Saaba hákuóro kúó ná Salomɔŋ
Bel 2 Kuóre wɩ́állɛ 9.1-12
10
1 Saaba hákuóro há nɛ́ ɛ́, Nyuutɩna Wɩɩsɛ há ɛ́ɛ́ Salomɔŋ yɩr lɩ, ɛ́ nʋ́ʋ́ isi a mʋ́ Zerizalɛmɛ rʋ́ʋ́ diŋú, a bɔ́sʋ́ rɩ́ wɩ́dúóru. 2 Ʋ háá mʋ́ Zerizalɛmɛ, ʋ kɛ́sʋ́ tʋtʋnna ɓɩkana, arɩ́ nyʋkmawa há cɩ́ɩ́nɛ tulaaléwa sɔ́ŋ há wéró, salmɛ ɓɩkana arɩ́ dɔ́wɩ́tʋlɛ́ yɛlɩ́ há dúókó, a kaa ko Salomɔŋ dɩhɩ̃́. Ʋ há kúé, ʋ pí wɩ́ɩ́ ná wuu ʋ há kené ʋ sɩɛrʋ, a bɔsɛ Salomɔŋ. 3 Salomɔŋ má lɩ́sɛ wɩ́ɛ́ ná wuu ʋ há bɔ́sɛ́ sɩ́ɛ́. Wɩ́bɔsɛ́ ná oro wuu fa too Salomɔŋ há wɩ wuolle lɩ́sʋ́ sɩ́ɛ́. 4 Saaba hákuóro há ná zɩ́mɛ́ ná Salomɔŋ há kené rɩ́rʋ́ kuójaa ná ʋ há sɔ́ɛ́, 5 ɓɩdííle ná ʋ háá díé, ʋ tʋtʋnna jɩɩsɛ rɩ́rʋ́ tʋtʋnna náŋa, rɩ́ gɛnnɛ ná ɓa háá sué, nɩɛ ná há kénú oŋnyɔɔlɛ́ ko aá pɔ́ʋ́, arɩ́ vʋk'fisé ná Salomɔŋ háá ɔsɛ́ Nyuutɩna Wɩɩsɛ Wɩcʋɔlɩjɩzeno ná sɩɛrʋ, ʋ nʋɔ máánɔ́. 6 Ɛ́ nɛ́ ʋ bʋ́l pá kuóro Salomɔŋ a bʋ́lɛ́: “Ŋ há mɩ́nɩ́ŋ tɔ́ɔ́ mɛ́, ká nɛ wɩ́ɛ́ ná wuu ɩ há ɛ́ɛ́ arɩ́ zɩ́mɛ́ ná ɩ há kené, ɓa wuu ɓɩɛ́ná ká taŋá nɛ́. 7 Ká ŋ fa wɩ lɛ́ɛ́ dí; rʋʋ nɛ́ to mʋ́l né mí, ŋ tɩɩ sɩ́ɛ́ há néé nyɛ. Ŋ wɩ́ɩ́ wɩ́ɛ́ ná ɓármá má tɩɩ nɩ́ɛ́. Ɩ zɩ́mɛ́ arɩ́rɩ́ ɓɩɛ káŋ kɛ́ ɛ́ ná ŋ há nɩ́ɛ́. 8 Ɩ nɩɛ ká nyúwéritɩ́ɩ́na rɛ́. Ɩ tʋtʋnna arɩ́ nɩɛ ná háá tʋ́mɩ́ sɩ́ɛ́ tɛ́ŋ wuu mí, sɩɛnnɛ sɩ́ tɔrɛ kɩ́ŋkáŋ, ɓa há sɩ́ zizesí zɩ́mɛ́ wɩ́bʋlɛ́ ná. 9 Ŋŋ́ bɛ Nyuutɩna Wɩɩsɛ mɛ́, ɩ Wɩɩsɛ, ʋ sɩɛrʋ há tɔ́rɩ́ nyúú, ʋ a ɩ dí Ɩzɩrayɛl nɩɛ kuorí. A tɩŋ Nyuutɩna Wɩɩsɛ há có Ɩzɩrayɛl nɩɛ, a kaá mʋ́ wuu ní tɛ, ʋ píí, ɩ ɔ́wɔ́ kuóro, rɩ́ɩ́ bélwó mí rɩ́ taŋá arɩ́ sapʋmmɩ́.”10 Ɛ́ nɛ́ Saaba hákuóro ná pi salmɛ píŋ há peri tɔnɛwa botoro rɩ́ fá a pá Salomɔŋ, arɩ́ tulaalé sɔ́ŋ há wéró, ɓɩkaná arɩ́ dɔ́wɩ́tʋlɛ́ yɛlɩ́ há dúókó. Nɛ́ŋ wuu ha wɩ ɛ́ tulaalé duo kené ko pá Salomɔŋ, a mɔ́wɔ́ ná Saaba hákuóro há píé pɔ́ʋ́.
11 Kuóro Hɩraŋ má nyiidaborizeŋse kéŋ salmɛ lɛ Ofiiri ko, a súúri saŋtal dákana arɩ́ dɔ́wɩ́tʋlɛ́ yɛlɩ́ há dúókó. 12 Kuóro kéŋ santal dáásɛ ná nɛ́ a líŋe, ɓa kaa cakɛ Nyuutɩna Wɩɩsɛ Wɩcʋɔlɩjɩzeno ná rɩ́rʋ́ kuójaa, ká báá káŋwɔ́ a ceŋsi arɩ́ kɔnɛ́wa a pá nɩɛ ná háá yɛ yɩɩla. A pɔ́ ɛ́ kal a ko aá lɩ zaa, ɓa báá wɩ dáwéré nyáŋ duo kené a mɔ nyɛ́ ko Zerizalɛmɛ.
13 Ɛ́ nɛ́ kuóro Salomɔŋ pá Saaba hákuóro ɓɩɛ ná wuu ʋ háá jɛɛ́ a sʋl, ká há dí kuózile a súúri pɔ́ʋ́. Ɛ́ nɛ́ ká ʋ rɩ́rʋ́ tʋtʋnna bɩrɛ mʋ́wɔ́ tɔ́ɔ́.
Salomɔŋ kuóɓɩɛ wɩ́ɛ́
14 Bɩná é wuu, ɓaá pá Salomɔŋ salmɛ píŋ há pérí tɔ́ɔ́nɛ́wa mɛrɛ́ nɛ́. 15 Loŋpówa ná báyɛlɛ́ háá túmé, rɩ́ tɔ́nɛ́ náŋa kuóre háá túŋ ɓɩɛ ná, arɩ́ Ɩzɩrayɛl dɩ́tɩllɛ́ sɩ́dííre há pi ɓɩɛ ná aá pɔ́ʋ́ é wɩ́ɛ́ to ráŋ.
16 Kuóro Salomɔŋ fa ɔ́ɔ́ ɓa pi salmɛ, a luki lal hɔ́kɛrɛ, ɓɩjɛlɛ zɔwɛllɛ nɛ́ (200). Salmɛ ná ɓa há kené luki ɓa oro wuu ká kííló balgo ní. 17 Ʋ báá a ɓa ka salmɛ ná a luki hɔ́kɛrɛ ɓɩwɩɛla má zotoro (300). Salmɛ píŋ há ká kííló balá rí fá nɛ́ ɓa kaa ɔ́wɔ́ má oro wuu. Kuóro píwó a bíl jaa ná sɩɛrʋ ɓa háá yɩ́rɛ Libaŋ kʋkɔrɔ. 18 Ɛ́ nɛ́ kuóro a ɓa pi betúnyɩla, a bɩrmɛ kuóɓasɩzeno, a mʋɔlʋ́ wuu tɔ́ rɩ́ salmɛ. 19 Kuóro ɓasa ná kéŋ neŋcolsɩ́ɛ́ balgo ní, kɔ́ʋ́ dɩyelli gúóri. Ɓasa ná cɔrɛ bɛllɛ wuu mí, nɛ́ŋsa dɩsakɛ́ mɩŋ ráŋ, ɓa luki kɩ́ŋkánáwa bɛllɛ ɓa cɛ́ cɛ́rɛ náŋá nedu arɩ́ nɛ́gʋ́ɔ́. 20 Neŋcolsɩ́ɛ́ ná balgo mí, kɩ́ŋkánáwa fí arɩ́ bɛllɛ cɩ́ŋwɔ́ kíŋkere mí. Balgo cɛ́ nédu ká balgo naŋá má cɛ́ nɛ́gʋɔ. Ɓa ha wɩ kuóɓasa né duo ɛ́ɛ́ tɔ́ɔ́ oro wuu mí ná. 21 Kuóro Salomɔŋ nyíŋgbaŋsɛ wuu, salmɛ nɛ́ ɓa kaá a. Ʋ gbaŋsɛ ná wuu há mɩŋ jaa ná ɓa háá yɩ́rɛ Libaŋ kʋkɔrɔ mɛ́, salmɛ cʋɔrɩ́ dʋŋɔ nɛ́ ɓa kaa ɔ́wɔ́. Wárɛ óŋ wuu fa to ráŋ, bee wɩ́ɛ́ ʋ tɛ́ŋ mɛ́, rɩ́ wárɛ fa wɩ píŋ kené. 22 Kuóro fa kéŋ nyiidaborzeŋse má. Ɓa rɩ́ Hɩraŋ nyiidaborzeŋse sɩɛ́ kuosi nyii a vɩ́va báyɛlɩ́, aá mʋ́ dɩbólí. Bɩŋsɛ botoro é wuu, ɓa sɩɛ́ bɩrɛ ko naasɩ́ balá, a cɩ́ɩ́nɛ salmɛ, wárɛ, betúnyɩla, ɔma arɩ́ kolókolwere bamma.
23 Kuóro Salomɔŋ nɛ́ fa kéŋ ɓɩɛ arɩ́ zɩ́mɛ́, a kɩ́llɛ kuóre ná wuu há mɩŋ tíé nyúú. 24 Dúníé nɩɛ wuu fa có rɩ́wɔ́ ko zesi nɛ Salomɔŋ zɩ́mɛ́ wɩ́bʋlɛ́ ná Wɩɩsɛ há píé pɔ́ʋ́. 25 Bɩna wuu, nɛrɔ wuu sɩ́ ko ná Salomɔŋ, ká dí zilé pɔ́ʋ́: ɓaá pɔ́ʋ́ wárɛ ɓɩɛ, salmɛ ɓɩɛ, gɛnnɛ, lalyóórícɩ́ksɛ arɩ́ tulaaléwa, záksɛ arɩ́ kokúme ká zakawa.
26 Salomɔŋ fa kéŋ laltórkowa bʋ́ɩ́ arɩ́ zɔwaná nɛ́ (1 400), zɔ́nɛ má bʋ́ɩ́ fí arɩ́ bɛllɛ (1 200), ʋ pii tá tɔ́nɛ ná mɛ́ ʋ háá bílú laltórkowa, ká náŋa má mɩ́nʋ́ dɩhɩ̃́ Zerizalɛmɛ mɛ́. 27 Kuóro fa ɔ́ɔ́ wárɛ pʋ́rkɛ wérí Zerizalɛmɛ mɛ́ anɛ dɔ́wʋ́ɔ́, sɛɛdɩrɛ daasɛ má pʋrkɛ wérí anɛ pirsolo há mɩŋ Sefela amɛ́. 28 Salomɔŋ faá de a ʋ báyɛlɛ́ mʋ́ Ezipiti tɔ́ɔ́ arɩ́ Siliisi tɔ́ɔ́ nɛ́ aá yɔ́wʋ́ záksɛ. 29 Ɓa sɩɛ́ yɔwɛ laltórko Ezipiti mí, wárɛ zɔwalgo ní, a yɔwɛ zaka má wárɛ zɔlɔ rɩ́ mɛɛ́sɛllɛ arɩ́ fí. Ɓaá yɔwɛ ɛ́ nɛ́ a kaa ko pá Hɛtɛ duó nɩɛ arɩ́ Siiri nɩɛ kuóre.