Wɩɩsɛ wɩ́laabʋ́llɔ gáásɛ wɩ́ɛ́ Bɩtɛl koro nyúú
13
1 Tɛ́ŋ ná mɛ́ Zerobowamɛ háá nyɩkɛ tulaaléwa koro ná daha, Nyuutɩna Wɩɩsɛ tʋ́mʋ́ wɩ́laabʋ́lla nɔ́ŋɔ, ʋ lɛ Ziida a mʋ́ Bɩtɛl. 2 Ʋ gáásɛ wɩ́ɛ́ koro ná rɩ́, Nyuutɩna Wɩɩsɛ yɩr mɛ́ a bʋ́lɛ́: «Koro! koro! zesi Nyuutɩna Wɩɩsɛ há sʋ́ʋ́ ná: Ɓa sɩ́ lʋl heŋbole David duo nɩɛ sɩɛrʋ, rʋ́ʋ́ yɩr dí Zoziase. Ʋ sɩ́ kɛsɛ veŋgúlli vʋk'ɔɔsa ná há físi tulaalewa aá pɛ́ɩ́, a ɔsɛ vʋk a pɛ́ɩ́. Ká físi nɩbííne heŋgbele má pɛ́ɩ́.» 3 Ɛ́ kal tɩɩ, Wɩɩsɛ wɩ́laabʋ́llɔ ná bʋ́l nyɩnɛ wɩ́ɛ́ a bʋ́lɛ́: «Koro ná sɩ́ yɛ́rkɛ́, ká rɩ́ tapʋmmɔ ná nʋʋ há búúlé ɓɛ́sɛ. Ɛ́ nɛ́ rɩ́ɩ́wa sɩɛ́ zɩŋ rɩ́ Nyuutɩna Wɩɩsɛ nɛ́ ɓɩɛ́na bʋ́lɛ́.»4 Tɛ́ŋ ná mɛ́ kuóro Zerobowamɛ há nɛ́ wɩ́ɛ́ ná Wɩɩsɛ wɩ́laabʋ́llɔ há gáásɛ Bɩtɛl koro ná rɩ́, ʋ tɛ́rʋ́ nɛ́sɛ koro ná daha ká cáási a bʋ́lɛ́: «Ɩ́ ká báálɔ né!» Amá Zerobowamɛ nɛ́sɛ ná ʋ há fá tɛ́rɛ́ rʋ́ʋ́ ká Wɩɩsɛ wɩ́laabʋ́llɔ ná dé sʋwɛ nɛ́, a terki, ʋ baá wʋ́ʋ́ wo kaá gʋrɛ. 5 Koro ná yɛrkɛ́, ká tapʋmmɔ ná nʋʋ há búúlé bɩ́sɛ, anɛ ɛ́ Wɩɩsɛ wɩ́laabʋ́llɔ ná fá há bʋ́lɛ́ Nyuutɩna Wɩɩsɛ yɩr mɛ́. 6 Ɛ́ nɛ́ kuóro bʋ́l Wɩɩsɛ wɩ́laabʋ́llɔ ná rɩ́ a bʋ́lɛ́: «Ŋŋ́ sʋlɩ́, sʋl Nyuutɩna Wɩɩsɛ, ɩ Wɩɩsɛ a páŋ, jɛ́nnʋ́ rʋ́ʋ́ lo rɩ́ŋ nɛ́sɛ wólli gʋrɛ.» Wɩɩsɛ wɩ́laabʋ́llɔ ná sʋl Nyuutɩna Wɩɩsɛ, ʋ lo kuóro nɛ́sɛ ná bɩr wólli a gʋrɛ, a bɩr nʋ́ʋ́ nɩɩsɔ.
7 Kuóro ná bʋ́l pá Wɩɩsɛ wɩ́laabʋ́llɔ ná a bʋ́lɛ́: «Ko ráá zʋ́ŋ jaa rɩ́ɩ́ dí ɓɩɛ, ká rɩ́ŋ dí zilé a pɛ́ɩ́.» 8 Wɩɩsɛ wɩ́laabʋ́llɔ ná bʋ́l pá kuóro Zerobowamɛ a bʋ́lɛ́: «Rɩɩ́ já rɩɩ́ píí jaa kuóɓɩɛ fá má a páŋ, ŋ wɩ́ɩ́ jaa zʋ, ŋ wɩ rɛ́ɛ́ ɓɩdíílí rɩ́ nyii mʋ́ɔ́ má ja. 9 Bee wɩ́ɛ́, ná líŋo ná Nyuutɩna Wɩɩsɛ há páŋ: “Sɩ́ ɓɩdííli dí, sɩ́ nyii nyɔ́, báá sɩ́ bɩ́r pi ŋmɛ́nɔ ná ɩ há píé a ko.”» 10 Ɛ́ nʋ́ʋ́ tɩŋ ŋmɛ́nɔ nɔ́ŋɔ a col, ká tá ŋmɛ́nɔ ná ʋ fa há tɩ́ŋɛ́ a ko Bɩtɛl.
Wɩɩsɛ wɩ́laabʋ́llɔ ɔ́ɔ́ zɔkɛ a sʋwɛ
11 Wɩɩsɛ wɩ́laabʋ́llɔ bɩnɛ́ nɔ́ŋɔ fá mɩŋ Bɩtɛl mɛ́: Ʋ bɛlɛ ko a máŋsɛ wɩ́ɛ́ ná wuu Wɩɩsɛ wɩ́laabʋ́llɔ ná fa há ɛ́ɛ́ ɛ́ kal; ɓa césí wɩ́ɛ́ ná ʋ fá há bʋ́lɛ́ a pá kuóro, a pɔ́wɔ́ áná. 12 Ɓa áná bɔ́sɩ́wɔ́ a bʋ́lɛ́: «Ŋmɛ́ŋ orí rí, ʋ tɩŋ col>>» Ɛ́ nʋ́ʋ́ bɛlɛ ná bɔsɛ, a zɩŋ ŋmɛ́nɔ ná Wɩɩsɛ wɩ́laabʋ́llɔ ná há lɛ́ Ziida há tɩ́ŋɛ́, a col, a bʋ́l pɔ́wɔ́ áná. 13 Ʋ bʋ́l pɔ́ʋ́ bɛlɛ ná a bʋ́lɛ́: «Ɩ́ vɔwɛ kokúme páŋ!» Ɓa vɔwɛ kokúme ná pɔ́ʋ́, ʋ laa zɛ́. 14 A kiri Wɩɩsɛ wɩ́laabʋ́llɔ ná har, a mʋ́ púú, rʋʋ ké tuzeno oro mʋ́l. Ʋ bɔ́sʋ́ a bʋ́lɛ́: «Ɩ nɛ́ ká Wɩɩsɛ wɩ́laabʋ́llɔ ná há lɩ Ziida a ko>>» Ʋ sɛ́: «Ŋ nɛ́!»
15 Ɛ́ nɛ́ Wɩɩsɛ wɩ́laabʋ́llɔ bɩnɛ́ ná bʋ́lʋ́ rɩ́ a bʋ́lɛ́: «Ko ráá mʋ́ŋ jaa rɩ́ɩ́ dí ɓɩdííle.»
16 Wɩɩsɛ wɩ́laabʋ́llɔ ná bʋ́lʋ́ rɩ́ a bʋ́lɛ́: «Ŋ wɩ́ɩ́ mɛ́ wo bɩrɛ aá tɩŋ, ŋ wɩ́ɩ́ jaa má zʋ́, ŋ wɩ ɓɩdííle dí, a wɩ nyii má nyɔ dɩhɩ̃́ né, 17 bee wɩ́ɛ́, Nyuutɩna Wɩɩsɛ nɛ́ páŋ liŋó né: “Ɩ wɩ ɛ́ dɩhɩ̃́ ɓɩdííle dí, a wɩ ɛ́ dɩhɩ̃́ nyii maá nyɔ, ká ŋmɛ́nɔ ná má ɩ há tɩ́ŋɛ́ a ko, ɩ báá wáá bɩr púú tɩɩ rɩ́ɩ́ col.”» 18 Ɛ́ nɛ́ Wɩɩsɛ wɩ́laabʋ́llɔ bɩnɛ́ ná sɛ́: «Ŋ má ká Wɩɩsɛ wɩ́laabʋ́llɔ nɛ́ anɩ́ɩ́ há kɔ́ʋ́ nyɛ, ká malka pi Nyuutɩna Wɩɩsɛ liŋó a páŋ a bʋ́lɛ́: Kánʋ́ bɩr kóí jaa; rʋ́ʋ́ dí ɓɩdííle ká nyɔ nyii.» Ká nyɩ́ɛ́rʋ nɛ́ ʋ faá nyɛ́ ɛ́. 19 Wɩɩsɛ wɩ́laabʋ́llɔ ná bɩr tɩ́ŋʋ́ mɛ́, a mʋ́ʋ́ jaa, a dí ɓɩdííle ká nyɔ nyii.
Kɩ́ŋkána ɓʋ́ wɩ́laabʋ́llɔ
20 Ɓa há ké tíé rɩ́wɔ́ dí ɓɩɛ, Nyuutɩna Wɩɩsɛ liŋó zʋ́ʋ́ wɩ́laabʋ́llɔ bɩnɛ́ ná há kéŋ nɔ́ŋɔ ná bɩrko; 21 ɛ́ nʋ́ʋ́ caasi bʋ́lɛ́ pá Wɩɩsɛ wɩ́laabʋ́llɔ ná há lɛ Ziida ko a bʋ́lɛ́: «Ná Nyuutɩna Wɩɩsɛ há sʋ́ʋ́ ná: “Ɩ wɩ Nyuutɩna Wɩɩsɛ há sʋ́ʋ́ ná tɩ́ŋɛ́, Nyuutɩna Wɩɩsɛ, ɩ Wɩɩsɛ fa há mákʋ́ ná pɛ́ɩ́, ɩ vɔ́ʋ́ tɩ́ŋɛ́. 22 Bee wɩ́ɛ́, ɩ bɩrɔ́ a ko dí ɓɩɛ ká nyɔ nyii dɩhɩ̃́ ná ʋ fá há sɛ́: Sɩ́ ɓɩdííle ráŋ dí, a sɩ́ nyii má ráŋ nyɔ́, ɛ́ wɩ́ɛ́, ɩ lɛl wɩ́ɩ́ ánáwa lɛ́lbule sɩɛrʋ zʋ́.”»
23 Wɩɩsɛ wɩ́laabʋ́llɔ ná há dí ɓɩɛ, a nyɔ nyii tenni, Wɩɩsɛ wɩ́laabʋ́llɔ bɩnɛ́ ná vɔwɛ Wɩɩsɛ wɩ́laabʋ́llɔ ná ʋ fá há ɛ́ɛ́ ʋ bɩrko, kókúme a pɔ́ʋ́. 24 Ɛ́ nʋ́ʋ́ col. Kɩ́ŋkáná kɛ́rʋ́ ŋmɛ́nɔ́ mɛ́ a ɓʋ́ʋ́. Ʋ lɛ́l ná pɛ́ ŋmɛ́nɔ́ mɛ́, kókúme ná cɩ́nʋ́ lɛ́l ná cɔɔ nɔ́ŋɔ ká kɩ́ŋkáná ná má cɛ́ cɔɔ nɔ́ŋɔ. 25 Ŋmɛ́ŋvalla ná lɛ́l ná rʋ́ʋ́ pɛ́ ŋmɛ́nɔ mɛ́, ká kɩ́ŋkáná ná cɩ́nʋ́ laka. Ɓa ko bʋ́lʋ́ wɩ́ɛ́ Wɩɩsɛ wɩ́laabʋ́llɔ bɩnɛ́ ná tɔ́ɔ́ sɩɛrʋ.
26 Wɩɩsɛ wɩ́laabʋ́llɔ bɩnɛ́ ná fá há ɛ́ɛ́ ʋ bɩrko, ʋ nʋ́ʋ́ wɩ́ɛ́ rɩ́ ɓaá bʋ́lʋ́, ɛ́ nʋ́ʋ́ sɛ́: «Wɩɩsɛ wɩ́laabʋ́llɔ nɛ́! Ʋ nɛ́ ɛ́ɛ́ zɔkɛ Nyuutɩna Wɩɩsɛ mɛ́. Ɛ́ nɛ́ Nyuutɩna Wɩɩsɛ lo kɩ́ŋkáná nyʋ́ksʋ́ heŋgbele a ɓʋ́ʋ́, anɛ ɛ́ Nyuutɩna Wɩɩsɛ fá há bʋ́lɛ́ a pɔ́ʋ́.»
27 Ká bʋ́lʋ́ bɛlɛ rɩ́ a bʋ́lɛ́: «Ɩ́ vɔwɛ kókúme a páŋ! Ɓa vɔwɛ a pɔ́ʋ́, 28 ʋ lɩ́ɩ́ va a mʋ́ ná lɛl ná rʋʋ pɛ́ ŋmɛ́nɔ́ mɛ́, ká kókúme má rɩ́ kɩ́ŋkáná cɩ́nʋ́ laka. Kɩ́ŋkáná ná fá wɩ lɛl ná díé, a wɩ kókúme ná má ɓʋ́ɛ́. 29 Wɩɩsɛ wɩ́laabʋ́llɔ bɩnɛ́ ná pi Wɩɩsɛ wɩ́laabʋ́llɔ ná há lɛ́ Ziida lɛl ná a sakɛ kókúme daha a kaa bɩr mʋ́ Bɩtɛl rʋ́ʋ́ wúú yuó ká púú hu ráŋ. 30 Wɩɩsɛ wɩ́laabʋ́llɔ bɩnɛ́ ná pi lɛ́l ná húú tɩɩ lɛlbule mí, ká ɓa wúú yuó a dɛnnɛ a bʋ́lɛ́: «Nyúbɔ́ŋ, ŋ maábinɔ́ŋɔ!»
31 Ʋ há húú a tenni, ʋ bʋ́lʋ́ bɛlɛ rɩ́ a bʋ́lɛ́: «Rɩ́ŋ kúó sʋwɛ, ɩ́ húŋ Wɩɩsɛ wɩ́laabʋ́llɔ né lɛlbule sɩɛrʋ, rɩ́ŋ heŋgbele mɩnʋ́ heŋgbele laka. 32 Bee wɩ́ɛ́, ʋ wɩ́bʋ́lɩ́ ná sɩ́ dí, ʋ há caase bʋ́l wɩ́ɛ́ Nyuutɩna Wɩɩsɛ yɩr mɛ́, a tʋksɛ veŋgúle ná há mɩŋ Bɩtɛl mɛ́, arɩ́ venni ná wuu jɩɩsɛ há mɩŋ Samari mí wɩ́ɛ́.»
33 Arɩ́ ɛ́ wuu, Zerobowamɛ há wʋ́ʋ́ maltɔ́k ná tɛ́ɛ́. Ʋ ló jamáŋ ná sɩɛrʋ nɩɛ náŋa nɛ́ há a veŋgúlli ná vʋk'ɔɔsa. Aá bil nɛrɔ ná wuu há có rʋ́ʋ́ ká veŋgúlli vʋk'ɔɔsɔ, rʋ́ʋ́ ɔ́ʋ́. 34 Nyɛ́ nɛ́ ká Zerobowamɛ wɩ́bɔmɔ, ʋ há ɛ́ɛ́, a yíkú jaa nɩɛ wuu a hóú sɩɛrʋ. Ɛ́ nɛ́ sɩɛ́ zɔ́kʋ́ jaa, ɓa yɩr yʋ́ksɛ tíé nyúú.