Ɓa hɩ̃ɩ̃́sɛ Davidi nɩtʋmɛ́
10
1 Ʋ há dáánɛ mʋ́ɔ̃́, Amonitiwa kuóro Nahasɛ sʋ́wɔ́, kɔ́ʋ́ bio Hanuŋ la kuorí. 2 Ɛ́ nɛ́ Davidi sɛ́: «Ŋ sɩ́ makɛ sawér a pá Nahasɛ bio Hanuŋ, anɛ ɛ́ ʋ áná há mákɛ́ sawér a cáásɩ́ŋ». Ɛ́ nɛ́, ʋ sɩɛ́ tʋ́mʋ́ tʋtʋnna náŋa, rɩ́wɔ́ mʋ́ bɔ́llɛ Hanuŋ áná há sʋ́wɛ́ yuó. Amá Davidi tʋtʋnna ná há mʋ́ɛ́ peri Amonitiwa tɔ́ɔ́, 3 Amonitiwa kuóbɛlɛ bʋ́lwɔ́ nyúútɩna Hanuŋ rɩ́ bʋlɛ́: «Ɩ bɩ́ɩ́nɔ́ rɩɩ áná sʋʋ wɩ́ɛ́ nɛ́ Davidi tʋŋ nɩɛ rɩ́wɔ́ ko bɔ́llɩ́>>» Ʋ wʋ́ʋ́ nɩɛ nyáŋ tʋ́mɛ́ ɩ rɩ́, rɩ́wɔ́ ko kɩ́ɛ́lɛ tɔ́ɔ́ nɛ́ ná, a makɛ rɩ́ kal nɔ́ŋɔ rɩ́wɔ́ ko yó ráá>>» 4 Ɛ́ nɛ́ Hanuŋ a ɓa kɛsɛ Davidi tʋtʋnna ná, a a ɓa píéríwó tɔma kɩ́ɛ́sʋ́wa, ká a ɓa cɔ́nnɩ́wɔ́ gɛnnɛ, a pɔ́ sɩ́sɩ́ɛ́nnʋ́wa mɛ́, ká tuwi yákɩ́wɔ́ mʋ́bʋʋsɛ mɛ́, ká táwɔ́ ɓa bɩrɛ col. 5 Ɓa ko bʋl ɛ́ pá Davidi, ɛ́ nɛ́ ʋ tʋŋ nɩɛ rɩ́wɔ́ lɩɩ céŋ tʋtʋnna ná, béé wɩ́ɛ́ ɓaá kó rɩ́ hɩ̃ɩ̃sɛ nɛ́. Ɛ́ nɛ́ kuóro a ɓa bʋl pɔ́wɔ́ bʋlɛ́: «Ɩ́ ké Zeriko mí a kaa jɛ́ɩ́wa tɔma bɩrnyʋ́ɩ́, ká rɩ́ɩ́wa sɩɛ́ zɩŋ bɩrko rɛ́ɛ́wa.» Davidi yo dí Amonitiwa arɩ́ Siriyɛŋwa
6 Amonitiwa há néí rɩ Davidi cɔ́ɛ́ wɩ́wɔ́, ɓa mʋɔ́ yɔwɛ Siriyɛŋwa rɩ́wɔ́ ko sáŋʋ́ mɛ́; Siriyɛŋwa ná há lɛ́ Bɛtɛrehɔbɛ arɩ́ ɓa ná há lɛ́ Soba, ɓa sóóji navalla bʋ́ɩ́ mɛrɛ́ (20 000), a yɩ́rɛ kuóro Maka má nɩɛ bʋ́ɩ́ (1 000), arɩ́ Tɔɔbɛ tɩ́náwa má nɩɛ bʋ́ɩ́ fí rɩ́ bɛllɛ (12 000). 7 Davidi há nɛ́ ɛ́, ʋ tʋ́ŋ Zʋwabɛ rɩ́rʋ́ sóóji bɩbara wuu ɓa mʋ́wɔ́ mɛ́. 8 Amonitiwa sɩɛ́ káŋwɔ́ tɩɩ a lɩɩ cɛ́ lal yóé mí, ɓa tɔ́ɔ́ dánʋɔ. Ká Siriyɛŋwa sóójiwa ná há lɛ́ Soba arɩ́ Rehɔbɛ, arɩ́ Tɔɔbɛ, rɩ́ Maaka sóójiwa, ɓa má mɩŋ gɩr sáŋcɔɔ nɔ́ŋɔ. 9 Zʋwabɛ nóú rɩ sóóji buke bɛllɛ nɛ́ mɔhɛ̃́ rʋ́ʋ́ yo; náŋa mɩ́nʋ́ sɩ́ɛ́rɩ́ ká náŋa mɩ́nʋ́ har rɩ́. Ɛ́ nɛ́ ʋ tʋɔsɛ Ɩzɩrayɛl sóójiwa sɩɛrʋ ɓɩwere, a a ɓa cɛ́ caasɛ sóójiwa ná há lɛ́ Siiri. 10 Ká pi sóóji káánɛ ná hóú maábinɔ́ŋɔ Abikayi nɛ́sɛ mɛ́, ɓa má pɔ́ Amonitiwa mɛ́. 11 Ká bʋl pɔ́ʋ́ bʋlɛ́: «Rɩ Siriyɛŋwa nɩ́ɩ́ já rɩ́wɔ́ wóllíŋ, ɩ ko pɛ́ŋ mɛ́, ká rɩ Amonitiwa má nɛ́ kúé aá wóllí, ŋ má sɩ́ ko pɛ́ɩ́ mɛ́. 12 Ka dóé, ráá makɛ ballɩ́ pɔ́wɔ́, á dunɩɛ yɩr mɛ́, arɩ́rá Wɩɩsɛ tɔ́nɛ yɩr mɛ́. Rɩ́ Nyuutɩna Wɩɩsɛ é ha tʋ́mʋ́ cóllé.» 13 Ɛ́ nɛ́ Zʋwabɛ rɩ́rʋ́ nɩɛ sɩɛ́ tuuperi rɩ́wɔ́ yo Siriyɛŋwa; ɓa de fá Zʋwabɛ sɩ́ɛ́ mɛ́. 14 Amonitiwa há néí rɩ Siriyɛŋwa fɔ́ʋ́, ɛ́ nɛ́ ɓa má de fá Abikayi sɩ́ɛ́ mɛ́ a mʋ́ zʋ́wɔ́ tɔ́ɔ́. Ɛ́ nɛ́ Zʋwabɛ sɩɛ́ lo Amonitiwa yóé, ká bɩrɛ mʋ́ Zerizalɛmɛ.
15 Siiri nɩɛ nóú rɩ Ɩzɩrayɛl nɩɛ wówó, ɛ́ nɛ́ ɓa yɩ́rwɔ́ lalyoore wuu hé náŋá mɛ́. 16 Hadadezɛɛr tʋ́ŋ nɩɛ rɩ́wɔ́ mʋ́ yɩrɛ Siiri nɩɛ ná há mɩŋ Ɩfɩratɛ fuo daarɛ́. Ɓa lɩɩ ko peri Elamɛ. Hadadezɛɛr lalyoore kuóro Sobakɛ nɛ́ mɩ́ŋwɔ́ sɩ́ɛ́. 17 Davidi nɩ́wɔ́ kóé ná wɩ́ɛ́; ɛ́ nɛ́ ʋ yɩ́rɛ Ɩzɩrayɛl lalyoore wuu hé náŋá mɛ́, ɓa zʋ Zʋrdɛŋ fuo lɛ, a mʋ́ peri Elamɛ. Siriyɛŋwa sɩɛ́ cɛ́ caasɛ Davidi rɩ́rʋ́ nɩɛ, aá yówó. 18 Amá Siriyɛŋwa gúló ká fá Ɩzɩrayɛl nɩɛ sɩ́ɛ́ mɛ́. Davidi rɩ́rʋ́ nɩɛ ɓʋ́ʋ́sɩ́wɔ́ sáárɛ tɩ́náwa nɩɛ zɔwalpɛ (700), a ɓʋ́ʋ́sɛ zakzɩ́nna má bʋ́ɩ́ mɛɛ́sɛllɛ (40 000); ɓa ŋmɔ́wɩ́wɔ́ lalyoore kuóro Sobakɛ má ɓʋ́. 19 Hadadezɛr kuówɩɛla wuu há néí rɩ Ɩzɩrayɛl nɩɛ yóó díwó, ɓa kuó saŋ múúríwó tɩɩ pá Ɩzɩrayɛl nɩɛ, ká sʋl rɩ́ tɛŋfɩ́ɛ́l mɩ́ŋwɔ́ pɛ́kɛ. A pɔ́ ɛ́ tɛ́ŋ mɛ́ nɛ́ Siiri nɩɛ fɩ́fá Amɔŋ nɩɛ mɛ́ ko pɛ́ɛ́ héwíŋ.