Ɩzɩrayɛl nɩɛ lɛ́ Robohaŋ har
12
1 Ɛ́ nɛ́ Robohaŋ isi mʋ́ tɔ́ɔ́ ná ɓa háá yɩ́rɛ Sɩsɛmɛ. Ɩzɩrayɛl jamáŋ wuu fa mʋ́ ráŋ nɛ́ rɩ́wɔ́ bílú rʋ́ʋ́ dí kuorí. 2 Nɛbatɛ bio Zerobowamɛ há nɛ́ ɛ́ wɩ́ɩ́, ɛ́ tɛ́ŋ mɛ́ rʋʋ lɩ́ɔ́ fá rʋʋ fóri Salomɔŋ nɛ́sɛ mɛ́, a mʋ́ mɩŋ Ezipiti tíé mí, a ké ráŋ. 3 Ɛ́ nɛ́ ɓa tʋŋ yɩ́rɛ Zerobowamɛ, ʋ rɩ́ Ɩzɩrayɛl nɩɛ wuu tɩŋ náŋá mɛ́ a mʋ́ Robohaŋ dɩhɩ̃́ a bʋ́l pɔ́ʋ́ a bʋ́lɛ́: 4 «Ɩ áná fa fɩ́krá á tʋŋ tʋtʋ́ŋduoru wérí, amá rɩɩ nɛ́ waá a ráá tʋŋ tʋtʋ́ŋduoru ná fa há nyaŋɩ́rá anɛ dol ɛ́ é, á sɩ́ saŋ a tʋŋ pɩ́pɛ́ɩ́.»5 Robohaŋ bʋ́l pɔ́wɔ́ a bʋ́lɛ́: «Ɩ́ mʋ́ ká bɩrɛ ko tápʋlɛ botoro pɛ́kɛ.» Nɩɛ ná bɩrɛ col. 6 Ɛ́ nɛ́ kuóro Robohaŋ bɔsɛ nɩhɩɛ̃́sɛ ná fa há tʋ́mɛ́ pɩ́pɔ́ʋ́ áná Salomɔŋ ʋ mɩnɛ́ mɛ́, a bʋ́lɛ́: «Bee wɩ́ɩ́ rɛ́, ɩ́ sɩ́ mákɩ́ŋ, rɩ́ŋ bʋ́l pá nɩɛ nyáŋ>>» 7 Nɩhɩɛ̃́sɛ ná sɛ́: «Rɩɩ nɛ́ zaa saŋɛ rɩ́ɩ́ a nɩɛ nyáŋ tʋtʋnnʋ, a tʋ́ŋ aá pɔ́wɔ́, a bʋl wɩ́wéré aá pɔ́wɔ́, ɓa sɩ́ ɛ́ɩ́ tʋtʋnna a kaá mʋ́ wuu.»
8 Amá Robohaŋ wɩ nɩhɩɛ̃́sɛ ná wɩ́makɛ́ ná tɩŋɛ, ká bɩrɛ mʋ́ bɔsɛ bápʋɔsɛ́ ná há kɔ́ʋ́ woónaŋá, a mɩnʋ́ dɩhɩ̃́, a sɩ́sɛ́nyɛ tʋŋ pɩ́pɔ́ʋ́. 9 Ʋ bɔ́sɩ́wɔ́ a bʋ́lɛ́: «Bee caanɛ rɛ́ ɩ́ ká rɩ́ɩ́wa páŋ, rɩ́ŋ bʋ́l pá nɩɛ ná há sɩ́ŋ lɩ́sɩ́wɔ́ tʋtʋ́ŋduoru ná nyaŋwɔ́ anɛ dol, ŋ áná há píwó hé.»
10 Ɛ́ nɛ́ ʋ woónaŋá ná sɛ́: «Nɩɛ nyáŋ gáásɛ wɩ́ɛ́, ɩ áná há bɛ́ŋsɩ́wɔ́ anɛ yosi wɩ́ɛ́, kaá sʋ́lɩ́ rɩ́ɩ́ a, rɩ́ ɛ́ cɩka dɔ́l mʋɔ́ a pɔ́wɔ́. Ɛ́ wɩ́ɛ́, ná nʋɔ ná ɩ há mɔhɛ̃́ rɩ́ɩ́ lɩ́sɛ a pɔ́wɔ́: Bʋl pá nɩɛ ná, a bʋ́lɛ́: “Ŋ néní ɓɩwíé má tɩɩ zénó kɩ́llɩ́ŋ áná tɩŋa. 11 Ŋ áná ɔ́ɔ́ ɩ́ tʋŋ tʋtʋ́ŋduoru rí, amá ŋ é sɩ́ a rɩ́ɩ́wa ɔsɛ tʋŋ tʋtʋ́ŋduoru a kɩ́llɛ ɛ́. Ŋ áná fɩ́rɩ́wa arɩ́ nɔpɛnɛ nɛ́; amá ŋ é sɩ́ ja hɔrʋ a hé nɔpɛnɛ ná nʋʋsɛ mɛ́, a kaá fɩ́rɩ́wa.”»
12 Tápʋlɛ botoro har mɛ́, Zerobowamɛ rɩ́ nɩɛ ná wuu bɩ́rɔ́ ko Robohaŋ dɩhɩ̃́, anɛ ɛ́ ʋ fa há bʋ́lwɔ́ rɩ́. 13 Robohaŋ vɛ́ caanɛ ná nɩhɩɛ̃́sɛ ná há mákʋ́, ká bʋ́l nɩhɔwɩ́ɛ́, 14 ká tɩŋ wɩ́ɩ́ ná ʋ woónaŋá ná há mákʋ́ a bʋ́lɛ́: «Ŋ áná ɔ́ɔ́ ɩ́ tʋŋ tʋtʋ́ŋduoru rí; amá ŋ é sɩ́ a rɩ́ɩ́wa ɔsɛ tʋŋ tʋtʋ́ŋduoru a kɩ́llɛ ɛ́. Ŋ áná fɩ́rɩ́wa arɩ́ nɔpɛnɛ nɛ́; amá ŋ é sɩ́ pi hɔrʋ a hé nɔpɛnɛ ná nʋʋsɛ mɛ́ a kaá fɩ́rɩ́wa.» 15 Nyuutɩna Wɩɩsɛ faá já rɩ́ wɩ́ɩ́ ná, ʋ há tɩ́ŋ Wɩɩsɛ wɩ́laabʋ́llɔ Ahiya há lɛ́ Siilo mí, a bʋ́l pá Nɛbatɛ bio Zerobowamɛ nɛ́ cɛ́. Ɛ́ nɛ́ tɛ kuóro wɩ nɩhɩɛ̃́sɛ ná nʋɔ zésé.
Ɩzɩrayɛl kuorí caksɔ́
16 Ɩzɩrayɛl nɩɛ ná wuu há néé rɩ kuóro wʋ́ɔ́ rɩ́ zesi, ɓa má sɛ́:
«Á rɩ́ Davidi duo wɩ ker kené.
A rɩ́ Zeese bio wɩ wɩ́ɩ́ mɛ́ tʋ́mɛ́.
Ɩzɩrayɛl jamáŋ, á bɩrɛ mʋ́ jɩɩsɛ,
ká mʋ́l né mí, rɩ́ Robohaŋ bíbélú nɩɛ.»
Ɛ́ nɛ́ Ɩzɩrayɛl nɩɛ mʋ́ jɩɩsɛ́. 17 Amá Ɩzɩrayɛl nɩɛ ná é wuu fa há ké tɔ́nɛ ná há mɩŋ Ziida tíé mí, Robohaŋ nɛ́ fa háá bélwó mí. 18 Ɛ́ nɛ́ kuóro Robohaŋ tʋŋ Adoraŋ, nɛrɔ ná fa háá bel nɩɛ ná ɓa há fɩ́kɛ́ ɓa tʋ́tʋŋ tʋtʋŋduóru, Ɩzɩrayɛl jamáŋ rɩ́, amá ɓa wuu lɩ́ɔ́ yósú arɩ́ dɔ́wʋ́ɔ́ a ɓʋ́. Ká kuóro Robohaŋ é wólli fá a mʋ́ zʋ́ʋ́ lal tórko, a fá mʋ́ Zerizalɛmɛ. 19 A pɔ́ ɛ́ tɛ́ŋ mɛ́ ká kaá ko zaa wuu, Ɩzɩrayɛl jɩmʋ́ʋ́la ná wuu há mɩŋ wɩɩsɛ dɩpomí nɛ́gʋɔ, arɩ́ Davidi duo nɩɛ wɩ náŋá mɛ́ wo.
20 Ɩzɩrayɛl duo nɩɛ ná wuu há nɩ́ɛ́ rɩ Zerobowamɛ bɩ́rɔ́ ko, ɓa tʋ́mɔ́ yɩ́rʋ́ ʋ ko ɓa ciki, a bílú ʋ dí kuorí a bíbel Ɩzɩrayɛl tíé wuu. Ziida jɩmʋ́l nɩɛ dʋŋɔ nɛ́ fa haá tɩŋ Davidi duo nɩɛ mɛ́.
21 Robohaŋ há bɩ́rɛ́ ko Zerizalɛmɛ, ʋ yɩ́rɛ Ziida arɩ́ Bɛŋzamɛ jɩmʋ́ʋ́la lalyoore bʋ́ɩ́zɔlɔ arɩ́ mɛɛ́sɩbaná (180 000) a hé náŋá mɛ́, rɩ́wɔ́ mʋ́ yo Ɩzɩrayɛl duo nɩɛ ná náŋa, ká rʋ́ʋ́ é Robohaŋ, Salomɔŋ bio la kuorí. 22 Amá Wɩɩsɛ fa bʋ́lɔ́ pá Sɩmaya há ká Wɩɩsɛ wɩ́laabʋ́llʋ́ a bʋ́lɛ́: 23 «Bʋl pá Salomɔŋ bio Robohaŋ há ká Ziida kuóro, ʋ rɩ́ Ziida arɩ́ Bɛŋzamɛ jɩmʋ́ʋ́la nɩɛ arɩ́ nɩkáánɛ ná wuu 24 rɩ́ Nyuutɩna Wɩɩsɛ sɛ́: “Ɩ́ pʋ́pɔ́ rɩ́ɩ́wa háá yóíwa maábinaŋa, Ɩzɩrayɛl nɩɛ. Ɩ́ bɩrmʋ́ jɩɩsɛ́, ŋ nɛ́ ɛ́ɛ́ wɩ́ɩ́ né tʋŋ.”» Ɓa sáŋ Nyuutɩna Wɩɩsɛ nʋɔ, a bɩrɛ mʋ́wɔ́ jɩɩsɛ́. 25 Ɛ́ nɛ́ Zerobowamɛ sɔ zenaa a kíl tɔ́ɔ́ ná ɓa haá yɩ́rɛ Sɩsɛmɛ há mɩŋ Ɩfɩrayɩŋ tíé, pallɛ ɓɩkaná dɩhɩ̃́, a ké ráŋ. Ʋ báá lɛ ráŋ a mʋ́ sɔ zenaa a kíl tɔ́ɔ́ ná ɓa háá yɩ́rɛ Pɛnʋwɛl má.
Zerobowamɛ ɔ́ɔ́ zɔkɛ Nyutɩna Wɩɩsɛ mɛ́
26 Zerobowamɛ fa bɩ́ɩ́nʋ́ sɩɛrʋ mɛ́ a bʋ́lɛ́: «Kuorí né mʋ́l né mí sɩ́ wólli bɩrko zʋ Davidi duo nɩɛ nɛ́sɛ. 27 Rɩ nɩɛ nyáŋ nɛ́ mʋ́ Nyuutɩna Wɩɩsɛ Wɩcʋɔlɩjɩzeno ná há mɩŋ Zerizalɛmɛ mɛ́, rɩ́ɩ́ ɔsɛ vʋka, ɓa sɩ́ bɩrko tɩ́ŋwɔ́ nɔhɔ̃́ Robohaŋ há ká Ziida kuóro. Ɓa sɩ́ ɓʋ́ŋ é, ká tɩ́tɩ́ŋʋ́.» 28 Ɛ́ nɛ́ Zerobowamɛ bɔsɛ nɩɛ, ɓa mákʋ́ wɩ́ɛ́. Ʋ ka salmɛ luki nɔɓalwiisi bɛllɛ, ká bʋ́l pɔ́ʋ́ nɩɛ: «Ɩ́ wálmɩ́wa tɩɩ dɩ́daarɛ, a mʋ́mʋ́ Zerizalɛmɛ, rɩɩ́wa cɩ́cʋɔlɛ Nyuutɩna Wɩɩsɛ. Ɩzɩrayɛl nɩɛ, ɩ́ ná wɩŋsa ná há lɛ́ɩ́wa tá Ezipiti tíé mí, a kánɩ́wa lɛ nɛ́ nyɛ.» 29 Ʋ pí nɔ́ŋɔ a bil Bɩtɛl tɔ́ɔ́ mɛ́, ká pi nɔ́ŋɔ má a bil Daŋ tɔ́ɔ́ mɛ́. 30 Ɛ́ nɛ́ yɩkɛ nɩɛ hé wɩ́bɔmɔ sɩɛrʋ. Nɩɛ mʋ́ Daŋ má tɩɩ a ɓɩ́ɓaarɛ nɔwie ná nɔ́ŋɔ. 31 Zerobowamɛ sɔ venni dɩɓaarɛ́ dúŋdúóme nyunni má, a lɩ́sɛ jamáŋ ná sɩɛrʋ nɩɛ ná há to Levi dunɩɛ, rɩ́wɔ́ ɓʋ́ pʋsɛ pɩ́pá venni ná. 32 Ʋ bil cana a pá nɩɛ rɩ́wɔ́ jʋ́jʋɔsɛ, bɩna sɩɛrʋ caŋsɛ córí mí tápʋlɛ fí rɩ́ bɔmmʋ́ɔ́ kal, anɛ cana ná ɓa háá dí Ziida mɛ́, ká tɩɩ ɓʋ́ pʋsɛ a ɔsɛ vʋka koro daha. Bɩtɛl mɛ́, ʋ ɓʋ́ pʋsɛ a ɔsɛ vʋka a pá nɔwiisi ná ʋ há lúke; ká lɩ́sɛ veŋgúlli ná, ʋ há ɛɛ ɓa sɔ́, vʋk'ɔɔsa. 33 Caŋsɛ córí nyúú mí tápʋlɛ fí arɩ́ bɔmmʋ́ɔ́ kal ná, ʋ tɩɩ nɛ́ há lɩ́sɛ́, ʋ dí cana a pá Ɩzɩrayɛl nɩɛ, ká tɩɩ sɩɛ́ mʋ́ ɓʋ́ pʋsɛ a ɔsɛ vʋka, koro ná ʋ há sɔ́ Bɩtɛl mɛ́ daha.