Davidi dí Ɩzɩrayɛl dʋŋɔ kuorí
5
1 Ɩzɩrayɛl duo nɩɛ wuu sɩɛ́ ko Davidi dɩhɩ̃́ Ɩbrɔŋ mɛ́, a bʋ́lʋ́ rɩ́ bʋlɛ́: «Ná rá nɛ́, á rɩ́rɩ́ nɛ́ ká duó, á rɩ́rɩ́ nɛ́ ká jaá. 2 Fól wuu, Sayul fa há ká rá kuóro má, ɩ nɛ́ fa lá Ɩzɩrayɛl nɩɛ sɩ́ɛ́ a káŋwɔ́ lɩɩ yo lal, ká bɩr káŋwɔ́ áá ko. Nyuutɩna Wɩɩsɛ sɩɛ́ fa lá sɩ́ɛ́ bʋl pɛ́ɩ́ bʋlɛ́: ‹ɩ nɩ́ɩ́ á rɩ́ɩ́ nʋɔlɛ Ɩzɩrayɛl há káŋ duo nɩɛ, ɩ nɛ́ sɩ́ ɔ́wɔ́ kuóro. 3 Ɩzɩrayɛl nɩhɩ̃́ɛ́sɛ wuu kó kuóro Davidi rɩ́ Ɩbrɔŋ mɛ́, ʋ ɔ́ɔ́ ɓa vʋʋrɛ tʋŋ nʋɔ mɛ́, a ŋmɩ́ɛ́sɛ Nyuutɩna Wɩɩsɛ sɩ́ɛ́, ká ɓa pi Ɩzɩrayɛl kuorí pɔ́ʋ́. 4 Davidi há dí ɛ́ kuorí rʋʋ fa kéŋ bɩŋsɛ mɛrɛ́ rɩ́ fí ní, ká dí kuórí bɩŋsɛ mɛɛ́sɛllɛ. 5 Ʋ ké Ɩbrɔŋ mɛ́ a dí kuorí bɩŋsɛ balpɛ rɩ́ fá Ziida nɩɛ nyúú, ká ké Zerizalɛmɛ mɛ́, a dí kuorí bɩŋsɛ mɛrɛ́ rɩ́ fí rɩ́ botoro Ɩzɩrayɛl rɩ́ Ziida wuu nyúú.Davidi mʋ́ɔ́ la Zerizalɛmɛ a ké ráŋ
6 Kuóro Davidi rɩ́rʋ́ nɩɛ mʋ́ɔ́ rɩ́wɔ́ kiri Yebusɩɛŋwa ná fa há mɩŋ Zerizalɛmɛ mɛ́ ká tɩ́llʋ́. Ɛ́ nɛ́ ɛ́ nɩɛ bʋl pá Davidi bʋlɛ́: «Ɩ wɩ rɛɛ́ zʋ; nyʋmma rɩ́ gbɛrka má dʋŋɔ waá lo rɩ́ɩ́ zʋ.» Ɓaá já rɩ́wɔ́ bʋlɛ́ Davidi wɩ tɔ́ɔ́ ná wuó la nɛ́ ɛ́. 7 Amá Davidi yóó lá Sɩyɔŋ dóé dɩdí. Ráŋ nɛ́ kúé bɩrmɛ Davidi kuótɔ́ɔ́.
8 Ɛ́ kal, Davidi fa sɛ́: «Rɩ nɛ́ŋ já rʋ́ʋ́ yoo dí Yebusɩɛŋwa, ʋ tɩŋ nyiinaa ná ɓa há cákɛ́, a mʋ́ péríwó. Ŋ bɛ́rɛ ɛ́ gbɛrka rɩ́ ɛ́ nyʋmma. Ɛ́ wɩ́ɛ́ nɛ́ ɓa sɛ́: «Gbɛrka rɩ́ nyʋmma wɩ wɩcʋ́ɔ́lɩ́jɩzeno sɩɛrʋ wuó zʋ.» 9 Davidi ké tɔ́ɔ́ ná dóé dɩdíí ní, a kaá yɩ́rɛ Davidi kuótɔ́ɔ́. Ʋ ɔ́ɔ́ ɓa sɔ́ zeŋ a kílú wuu, a pɔ́ dúŋdúóŋ ná ɓa háá yɩ́rɛ Milo mí ká kaa zʋ sɩɛrʋ rɩ́. 10 Davidi dóé ɔ́sɔ́ aá súúri kɩ́ŋkáŋ wuu, béé wɩ́ɛ́ Nyuutɩna Wɩɩsɛ, há ká lalyoore Wɩɩsɛ fa mɩ́nʋ́ har.
11 Tiiri kuóro Hiraŋ, tʋ́ŋ nɩɛ Davidi rɩ́, ɓa ká sɛɛdɩrɛ daasɛ ko pɔ́ʋ́; ʋ hé dakʋnna rɩ́ nɩɛ ná há ɛ̃́ zeŋe dɔ́wʋ́ɔ́ cɔ́ɛ́, rɩ́wɔ́ ko sɔ kuójaa pá Davidi. 12 Davidi sɩɛ́ zɩŋ rɩ Nyuutɩna Wɩɩsɛ tɩɩ nɛ́ bílú rʋ́ʋ́ a Ɩzɩrayɛl kuóro, ká cúólú kuorí, Ɩzɩrayɛl nɩɛ há kɔ́ʋ́ Wɩɩsɛ duo nɩɛ wɩ́ɛ́.
Davidi bɛlɛ ná ʋ há lʋ́l Zerizalɛmɛ mɛ́
13 Davidi há lɛ́ Ɩbrɔŋ ko Zerizalɛmɛ, ʋ báá já háála, a já didowe súúri; ɓa lʋllɛ heŋbólli rɩ́ tolé pɔ́ʋ́. 14 Ná bɛlɛ ná ʋ há lʋ́l Zerizalɛmɛ mɛ́ : Samʋa, Sobabɛ, Nataŋ, Salomɔŋ, 15 Yɩbarɛ, Elisua, Nefɛgɛ, Yafɩa, 16 Elisama, Ɩlɩyada, arɩ́ Elifelɛtɛ.
Davidi yóó dí Filisiti nɩɛ
17 Filisiti nɩɛ nɩ́ɔ̃́ rɩ ɓa lɩ́sɛ Davidi, a bílú, ʋ a Ɩzɩrayɛl kuóro. Ɛ́ nɛ́ ɓa wuu isi mʋ́ rɩ́wɔ́ já kánʋ́. Davidi nɛ, a isi mʋ́ féŋsú tɔ́ɔ́ dóé dɩdíí, ráŋ ná ɓa há sɔ́ zeŋ kíl. 18 Filisiti nɩɛ ko peri, a jɛrɛ sú Refayitiwa polo wuu. 19 Ɛ́ nɛ́ Davidi sɩɛ́ bɔsɛ Nyuutɩna Wɩɩsɛ a bʋlɛ́: «Ŋ isi mʋ́ yo Filisiti nɩɛ nyáŋ>> Ɩ sɩ́ kɛ́sɩ́wɔ́ héŋ nɛ́sɛ mɛ́>>» Ɛ́ nɛ́ Nyuutɩna Wɩɩsɛ sɛ́: «Oo! mʋ́ yo Filisiti nɩɛ, ŋ sɩ́ kɛ́sɩ́wɔ́ héí nɛ́sɛ mɛ́.» 20 Davidi isi mʋ́ Baalperasimmi, a yoo dí Filisiti nɩɛ ráŋ. Ká sɩɛ́ bʋlɛ́: «Nyuutɩna Wɩɩsɛ lúri gbel páŋ ŋ dɩŋdɔmɔ pɛ́kɛ, anɛ nyii há cɩ́ɩ́rɛ́ a gírí kɛ́rɛ». Ɛ́ nɛ́ tɛ ɓa ka ɛ́ dɩhɩ̃́ aá yɩ́rɛ “gire dɩhɩ̃́”. 21 Filisiti nɩɛ fá ká táwɔ́ venni, Davidi rɩ́rʋ́ nɩɛ mʋ́ paa col.
22 Filisiti nɩɛ baa bɩrɛ lɛ lal mɛ́, a mʋ́ sú Refayitiwa polo wuu. 23 Davidi baa bɔsɛ Nyuutɩna Wɩɩsɛ, ɛ́ nʋ́ʋ́ sɛ́: «Sɩ́wɔ́ cáásɩ́ mʋ́; bɩrɛ báárɩ́wɔ́ har rɩ́, a mʋ́ tɩŋ tuuni ná ɓa háá yɩ́rɛ miriyewa, cɔɔ rɩ́. 24 Rɩɩ kúó nɛ dɔ́mɛ anɛ naasɛ vaa dɔ́mɛ ɛ́ tuuni nyúú rí, ɩ mʋ́ kɩ́kɛ́lɛ́ a yówó; bee wɩ́ɛ́ Nyuutɩna Wɩɩsɛ nɩ́ɩ́ lɩ́ɛ́ ɛ́, rʋ́ʋ́ lɛ́ɩ́ sɩ́ɛ́ a yo Filisiti nɩɛ dí. 25 Davidi tʋ́ŋ ɛ́ Nyuutɩna Wɩɩsɛ há mákɛ́ pɔ́ʋ́. Ɛ́ nɛ́ ʋ wólli yoo dí Filisiti nɩɛ, a pɔ́ Geba mɛ́ ká kírwó kaa mʋ́ peri Gɩzɛr nʋɔ.