Salomɔŋ já kuóro Faarɔŋ toló
3
1 Salomɔŋ tɩŋ hájaasɛ́ mɛ́, a a Ezipiti kuóro hɩɩla. Salomɔŋ jɔ́ʋ́ toló ná, a kaa mʋ́ ké Davidi zʋ́ɔ́ ná mɛ́, a ké ráŋ ɛ́ a mʋ́ peri tɛ́ŋ ná mɛ́ ʋ há sɔ́ʋ́ kuójaa arɩ́ Nyuutɩna Wɩɩsɛ jaa, arɩ́ zekúme ná há kíl Zerizalɛmɛ, a tenni.2 Ɛ́ tɛ́ŋ mɛ́, rɩ ɓa ha wɩ Wɩcʋɔlɩjɩzeno sɔ́ɛ́ rɩ́wɔ́ mʋ́ cɩ́cʋɔlɛ Nyuutɩna Wɩɩsɛ ráŋ. Nɩɛ faá ɔsɛ vʋka venni dɩɓáárɛ́ nɛ́. 3 Salomɔŋ fa có Nyuutɩna Wɩɩsɛ, a tɩ́tɩŋ wɩ́ɛ́ ná ʋ áná Davidi há mákɛ́ pɔ́ʋ́, amá ʋ má tɩɩ faá ɓʋ́ pʋsɛ aá ɔsɛ vʋka dɩhɛ̃́ ná ɓa háá ɓaarɛ venni ní, aá nyɩkɛ tulaalé míŋ ráŋ.
Salomɔŋ sʋl zɩ́mɛ́ Wɩɩsɛ rɩ́
4 Dɩhɩ̃́ ná nɩɛ fa há cáásɛ́ aá ɔsɛ vʋka mɩŋ Gabaɔŋ mɛ́ nɛ́. Tɛ́ŋ oro mí, Salomɔŋ mʋ́ ráŋ rʋ́ʋ́ ɔsɛ vʋk. Ʋ fa la sɩ́ɛ́ ɔsɛ vʋkfíse ráŋ, vʋk'ɔ́ɔ́sɩ́koro daha, a peri naasɩ́ bʋ́ɩ́. 5 Tɩ́taŋ oro, Salomɔŋ há mɩŋ Gabaɔŋ mɛ́ ɛ́, Nyuutɩna Wɩɩsɛ kenú tɩɩ ko mákʋ́ duose sɩɛrʋ a bʋ́l pɔ́ʋ́ a bʋ́lɛ́: «Sʋl omo ná wuu ɩ háá jɛɛ́ ŋ dɩhɩ̃́, ŋ sɩ́ pɛ́ɩ́.» 6 Ɛ́ nɛ́ Salomɔŋ sɛ́: «Ɩ cáásɔ́ dí zilé kɩ́ŋkáŋ ŋ áná Davidi há kɛ́ɩ́ tʋtʋnnɔ mɛ́, a tɩ́ŋʋ́ fa há ɛ́ɩ́ yardá, a ka sapʋmmɩ́, a cɛ́ taŋá naa mɛ́. Zilé ná tɩɩ tɩɩ nɛ́ ɩ ha ɔ́ʋ́ mɛ́, a pɔ́ʋ́ heŋbólwie, ʋ zaa kénú kuóɓasa daha nyɛ. 7 Nyuutɩna Wɩɩsɛ, ŋ Wɩɩsɛ, ɩ nɛ́ ɛ́ɛ́ ŋ láŋ áná Davidi nyúú mí a dí kuorí. Amá ŋ ká heŋbié, a wɩ wɩ́ɛ́ ná ŋ há mɔhɛ̃́ rɩ́ŋ a ɛ̃. 8 Ŋ mɩŋ nɩɛ ná ɩ há lɩ́sɛ́ sɩɛrʋ nɛ́. Ɓa ká nɩkana rɛ́, nɛ́ŋ há wʋ́ɔ́ wó aá dɩɩsɛ. 9 Ɛ́ wɩ́ɛ́, páŋ wɩ́zɩmɛ rɩ́ŋ zɩŋ wɩ́were arɩ́ wɩ́bɔma caksɛ́, a kaá kánɩ́ nɩɛ. Rɩ ɛ́ raá, ɛ́rɛ́ rɛ́ ŋ sɩ́ wólli kánɩ́ nɩkana nyáŋ>>» 10 Nyuutɩna sɩɛrʋ tɔrɛ Salomɔŋ sʋlɛ́ ná. 11 Ɛ́ nɛ́ Wɩɩsɛ bʋ́l pɔ́ʋ́: «Ɩ há la sɩ́ɛ́ jɩ́ja wɩ́ɩ́ né ní, ká wɩ mɩgbóó ɛ́rá má a wɩ sʋlɛ́ jɩ́ja rɩ́ɩ́ ka ɓɩɛ nɛ́, a báá wɩ sʋlɛ́ jɩ́ja rɩ́ɩ́ dɩŋdɔma má nɛ́ sʋsɛ, amá ká sʋl zɩ́mɛ́ rɩ́ɩ́ kaa kánɩ́ŋ nɩɛ rɩ́ táŋa, 12 ŋ sɩ́ a wɩ́ɩ́ ná ɩ háá jɛ́ɛ́ a pɛ́ɩ́. Ŋ há sɩ́ pɛ́ɩ́ zɩ́mɛ́ rɩ́ wɩ́zɩmɛ ná nɛ́ŋ wuu há wɩ́ɩ́ sɩ́ɛ́ lɛ́ɩ́ káŋwɔ́, ká nɛ́ŋ wuu waá a rʋʋ káŋwɔ́ ɩ har mɛ́. 13 Ŋ ha sɩ́ pɛ́ɩ́ ɓɩɛ ná má tɩɩ ɩ há wɩ sʋlɛ́. Ŋ sɩ́ a rɩ́ɩ́ ka ɓɩɛ arɩ́ píŋ». Ɩ mɩɩsɛ wuu mí, kuór wuu waá mɩŋ rɩ́ɩ́ mɔ́ɩ́. 14 Rɩɩ nɛ́ sɩ́ tɩŋɩ́ŋ ŋmɛ́ŋsɛ, a tɩŋɩ́ŋ wɩ́bile arɩ́rɩ́ŋ wɩ́makɛ́ ná wuu, anɩ́ɩ́ áná Davidi há a ɛ́, ŋ sɩ́ lo rɩ́ɩ́ ká mɩgbó.»
15 Ɛ́ nɛ́ Salomɔŋ gírki isi, a ná rɩ duose sɩɛrʋ nɛ́. Ʋ bɩrɛ mʋ́ Zerizalɛmɛ, a cɛ́ Nyuutɩna Wɩɩsɛ nʋtʋmɛ dáka ná sɩ́ɛ́; a ɓʋ́ pʋsɛ a ɔsɛ vʋk'físe arɩ́ tɛŋfɩ́ɛ́l vʋka. Ká dí cana pɔ́ʋ́ tʋtʋnna wuu.
Salomɔŋ dí sarɩ́ya arɩ́ zɩ́mɛ́
16 Kal oro hácɔrma bɛllɛ ísó a ko kuóro Salomɔŋ dɩhɩ̃́. 17 Háála ná nɔ́ŋɔ sɛ́: «Kuóro, ŋ rɩ́ háálɔ né wuu mɩŋ jaa balá mɛ́ nɛ́. Ŋ lʋ́l heŋbólwie, rʋʋ mɩŋ ráŋ. 18 Ŋ lʋlɛ́ har mɛ́, tápʋlɛ botoro kal nɛ́ ʋ má lʋl. Á dʋŋɔ bɛllɛ nɛ́, nɛ́ŋ nɔ́ŋ fa wɩ́rá mɛ́ súúré jaa ná sɩɛrʋ. 19 Háálɔ né pɛ́ tɩ́taŋ oro, a billi nyáŋʋ́ bio ɓʋ́. 20 Ŋ cúŋ pɛ́ dóŋ kɔ́ʋ́ isi tɩ́tafɩɛla, a píŋ bio ná fá há pɩ́nɩ́ŋ sáma, a kaa mʋ́ bílú sáma, ká bɩrɛ púú bisʋwɛ ná a kaa ko bílíŋ sáma mɛ́. 21 Ŋ há ísé cɩ́cʋɔ, a jɩ́ja rɩ́ŋ ka ɩ́l a páŋ bio, ŋ béló rʋʋ sʋ́wɔ́. Amá sɩ́ɛ́ há wuole, ŋ bélú weri, ŋ nóú rɩŋ bio raá.
22 Ɛ́ nɛ́ háálɔ ná nɔ́ŋɔ má sɛ́: «Aɩ́, bio ná há wómmó ní káŋ bio; bisʋwɛ ná nɛ́ kɛ́ɩ́ bio.» Amá dʋŋdʋʋ̃́ háálɔ ná báá caasó a bʋ́lɛ́: «Aɩ́, bisʋwɛ ná nɛ́ kɛ́ɩ́ bio; ʋ ná há wómmó ní káŋ má bió.» Ɓa kaa cɛ́ pʋ́pɔsɛ náŋá kuóro sɩ́ɛ́. 23 Ɛ́ nɛ́ kuóro sɛ́: «Ɩ́ oro wuu sʋ́ʋ́ nɛ́ tɛ bio ná há wómmó, ká nɔ́ŋɔ tɩ́llɛ bisʋwɛ!»
24 Salomɔŋ báá bʋ́lɛ́: «Ɩ́ pi tókowí ko páŋ.» Ɛ́ nɛ́ ɓa pii kaa ko pɔ́ʋ́. 25 Ɛ́ nɛ́ kuóro pá ŋmɛ́nɔ a bʋ́lɛ́: «Ɩ́ ka biwómmi ná conni bɛllɛ, a pi fá a pá nɔ́ŋɔ, ká pi fá pá nɔ́ŋɔ má.»
26 Ɛ́ nɛ́ susu ka háálɔ ná bio há wómmó, ʋ bʋ́l pá kuóro a bʋ́lɛ́: «Ŋŋ́ sʋlɩ́, kuóro, pi bio ná a pá háálɔ ná, sʋ́ʋ́ ɓʋ́!» Amá háálɔ ná nɔ́ŋɔ má sɛ́: «Á wuu sɩ́ gúl, á oro wuu wɩ bio ná tɩ́llɛ. Ɩ́ kánʋ́ conni bɛllɛ!» 27 Ɛ́ nɛ́ Salomɔŋ sɛ́: «Ɩ́ sɩ́ bio ná ɓʋ́, ɩ́ pi bio ná pá dʋ́ŋdʋʋ̃́ háálɔ ná, ʋ nɛ́ ká biwommi ná maá tɩɩ.
28 Ɩzɩrayɛl jamáŋ wuu há nɛ́ ɛ́ kuóro há dí sarɩ́ya ná, ɓa wuú fɔ́ʋ́ kɩ́ŋkáŋ. Ɓa ɩ́ɔ̃́ rɩ Wɩɩsɛ pɔ́ʋ́ zɩ́mɛ́ rɛ́, rʋ́ʋ́ kaá dí sarɩ́ya ʋ sɩ́ɩ́ mɛ́.