Usayi vɛ́ Ahitofɛl caana
17
1 Ahitofɛl bʋ́l Abɩsalɔŋ rɩ́ bʋlɛ́: «Lo rɩ́ŋ tʋɔsɛ nɩɛ bʋ́ɩ́ fí rɩ́ bɛllɛ a isi tɩ́táŋ né wuu a kiri Davidi har. 2 Ŋ sɩ́ mʋ́ kánʋ́ tɛ́ŋ ná mɛ́ ʋ sɩɛrʋ há sɩ́ ko zɔkɛ kɔ́ʋ́ bɔl, ŋ sɩ́ a rɩ́ héwíŋ zʋ́ʋ́; nɩɛ ná wuu há tɩ́ŋʋ́ mɛ́ sɩ́ fá, káŋ sɩɛ́ ɓʋ́ʋ́ dʋŋɔ. 3 Ká sɩ́ɛ́ kɛsɛ nɩɛ ná wuu kaa bɩrɛ kóí rɩ́. Ɛ́ wɩ́ɛ́, báálɔ ná ɩ há wʋ́ʋ́ ja nɛ́ kué sʋwɛ, nɩɛ ná wuu sɩ́ bɩrɛ kóí dɩhɩ̃́, a ké rɩ́ tɛŋfɩ́ɛ́l.» 4 Ɛ́ wɩ́bʋl tɔrɛ Abɩsalɔŋ rɩ́ Ɩzɩrayɛl nɩhɩ́ɛ̃́sɛ wuu sɩɛrʋ. 5 Ɛ́ nɛ́ Abɩsalɔŋ sɛ́: «Ɩ́ baa yɩ́rɛ Arkɛ tɩ́náwa báálɔ Usayi páŋ, ráá zésú má há sɩ́ bʋ́lʋ́ ná.» 6 Usayi mʋ́ Abɩsalɔŋ dɩhɩ̃́, ɛ́ nɛ́ Abɩsalɔŋ bʋ́lʋ́ rɩ́ bʋlɛ́: «Ná Ahitofɛl há bʋ́lʋ́ ná, á mɔhɔ̃́ rá a ɛ́ ʋ há bʋ́lɛ́ nɛ́>> Rɩ ɛ́ nɛ́ wɩ wo, ɩ má baa kánɩ́ sabɩɩna ko.» 7 Usayi bʋ́l Abɩsalɔŋ rɩ́ bʋlɛ́: «Ahitofɛl cáánɛ́ né zaa wɩ weri.» 8 Ɩ ɩ̃́ áná rɩ́rʋ́ nɩɛ wérí rí: Ɓa wuu ká sóóji bibárá nɛ́, ɓa tɛŋ dé búbuori anɛ ɓee bɛlɛ ɓa há kɛsɛ kɔ́ʋ́ tɛŋ búbuori ɛ́ nɛ́. Ɩ áná lalyóórílɩ́ŋ zénó, ʋ waá sáŋ kánʋ́ nɩɛ rɩ́ɩ́ pɛ́ tɩ́taŋ. 9 Nyɛ mɛ́ ʋ féŋsi bʋɔ sɩɛrʋ, ɛ́ rá má dɩhɩ̃́ nɔ́ŋɔ. Rɩ ɓa dé bʋʋrɛ ɓʋ́ʋ́sɩ́rá nɩɛ, nɩɛ sɩ́ nɛ a bʋlɛ́: ɓa yóó dí Abɩsalɔŋ rɩ́rʋ́ nɩɛ ná. 10 Ɛ́ wɩ́ɛ́, nɩɛ ná má tɩɩ beŋtunni há pɩ́rɛ́, anɛ kɩ́ŋkána, ɓa má tɩɩ sɩ́ yʋɔrɛ; beé wɩ́ɛ́ Ɩzɩrayɛl nɩɛ wuu ɩ́ɔ̃́ zɩŋ rɩ́ɩ́ áná ká lalyóóríbɩbár rɛ́, a ka lalyóóríbɩbara má. 11 Ŋ caana nɛ́ sɩɛ́ ká, rɩ́ɩ́ yɩ́rɛ Ɩzɩrayɛl nɩɛ wuu ko hé náŋá mɛ́ ɩ laka, a pɔ́ Daŋ há mɩŋ wɩɩsɛ dɩpomí nɛ́gʋ́ɔ́ mɛ́ ká kaa mʋ́ lɛ Berseba há mɩŋ wɩɩsɛ dɩpomí néduu, rɩ́wɔ́ a ɓɩkáná anɛ mʋʋ nʋɔ hɩɛla; ká rɩ́ tɩɩ sɩɛ́ la sɩ́ɛ́, a káŋwɔ́ mʋ́ yo lal. 12 Ráŋ ná wuu Davidi há mɩnɔ́, á sɩ́ tukú mí; á sɩ́ túwú mí anɛ ɛ́ nyɛlɔ haá tuwi tíé nyúú a kánʋ́. Ʋ rɩ́ nɩɛ ná wuu há mɩ́nʋ́ har, oro balá má waá a rʋ́ʋ́ lú lɛ. 13 Rʋʋ nɛ́ báá zʋ́ɛ́ féŋsi tɔ́ɔ́ nɔ́ŋ mɛ́ má, á sóójiwa wuu sɩ́ pa ŋmɛ́sɛ a mʋ́ ɛ́ tɔ́ɔ́, a pɔ́sʋ́ kaa tuwi hé polcʋ́ɔ́rɛ sɩɛrʋ, a kaa ja rɩ́ dɔ́wɩ́wíé balá má sɩ́ káánʋ́.
14 Abɩsalɔŋ rɩ́ Ɩzɩrayɛl nɩɛ wuu sɛ́: «Arkɛ tɩ́náwa báálɔ Usayi caana ná nɛ́ wer Ahitofɛl caana!» Beé wɩ́ɛ́ Nyuutɩna Wɩɩsɛ já rɩ́ Ahitofɛl caana ná há wéró a yɔ́ɔ́ nɛ́, a makɛ rʋ́ʋ́ pi bɔ́ŋbɔ́ŋ tʋŋ Abɩsalɔŋ mɛ́.
Davidi fɔ́ʋ́ daarɛ Zʋrdɛŋ fuo dáárɛ́
15 Usayi bʋ́lɔ́ pá vʋk'ɔɔsa Sadɔkɛ rɩ́ Abiyatarɛ a bʋlɛ́: «Ahitofɛl cáánɛ Abɩsalɔŋ rɩ́ Ɩzɩrayɛl nɩhɩ́ɛ̃́sɛ a bʋlɛ́ nyɛ rɩ́ nyɛ nɛ́, káŋ má cáánɩ́wɔ́ nyɛ rɩ́ nyɛ. 16 Mʋ́l néé mí, ɩ́ tʋŋ nɛ́ŋ kɩ́kɛ́lɛ́ Davidi rɩ́. Ɩ́ a rɩ́wɔ́ bʋl pɔ́ʋ́ rʋ́ʋ́ sɩ́ Zʋrdɛŋ polo ná mɛ́ cɔ́ɔ́. Amá, rʋʋ daarɛ fuo daarɛ́, a mʋ́ sɩ́ɛ́rɩ́, a makɛ rɩ́wɔ́ sɩ́ kuóro rɩ́rʋ́ nɩɛ ɓʋ́ʋ́sʋ́.»
17 Yonataŋ rɩ́ Ahimasɛ fa mʋ́ɔ́ cɛ́ Ɛŋrʋgɛl nyibulé fuo laka aá dɛllɛ. Tʋtʋŋháálɔ oro ko bʋl pɔ́wɔ́, rɩ́wɔ́ mʋ́ bʋl pá kuóro Davidi. Bee wɩ́ɛ́, ɓa fa wɩ tɔ́ɔ́ sɩɛrʋ kɔwɛ aá zʋ, a makɛ rɩ́ nɩɛ háá nówó. 18 Ká biwie oro nówó a ko bʋl pá Abɩsalɔŋ. Ɛ́ nɛ́ báála ná bɛllɛ va kɩ́kɛ́lɛ́ a mʋ́ peri Bahurimi, a zʋ báálɔ oro jaa; rɩ vɩ́lɛ́ mɩ́nʋ́ wuolo sɩɛrʋ, ɓa zʋʋ féŋsi ráŋ. 19 Jaa tɩ́na háálɔ pi gɛrɔ jɛrɛ tɔ́ vɩ́lɛ́ ná mɛ́, a pi oŋfoke jɛrɛ ɛ́ gɛrɔ daha, a makɛ rɩ́wɔ́ sɩ́ zɩ́mʋ́ rɩ́ vɩ́lɛ́ mɩŋ ráŋ. 20 Abɩsalɔŋ tʋtʋnna tɩŋ ko zʋ háálɔ ná dɩhɩ̃́ jaa ná mɛ́, a bɔ́sʋ́ bʋlɛ́: «Ahimasɛ rɩ́ Yonataŋ mɩŋ nɛɛ́>>» Háálɔ ná sɛ́: «Ɓa tɩ́ŋ nyinaa daarɛ.»
Ɛ́ nɛ́ ɓa jáwɔ́ jáwɔ́ gúl, ká bɩrmʋ́ Zerizalɛmɛ. 21 Ɓa há cólé, Ahimasɛ rɩ́ Zonataŋ lɛ́ vɩ́lɛ́ ná mɛ́, a mʋ́ ná Davidi, a bʋ́lʋ́ rɩ́ bʋ́lɛ́: «Ɩ́ isi a va kɩ́kɛ́lɛ́ a daarɛ fuo daarɛ́, bee wɩ́ɛ́ Ahitofɛl bʋ́l nyɛ nɛ́ cáásɩ́wa.» 22 Ɛ́ nɛ́ Davidi rɩ́rʋ́ har nɩɛ wuu isi zʋ ŋmɛ́nɔ, a daarɛ Zʋrdɛŋ fuo. Tɔ́ɔ́ kúó aá pʋl, rɩ ɓa wuu dáárɛ́ Zʋrdɛŋ fuo, nɛ́ŋ balá má wɩ káánɛ́.
23 Ahitofɛl há kɩ́ɛ́lɛ́ rɩ ɓa wʋ́ʋ́ caana ná zésé, ʋ ísó kánʋ́ kokúme, a pa laala sakɛ a zɛ́, a bɩrmʋ́ jáá ʋ tɔ́ɔ́ mɛ́. A máŋsɛ wɩ́ɛ́ pɔ́ʋ́ jaa nɩɛ, ká yo ŋmɛ́ŋ. Ɓa púú lɩɩ húú áná lɛlbule mí.
Davidi mʋ́ɔ́ ké Mahanayimi mí
24 Davidi mʋ́ɔ́ peri Mahanayimi, rɩ Absalɔŋ rɩ́rʋ́ har nɩɛ wuu sɩɛ́ nɛ́ kúé aá daarɛ Zʋrdɛŋ fuo. 25 Amasa nɛ́ Abɩsalɔŋ pii hóú lalyoore nyúú, ʋ la Zʋwabɛ mɛ́. Amasa ná ká Ɩzɩrayɛl tɩ́náwa báálɔ oro ɓa haá yɩ́rɛ Yitira bio ní. Ʋ fa ja Nahasɛ toló Abigayi ní. Abigayi ná sɩɛ́ ká Zʋwabɛ maá Seruya maábio ní. 26 Abɩsalɔŋ rɩ́ Ɩzɩrayɛl nɩɛ ná wuu há mɩ́nʋ́ har, mʋ́ɔ́ cíkíwó zʋ́ɔ́ Galadɛ tíé.
27 Davidi há mʋ́ɛ́ peri Mahanayimi, Nahasɛ bio Sobi há lɛ́ Amonitiwa tɔ́ɔ́ Raba, rɩ Amɩyɛlɛ bio Makiri há lɛ́ Lodebar, rɩ́ Barzɩlayɩ há lɛ́ Rogelimi, Galadɛ tíé mí 28 ɓa ɛ́ nɩɛ wuu ísó cɩ́ɩ́nɛ gódówa, gɛbaŋsa, táásawa, a kaa ko pá Davidi. Ɓa kéŋ ɓɩdííle má ko: bile, ɔrzɛ, míŋ, oŋhalɛ́, síŋsúóŋ, siiwie, 29 tʋʋ, nɛ'ɩ́lnʋʋ, pieŋse arɩ́ nɔɔ namɩɛ; a kaa ko pá Davidi rɩ́rʋ́ nɩɛ rɩ́wɔ́ dí. Ɓa sabɩɩna mɛ́ ɓa sɛ́: «Ɓa há mɩŋ gɩrbétéke ná sɩɛrʋ aá va, losu rɩ́ nyinyʋ́ɔ́sɛ kéŋwó, bɔlɛ má zʋ́wɔ́ mɛ́.»