Abiyaŋ dí Ziida kuorí
15
1 Nebatɛ bio Zerobowamɛ kuorí díí bɩŋsɛ fí arɩ́ córi nyúú mí ní, Abiyaŋ dí Ziida kuorí. 2 Ʋ dí kuorí bɩŋsɛ botoro ní Zerizalɛmɛ mɛ́. Ʋ máá yɩr nɛ́ fá ká Maaka, Abɩsalɔŋ tolo ní.3 Abiyaŋ césú áná wɩ́bɔma ná wuu, ʋ áná há la sɩ́ɛ́ a. Kɔ́ʋ́ sɩɛrʋ wuu má fa wɩ Nyuutɩna Wɩɩsɛ, ʋ Wɩɩsɛ mɛ́ cɔ́ɛ́ anʋ́ naabál Davidi sɩɛrʋ fa há cɔ́ Nyuutɩna Wɩɩsɛ mɛ́ ɛ́. 4 Davidi wɩ́ɛ́ nɛ́ tɛ Nyuutɩna Wɩɩsɛ, ʋ Wɩɩsɛ pɔ́ʋ́ bio ʋ nɛ́ caanɔ́ Zerizalɛmɛ mɛ́, ʋ bio ná há sɩ́ lɔ́ʋ́ nyúú mí a ká Zerizalɛmɛ ké. 5 Davidi fa á Nyuutɩna Wɩɩsɛ satɔ́rɛ́wɩ́ɛ́, a wʋ́ʋ́ wɩ́makɛ́ ná oro wuu mí cʋ́rɛ́ ʋ hiẽ́só wuu mí, rʋʋ nɛ́ tóú rɩ́ Uri há lɛ́ Hɛtɛ wɩ́ɩ́ ná dʋŋɔ́.
6 Robowamɛ hiẽ́só wuu mí, nɛsɛ de mɩ́nʋ́ rɩ́ Zerobowamɛ pɛ́kɛ nɛ́. 7 Abiyaŋ wɩ́'állɛ ná náŋá mɩ́ŋ Ziida kuóre wɩ́'állɛ kɛnɔ sɩɛrʋ nɛ́. Nɛsɛ fá mɩnʋ́ má rɩ́ Zerobowamɛ pɛ́kɛ. 8 Abiyaŋ há sʋ́wɛ́, a mʋ́ʋ́ ánáwa rɩ́, ɓa húú Davidi zʋ́ɔ́ mɛ́ nɛ́, kɔ́ʋ́ bio Aza nɛ́ lɔ́ʋ́ nyúú mí a dí kuorí.
Aza dí Ziida kuorí
9 Zerobowamɛ há dí Ɩzɩrayɛl kuorí, ʋ bɩŋsɛ mɛrɛ́ nyúú mí ní, Aza má dí Ziida kuorí. 10 Ʋ dí kuorí bɩŋsɛ mɛɛ́sɛllɛ arɩ́ balá nɛ́ Zerizalɛmɛ mɛ́. Ʋ máá yɩr nɛ́ fa ká Maaka, Abɩsalɔŋ toló.
11 Aza a Nyuutɩna Wɩɩsɛ satɔ́rɛ́wɩ́ɛ́ anʋ́ naabál Davidi. 12 Ʋ kiri nɩɛ ná há pi cɔ́rmɛ́ a makɛ veŋɓaarɛwɩ́ɩ́, tɔ́ɔ́ ná sɩɛrʋ, ká zɔkɛ veŋgúlli ná wuu ʋ ánáwa fa há ɛ́ɛ́. 13 Ʋ lɩ́sʋ́ máá Maaka má tɩɩ fá há ká hákuór, ʋ kuorí díí mí, beé wɩ́ɛ́, ʋ a wɩ́tɔk, ʋ há má veŋgúlbɔmɔ oro a pá veno ná ɓa háá yɩ́rɛ Akera. Aza ɔ́ɔ́ ɓa yɛ́rkʋ́ ɛ́ veŋgúlbɔmɔ a paa tuwi Sediroŋ polo nyɩkɛ. 14 Amá ʋ wɩ dɩɓaarɛ́ ná é zɔ́kɛ́. Aza hiẽ́só wuu mí, ʋ fa có Nyuutɩna Wɩɩsɛ arɩ́rʋ́ sɩɛrʋ wuu. 15 Ʋ ɔ́ɔ́ ɓa pa onni ná ʋ áná arɩ́rʋ́ tɩɩ há píé a satɔ́rpállɛ a pá Nyuutɩna Wɩɩsɛ ʋ tɩ́llɩ́wɔ́, a kaa ko bil Nyuutɩna Wɩɩsɛ Wɩcʋɔlɩjɩzeno sɩɛrʋ: wárɛ, salmɛ arɩ́ cɩksɛ náŋa.
16 Aza arɩ́ Ɩzɩrayɛl kuóro Basa hiẽ́só wuu mí, nɛsɛ fa mɩ́ŋwɔ́ pɛ́kɛ. 17 Ɩzɩrayɛl kuóro Basa mʋ́ɔ́ rʋ́ʋ́ yo Ziida, a sɔ zeŋe a kíl Rama tɔ́ɔ́ a makɛ rʋ́ʋ́ kɛ́rɛ Ziida kuóro Aza rɩ́rʋ́ nɩɛ mɛ́ rɩ́wɔ́ sɩ́ ráŋ tɩŋʋ́.
18 Ɛ́ nɛ́ Aza pi wárɛ arɩ́ salmɛ ná há káánɛ a mɩŋ Nyuutɩna Wɩɩsɛ jaa sɩɛrʋ kuóɓɩɛ ná sɩɛrʋ arɩ́ kuóro tɩɩ jaa kuóɓɩɛ ná wuu, a pɔ́ʋ́ tʋtʋnna rɩ́wɔ́ kaa mʋ́ Damaasɛ a pá Siiri kuóro Bɛnɛhadaadɛ, há ká Tabɩrɩmɔŋ bio ká a Hɩzɩɔŋ nihĩ́. Ká bʋ́lʋ́ rɩ́ a bʋ́lɛ́: 19 «Lo rɩ́ŋ rɩ́rɩ́ tʋ́ŋ nʋɔ mɛ́, anɩ́rá ánáwa fa há tʋ́ŋ nʋɔ mɛ́ ɛ́. Náŋ zilé onni, wárɛ arɩ́ salmɛ nɛ́ ŋ tɛ rɩ́wɔ́ kaa ko a pɛ́ɩ́. Mʋ́ zɔkɛ nʋtʋmɛ ná há mɩ́nɩ́ rɩ́ Ɩzɩrayɛl kuóro Basa pɛ́kɛ, a makɛ rʋ́ʋ́ lalyoore báá sɩ́ŋ yó.»
20 Bɛnɛhadaadɛ saŋ ɛ́ ná Aza há sʋ́lɛ́, a tʋ́mʋ́ sóójihɩ́ɛ̃́sɛ ɓa mʋ́ yo Ɩzɩrayɛl tɔ́nɛ́. Ɓa yóó a la tɔ́nɛ nyáŋ nɛ́: Yɔŋ, Daŋ, Abɛlbɛtɛmaaka, Kɩnɩrɔtɛ dɩtɩ́llɛ arɩ́ Nɛfɩtalɩ dɩtɩ́llɛ ná wuu há káánɛ. 21 Basa há nɛ́ ɛ́ labáárɛ, ʋ tá Rama zeŋe sɔ́ɛ́ kíle ká bɩr mʋ́ ké Tirisa mɛ́. 22 Ɛ́ nɛ́ kuóro Aza yɩ́rɛ Ziida nɩɛ wuu hé náŋá mɛ́, coki tá tó. Ɛ́ nɩɛ mʋ́ a pa dɔ́wʋ́ɔ́ ná rɩ́ dole ná Basa fa haá já rʋ́ʋ́ pii sɔ́ zeŋe, a kíl Rama tɔ́ɔ́, a kaa ko. Kuóro Aza píwó a sɔ́ zeŋe a kíl Geba ná há mɩŋ Bɛŋzamɛ dɩtɩ́llɛ arɩ́ Mispa.
23 Aza wɩ́'állɛ ná náŋá wuu mɩŋ Ziida kuóre wɩ́'állɛ kɛnɔ sɩɛrʋ nɛ́. Ʋ ballɩ́wa dí wuu, wɩ́ɛ́ ná wuu ʋ há ɛ́ɛ́ arɩ́ tɔ́nɛ ná ʋ há sɔ́ zeŋe a kɛ́rɛ, ɓa wuu wɩ́ɛ́ mɩŋ ɛ́ kɛnɔ sɩɛrʋ nɛ́. Amá ʋ nɩɩnɛ́ tɛ́ŋ mɛ́, naasɛ pʋɔlɩ́ kenú. 24 Aza há sʋ́wɛ́, a mʋ́ʋ́ ánáwa rɩ́, ɓa húú ʋ ánáwa dɩhúí ní, ʋ naabál Davidi zʋ́ɔ́ mɛ́. Ʋ bio Zozafa nɛ́ lɔ́ʋ́ nyúú mí a dí kuorí.
Nadaabɛ dí Ɩzɩrayɛl kuorí
25 Ziida kuóro Aza kuorí bɩŋsɛ bɛllɛ nyúú mí ní Zerobowamɛ bio Nadaabɛ má dí kuorí Ɩzɩrayɛl mɛ́. Ʋ dí kuorí bɩŋsɛ bɛllɛ nɛ́ Ɩzɩrayɛl mɛ́. 26 Ʋ ɔ́ɔ́ zɔkɛ Nyuutɩna Wɩɩsɛ mɛ́; ʋ púú áná nabulle, a tʋŋ wɩ́bɔma ná ʋ fa há yikí Ɩzɩrayɛl nɩɛ a héwó sɩɛrʋ.
27 Ɛ́ nɛ́ Ahiya bio Basa há lɛ́ Ɩsakaarɛ jɩmʋ́l gɩgɛ Nadaabɛ ɓʋ́ɩ́. Ʋ ɓʋ́ Nadaabɛ Gɩbɛtɔŋ mɛ́, tɛ́ŋ ná mɛ́ ʋ rɩ́rʋ́ sóójiwa há cúmé aá yo Gɩbɛtɔŋ nɩɛ, Filisiti nɩɛ dɩtɩ́llɛ. 28 Ziida kuóro Aza kuorí bɩŋsɛ botoro nyúú mí ní Basa ɓʋ́ Nadaabɛ ká lɔ́ʋ́ nyúú mí, a dí kuorí. 29 Tɛ́ŋ ná mɛ́ ʋ há dí kuorí, ʋ ɓʋ́ʋ́sɛ Zerobowamɛ jaa nɩɛ wuu ní, nɛ́ŋ wɩ káánɛ, anɛ ɛ́ Nyuutɩna Wɩɩsɛ fa há bʋ́lɛ́ a tɩŋʋ́ wɩ́laabʋ́llɔ Ahiya há lɛ́ Silo mí. 30 Zerobowamɛ wɩ́bɔma ná ʋ há ɛ́ɛ́, ká yiki Ɩzɩrayɛl nɩɛ má a héwó sɩɛrʋ, nɛ́ ɛ́ɛ́ Nyuutɩna Wɩɩsɛ, Ɩzɩrayɛl Wɩɩsɛ cɔ́ɛ́ wɛ, ʋ pi wɩ́ɛ́ nyáŋ wuu tʋ́mʋ́ mɛ́. 31 Nadaabɛ wɩ́állɛ ná náŋa arɩ́rʋ́ wɩ́ɛ́ ná wuu ʋ há ɛ́ɛ́ nɛ́ ɓa pʋ́ŋsɛ hé Ɩzɩrayɛl kuóre wɩ́'állɛ kɛnɔ sɩɛrʋ.
32 Aza rɩ́ Ɩzɩrayɛl kuóro Basa mɩnɛ́ wuu mí, lal mɩ́ŋwɔ́ pɛ́kɛ.
Basa dí Ɩzɩrayɛl kuorí