Kuóro Davidi yó lala, a dí dóé ʋ dɩŋdɔmɔ nyúú
8
1 Ɛ́ wɩ́ɛ́ har mɛ́, Davidi ŋmásɛ́ Filisiti nɩɛ, a múúríwó; ʋ ɔ́ɔ́ ɓa báá wɩ tíŋ wuu kené ɓa tíé. 2 Ʋ ŋmásɛ́ Mʋwabɛ nɩɛ má. A a ɓa pɛ́ pɩɛrɛ náŋá mɛ́, ká ɓaá dɩɩsɛ. Ɓaá dɩɩsɛ nɩɛ botoro wuu, a ɓʋ́ʋ́sɛ bɛllɛ ká tá balá. Mʋwabɛ nɩɛ sɩɛ́ mɩŋ Davidi nɛ́sɛ mɛ́, ʋ a ɓa túŋ lompó aá pɔ́ʋ́. 3 Rɩhɔbɛ bio Hadadezɛɛrɛ há ká Soba kuóro, Siiri tíé, fa ísó ko rʋ́ʋ́ la Ɩfɩratɛ mʋnaa kílo wuu a tɩ́llʋ́. Ɛ́ nɛ́ Davidi baa ŋmɔ́wʋ́ má. 4 Davidi kɛ́sʋ́ zákzɩ́nna bʋ́ɩ́ rɩ́ zɔwalpɛ (1 700), a kɛsɛ sóóji navalla má bʋ́ɩ́ mɛrɛ́ (20 000). Davidi ɔ́ɔ́ ɓa lɩ́sɛ záksɛ peri zɔlɔ rɩ́wɔ́ tórkowa tá, ká a ɓa kʋsɛ záksɛ ná náŋa napole conni. 5 Siiri dɩtɩ́llɛ Damasɛ tɩ́náwa isi ko rɩ́wɔ́ pɛ́ Soba kuóro Hadadezɛrɛ mɛ́. Ɛ́ nɛ́ Davidi ŋmasɩ́wɔ́, a ɓʋ́ʋ́sɩ́wɔ́ nɩɛ bʋ́ɩ́ mɛrɛ́ rɩ́ bɛllɛ (22 000). 6 Ʋ bíl kʋ́máŋdáwa Siiri tɩ́náwa tɔ́nɛ wuu mí, Damasɛ tíé. Siiri tɩ́náwa ɔ́ʋ́ tʋtʋnna, a túŋ lompó aá pɔ́ʋ́. Nyuutɩna Wɩɩsɛ pɛ́ Davidi mí, ʋ há mʋ́ ráŋ ná wuu yo lal, ʋ dí dóé. 7 Kuóro Hadadezɛrɛ lalyoore hɔkɛ́rɛ́ wuu fa ká salmɛ nɛ́; Davidi lɔ́wɔ́ wuu a kaa mʋ́ Zerizalɛmɛ. 8 Ʋ zʋ́ Hadadezɛrɛ tɔ́nɛ bɛllɛ sɩɛrʋ: Beta rɩ́ Berotayi, a paa kɔmɔ́ cɩksɛ má ɓɩkana.9 Hamatɛ tɩ́náwa kuóro Tohu sɩɛ́ nɛ, rɩ Davidi yóó dí Hadadezɛrɛ lalyoore wuu. 10 Ɛ́ nɛ́ ʋ tʋ́mʋ́ bio Yoramɛ, rʋ́ʋ́ mʋ́ bɔ́llɛ kuóro Davidi, ká bʋlʋ́ á wérí, ʋ há yó lal rɩ́ Hadadezɛrɛ, a yoo dúú. Bee wɩ́ɛ́, Tohu dɩŋdɔmɔ nɛ́ fa ká Hadadezɛrɛ. Yoramɛ isi paa salmɛ oŋbɩrmɛ́, wárɛ oŋbɩrmɛ́, arɩ́ kɔmɔ́ oŋbɩrmɛ́, a kaa mʋ́ pá Davidi. 11 Kuóro Davidi lɔ́wɔ́ má, a pii pá Nyuutɩna Wɩɩsɛ, anɛ ʋ há lá sɩ́ɛ́ pi wárɛ rɩ́ salmɛ ná ʋ há yóé la tɔ́nɛ ná náŋa nɩɛ rɩ́, a pii pá Nyuutɩna Wɩɩsɛ ɛ́: 12 Ɓa ná ʋ há lá Siirieŋwa rɩ́, Mʋwabɛ nɩɛ rɩ́, Amonitiwa rɩ́, Filisiti nɩɛ rɩ́, arɩ́ Amalɛkɛ nɩɛ rɩ́, arɩ́ ɓa ná ʋ há yóé la Soba kuóro, Rɩhɔbɛ bio Hadadezɛrɛ rɩ́.
13 Davidi báá ha lá yɩr pɔ́ʋ́ tɩɩ, ʋ há mʋ́ɛ́ yoo dí Siirieŋwa bʋ́ɩ́ fí rí córí (18 000), yɛsɛ polo sɩɛrʋ. 14 Ʋ bíl kʋ́máŋdáwa Edɔŋ tíé wuu mí. Ʋ bíl kʋ́máŋdáwa, ɓa a nɩɛ wuu tʋŋ aá pɔ́ʋ́. Davidi há yó lal mʋ́ lɛ ráŋ ná wuu, Nyuutɩna Wɩɩsɛ sáŋʋ́ mɛ́ ʋ dí dóé.
Davidi har nɩɛ wɩ́ɛ́
15 Davidi dí kuorí Ɩzɩrayɛl wuu nyúú. Ʋ fa a wɩ́ɛ́ ɓa sɩ́ɩ́ mɛ́, arɩ́ taŋá aá pɔ́ʋ́ nɩɛ wuu. 16 Seruya bio Zʋwabɛ nɛ́ kɔ́ʋ́ lalyoore nyúútɩ́na; Ahiludi bio Zozafa nɛ́ lɔ́ʋ́ wɩ́ɛ́ bʋl aá pá nɩɛ; 17 Ahitubi bio Sadɔkɛ rɩ́ Abiyatarɛ bio Ahimelɛkɛ nɛ́ ká vʋk'ɔɔsa; ká Seraya nɛ́ a kɛŋpʋ́ŋsɔ; 18 Yehoyada bio Benayahu nɛ́ ká Keretɛ rɩ́ Peletɛ kʋ́máŋda; Davidi bɛlɛ má kéŋ tʋtʋnna ʋ laka.