Kuóre 9

Nyuutɩna Wɩɩsɛ báá kenú tɩɩ nyɩ́ɩ́sɛ Salomɔŋ mɛ́

Bel 2 Kuóre wɩ́állɛ 7. 11-22

1 Salomɔŋ há sɔ́ Nyuutɩna Wɩɩsɛ jɩzeno ná rɩ́rʋ́ kuójaa a tenni, a a wɩ́ɛ́ ná wuu ʋ háá jɛɛ́, 2 Nyuutɩna Wɩɩsɛ báá kenú tɩɩ ko mákʋ́ bʋ́llɛ mɛ́ anɛ ʋ fa há lá sɩ́ɛ́ a ɛ́ Gabaɔŋ mɛ́. 3 Nyuutɩna Wɩɩsɛ bʋ́lɔ́ pɔ́ʋ́ a bʋ́lɛ́: «Ŋ nɩ́ɩ́ wɩsʋlɔ́ arɩ́rɩ́ jɛ́nnɛ́ rɛ́. Wɩcʋɔlɩjɩzeno né ɩ há sɔ́ɛ́ rɩ́wɔ́ cʋ́cʋ́ɔ́lɩ́ŋ ráŋ, ŋ saŋɔ rʋ́ʋ́ áŋ tɩ́llɛ́, ŋ sɩ́ bíbélú mí tɛ́ŋ wuu mí arɩ́rɩ́ŋ sɩɛrʋ wuu. 4 Ɩ é, rɩɩ nɛ́ kéŋ taŋá, aá a wɩ́ɛ́ ɓa sɩ́ɩ́ mɛ́, ŋ sɩ́ɛ́ mɛ́ anɛ ɩ áná Davidi há á ɛ́, a tɩ́ŋɩ́ŋ wɩ́bile arɩ́rɩ́ŋ kíŋse ná, a ká wɩ́ɛ́ ná wuu ŋ há mákɛ́ a tʋ́tʋŋ, 5 ŋ sɩ́ a rɩ́ɩ́ kuorí cɛ́ Ɩzɩrayɛl tíé mí, a kaá mʋ́ wuu, anɩ́ŋ fa há bʋ́l ɛ́ a pɛ́ɩ́ áná Davidi, rɩ́ tɛ́ŋ wuu mí, rʋ́ʋ́ duo nɩɛ nɛ́ sɩ́ dídí kuorí Ɩzɩrayɛl mɛ́. 6 Amá ɩ é, rɩ́ Ɩzɩrayɛl nɩɛ arɩ́rɩ́ɩ́wa duo nɩɛ, rɩ́ɩ́wa nɛ́ vɛ́ŋ, a wɩ́ŋ wɩ́makɛ́ rɩ́rɩ́ŋ wɩ́bile ná ŋ há makɛ́ pɛ́ɩ́wa tɩ́ŋ, ká bɩrɛ mʋ́ ɓɩ́ɓaarɛ venni, 7 ká ná, ŋ sɩ́ kíríwa, ɩ́ é Ɩzɩrayɛl nɩɛ, tíé ná ŋ há píé pɛ́ɩ́wa mɛ́, ká vɛ́ŋ Wɩcʋɔlɩjɩzeno né má, ŋ há saŋɛ rʋ́ʋ́ áŋ tɩ́llɛ́. Rɩ ɛ́ nɛ́ ɛ́ɛ́, ɩ́ é Ɩzɩrayɛl nɩɛ sɩ́ a nɩmɔmɛ́ rɩ́ nɩɛ wuu mʋ́mɔŋ. 8 Wɩcʋɔlɩjɩzeno né há isé sɩ́ a jɩɓoo. Rɩ nɛ́ŋ wuu ní tɩ́ŋ ráŋ dɩ́daarɛ, ʋ sɩ́ a tɩ́na wɩ́gɩrɩ́, rʋ́ʋ́ caasí a bʋ́lɛ́: «“Beé rí tɛ Nyuutɩna Wɩɩsɛ pi wɩ́ɩ́ né a a tíé né arɩ́ Wɩcʋɔlɩjizeno né mí>>» 9 Nɩɛ sɩ́ bʋ́lɛ́: “Ɓa há vɛ́ Nyuutɩna Wɩɩsɛ, ɓa Wɩɩsɛ nɛ́, ʋ nɛ́ kéŋwó ánáwa lɛ Ezipiti mí, ká ɓa bɩrɛ píwó tɩɩ hé venni mí, a ɓɩ́ɓáárɩ́wɔ́. Ɛ́ nɛ́ tɛ Nyuutɩna Wɩɩsɛ pi wɩ́lɔrɛ́ nyáŋ ɔ́wɔ́ mɛ́ ɛ́.”»

Salomɔŋ tʋtʋmɛ́ náŋa wɩ́ɛ́

2 Kuóre wɩ́állɛ 8. 1-18

10 Bɩŋsɛ mɛrɛ́ nɛ́ Salomɔŋ fa pi a sɔ jɩɩsɛ ná bɛllɛ, Wɩcʋɔlɩjɩzeno ná rɩ́rʋ́ kuójaa ná. 11 Kuóro Salomɔŋ fa pí tɔ́nɛ mɛrɛ́ nɛ́ Galiile tíé mí a pá Tiiri kuóro Hɩraŋ, bee wɩ́ɛ́ Hɩraŋ nɛ́ fa pɔ́ʋ́ sɛɛdɩrɛ daasɛ rɩ́ sɩɩpɩrɛsɛ daasɛ arɩ́ salmɛ ná wuu ʋ fa háá jɛɛ́. 12 Amá Hɩraŋ fa há lɛ Tiiri mí, a mʋ́ ná tɔ́nɛ ná Salomɔŋ há píé pɔ́ʋ́, ɓa fa wʋ́ʋ́ sɩɛrʋ tɔ́rɛ́. 13 Ɛ́ nɛ́ ʋ bɔsɛ Salomɔŋ a bʋ́lɛ́: «Bee tɔ́nɛ rɛ́ nyɛ, ɩ pii páŋ, ŋ maábinɔ́ŋɔ!» Ká hé tɔ́nɛ ná yɩr Kabul. Bee wɩ́ɛ́ ʋ sɛ́ tɔ́nɛ ná wɩ cícó. Tɔ́nɛ ná yɩr nɛ́ ha ɛ́, arɩ́ zaa wuu. 14 Hɩraŋ fa tɛ salmɛ píŋ há ká tɔɔnɛwa botoro arɩ́ fá nɛ́, ɓa kaa mʋ́ pá kuóro Salomɔŋ.

15 Kuóro Salomɔŋ há fɩ́kʋ́ tʋtʋnna ná ɓa sɔ́ Wɩcʋɔlɩjɩzeno ná rɩ́rʋ́ kuójaa tenni, ʋ ɔ́ɔ́ ɓa sɔ́ koro jaa ná sɩ́ɛ́, ɓa kaá yɩ́rɛ Milo, ká sɔ zenaa a kíl Zerizalɛmɛ, a ɔsɛ sɔ tɔ́nɛ nyáŋ: Hasɔɔrɛ, Megido arɩ́ Gɛzɛɛrɛ. 16 Ezipiti tíé kuóro Faarɔŋ fa yóó dí Gɛzɛɛrɛ, a tɔkɛ níŋ hóú mí ʋ dí. Kanaŋ nɩɛ nɛ́ fa ké ráŋ. Ʋ ɓʋ́wɔ́ wuu ká pi tɔ́ɔ́ ná dí zilé pɔ́ʋ́ toló ná há já Salomɔŋ. 17 Ɛ́ nɛ́ Salomɔŋ ɔsɛ sɔ Gɛzɛɛrɛ. Ʋ fa ɔ́sɔ́ sɔ Betihoroŋ cɔ́ɔ́ ná má há mɩŋ mʋ́bʋɔ rɩ́, 18 arɩ́ Baalatɛ, arɩ́ Tamarɛ má há mɩŋ Ziida gɩrbétéke mí, 19 a súúri tɔ́nɛ ná wuu mí ʋ há sɔ́ɛ́ ʋ cɩksɛ dɩbilé arɩ́ dɩhɛ̃́ ná ʋ zɔ́nɛ arɩ́ lal zɔ́nɛ tórkowa háá cɩ́nɛ́. Ʋ sɔ́ jɩɩsɛ ná wuu ʋ há có ní, Zerizalɛmɛ mɛ́ rɩ́ Libaŋ arɩ́ dɩhɛ̃́ ná wuu ʋ háá belé mí. 20 Nɩɛ ná wuu fa há káánɛ́ Amɔɔrɛ duo nɩɛ, Hɛtɛ duo nɩɛ, Perezi duo nɩɛ, Hivi duo nɩɛ arɩ́ Yebuzi nɩɛ fa to Ɩzɩrayɛl nɩɛ. 21 Nɩɛ ná duo há káánɛ́, Ɩzɩrayɛl nɩɛ fa há wɩ ɓʋ́ɛ́ mɩ́ɛ́mɩ́ɛ́ nɛ́. Ɓa nɛ́ Salomɔŋ lo ɓa ɔ́ʋ́ yósi, ʋ fɩkɛ ɓa tʋ́tʋŋ tʋtʋŋduóru, arɩ́ zaa wuu. 22 Amá Salomɔŋ fa wɩ lóé Ɩzɩrayɛl nɛ́ŋ wuu a yómo. Ɓa nɛ́ fa kɔ́ʋ́ lalyoore, rɩ́rʋ́ tʋtʋnnɩhɩɛ̃́sɛ, arɩ́rʋ́ sɩ́dííre rɩ́rʋ́ lalyoorihɩɛ̃́sɛ rɩ́rʋ́ lal tórkowa nɩhɩɛ̃́sɛ arɩ́ nɩɛ ná há zʋ́ tórkowa ná vɩ́va arɩ́ zakzɩnna. 23 Ɓa nɛ́ fa bɩ́rɛ́ a tʋtʋnnɩhɩɛ̃́sɛ ná zɔmmʋ́ɔ́ rɩ́ mɛɛ́sɛllɛ arɩ́ fí (550), Salomɔŋ há lɩ́sɛ́ ɓa bíbel nɩɛ ná háá sɔ́ʋ́ jɩɩsɛ mɛ́.

24 Faarɔŋ toló há lɛ́ Davidi zʋ́ɔ́, a ko kuójaa ná Salomɔŋ há sɔ́ɛ́ pɔ́ʋ́, tɛ́ŋ mɛ́ nɛ́, Salomɔŋ a ɓa sɔ́ koro jaa ná sɩ́ɛ́, ɓa kaá yɩ́rɛ Milo. 25 Bɩna sɩɛrʋ, naasɩ́ botoro ní Salomɔŋ vaá ɔsɛ vʋk'fisé arɩ́ tɛŋfɩ́ɛ́l vʋka vʋk'ɔ́ɔ́sɛ koro ná ʋ há sɔ́ɛ́ pá Nyuutɩna Wɩɩsɛ daha, kaá nyɩkɛ tulaaléwa koro ná há mɩ́ŋ Nyuutɩna Wɩɩsɛ sɩ́ɛ́. Wɩcʋɔlɩjɩzeno ná sɩɛrʋ tʋtʋ́mɛ́ sɩɛ́ púló ní ɛ́.

26 Kuóro Salomɔŋ báá ɓásɛ nyii daborizeŋzi má tɔ́ɔ́ ná ɓa háá yɩ́rɛ Ɛsɩyɔŋgɛbɛrɛ mɛ́, a lɛ́l Ɛlatɛ há mɩŋ Edoŋ tíé, Mʋfɩɛmɔ nʋɔ. 27 Hɩraŋ hóú nɩɛ ná há ɛ̃ nyii daborsi kaa valɛ́, ɓa mʋ́ súúri Salomɔŋ nɩɛ mɛ́ ɓa tʋ́tʋŋ mʋzeno ná sɩɛrʋ. 28 Ɓa kuosi a mʋ́ tɔ́ɔ́ ná ɓa háá yɩ́rɛ Ofiri, a ka salmɛ píŋ há kɛ́ tɔɔnɛwa fí arɩ́ bɛllɛ, a kaa mʋ́ pá kuóro Salomɔŋ.