16
1 Nyuutɩna Wɩɩsɛ sɛ́ rɩ Hanani bio Yehu bʋ́l Basa rɩ́ a bʋ́lɛ́: 2 «Ɩ fá wɩ cícó, ká ŋ lɩ́sɩ́ ɩ dí kuorí ŋ jamáŋ nyúú, Ɩzɩrayɛl nɩɛ. Amá mʋ́l né mí, ɩ pi Zerobowamɛ nabulle, a tʋ́mʋ́ wɩ́bɔma ná, ká yiki Ɩzɩrayɛl nɩɛ, ŋ jamáŋ a hé wɩ́bɔma ná sɩɛrʋ. Ɓa wɩ́bɔma ná ɔ́ɔ́ ŋ cɔ́ɛ́ wɛ. 3 Ɛ́ wɩ́ɛ́, ŋ sɩ́ a rɩ́ɩ́wa nyɩ́ɩ́kɛ, ɩ rɩ́rɩ́ jaa nɩɛ, anɛ Nɩbatɛ bio Zerobowamɛ jaa. 4 Rɩ́ Basa jaa nɛrɔ wuu nɛ́ fa sʋwɛ tɔ́ɔ́ sɩɛrʋ, vasɛ nɩ́ɩ́ díé. Kɔ́ʋ́ ná má wuu há sɩ́ sʋwɛ gɩr sɩɛrʋ, duune níí díé.»5 Basa wɩ́állɛ ná náŋa, ʋ wɩ́ɛ́ arɩ́rʋ́ ballɩ́ wɩ́ɛ́ wuu ní ɓa pʋ́ŋsɛ hé Ɩzɩrayɛl kuóre wɩ́'állɛ kɛnɔ sɩɛrʋ nɛ́. 6 Basa há sʋ́wɛ́, a mʋ́ʋ́ ánáwa rɩ́, ɓa húú Tirisa mí ní. Ʋ bio Ela nɛ́ lɔ́ʋ́ nyúú mí a dí kuorí.
7 Nyuutɩna Wɩɩsɛ báá tɩ́ŋʋ́ wɩ́laabʋ́llɔ Yehu há ká Hanani bio mí, a bʋ́l Basa rɩ́rʋ́ jaa nɩɛ wɩ́zɔkɛ́ bɛllɛ wɩ́ɛ́: dʋ́ŋdʋʋ̃́ wɩ́ɩ́ nɛ́ kɔ́ʋ́ rɩ́rʋ́ jaa nɩɛ há ɛ́ɛ́ zɔkɛ Nyuutɩna Wɩɩsɛ mɛ́, anɛ Zerobowamɛ rɩ́rʋ́ jaa nɩɛ, ɛ́ a ʋ cɔ́ɛ́ wɛ. Bʋllɛ wɩ́ɩ́ nɛ́ kɔ́ʋ́ há ɓʋ́ Zerobowamɛ jaa nɩɛ wuu.
Ela dí Ɩzɩrayɛl kuorí
8 Aza há dí Ziida kuorí bɩŋsɛ mɛrɛ́ arɩ́ balgo nyúú mí ní, Basa bio Ela má dí Ɩzɩrayɛl kuorí, a ké Tirisa mɛ́, a dí bɩŋsɛ bɛllɛ.
9 Ɛ́ nɛ́ Zimiri há kɔ́ʋ́ tʋtʋnnɔ nɔ́ŋɔ, ká a lalyóórítórkowa ná fá nɔhɔ̃́, isi gɩ́gʋ́ ɓʋ́ɩ́. Ɛ́ tɛ́ŋ mɛ́, rɩ́ kuóro mɩŋ Tirisa mɛ́, a nyɔ́ sɩ́ŋ a buki a pɛ́ kuóro wuolo nɔhɔ̃́, Arɩsa jaa mɛ́. 10 Zimiri zʋ́ɔ́ a ŋmɔwɛ Ela a ɓʋ́, Ziida kuóro Aza kuorí dí bɩŋsɛ mɛrɛ́ arɩ́ balpɛ nyúú mí ní ɛ́ tʋŋ. Ká Zimiri la Ela nyúú mí a dí kuorí.
11 Tɛ́ŋ ná mɛ́ ʋ há la kuorí, a ké kuóɓasa daha, ʋ ɓʋ́ Basa jaa nɩɛ wuu. Ʋ wɩ lóé rɩ́ bál balá má káánʋ́ jaa sɩɛrʋ, ʋ nɩtɩ́náwa arɩ́rʋ́ nannɔ́ŋsɛ wuu ní ʋ ɓʋ́ʋ́sɛ. 12 Zimiri ɓʋ́ Basa jaa nɩɛ wuu, anɛ ɛ́ ná Nyuutɩna Wɩɩsɛ fa há bʋ́lɛ́ a pɔ́ʋ́, a tɩ́ŋʋ́ wɩ́laabʋ́llɔ Yehu mí. 13 Basa rɩ́rʋ́ bio Ela veŋɓaarɔ́ arɩ́wɔ́ há yiki Ɩzɩrayɛl nɩɛ a hé ɛ́ wɩ́bɔmɔ sɩɛrʋ, ɔ́ɔ́ Nyuutɩna Wɩɩsɛ, Ɩzɩrayɛl Wɩɩsɛ cɔ́ɛ́ wɛ, ʋ pi wɩ́ɛ́ nyáŋ tʋ́mʋ́ mɛ́.
14 Ela wɩ́'állɛ ná náŋa wuu mɩŋ Ɩzɩrayɛl kuóre wɩ́'állɛ kɛnɔ sɩɛrʋ nɛ́.
Zimiri dí Ɩzɩrayɛl kuorí
15 Ziida kuóro Aza kuorí díí bɩŋsɛ mɛrɛ́ arɩ́ balpɛ nyúú mí ní, Zimiri má dí Ɩzɩrayɛl kuorí, a ké Tirisa mí, a dí tápʋlɛ́ balpɛ. Ɛ́ tɛ́ŋ mɛ́, rɩ Ɩzɩrayɛl nɩɛ isó aá yo Filisiti nɩɛ dɩtɩ́llɛ tɔ́ɔ́ Gɩbɛtɔŋ. 16 Nɩɛ ná fa háá yo lal ná nɛ́ labáárɛ́ né: «Zimiri fa gɛ́ kuóro ɓʋ́ɩ́, a ɓʋ́ʋ́ má tɩɩ.» Ɛ́ nɛ́, ɛ́ kal tɩɩ, Ɩzɩrayɛl nɩɛ wuu hé náŋá mɛ́, ɓa pul sɩɛrʋ, a lɩ́sɛ sóójihɔ̃́ Omiri, ʋ dí Ɩzɩrayɛl kuorí. 17 Omiri rɩ́rʋ́ sóójiwa wuu lɛ́ Gɩbɛtɔŋ mɛ́ a mʋ́ tɔ́ Tirisa hé. 18 Zimiri há néé rɩ́ ɓa lá tɔ́ɔ́ ná, ʋ zʋ́ kuójaa ná nɔ́ŋɔ sɩɛrʋ ká tɔkɛ níŋ a hé, a sʋwɛ níŋ ná sɩɛrʋ. 19 Zimiri pi Zerobowamɛ nabulle. A tʋŋ wɩ́bɔma ná ʋ há ɛ́ɛ́ a zɔkɛ Nyuutɩna Wɩɩsɛ sɩɛrʋ, ká yiki Ɩzɩrayɛl nɩɛ a héwó sɩɛrʋ. Ɛ́ nɛ́ tɛ wɩ́ɛ́ nyáŋ wuu púú.
20 Zimiri wɩ́'állɛ ná náŋa arɩ́rʋ́ há gɛ́ kuóro Ela ɓʋ́ɩ́, ɓa wuu ní ɓa pʋ́ŋsɛ hé Ɩzɩrayɛl kuóre wɩ́'állɛ kɛnɔ sɩɛrʋ nɛ́.
21 Zimiri sʋʋ har mɛ́, Ɩzɩrayɛl nɩɛ ná caksɛ bɛllɛ: Nɩɛ ná ɓaámɔnáŋa jɩ́ja rɩ́ Gɩnatɛ bio Tibini ní ɔ́wɔ́ kuóro, ká ɓaámɔnáŋa ná náŋa má jɩ́ja rɩ́ Omiri ní ɔ́wɔ́ kuóro. 22 Omiri hatɩ́ŋna dí dóé, Gɩnatɛ bio Tibini rɩ́rʋ́ hatɩ́ŋna ná nyúú. Tibini sʋwɛ ká Omiri dí kuorí.
Omiri dí Ɩzɩrayɛl kuorí
23 Aza há dí Ziida kuorí díí bɩŋsɛ mɛrɛ́ arɩ́ fí oro nyúú mí ní, Omiri má dí Ɩzɩrayɛl kuorí , a a bɩŋsɛ fí arɩ́ bɛllɛ. Ʋ lá sɩ́ɛ́ dí bɩŋsɛ balgo kuorí Tirisa mɛ́ nɛ́. 24 Ká lá Samari dúŋdúóŋ ná yɔwɛ Sɛmɛɛrɛ rɩ́, meéwicááka bʋ́ɩ́walgo (6 000). Ʋ sɔ́ tɔ́ɔ́ ʋ daha, a hóú yɩr Samari, ɛ́ yɩr lɛ nɛrɔ ná fá há tɛ paalɔ ná nɛ́, Sɛmɛɛrɛ.
25 Amá Omiri ɔ́ɔ́ zɔkɛ Nyuutɩna Wɩɩsɛ mɛ́, ʋ wɩ́bɔma ná nɛ́ lɔrɛ́ a kɩ́llɛ kuóré ná wuu fá há dúú sɩ́ɛ́. 26 Ʋ pí Nebatɛ bio Zerobowamɛ naa, a tʋ́ŋ wɩ́bɔma ná ʋ há ɛ́ɛ́, a yiki Ɩzɩrayɛl nɩɛ a hówó sɩɛrʋ, ɛ́ a Nyuutɩna Wɩɩsɛ, Ɩzɩrayɛl Wɩɩsɛ cɔ́ɛ́ wɛ́, ɓa veŋɓaarɔ́ ná wɩ́ɛ́.
27 Omiri wɩ́'állɛ ná náŋa, wɩ́ɛ́ ná ʋ há tʋ́mɛ́ arɩ́rʋ́ ballɩ́ wɩ́'állɛ ná wuu mɩ́ŋ Ɩzɩrayɛl kuóré wɩ́'állɛ kɛnɔ sɩɛrʋ nɛ́. 28 Omiri há sʋ́wɛ́, a mʋ́ʋ́ ánáwa rɩ́, ɓa húú Samari mí ní. Ʋ bio Akaabɛ nɛ́ lɔ́ʋ́ nyúú mí a dí kuóri.
Akaabɛ dí Ɩzɩrayɛl kuorí
29 Aza há dí Ziida kuorí bɩŋsɛ mɛrɛ́ rɩ́ fí arɩ́ córí nyúú mí ní Omiri bio Akaabɛ má dí Ɩzɩrayɛl kuorí. Omiri bio Akaabɛ ké Samari mí, a dí Ɩzɩrayɛl kuorí bɩŋsɛ mɛrɛ́ arɩ́ bɛllɛ nɛ́. 30 Omiri bio Akaabɛ ɔ́ɔ́ zɔkɛ Nyuutɩna Wɩɩsɛ mɛ́ a kɩ́llɛ kuóre ná wuu há lɔ́ʋ́ sɩ́ɛ́. 31 Ʋ césí Nebatɛ bio Zerobowamɛ wɩ́bɔma, a ná rɩ́ ɛ́ to wɩ́ɩ́, ʋ báá cɛ́ ráŋ mɛ́, a já Zezabel há ká Sɩdɔŋ nɩɛ kuóro Ɛtɩbáál toló a súúri. Ká há mʋ́ ɓírmi veno ná ɓa haá yɩrɛ Baal sɩ́ɛ́, a cʋ́ɔ́lʋ́. 32 Ʋ sɔ́ jaa Samari mí a pá Baal, a zʋ jaa ná sɩɛrʋ a má koro a pɔ́ʋ́, vʋka ɔsɛ́ wɩ́ɛ́. 33 Akaabɛ cɔ́ŋsɛ veŋdaa: ʋ báá a wɩ́ɛ́ náŋa a wɛ Nyuutɩna Wɩɩsɛ mɛ́, Ɩzɩrayɛl Wɩɩsɛ, a kɩ́llɛ Ɩzɩrayɛl kuóré ná wuu fa há lɔ́ʋ́ sɩ́ɛ́.
34 Ʋ kuorí dí tɛ́ŋ mɛ́ nɛ́, Bɩtɛl báálɔ ná ɓa háá yɩ́rɛ Hɩɛlɛ bɩrsɔ Zeriko tɔ́ɔ́. Tɔ́ɔ́ ná mʋ́l bilé ɔ́ɔ́ Hɩɛlɛ bihɔ̃́ Abɩraŋ mɩɩsɛ tenni, ká bio ná há tʋ́kʋ́ mɛ́, Segubi má mɩɩsɛ tenni tɔ́ɔ́ ná dánʋʋsɛ lɩ́sɛ mɛ́, anɛ ɛ́ Nyuutɩna Wɩɩsɛ fa há bʋ́lɛ́, a tɩŋ Nuŋ bio Zozie a.