Kuóre 5

Ɓɩɛ ná ɓa há kené ko pɩ́pá Salomɔŋ kál wuu

1 Salomɔŋ fa dí dóé kuówɩɛla ná wuu nyúú, a pɔ́ Ɩfɩratɛ fuo ná mɛ́, a kaa mʋ́ peri Filisiti nɩɛ tíé, a ka ɛ́ mʋ́ peri Ezipiti tíé bʋɔ. Salomɔŋ mɩɩsɛ wuu mí, ɛ́ dɩtɩ́llɛ́ kuóre wuu fa túŋwó loŋpówa a pɩ́pɔ́ʋ́ nɛ́. 2 Tápʋ́l wuu ɓɩɛ ná ɓa há sɩ́ kaa ko pá Salomɔŋ nɛ́ ká míŋgíére zíŋ há peri tɔnɛwa nɛmɛ arɩ́ míŋɓɩsɛ́ má zíŋ há peri tɔnɛwa fí rí cori. 3 Nɔdɔɔlɛ́ fí arɩ́ nɛsɛ mɛrɛ́ má há gʋ́ɔ́rɩ́wɔ́ tɩɩ mɛ́ aá dí gɩr mɛ́, pieŋse arɩ́ bʋnnɛ zɔlɔ, arɩ́ balla: aáma, ɓɛ́ɛ́wa arɩ́ wɩ́ɛ́ma, arɩ́ zʋɔ fíŋfille ná há vʋ́ɛ́ peri.

4 Salomɔŋ nɛ́ faá dí dóé kuóre ná wuu há mɩŋ Ɩfɩratɛ fuo daarɛ́, a pɔ́ Tɩfɩsa mɛ́ a kaá mʋ́ Gaza. Tɛŋfɩ́ɛ́l fa mɩ́nʋ́ rɩ́ duówa ná wuu há kéné lɛ́lwɔ́ pɛ́kɛ. 5 Salomɔŋ hiẽso wuu mí, Ziida arɩ́ Ɩzɩrayɛl tɩ́náwa wuu, a pɔ́ tɔ́ɔ́ ná ɓa háá yɩ́rɛ Daŋ mɛ́, a kaa tuwi yakɛ tɔ́ɔ́ ná ɓa háá yɩ́rɛ Bɛrsɩba mɛ́, nɛrɔ wuu fa kénó arɩ́ tɛŋfɩ́ɛ́l nɛ́, ʋ vínyiwa arɩ́rʋ́ pirsi baksɛ sɩɛrʋ.

6 Salomɔŋ fa kéŋ zɔ́nɛ ná háá pɔsɛ lalyooritórkowa jɩɩsɛ bʋ́ɩ́ mɛɛ́sɛllɛ (40 000). Ʋ zakzɩnna má ká bʋ́ɩ́ fí arɩ́ bɛllɛ (12 000). 7 Salomɔŋ tʋtʋnnɩhɩ́ɛ̃́sɛ ná fí arɩ́ bɛllɛ há jɔ́ʋ́ ɓɩdííle aá pɔ́ʋ́, rɩ ɓa oro wuu cana nɛ́ péré, ʋʋ́ ka ɓɩdííle ko pá Salomɔŋ arɩ́ nɩɛ ná wuu háá dí ɓɩɛ ʋ jaa mɛ́, rɩ́wɔ́ sɩ́ óŋ wuu jáá gúl. 8 Ɓa faá de pɛ́ ka mɩ́ɛ́ arɩ́ zɔ́nyɔ́ɔ́ má kaa mʋ́ kuóro dɩmɩnɩ́ nɛ́, anɛ ɛ́ ʋ há makɛ́, ɓa la aá pá zɔ́nɛ ná wuu.

Salomɔŋ zɩ́mɛ́ kɛ nɩɛ wuu

9 Wɩɩsɛ fa pá Salomɔŋ zɩ́mɛ́ arɩ́ wɩ́zɩmɛ kɩ́ŋkáŋ, ʋ wólli lɩ́lɩ́sɛ wɩ́ɛ́ há kánɔ́ anɛ mʋʋ nʋɔ guohɩɛl mʋ́ʋ́la. 10 Salomɔŋ zɩ́mɛ́ nɛ́ fa kɛ zɩ́ŋzɩnna ná wuu há mɩŋ wɩɩsɛ dɩpomí caasɛ́, arɩ́ Ezipiti tíé zɩ́ŋzɩnna wuu. 11 Ʋ nɛ́ fa kéŋ zɩ́mɛ́ a kɩ́llɛ nɛ́ŋ wuu, ʋ zɩ́mɛ́ nɛ́ fa kɛ Ezirahiti ná há lɛ́ Etaŋ, arɩ́ Hemaŋ, Kalɩkɔl arɩ́ Darɩda há ká Mahɔl bɛlɛ. Ʋ yɩr fa lɩ́ɔ́ duówa ná wuu há kíl Ɩzɩrayɛl tíé. 12 Salomɔŋ sʋ́ɔ́lɛ sɩ́ŋsʋ́ɔ́lɔwa bʋ́ɩ́toro ní (3 000), a yɩ yɩɩla má bʋ́ɩ́ arɩ́ bɔmmʋ́ɔ́ (1005). 13 Ʋ wólló bʋ́l tuuni wɩ́ɛ́: ʋ bʋ́l Liibaŋ sɛɛdɩrɛwa wɩ́ɛ́ arɩ́ Ɩzɔpɛ ná háá nyʋ́ zéŋ mí wɩ́ɛ́; a bʋ́l pʋsɛ wɩ́ɛ́, diíwiisi, títuure arɩ́ náŋwʋlɛ́ wuu wɩ́ɛ́. 14 Dúníé kuóre wuu ní nɛ́ Salomɔŋ zɩ́mɛ́ wɩ́ɛ́, a tʋŋ nɩɛ ɓa ko aá zésú zɩ́mɛ́ wɩ́bʋlɛ́.

Salomɔŋ kénú tɩɩ rʋ́ʋ́ sɔ́ Wɩcʋɔlɩjɩzeno

15 Tiiri tɩ́náwa kuóro Hɩramɛ há nɩ́ɛ́ rɩ Salomɔŋ nɛ́ ɓa lɩ́sɛ, ʋ lɔ́ʋ́ áná Davidi nyúú mí a dí kuorí, ʋ tʋ́mʋ́ tʋtʋnna rɩ́wɔ́ mʋ́ bɔ́llɛ Salomɔŋ, bee wɩ́ɛ́ ʋ rɩ́ Davidi fa ká naŋnɔ́ŋsɛ rɛ́. 16 Salomɔŋ bɩrɛ tʋŋ a pá Hɩramɛ a bʋ́lɛ́: 17 «Ɩ ɩ́ɔ̃́ rɩ lalwa fa kílíŋ áná Davidi hé, ʋ wɩ wóllé sɔ Wɩcʋɔlɩjɩzeno, rɩ́wɔ́ cʋ́cʋ́ɔ́lʋ́ Nyuutɩna Wɩɩsɛ ráŋ, a kaa mʋ́ peri tɛ́ŋ ná mɛ́ Nyuutɩna Wɩɩsɛ há ɛ́ɛ́ ʋ yoo dúú dɩŋdɔma wuu. 18 Amá mʋ́l né mí Nyuutɩna Wɩɩsɛ, ŋ Wɩɩsɛ ɔ́ɔ́ ŋ ké arɩ́ tɛŋfɩ́ɛ́l, wɩ́ɩ́ wuu wɩ́ŋ walmɛ. 19 Nyuutɩna Wɩɩsɛ fa tá nʋɔ páŋ áná Davidi rʋ́ʋ́ bio ná há sɩ́ lɔ́ʋ́ nyúú mí, a dí kuorí ní sɩ́ sɔ jaa a pɔ́ʋ́. Ɛ́ sabɩɩna nɛ́ ŋ ka rɩ́ŋ sɔ jɩzeno a pá Nyuutɩna Wɩɩsɛ, ŋ Wɩɩsɛ. 20 Ɛ́ wɩ́ɛ́, a rɩ́ɩ́ tʋtʋnna conni sɛɛdɩrɛ daasɛ Lɩbaŋ mɛ́ a páŋ. Ŋ sɩ́ a rɩ́ŋ tʋtʋnna ko pɛ́ɩ́ tʋtʋnna mɛ́, rɩ́wɔ́ conni daasɛ ná. Makɛ ɛ́ wuu ɩ háá jɛɛ́ rɩ́ŋ túmí tʋtʋnna, ŋ sɩ́ túŋ pɛ́ɩ́. Ɩ ɩ́ɔ̃́, á wɩ nɩɛ kené ɓa zɩŋ daasɛ kʋsɛ́ anɩ́ɩ́wa Sɩɩdɔŋ nɩɛ.»

21 Hɩramɛ há zésí Salomɔŋ wɩ́bʋlɛ́ ná, ʋ sɩɛrʋ ɔ́sɔ́ tɔrɛ ʋ sɛ́: «Ŋŋ́ dɛ́nnɛ Nyuutɩna Wɩɩsɛ zaa, ʋ há pí heŋbóle ná há kéŋ zɩ́mɛ́, a pá Davidi rʋ́ʋ́ bel tɔ́zenó né. 22 Ɛ́ nɛ́ Hɩramɛ tʋŋ ɓa mʋ́ bʋ́l pá Salomɔŋ: «Ŋ nɩ́ɩ́ liŋó, ɩ há tʋ́mɛ́ rɛ́, ŋ sɩ́ a wɩ́ɩ́ ná wuu ɩ háá jɛɛ́. Ŋ sɩ́ a rɩ́ŋ tʋtʋnna kʋsɛ sɛɛdɩrɛ arɩ́ sɩɩpɩrɛsɛ» dole a kaa ko pɛ́ɩ́. 23 Ŋ tʋtʋnna sɩ́ pa dole ná, a lɛ Lɩbaŋ, a kaa tuwi mʋzeno nʋɔ, a vɔsɛ paa hé nyii mí, rɩ́wɔ́ daali ko dɩhɩ̃́ ná ɩ há sɩ́ makɛ. Ráŋ nɛ́ ŋ tʋtʋnna sɩ́ púríwó rɩ́ɩ́ tʋtʋnna paa kaa col. Wɩ́ɩ́ ná ɩ má há sɩ́ a nɛ́ ká, rɩ́ɩ́ páŋ rɩ́rɩ́ŋ jaa nɩɛ ɓɩdííle.»

24 Ɛ́ nɛ́ Hɩramɛ pá Salomɔŋ sɛɛdɩrɛ arɩ́ sɩɩpɩrɛsɛ dole, a mɔ́ ɛ́ ná wuu ʋ háá jɛɛ́. 25 Bɩná é wuu, Salomɔŋ má sɩɛ́ pá Hɩramɛ bile zíŋ há peri tɔɔnɛwa bʋ́ɩ́walgo (6 000) ní arɩ́ ólivi nʋʋ ná há wɩ busunnú kéné má líítirwa bʋ́ɩ́ cori (8 000), ʋ la aá pɔ́ʋ́ nɩɛ.

26 Nyuutɩna Wɩɩsɛ pá Salomɔŋ zɩ́mɛ́ anɛ ʋ há bʋ́l ɛ́ pɔ́ʋ́. Salomɔŋ arɩ́ Hɩramɛ pɛ́kɛ fa wéró kɩ́ŋkáŋ, ɓa tá nʋɔ a pá náŋá.

Salɔmɔŋ ɔɔ nɩɛ tʋ́ŋ tʋtʋŋduóru

27 Kuóro Salomɔŋ fa tʋ́ɔ́sɛ tʋtʋnna bʋ́ɩ́ mɛrɛ́ arɩ́ fí ní (30 000) Ɩzɩrayɛl tíé wuu mí. 28 Ʋ fa ɔ́ɔ́ Adɔnɩramɛ nɛ́ a tʋtʋnna ná nɔhɔ̃́. Salomɔŋ kéŋ nɩɛ ná ɓa gori botoro. Bʋ́ɩ́ fí (10 000) sɩɛ́ mʋ́ Libaŋ a tʋŋ caná, ká bɩrɛ ko fɩɛlɛ jaa mɛ́ caŋsɛ bɛllɛ. Bʋ́ɩ́ fí (10 000) má báá mʋ́, a tʋŋ caná, ká bɩrɛ ko jaa, a fɩɛlɛ caŋsɛ bɛllɛ, ká bʋ́ɩ́ fí (10 000) nɔ́ŋɔ má báá a ɛ́ tɩɩ. 29 Salomɔŋ fa kéŋ nɩɛ bʋ́ɩ́ mɛɛ́sɩbaná (80 000) má háá cɔ́ dɔ́wʋ́ɔ́ paalɔ nyúú, ká nɩɛ bʋ́ɩ́ mɛɛ́sɩbotoro arɩ́ fí (70 000) má cɩ́cɩ́ɩ́nɛ dɔ́wʋ́ɔ́ ná. 30 Salomɔŋ lɩsɛ tʋtʋnnɩhɩ́ɛ̃́sɛ bʋ́ɩ́toro arɩ́ zɔɔtoro (3 300) ní, rɩ́wɔ́ bíbel tʋtʋnna ná mɛ́. 31 Ɛ́ nɛ́ ʋ bʋ́l pá tʋtʋnna ná rɩ́wɔ́ cɔ́ lɩ́sɛ dɔ́wɩ́zeŋsi ná há wéró, rɩ́wɔ́ kaa bil Wɩcʋɔlɩjɩzeno ná mʋ́l. 32 Salomɔŋ rɩ́ Hɩramɛ tʋtʋnna arɩ́ tɔ́ɔ́ ná ɓa háá yɩ́rɛ Gebal tɩ́náwa báála nɛ́ cónní dole, a cɔ́ dɔ́wʋ́ɔ́ ná ɓa há sɩ́ kaa sɔ Wɩcʋɔlɩjɩzeno ná.