Davidi rɩ́ Siba wɩ́ɛ́
16
1 Kuóro Davidi há kué zɛ́ paalɔ nyúú daarɛ, ʋ céŋ Mefibosɛtɛ tʋtʋnnɔ Siba rʋʋ kóú rí. Ʋ kéŋ kokúsi bɛllɛ há cɩ́ɩ́nɛ dɩpɛ́ŋwa zɔwɛllɛ, ɛllɛnɔŋhɩlɛ́ duúme zɔlɔ, pirnɔŋkaasɛ́ má duúme zɔlɔ arɩ́ dɩvɛ́ŋ pur sɩ́ɩ́. 2 Ɛ́ nɛ́ Davidi bɔsɛ Siba: «Ɩɩ́ já rɩ́ a ɓɩɛ nyáŋ wuu beé>>» Siba sɛ́: «Kuóro, ɩ jaa nɩɛ sɩ́ zɛ́ kokúsi ná, dɩpɛ́ŋwa rɩ́ tunɔnɔ ná sɩ ɛ́ɩ́ sóójiwa ɓɩdííli, ká rɩ́ nɩɛ ná há sɩ́ bɔl gɩr sɩɛrʋ, rɩ́wɔ́ nyɩ́nyɔ dɩvɛ́ŋ ná.» 3 Kuóro baa bɔ́sʋ́: « Ká ɩ nyúútɩ́na Sayul bio Mefibosɛtɛ ná mɩŋ nɛ́ɛ́>>» Siba sɛ́: «Ʋ káánɛ Zerizalɛmɛ mɛ́, béé wɩ́ɛ́ ʋ fa bɩ́ɩ́nɔ́ rɩ Ɩzɩrayɛl nɩɛ sɩ́ púú áná kuorí pɔ́ʋ́ zaa.» 4 Ɛ́ nɛ́ kuóro bʋ́l Siba rɩ́ bʋlɛ́: «Ná, Mefibosɛtɛ há tɛ óŋ ná wuu, ɩ nɛ́ tʋ̃́. Siba sɛ́: «Nyúútɩ́na, ŋ kuóro néŋ ní ɓírmi tíé ɩ sɩ́ɛ́ nyɛ, aá bárkɩ́ ɩ sawer wɩ́ɛ́.»Simeyi bʋrɔ́ a hé Davidi mí
5 Kuóro Davidi há mʋ́ɛ́ peri tɔ́ɔ́ ná ɓa haá yɩrɛ Bahurimi, báálɔ oro lɛ́ ráŋ a kóú mí, a bʋrɛ bʋra hóú mí. Ɛ́ báálɔ yɩr nɛ́ Simeyi a lɛ́ Sayul duo sɩɛrʋ, ʋ áná má yɩr nɛ́ Gera. 6 Ʋ pá dɔ́wʋ́ɔ́ aá yosi Davidi rɩ́rʋ́ tʋtʋnna wuu, ká jamáŋ rɩ́ sóójiwa kíl Davidi, a mɩ́nʋ́ néduu rɩ́rʋ́ nágʋɔ wuu. 7 Simeyi sɩɛ́ bʋrɛ hóú mí a bʋlɛ́: «Kaa mʋ́ dɩhuó, nɩkɔsɔ, nɩɓʋ́ʋ́rɔ! 8 Nɩɛ ná wuu ɩ há ɓʋ́ʋ́sɛ́ Sayul jaa mɛ́, Nyuutɩna Wɩɩsɛ bɛ́ŋsɩ́ a tuŋwó kɩŋ. Ɩ gá Sayul kuorí, ɛ́ nɛ́ tɛ Nyuutɩna Wɩɩsɛ pi kuorí ná pɛ́ɩ́ bio Abɩsalɔŋ. Mʋ́l néé mí, néí ní wɩ́hala sɩɛrʋ, bee wɩ́ɛ́ ɩ ká nɩɓʋ́ʋ́rɔ nɛ́!» 9 Ɛ́ nɛ́ Seruya bio Abikayi bʋl kuóro dɩhɩ̃́ bʋlɛ́: «Nyúútɩ́na, ŋ kuóro, báálɔ́ né ká vásʋwɩ́ rɛ́, ʋ wɩ mɔhɛ̃́ rʋʋ bʋrɛ áá héí mí. Lo rɩ́ŋ daarɛ mʋ́ cókú nyúú.» 10 Amá kuóro sɛ́: «Seruya bɛlɛ, ʋ tóíwa sɩ́ɛ́ wɩ́ɩ́.» Rɩ Nyuutɩna Wɩɩsɛ nɛ́ sɛ́ báálɔ́ né bʋ́rɛ́ héŋ mí, áŋ rɩ́ sɩɛ́ sɩ́ wólli bʋlʋ́ sɩ́ ɛ́ á>>» 11 Ká Davidi bʋl pá Abikayi rɩ́rʋ́ tʋtʋnna wuu bʋlɛ́: «Ŋ tɩɩ bilʋlɩ́ háá jáŋ ɓʋ́ɩ́, rɩ báálɔ́ né há lɛ́ Bɛŋzamɛŋ duo sɩɛrʋ má nɛ́ sɩɛ́ báá! Ɩ́ lo rʋ́ʋ́ bʋrɛ áá héŋ mí, rɩ Nyuutɩna Wɩɩsɛ nɛ́ pɔ́ʋ́ ŋmɛ́nɔ é. 12 Rɩɩ gbé Nyuutɩna Wɩɩsɛ sɩ́ néŋ wɩɩla, a kánʋ́ zaa bʋra nyáŋ bɩ́rsɛ, rɩ́wɔ́ a bárka wɩ́ɛ́ a páŋ.»
13 Davidi rɩ́rʋ́ nɩɛ píwó ŋmɛ́nɔ aá col, ká Simeyi cɛl paalɔ kíŋkere, a bʋrɛ hé Davidi mí áá va; a pa dɔ́wʋ́ɔ́ áá yósíwó, ká pa kuŋkulo má aá yo bána rɩ́. 14 Kuóro rɩ́rʋ́ naanɩɛ wuu mʋ́ɔ́ peri Zʋrdɛŋ fuo, rɩ ɓa bɔ́lɔ́, ɛ́ nɛ́ ɓa ké ráŋ fɩɛlɛ.
Usayi zʋ́ Abɩsalɔŋ har
15 Abɩsalɔŋ rɩ́ Ɩzɩrayɛl nɩɛ ná wuu há mɩ́nʋ́ har mʋ́ Zerizalɛmɛ; Ahitofɛl má tɩ́ŋʋ́ mɛ́ mʋ́. 16 Davidi naŋnɔ́ŋɔ Usayi há lɛ́ Arkɛ, mʋ́ Abɩsalɔŋ rɩ́ bʋlɛ́: «Rɩ́ kuóro ka mɩgbó, rɩ́ kuóro ka mɩgbó!» 17 Ɛ́ nɛ́ Abɩsalɔŋ bɔsɛ Usyi bʋlɛ́: «Ɩ taŋá wuu ní nyɛ ná, a cáásɩ́ naŋnɔ́ŋɔ Davidi>> Béé rí tɛ, ɩ wʋ́ʋ́ mɛ́ tɩ́ŋɛ́ col>>» 18 Usayi bʋ́l Abɩsalɔŋ dɩhɩ̃́ bʋlɛ́: «Aɩ́! Nɛrɔ ná Nyuutɩna Wɩɩsɛ rɩ́ Ɩzɩrayɛl nɩɛ wuu há lɩ́sɛ́ rʋ́ʋ́ a kuóro, ŋ mɩŋ ɛ́ kuóro har nɛ́, ŋŋ́ kénú laka nɛ́. 19 Bʋllɛ mɛ́, áŋ rɛ́ rɩ́ŋ tʋŋ pá>> Ŋ naŋnɔ́ŋɔ bio ráá tóí rí>> Anɛ ɛ́ ŋ há tʋ́mɛ́ pɛ́ɩ́ áná, ŋ sɩ́ tʋŋ pɛ́ɩ́ má.»
Abɩsalɔŋ pɛ́ Davidi háála
20 Abɩsalɔŋ bʋ́l Ahitofɛl dɩhɩ̃́ bʋlɛ́: «Ɩ́ cɔ́ksɛ wérí a ná wɩ́ɩ́ ná há mɔhɛ̃́ ráá a.» 21 Ɛ́ nɛ́ Ahitofɛl bʋ́l pá Abɩsalɔŋ bʋlɛ́: «Mʋ́ kɛ́sɩ́ áná háwiisi ná pɛ́, ɓa ná ʋ há píé tá, rɩ́wɔ́ pɔ́ jaa mɛ́. Ɛ́ wɩ́ɛ́ Ɩzɩrayɛl nɩɛ wuu sɩ́ nɛ rɩɩ ɔ́ʋ́ zɔ́kɩ́ áná mɛ́. Ɛ́ nɛ́ rɩ́ nɩɛ ná wuu há mɩ́nɩ́ har, rɩ́wɔ́ naasɛ duóri. 22 Ɓa ciki táŋtɛ luso nyúú pá Abɩsalɔŋ, ʋ zʋ ráŋ a pɩ́nʋ́ áná háwiisi ná, Ɩzɩrayɛl nɩɛ wuu sɩ́ɛ́ mɛ́. 23 Ɛ́ tɛ́ŋ mɛ́, ɓáá zesi Ahitofɛl caana anɛ Wɩɩsɛ tɩɩ wɩ́bʋl nɛ́. Ahitofɛl cáánɛ há wéró ɛ́ a pá Davidi, ɓa wéró ɛ́ nɛ́ a pá Abɩsalɔŋ má.