárɛ́, tíé zíkló; amá Nyuutɩna Wɩɩsɛ fá to tíé zíkle ná sɩɛrʋ.
12 Tíé ziklé ná há dáárɛ́, níŋ ní kúé, amá Nyuutɩna Wɩɩsɛ fá to níŋ ná sɩɛrʋ. Níŋ ná há dáárɛ́, pofɩɛsɩ́ nɛ́ fɩɛsɛ́. 13 Eli há nʋ́ʋ́ fɩɛsɛ́, ʋ púú kóóti a tɔ́ʋ́ sɩ́ɛ́ mɛ́, ká lɩɩ cɛ́ paalɔbʋɔ ná nʋɔ mɛ́. Liŋó báá bʋ́lʋ́ rɩ́ a bʋ́lɛ́: «Eli, ɩɩ́ já bee rɛ́ɛ́>>» 14 Ɛ́ nɛ́ Eli sɛ́: «Nyuutɩna Wɩɩsɛ, Doe wuu tɩna Wɩɩsɛ, ŋ cóí kɩ́ŋkáŋ, ɛ́ nɛ́ tɛ ŋ báá wɩ Ɩzɩrayɛl nɩɛ wɩ́'állɛ ná wúó nyammɛ. Bee wɩ́ɛ́, ɓa zɔ́kɩ́ rɩ́wɔ́ pɛ́kɛ nʋtʋmɛ ná, a zɔ́kɩ́ korsi ná, ká ɓʋ́ɩ́ wɩ́laabʋ́lla ná arɩ́ tókówi. Ŋ dʋŋɔ nɛ́ káánɛ, ká ɓa jɩ́jáŋ má mɩɩsɛ lɩ́sɛ.»
15 Nyuutɩna Wɩɩsɛ bʋ́l Eli rɩ́ a bʋ́lɛ́: «Bɩr pí gɩrbétéke ŋmɛ́nɔ ná ɩ fa há píé a ko, a mʋ́ Damaasɛ. Mʋ́ ɔ́ŋsɛ lɩ́sɛnʋʋ a hé Hazayɛl mɛ́, rʋ́ʋ́ dí Siiri tɔ́ɔ́ kuorí. 16 A ɔ́ŋsɛ lɩ́sɛnʋʋ a hé Nimisi bio Zeyu mí rʋ́ʋ́ dí Ɩzɩrayɛl kuorí, a ɔ́ŋsɛ lɩ́sɛnʋʋ a hé Safɛtɛ bio Elize há lɛ́ Abɛlmɛhɔla má mɛ́, rʋ́ʋ́ a wɩ́laabʋ́llʋ a lɛ́ɩ́ nyúú mí. 17 Nɛrɔ ná wuu Hazayɛl tókowi há sɩ́ gúlú mí, Zeyu sɩ́ ɓʋ́ʋ́, nɛrɔ ná má Zeyu tókówi há sɩ́ gúlú mí, Elize sɩ́ ɓʋ́ʋ́. 18 Amá, Ɩzɩrayɛl mɛ́, ŋ sɩ́ lo rɩ́ nɩɛ bʋ́ɩ́walpɛ, há wɩ Baal sɩ́ɛ́ ɓírmé, a wʋ́ʋ́ kórmé, ká mɩɩsɛ.»
Eli lɩ́sɛ Elize rʋ́ʋ́ lɔ́ʋ́ nyúú mí
19 Eli há lɩ́ ráŋ aá col, ʋ ná Safɛtɛ bio Elize rʋ́ʋ́ párʋ́. Ʋ fá kéŋ nɔpárɛ́ bɛllɛwa buke fí arɩ́ bɛllɛ nɛ́, ʋ tɩɩ nɛ́ sɩɛ́ fá kéŋ fí arɩ́ bɛllɛ nyúú mí nɛsɛ ná aá parɛ. Eli tɩŋʋ́ laka a daarɛ, ká púú kóóti a yó tɔ́ Elize mí. 20 Elize pi nɛsɛ ná a tá ráŋ, ká fá a tɩ́ŋ Eli mí a bʋ́lɛ́: «Ló rɩ́ŋ mʋ́ bɔ́llɩ́ŋ áná rɩ́rɩ́ŋ maá, ká ko tɩ́ŋɩ́ mɛ́.» Eli sɛ́: «Mʋ́ ká bɩrko, a tɩŋ wɩ́ɩ́ ná ŋ há píé ɛ́ɩ́ mɛ́ wɩ́ɛ́.»
21 Elize wʋ́ʋ́ mɛ́ tɩ́ŋɛ́ ká bɩr mʋ́ʋ́ baka, a kɛ́sʋ́ nɛsɛ ná bɛllɛ a ɔsɛ vʋk. A pi nɛsɛ baŋdaasɛ ná arɩ́ tórko ná a marɛ níŋ a wasɛ nɛsɛ ná namɩɛ a pá nɩɛ ná fa há mɩ́ŋ baka ná mɛ́, ɓa dí. Kɔ́ʋ́ isi tɩŋ Eli mí, a tʋ́ŋ aá pɔ́ʋ́.