Wɩɩsɛ wɩ́laabʋ́llɔ Ahiya bʋ́l Zerobowamɛ bio sʋʋ wɩ́ɛ́
14
1 Ɛ́ tɛ́ŋ tɩɩ mɛ́, Zerobowamɛ bio Abiya, ɓal pʋɔlɩ́. 2 Zerobowamɛ bʋ́lʋ́ háálɔ rɩ́ a bʋ́lɛ́: «Isi, a bɩ́rsɩ́ tɩɩ, rɩ́wɔ́ sɩ́ wóllí zɩ́ŋ rɩ́ɩ́ káŋ háálɔ nɛ́, ká rɩ́ɩ́ mʋ́ Silo. Wɩɩsɛ wɩ́laabʋ́llɔ Ahiya mɩŋ ráŋ nɛ́; ʋ nɛ́ sɛ́ rɩ́ŋ sɩ́ dí jamáŋ né kuorí. 3 Ɩ sɩ́ pɛ́ ká dɩpɛ́ŋwa fí rɩ́ gáátówa, arɩ́ tʋʋ má koŋyuo sɩ́ɩ́, a mʋ́ nóú; ká rʋ́ʋ́ makɛ wɩ́ɩ́ ná há sɩ́ peri heŋbólwie ná a pɛ́ɩ́.» 4 Zerobowamɛ háálɔ ná tʋŋ ɛ́ nɛ́, ʋ ísó a mʋ́ Silo, a mʋ́ zʋ Wɩɩsɛ wɩ́laabʋ́llɔ Ahiya jaa. Ahiya sɩ́ɛ́ fa wɩ ráŋ ná, ʋʋ́ bíbel ká waá ná, ʋ há nɩ́ɩ́nɛ́ wɩ́ɛ́. 5 Nyuutɩna Wɩɩsɛ fa bʋ́l Ahiya rɩ́ a bʋ́lɛ́: «Ná Zerobowamɛ háálɔ́ nɛ́ ŋmɛ́nɔ́ mɛ́ aá kóí rɩ́, rɩ́ɩ́ bʋ́l wɩ́ɩ́ ná há mʋ́ɛ́ a tɩ́ɩ́nʋ́ bio pʋɔlɩ́ mɛ́. Nyɛ rɩ́ nyɛ nɛ́ mɔhɛ̃́ rɩ́ɩ́ bʋ́l pɔ́ʋ́. Rʋʋ nɛ́ sɩɛ́ kúé má, ʋ sɩ́ ɔ́ʋ́ tɩɩ anʋ́ʋ́ ká nɩhúó.» 6 Ʋ há kúé aá peri dánnʋɔ, Ahiya nʋ́ʋ́ naasɛ dɔ́mɛ́, ʋ sɛ́: «Zerobowamɛ háálɔ́, zʋ́! Bee rí tɛ ɩ ɛ́ɩ́ tɩɩ, anɩɩ ká nɩhúó>> Ɓa sɩɛ́ tʋ́mɩ́ŋ rɩ́ŋ bʋ́l wɩ́lʋmɔ nɛ́ pɛ́ɩ́. 7 Mʋ́ bʋ́l pá Zerobowamɛ a bʋ́lɛ́: Ná Nyuutɩna Wɩɩsɛ, Ɩzɩrayɛl Wɩɩsɛ há sʋ́ʋ́ ná: “Ŋ lɩ́sɩ́ nɩɛ sɩɛrʋ, a lo ɩ a Ɩzɩrayɛl nɩɛ, ŋ jamáŋ ná kuóro; 8 ŋ lá kuorí ná Davidi jaa nɩɛ nɛ́sɛ mɛ́ a pɛ́ɩ́; amá ɩ é wɩ́ɩ́ tɩɩ kéné anɩ́ŋ tʋtʋnnɔ Davidi há tɩ́ŋɩ́ŋ wɩ́makɛ́, ká tɩ́ŋɩ́ŋ arɩ́rʋ́ sɩɛrʋ wuu, a a wɩ́ɛ́ ná haá tɔ́rɩ́ŋ sɩɛrʋ. 9 Ɩ bɔ́ŋbɔ́ŋ ɛ́ɛ́ nɛ́ kɛ́ nɩɛ ná wuu há lɛ́ɩ́ sɩ́ɛ́: Ɩ má veŋgúlli, a luki náŋa má ɓa ɛ́ɩ́ wɩŋsa, ɛ́ zɔ́kɩ́ŋ sɩɛrʋ; kɛ́ɩ́ bɩ́rɩ́ har a yákɩ́ŋ tɩɩ.10 Ɛ́ nɛ́ tɛ́, ŋ sɩ́ a rɩ́ wɩɩla zʋ́ Zerobowamɛ jaa, ŋ sɩ́ ɓʋ́ʋ́sʋ́ heŋbólli wuu, yósi ɛ́ ráá má nɩɛ ná há tɩ́wɔ́ tɩɩ. Ŋ sɩ́ píési Zerobowamɛ jaa nɩɛ wuu, anɛ caa háá píési jaa kʋɔra ɛ́. 11 Zerobowamɛ jaa nɛrɔ ná é wuu há sɩ́ sʋwɛ tɔ́ɔ́ sɩɛrʋ, vásɛ nɩ́ɩ́ díé. Kɔ́ʋ́ ná má wuu há sɩ́ sʋwɛ gɩr mɛ́, duune níí díé.” Bee wɩ́ɛ́ Nyuutɩna Wɩɩsɛ nɛ́ bʋ́l ɛ́.»
12 Ɩ má tɩɩ, Zerobowamɛ háálɔ́, isi mʋ́ jaa. Tɛ́ŋ ná mɛ́, ɩ naa há sɩ́ nʋɔsɛ tɔ́ɔ́ ná sɩɛrʋ, bio ná sɩ́ sʋwɛ. 13 Ɩzɩrayɛl nɩɛ wuu sɩ́ wúú yuó, ká púú hu. Bee wɩ́ɛ́, Zerobowamɛ jaa nɩɛ wuu sɩɛrʋ, ʋ dʋŋɔ́ nɛ́ sɩ́ ka lɛlbule. Zerobowamɛ jaa nɩɛ wuu sɩɛrʋ, ʋ dʋŋɔ́ mɛ́ nɛ́, Nyuutɩna Wɩɩsɛ, Ɩzɩrayɛl Wɩɩsɛ ná wɩ́wero. 14 Nyuutɩna Wɩɩsɛ sɩ́ bil kuóro nɔ́ŋɔ Ɩzɩrayɛl mɛ́, rʋ́ʋ́ ɓʋ́ʋ́sɛ Zerobowamɛ jaa nɩɛ wuu. Zaa tɩɩ nɛ́ sɩɛ́. Ɛ́ nɛ́ dé. Ʋ báá to wɩ́dáánɛ́! 15 Nyuutɩna Wɩɩsɛ sɩ́ bɛŋsɛ Ɩzɩrayɛl nɩɛ; rɩ́wɔ́ ɓallɛ anɛ fuo nʋɔ nyɔ́ɔ́. Ʋ sɩ́ kiri Ɩzɩrayɛl nɩɛ tíwero ná mɛ́, ʋ fá há píé a pɔ́wɔ́ ánáwa, rɩ́wɔ́ pɩsɛ náŋá mɛ́, a daarɛ Ɩfɩratɛ fuo cɔɔ ná nɔ́ŋɔ, bee wɩ́ɛ́ ɓa má veŋgúlli dácɔ́ŋsɛ, ɛ́ nɛ́ sɩɛ́ zɔkɛ Nyuutɩna Wɩɩsɛ sɩɛrʋ. 16 Ʋ sɩ́ vɛ Ɩzɩrayɛl a tá, a tɩŋ Zerobowamɛ wɩ́bɔma ná wɩ́ɛ́, arɩ́rʋ́ há yíkí Ɩzɩrayɛl nɩɛ a héwó sɩɛrʋ wɩ́ɛ́.»
17 Zerobowamɛ háálɔ isi a mʋ́ Tirisa. Tɛ́ŋ ná mɛ́ ʋ há pérí jaa dánnʋɔ mɛ́ nɛ́ ká heŋbólwie ná sʋʋ. 18 Ɓa húú, ká Ɩzɩrayɛl nɩɛ wuu wúú yuó, anɛ ɛ́ Nyuutɩna Wɩɩsɛ fa há tɩ́ŋʋ́ wɩ́laabʋ́llɔ Ahiya mɛ́ a bʋ́l.
19 Zerobowamɛ wɩ́'állɛ ná náŋá, ʋ lalwa ná ʋ há yóé, ʋ kuorí díí wɩ́ɛ́ wuu ní ɓa pʋ́ŋsɛ hé Ɩzɩrayɛl kuóre wɩ́'állɛ kɛnɔ sɩɛrʋ nɛ́. 20 Kuóro Zerobowamɛ dí kuorí bɩŋsɛ mɛrɛ́ arɩ́ bɛllɛ nɛ́; ká sʋwɛ a mʋ́ʋ́ ánáwa rɩ́. Ʋ bio Nadaabɛ nɛ́ lɔ́ʋ́ nyúú mí.
Ziida kuóro Robowamɛ wɩ́ɛ́
21 Salomoŋ bio Robowamɛ há dí Ziida kuorí, rʋʋ fá kéŋ bɩŋsɛ mɛɛ́sɛllɛ arɩ́ balá nɛ́. Ʋ dí kuorí bɩŋsɛ fí arɩ́ balpɛ nɛ́ Zerizalɛmɛ mɛ́, tɔ́ɔ́ ná Nyuutɩna Wɩɩsɛ há bɛ́llɛ a lɩ́sɛ Ɩzɩrayɛl jɩmʋ́ʋ́la wuu sɩɛrʋ, rɩ́wɔ́ cʋ́cʋ́ɔ́lʋ́ ráŋ. Robowamɛ máá yɩr nɛ́ fá ká Naama, a lɛ́ Amɔŋ nɩɛ tɔ́ɔ́.
22 Ziida jɩmʋ́l nɩɛ má ɔ́ɔ́ zɔkɛ Nyuutɩna Wɩɩsɛ mɛ́, a pɔŋ Nyuutɩna Wɩɩsɛ cɔ́wɩ́ɩ́lɔ a héwó tɩɩ mɛ́, a kɩ́llɩ́wɔ́ ánáwa, a tɩ́ŋwɔ́ wɩ́bɔma mɛ́. 23 Ɓa má lɩ́sɛ dɩɓaarɛ́ a pɔ́wɔ́ tɩɩ, a cɔ́ŋsɛ dáwʋ́ɔ́ arɩ́ daasɛ ná ɓa há cɔ́ŋsɛ́ aá yɩ́rɛ Asera, dúŋduóŋ gbó é wuu daha arɩ́ tulɔɔ é wuu mʋ́l. 24 Báála arɩ́ háála náŋá fá pi cɔ́rmɛ, a makɛ veŋɓaarɛwɩ́ɩ́ rɛ́ tɔ́ɔ́ ná sɩɛrʋ. Duowa ná Nyuutɩna Wɩɩsɛ fa há kiré ká la dɩhɩ̃́ ná a pá Ɩzɩrayɛl nɩɛ, ɓa wɩ́bɔma ná wuu tɩɩ nɛ́ ɓa ɩ́'a.
25 Robowamɛ kuorí díí bɩŋsɛ bɔmmʋ́ɔ́ nyúú mí, Ezipiti kuóro Sikilagɛ mʋ́ɔ́ rʋ́ʋ́ yo Zerizalɛmɛ. 26 Ʋ pá Nyuutɩna Wɩɩsɛ Wɩcʋɔlɩjɩzeno ná arɩ́ kuóro tɩɩ jaa sɩɛrʋ kuó onni, a páwɔ́ wuu a kaa col. Arɩ́ salmɛ hɔ́kɛ́rsɛ́ ná má tɩɩ Salomoŋ fá há ɛ́ɛ́. 27 Ɛ́ nɛ́ kuóro Robowamɛ a, ɓa luki kɔmɔ́ hɔ́kɛ́rsɛ́ a héwó gbel mí. Ʋ a soójihɩ́ɛ̃́sɛ ná fa há cɛ́ kuóro jaa dánnʋ́ɔ́ mɛ́ aá pɔ́, ɓa bíbélwó mí. 28 Tɛ́ŋ wuu mí, rɩ kuóro ní kúé aá mʋ́ Nyuutɩna Wɩɩsɛ Wɩ́cʋɔlɩjɩzeno, sóójiwa ná nɛ́ pɔ́wɔ́ aá, ká nɛ́ bɩr káŋwɔ́ ko aá bíl jaa ná sɩɛrʋ, aá bélwó mí.
29 Robowamɛ wɩ́'állɛ ná náŋa wuu ní ɓa pʋ́ŋsɛ hé Ziida kuóre wɩ́'állɛ kɛnɔ sɩɛrʋ. 30 Lal fa dé mɩŋ Robowamɛ arɩ́ Zerobowamɛ pɛ́kɛ nɛ́ tɛ́ŋ wuu mí.2 31 Robowamɛ há kúé sʋwɛ, a mʋ́ʋ́ ánáwa rɩ́, ɓa húú ʋ ánáwa lɛlbule sɩɛrʋ nɛ́, Davidi zʋ́ɔ́ mɛ́. Ʋ máá yɩr nɛ́ fá ká Naama, a lɛ́ Amɔŋ nɩɛ tɔ́ɔ́. Ʋ bio Abiyaŋ nɛ́ lɔ́ʋ́ nyúú mí a dí kuorí.