Ɓa kéŋ Wɩɩsɛ nʋtʋmɛ dáka ná bɩrko Zerizaɛmɛ
6
1 Davidi a ɓa yɩ́rɛ Ɩzɩrayɛl lalyooribɩbára wuu hé náŋá mɛ́, ɓa nɩɛ bʋ́ɩ́ mɛrɛ́ rɩ́ fí. 2 Ʋ rɩ́ ɛ́ nɩɛ wuu sɩɛ́ mʋ́ Baale há mɩŋ Ziida tíé, rɩ́wɔ́ pi Wɩɩsɛ nʋtʋmɛ dáka ná ráŋ. Dáka ná ɓa haá yɩrɛ: Wɩɩsɛ ná dóé há kɛ onni wuu, a mɩŋ malka piŋe nyúú dáka. 3 Ɓa pí dáka ná, dúŋdúó nyúú, Abɩnadabɛ jaa mɛ́, a hé nɛsɛ tórkofɛlɔ sɩɛrʋ a kaa col. Abɩnadabɛ bɛlɛ, Uza rɩ́ Ahiyo nɛ́ fa kéŋ tórko ná aá va. 4 Ɓa sɩɛ́ kaa lɛ dúŋdúóŋ nyúú Abɩnadabɛ jaa, aá col; Uza mɩŋ kíŋkere, ká Ahiyo la tórko sɩ́ɛ́. 5 Davidi rɩ́ Ɩzɩrayɛl nɩɛ wuu sɩɛ́ jɩ́jʋɔsɛ Nyuutɩna Wɩɩsɛ sɩ́ɛ́, a mu dáwéré mulli rɩ́wɔ́ duó wuu. Ɓa yákɛ lɔŋŋɔwa, a dú ceŋsi, a dú beŋtérsi, a dú gugoŋni, a dú kuléŋléŋwa hé. 6 Ɓa há mʋ́ɛ́ peri tʋ́ɔ́ ná há mɩŋ Nakɔŋ laka, nɛsɛ kéŋ torko ná biksi, nʋtʋmɛ dáka ná jɩ́ja rʋ́ʋ́ ɓal, ɛ́ nɛ́ Uza tɛ́rʋ́ nɛ́sɛ a kɛ́rka. 7 Nyuutɩna Wɩɩsɛ cɔ́ɛ́ isi Uza nyúú, ɛ́ nɛ́ ʋ ŋmɔ́wʋ́ yo, ʋ há tɩ́kɛ́ dáka ná mɛ́ wɩ́ɛ́. Ʋ sʋwɛ ráŋ, Wɩɩsɛ sɩ́ɛ́. 8 Davidi cɔ́ɛ́ wɛ, Nyuutɩna Wɩɩsɛ há túwé ŋmɔ́wɛ Uza ɓʋ́ wɩ́ɛ́. Ɛ́ nɛ́ ɓa ka ɛ́ dɩhɩ̃́ aá yɩ́rɛ Pɛrɛsɛ Uza, a ko aá lɛ zaa wuu. 9 Ɛ́ kal, Nyuutɩna Wɩɩsɛ héwíŋ kéŋ Davidi, ɛ́ nɛ́ ʋ sɛ́: «Ŋ wɩ Nyuutɩna Wɩɩsɛ dáka né wo la a kaá zʋ́ŋ jaa». 10 Davidi vɔ́ɔ́, ʋ wɩ dáka ná kené zʋ́ʋ́ jaa, ʋ kuótɔ́ɔ́ ná mɛ́; ká a ɓa kaa mʋ́ tá Gaatɛ tɩ́náwa báálɔ oro ɓa háá yɩ́rɛ Obɛd'Edɔŋ jaa mɛ́. 11 Nyuutɩna Wɩɩsɛ dáka ná mɩŋ Obɛɛd'Edɔŋ jaa ná mɛ́, a peri caŋsɛ botoro, ɛ́ nɛ́ Nyuutɩna Wɩɩsɛ hé bárka pá Obɛɛd'Edɔŋ rɩ́rʋ́ jaa nɩɛ wuu.
12 Ɛ́ nɛ́ ɓa ko bʋl pá kuóro Davidi bʋlɛ́: «Nyuutɩna Wɩɩsɛ tɩ́ŋʋ́ dáka ná wɩ́ɛ́ hé bárka Obɛd'Edɔŋ jaa nyúú, ʋ wɩ́ɛ́ wuu cɛ́rɛ.» Ɛ́ nɛ́ Davidi isi mʋ́ Obɛd'Edɔŋ jaa, a pi Wɩɩsɛ dáka ná, ɓa jʋɔsɛ kaa ko bílú kuótɔ́ɔ́ sɩɛrʋ. 13 Nɩɛ ná há pí Nyuutɩna Wɩɩsɛ dáka ná cɩ́ɩ́nɛ aá va, rɩ ɓa nɛ́ válɛ́ a ɓɔ́ nakaara sɩ́ɩ́ balgo wuu, ʋʋ́ a ɓa ɓʋ́ nɔɓala arɩ́ nɔwie ná há kéŋ nʋʋ wérí ní, a ɔsɛ vʋk. 14 Ká Davidi sɩɛ́ gʋ́gɔ gʋala rɩ́rʋ́ dóé wuu, a bɩ́rɛ sú dɩhɩ̃́ wuu, Nyuutɩna Wɩɩsɛ sɩ́ɛ́. Vʋk'ɔɔsɔ́ pɛ́ŋbie gɛluŋo dʋŋɔ nɛ́ fa ʋ sú. 15 Ɛ́ nɛ́ Davidi rɩ́ Ɩzɩrayɛl nɩɛ ná wuu sɩɛ́ cááasi ballɩ́, a mu nyɩ́sɛ hé, a ka Nyuutɩna Wɩɩsɛ dáka ná zʋ Zerizalɛmɛ.
16 Nyuutɩna Wɩɩsɛ dáka ná há kúé aá zʋ Davidi kuótɔ́ɔ́ ná sɩɛrʋ, ʋ háálɔ Mikal ná há ká Sayul toló, ʋ múúlí tókóró mí, a ná kuóro Davidi rʋʋ gɔ gʋala, a ɓéri aá bɩ́rɛ Nyuutɩna Wɩɩsɛ sɩ́ɛ́. Ɛ́ nɛ́, ʋ bel guónú ʋ sɩɛrʋ mɛ́. 17 Ɓa kéŋ Nyuutɩna Wɩɩsɛ dáka ná zʋ táŋtɛ ná Davidi há ɛ́ɛ́ ɓa ciki sɩɛrʋ, a bílú dɩhɩ̃́ ná ɓa há bɩ́rmɛ́ bílú mí. Ká Davidi sɩɛ́ ɓʋ́ʋ́sɛ pʋsɛ a ɔsɛ vʋkfíse rɩ́ tɛŋfɩ́ɛ́l vʋka, a pá Nyuutɩna Wɩɩsɛ. 18 Davidi há ɔsɛ vʋkfíse rɩ́ tɛŋfɩ́ɛ́l vʋka ná wuu tenni, ʋ hé bárka pá jamáŋ ná wuu, Nyuutɩna Wɩɩsɛ ná dóé há kɛ óŋ wuu, yɩr mɛ́. 19 Ká a, ɓa lɩ́sɛ ɓɩdííle a ɓaa pá Ɩzɩrayɛl jamáŋ wuu; báála rɩ́ háála, ɓa nɛ́ŋ wuu ná dɩpɛ́ŋ daa balá, pirnɔŋcewé guúŋ balá, arɩ́ ɛllɛ nɔŋcewé guúŋ balá. Ká ɓa oro wuu bɩrmʋ́ jáá.
20 Davidi há zʋ́ jaa rʋ́ʋ́ hóú jaa nɩɛ nyúú bárka, ʋ háálɔ Mikal, há ká Sayul toló, ʋ lɩ́ɔ́ cémú a bʋlɛ́: «Nóú zaa há píŋsú tɩɩ ɛ́, Ɩzɩrayɛl kuóro, a wúrkú tɩɩ, ʋ tʋtʋnna háála sɩ́ɛ́ mɛ́, anɛ ʋ há ká nɩkɔsʋ́.» 21 Ɛ́ nɛ́ Davidi bʋl pá Mikal bʋlɛ́: «Nyuutɩna Wɩɩsɛ ná há cóŋ a kɩ́llɩ́ áná rɩ́rʋ́ jaa wuu sɩ́ɛ́ mɛ́ nɛ́ ŋ gɔ gʋala; ʋ Nyuutɩna Wɩɩsɛ nɛ́ lísɩ́ŋ, rɩ́ŋ ɔ́ʋ́ duo nɩɛ, Ɩzɩrayɛl nɩɛ kuóro. Ʋ sɩ́ɛ́ mɛ́ nɛ́ ŋ gʋ́gɔ́. 22 Ŋ ha sɩ́ cɩkɩ́ŋ tɩɩ, a múríŋ tɩɩ kɩ́llɛ nyɛ, amá tʋtʋnna háála ná wɩ́ɛ́ ɩ há bʋ́lɛ́, ɓa é sɩ́ ná rɩŋ ká nɩpíŋí.» 23 Ɛ́ nɛ́ Sayul toló Mikal wɩ bíí wuu lʋ́lɛ́ ká mʋ́ sʋwɛ.