Isibosɛtɛ ɓʋ́ɩ́ wɩ́ɛ́
4
1 Sayul bio Isibosɛtɛ nɩ́ɔ̃́ rɩ Abɩnɛr sʋ́wɔ́ Ɩbɩrɔŋ mɛ́; ʋ vaŋsɛ wuu yʋɔrɛ ká Ɩzɩrayɛl nɩɛ wuu sɩɛnnɛ zɔkɛ. 2 Sayul bio ná fa kéŋ lalyoore nyúútɩ́náwa bɛllɛ, nɔ́ŋɔ yɩr nɛ́ Baana ká nɔ́ŋɔ má Rekabɛ. Ɓa áná nɛ́ ká Rɩmɔŋ há lɛ́ Bɛŋzamɛ dunɩɛ sɩɛrʋ. Ʋ tɔ́ɔ́ nɛ́ ká Berooti há mɩŋ Bɛŋzamɛ dunɩɛ tíé. 3 Ɛ́ Beeroti tɩ́náwa fa fɔ́ɔ́ mʋ́ féŋsi Gitayimi mí ní, a mɩŋ ráŋ a ko áá lɛ zaa.4 Sayul bio Zonataŋ fa lʋ́l bio oro, ʋ a gbɛ́rkʋ́. Nɩɛ há lɛ́ Zɩzɩrayɛl a ko bʋl Sayul rɩ́ Zonataŋ sʋʋ wɩ́ɛ́, rɩ ɛ́ bio fa kéŋ bɩŋsɛ bɔmmʋ́ɔ́ nɛ́. Háálɔ ná há dɩ́ɛ́sʋ́ sɩɛ́ isi púú rʋ́ʋ́ kaa fá. Ʋ sɩɛ́ há fá kɩ́kɛ́lɛ́, bio ná lɩ́ɔ́ ɓal, naasɛ bɛllɛ wuu sʋsɛ. Ɛ́ bio yɩr nɛ́ Mefibosɛtɛ.
5 Rɩmɔŋ há lɛ́ Beeroti, ʋ bɛlɛ Rekabɛ rɩ́ Baana ísó mʋ́ Isibosɛtɛ jaa; wɩɩsɛ fa há háákɔ́ wérí tɛ́ŋ ná mɛ́ nɛ́ ɓa mʋ́ peri. Rɩ Isibosɛtɛ fa pɛ́ wɔhɔ fɩɛla dóŋ. 6-7 Ɓa dee mʋ́ zʋ́ jaa sɩ́ɛ́rɩ́ anɛ ɓa há cɩ́ɩ́nɛ mɩ́ɛ́ kaá zʋ rɩ́wɔ́ pɔ́ʋ́. Ɓa zʋ́ɔ́ rʋʋ pɩ́nʋ́ gódó daha ʋ dɩpɩ́nɛ; ɓa dee cɔ́kɛ file mí a ɓʋ́, ká coki nyúú. Rekabɛ rɩ́rʋ́ maábio Baana pi nyúú ná kaa lɩɩ tɩŋ Zʋrdɛŋ polo ŋmɛ́nɔ aá col; a va tɔ́ɔ́ bírí. Ɓa va tɩ́taŋ wuu a col. 8 Ɓa kéŋ Isibosɛtɛ nyúú ná mʋ́ Ɩbɩrɔŋ a pá kuóro Davidi, ká bʋ́lʋ́ rɩ́ bʋlɛ́: « Ná Sayul bio Isibosɛtɛ nyúú; ɩ dɩŋdɔŋ ná háá jɛ́ɩ́ ɓʋ́ɩ́, ʋ nyúú ní.» Nyuutɩna Wɩɩsɛ zaa díí cɔwɩɩlɔ́ pɛ́ɩ́, kuóro, ŋ nyúútɩ́na, Sayul rɩ́rʋ́ jaa nɩɛ wuu nyúú». 9 Ɛ́ nɛ́ Davidi bʋ́lwɔ́ rɩ́ bʋlɛ́: «Nyuutɩna Wɩɩsɛ wómmó, ʋ nɛ́ lɩ́sɩ́ŋ wɩ́hala wuu mí! 10 Nɛrɔ ná há kúé tʋ́ŋ Sayul yuó páŋ, ʋ fa bɩ́ɩ́nɔ́ rɩ labáárɛ wérí rí ʋ kaa ko páŋ; ŋ ɔ́ɔ́ ɓa kánʋ́ ɓʋ́ Siklakɛ mɛ́; ŋ pí ɛ́ nɛ́ túmú ʋ labáárɩwero ná wɩ́ɛ́. 11 Ɩ́ sɩɛ́ bɩ́ɩ́nɔ́ rɩŋ sɩ́ lóíwa saháksɩ́tɩɩna nyáŋ há ɓʋ́ nɩtaŋá ʋ jaa sɩɛrʋ, ʋ gódó daha>> Ŋ sɩ́ ɓʋ́ʋ́sɩ́wa, báálɔ né ɩ́ há ɓʋ́ɛ́ wɩ́ɛ́, rɩ́ɩ́wa yɩr yʋ́ksɛ tíé nyúú.
12 Ká Davidi pá ŋmɛ́nɔ, ʋ sóójiwa ɓʋ́ʋ́sɛ Rekabɛ rɩ́ Baana. A cónníwó nɛ́ŋsa rɩ́ naasɛ , a pii ɓél Ɩbrɔŋ polo fozeno laka. Ká ɓa sɩɛ́ pi Isibosɛtɛ nyúú ná hu Nɛr bio Abɩnɛr lɛlbule sɩɛrʋ, Ɩbɩrɔŋ mɛ́.