Salomɔŋ sɔ́ Wɩcʋɔlɩjɩzeno
6
1 Ɩzɩrayɛl tɩ́náwa há lɛ́ Ezipiti tíé mí, ʋ bɩŋsɛ zɔwaná arɩ́ mɛɛ́sɩbaná mɛ́, ɛ́ tɛ́ŋ mɛ́ rɩ Salomɔŋ má há dí kuorí Ɩzɩrayɛl tíé mí, ʋ bɩŋsɛ baná nɛ́ ɛ́. Bɩŋsɛ baná ná sɩɛrʋ, caŋsɛ bɛllɛ ná ɓa háá yɩ́rɛ Ziivi mí ní, ʋ púl sʋ́sɔ́ Nyuutɩna Wɩcʋɔlɩjɩzeno ná. 2 Wɩcʋɔlɩjɩzeno ná kuóro Salomɔŋ há sɔ́ɛ́ pá Nyuutɩna Wɩɩsɛ gbési ká mɛɛ́tɩr mɛrɛ́ arɩ́ fí (30) ní. Ʋ jɛ́l má a mɛɛ́tɩr fí (10), kɔ́ʋ́ isé má a mɛɛ́tɩr fí arɩ́ bɔmmʋ́ɔ́ (15). 3 Wɩcʋɔlɩjɩzeno ná záwára ɩ há sɩ́ zʋ, ká zɩŋ zʋ́ jaa ná tɩɩ sɩɛrʋ jɛ́l ká mɛɛ́tɩr fí (10) ní, ʋ rɩ́ jaa ná jɛ́l wuu mɔ náŋá, kɔ́ʋ́ gbési a mɛɛ́tɩr bɔmmʋ́ɔ́ (5). 4 Wɩcʋɔlɩjɩzeno tókórówa ná daasɛ nɛ́ kílwó nʋʋsɛ wuu, ɓa hé gɩrɩyaasɩwa a tɔ́wɔ́ mɛ́. 5 Ʋ sɔ́ jɩɩsɛ botoro ní a sulli náŋá mɛ́, a ɓarɛ Wɩcʋɔlɩjɩzeno ná zeŋ mí a kíl. 6 Mʋ́l jaa ná jɛ́l ká mɛɛ́tɩr bɛllɛ arɩ́ fá nɛ́, sɩ́sɩ́ɛ́nʋ́wa ɓɩnɔ́ jɛ́l má ká mɛɛ́tɩr botoro, ká nyúú ɓɩnɔ́ má a mɛɛ́tɩr botoro arɩ́ fá. Salomɔŋ fa ɔ́ɔ́, ɓa sɔ Wɩcʋɔlɩjɩzeno ná ʋ ka nafársɛ har rɩ́, rɩ́ daasɛ ná sakwɔ́ nyúú ká sɩ́ zeŋe ná zʋ́. 7 Dɔ́wʋ́ɔ́ ná ɓa há kené sɔ Wɩcʋɔlɩjɩzeno ná, ɓa bɩ́rmɛ dɔ́wʋ́ɔ́ ná wuu dɩhɩ̃́ ná ɓa háá cɛ́sɩ́wɔ́ nɛ́, ɛ́ wɩ́ɛ́ nɛ́ tɛ, jaa ná sɔ́ɛ́ tɛ́ŋ mɛ́, ɓa báá wɩ háma ɛ́rá má saa ɛ́rá má hɔɔ óŋ wuu dɔ́mɛ́ nɩ́ɛ́, ká sɔ jaa ná tenni. 8 Dánnʋɔ ná ɓa há tɩ́ŋɛ́ zʋ́zʋ́ tíé rí jaa ná, mɩŋ wɩɩsɛ dɩpomí nédu ní, ká neŋcolo mɩŋ ráŋ a zɩ́zɛ́ sɩ́sɩ́ɛ́nʋ́ jaa ná arɩ́ botoro nyúú mí ɓɩnɔ́ ná. 9 Ɛ́ nɛ́ Salomɔŋ sɔ Wɩcʋɔlɩjɩzeno ná a tenni, a pi sɛɛdɩrɛ dole arɩ́ sɛɛdɩrɛ cɛ́rʋ́ a yóú. 10 Jɩwiisi ná ʋ há sɔ́ɛ́ a kíl Wɩcʋɔlɩjɩzeno ná, ɓa oro wuu isé ká mɛɛ́tɩr bɛllɛ arɩ́ fá nɛ́, a yelli Wɩcʋɔlɩjɩzeno ná zenaa mɛ́, ká sɛɛdɩrɛ daasɛ ná mʋ́ sakɛ Wɩcʋɔlɩjɩzeno ná mɛ́.11 Ɛ́ nɛ́ Nyuutɩna Wɩɩsɛ bʋ́l wɩ́ɛ́, a pá Salomɔŋ a bʋ́lɛ́: 12 «Ŋ jɩzeno né ɩ háá sɔ́ɛ́, rɩɩ nɛ́ tɩ́ŋɩ́ŋ ŋmɛ́ŋsɛ rɩ́rɩ́ŋ wɩ́bile, ŋ kíŋse arɩ́ wɩ́ɛ́ ná wuu ŋ há mákɛ́, ŋ sɩ́ tɩ́ŋɩ́ mɛ́, a a wɩ́ɛ́ ná wuu ŋ fa há bʋ́lɛ́ pɛ́ɩ́ áná Davidi. 13 Ŋ sɩ́ mɩŋ Ɩzɩrayɛl tɩ́náwa há káŋ nɩɛ sɩɛrʋ, ŋ wʋ́ɔ́ vɛ́ tá.»
Wɩcʋɔlɩjɩzeno ná sɩɛrʋ ɓɩɛrɛ́ wɩ́ɛ́
14 Ɛ́ nɛ́ Salomɔŋ sɔ Wɩcʋɔlɩjɩzeno ná tenni. 15 Ʋ pí sɛɛdɩrɛ dácasɛ́ nɛ́ a pɩ́ɛ́rɛ tɔ́ sɩɛrʋ zeŋ ná wuu mí, a pɔ́ tíé rí ká zɩ́ yakɛ nyúú rí, ká pi sɩɩpɩrɛ dácɛsɛ́ má a pɩ́ɛ́rɛ tɔ́ tíé wuu. 16 Wɩcʋɔlɩjɩzeno ná sɩɛrʋ, ɓa kéŋ sɛɛdɩrɛ dacɛsɛ́ nɛ́ a kaa sɔɔ coki, a pɔ́ tíé ká zɛ́ yakɛ nyúú, ʋ gbési a mɛɛ́tɩr fí, a lɩ́sɛ Wɩɩsɛ jaa dɩhɩ̃́ ná ɓa haá yɩ́rɛ Wɩɩsɛ dʋŋɔ dɩmɩnɩ́. 17 Wɩcʋɔlɩjɩzeno ná sɩɛrʋ jɩzeno tɩɩ jɛ́l ká mɛɛ́tɩr mɛrɛ́ (20) nɛ́, a mɩŋ Wɩɩsɛ dʋŋɔ dɩmɩnɩ́ ná sɩ́ɛ́. 18 Sɛɛdɩrɛ dapɛ́rsɛ́ nɛ́ ɓa fa pɩ́ɛ́rɛ tɔ́ Wɩcʋɔlɩjaa ná sɩɛrʋ zeŋ wuu mí, rɩ́ dɔ́wʋ́ɔ́ ná ɓa há kené sɔ sɩ́ nyɩ́ɩ́sʋ́. Ká sɔ ɓɩɛ há nɩhɩ̃́ lóéwa arɩ́ tufɩɩla, a hé daasɛ ná mɛ́, rʋ́ʋ́ a wérí. 19 Salomɔŋ fa bɩ́rmɛ Wɩɩsɛ dʋŋɔ dɩmɩnɩ́ ná há mɩŋ Wɩcʋɔlɩjɩzeno ná sɩɛrʋ, rʋ́ʋ́ pi Nyuutɩna Wɩɩsɛ nʋtʋmɛ dáka ná bil ráŋ. 20 Wɩɩsɛ dʋŋɔ dɩmɩnɩ́ ná gbési rɩ́rʋ́ jɛ́l arɩ́rʋ́ isé ká mɛɛ́tɩr fíwa nɛ́. Salomɔŋ fa pí salmɛ há wéró kɩ́ŋkáŋ nɛ́, a mʋ́ɔ́lɛ́ tɔ́ jaa ná sɩɛrʋ wuu, arɩ́ koro ná ɓa há bɩ́rmɛ́ rɩ́ sɛɛdɩrɛ daasɛ. 21 Salomɔŋ fa mʋ́ɔ́lɛ Wɩcʋɔlɩjɩzeno ná sɩɛrʋ wuu rɩ́ salmɛ há wéró kɩ́ŋkáŋ, a pi salmɛ bɛŋzɛllɛ, a sakɛ kɛ́rɛ Wɩɩsɛ jaa ná sɩ́ɛ́, Wɩɩsɛ dʋŋɔ dɩmɩnɩ́. 22 Ʋ fa cʋɔrɛ salmɛ a tɔ́ɔ́ jaa ná wuu mí, ʋ dɩhɩ̃́ oro wuu fa wɩ kaanɛ́, a tɔ́ koro ná fa há mɩ́ŋ Wɩɩsɛ dʋŋɔ dɩmɩnɩ́ ná sɩ́ɛ́.
23 Wɩcʋɔlɩjɩzeno ná sɩɛrʋ, Wɩɩsɛ dʋŋɔ dɩmɩnɩ́ ná sɩɛrʋ, Salomɔŋ pi olívi daa nɛ́, a cɔ́ onni bɛllɛ há nɩhɩ̃́ Wɩɩsɛ málkawa, a ka kiŋkeru, ɓa oro wuu isé a mɛɛ́tɩr bɔmmʋ́ɔ́. 24 Onni ná há nɩhɩ̃́ Wɩɩsɛ málkawa, dʋ́ŋdʋ́ʋ̃́ omo kiŋkó wuu gbési ká mɛɛ́tɩr bɛllɛ arɩ́ fá nɛ́. Kiŋkeru ná bɛllɛ wuu gbési ká mɛɛ́tɩr bɔmmʋ́ɔ́ nɛ́. 25 Bʋllɛ omo má isé mɔhɛ̃́ ɛ́ tɩɩ, ɓa wuu bɛllɛ fa nɩhɩ̃́ náŋá, a mɔ náŋá má. 26 Ɓa oro wuu isé ká mɛɛ́tɩr bɔmmʋ́ɔ́ nɛ́. 27 Ɓa pá onni ná há nɩhɩ̃́ Wɩɩsɛ malkawa ná, a kaa zʋʋ bil Wɩɩsɛ dʋŋɔ dɩmɩnɩ́, jaa ná sɩsɩɛnnʋwa. Ɓa cɛ́ cɛ́rɛ náŋá, ɓa kiŋkeru ko cɔ́ náŋá mɛ́ jaa ná sɩ́sɩ́ɛ́nʋ́wa, ká kiŋkeru ná náŋa má nʋʋsɛ mʋ́ tɩkɛ zeŋ mí. 28 Ʋ pi salmɛ mʋɔlɛ tɔ́wɔ́ wuu mí.
29 Wɩcʋɔlɩjaa ná sɩɛrʋ jɩɩsɛ arɩ́ har jɩɩsɛ zeŋe wuu mí, ʋ ɓɩ́ɛ́rʋ́ wuu kil rí onni ná há nɩhɩ̃́ Wɩɩsɛ málkawa rɩ́ habɛ́ tuuni arɩ́ ɓɩɛ ná há nɩhɩ̃́ tufɩɩla há pure ní. 30 Salmɛ ná nɛ́, ʋ ha kaa mʋɔlɛ jɩɩsɛ ná tíé má wuu. 31 Dánnʋɔ ná háá zʋ Wɩɩsɛ dʋŋɔ dɩmɩnɩ́, ʋ kéŋ gɩr ólivi daasɛ nɛ́, a a borɓarawa a hé. Rɩ ɓa nɛ́ kéŋ zeŋ ná ɓá bɔmmʋ́ɔ́, boro ná dácɔ́ŋsɛ arɩ́rʋ́ dágɛsɛ ná dʋŋɔ jɛ́l lá cɔɔ balá nɛ́. 32 Bonni ná mɛ́, ʋ fʋ́ Wɩɩsɛ málkawa, habɛ́ tuuni arɩ́ tufɩɩla a hé, a ka salmɛ a mʋɔlɛ tɔ́wɔ́ wuu mí. 33 Ʋ kéŋ gɩr ólivi daasɛ nɛ́ a a boro, a hé Wɩɩsɛ dɩmɩnɩ́ ná mɛ́. Rɩ ɓa nɛ́ kéŋ zeŋ ná ɓá baná, dánʋɔ ná dʋŋɔ jɛ́l lá cɔɔ balá nɛ́. 34 Sɩɩpɩrɛsɛ daasɛ nɛ́, ʋ báá kaa a boro há kéŋ cɔrʋ bɛllɛ, cɔɔ wuu ka naasɛ bɛllɛ haá bɩrwɔ́ tɩɩ mɛ́. 35 Ʋ cɔ́ onni há nɩhɩ̃́ Wɩɩsɛ málkawa, rɩ́ habɛ́ tuuni arɩ́ tufɩɩla nʋʋsɛ há wunne a héwó mí, a ka salmɛ a mʋɔlɛ tɔ́wɔ́ mɛ́, ɓa mɔ náŋá.
36 Ɛ́ nɛ́ ɓa pa dɔ́wʋ́ɔ́, ɓa há bɩ́rmɛ́ tá, a sɔ wuolwie Wɩcʋɔlɩjɩzeno ná sɩɛrʋ. Rɩ ɓa sɔ́ wárɛ kolli botoro é wuu, ɓa pɩɛrɛ sɛɛdɩrɛ dole naasɩ́ balá a kíl. 37 Salomɔŋ há dí kuorí, ʋ bɩŋsɛ baná sɩɛrʋ cana ná ɓa háá yɩ́rɛ Ziivi mí ní, ɓa púl bil Wɩcʋɔlɩjɩzeno ná mʋ́l. 38 Bɩŋsɛ fí arɩ́ oro sɩɛrʋ, caŋsɛ córí mí, ɓa háá yɩ́rɛ Bul, ʋ sɩɛrʋ nɛ́ ɓa sɔ Wɩɩsɛ jaa ná, a ɔ́ʋ́ wɩ́ɛ́ wuu ɓa há mákɛ́ tenni. Bɩŋsɛ balpɛ nɛ́ Salomɔŋ pii sɔ jaa ná.