Zozie hatɩ́ŋnɩ́wɩ́bʋlɛ́
23
1 Nyuutɩna Wɩɩsɛ há lá Ɩzɩrayɛl nɩɛ tá, ɓa kílo dɩŋdɔma wuu nɛ́sɛ mɛ́, ɓa ná tɛŋfɩ́ɛ́l a dáánɛ wérí. Zozie sɩɛ́ fa bɩ́nɔ́, a nɩɩnɛ kɩ́ŋkáŋ. 2 Ɛ́ nɛ́ Zozie yɩ́rɛ Ɩzɩrayɛl nɩɛ wuu, ɓa nɩhɩɛ̃́sɛ, ɓa sɩ́dííre, ɓa sarɩ́yadííre arɩ́wɔ́ kɛŋpʋ́ŋsa, a bʋ́lwɔ́ rɩ́, a bʋlɛ́: «Ŋ bɩ́nɔ́, a nɩɩnɛ kɩ́ŋkáŋ. 3 Ɩ́ ná Nyuutɩna Wɩɩsɛ, ɩ́ Wɩɩsɛ há á dɩtɩ́llɛ nyáŋ nɩɛ ɛ́ rɛ́, ɩ́ wɩ́ɛ́. Ʋ tɩɩ nɛ́ yóé a pɛ́ɩ́wa. 4 Ɩ́ nóú rí, ŋ tɩ́ŋ bíé yoe mí, a ká nɩɛ ná ŋ há yóé dí dɩtɩ́llɛ, arɩ́ nɩɛ ná há káánɛ́, rɩ́ɩ́wa yoo dí dɩtɩ́llɛ, a mɩŋ Zʋrdɛŋ fuo wɩɩsɛ dɩpomí, arɩ́ Mediterane há mɩŋ wɩɩsɛ dɩzʋʋlɩ́ pɛ́kɛ, a ɓɛ́ɩ́wa jɩmʋ́ʋ́la. 5 Nyuutɩna Wɩɩsɛ, ɩ́ Wɩɩsɛ tɩɩ nɛ́ sɩ́ kiri ɛ́ nɩɛ ɩ́ sɩ́ɛ́ mɛ́, ɩ́ mɩŋ peré mí ní, kɔ́ʋ́ há kírwó ɓa fá, ká rɩ́ɩ́wa tɩ́llɩ́wɔ́ tɔ́ɔ́, anɛ ɛ́ ʋ há máŋsɛ́. 6 Amá, ɩ́ hé dóé a zesi, ká tɩŋ wɩ́ɛ́ ná wuu há pʋ́ŋsɛ Moyizi wádawa kɛnɔ ná sɩɛrʋ, a sɩ́ cʋ́rʋ́ káá tɔ́wɔ́, ábádá. 7 Ɩ́ sɩ́ zʋ́ʋ́ kuosi nɩkáánɛ ná há mɩ́nɩ́wa sɩɛrʋ mɛ́; ɩ́ sɩ́ yɩ́rɩ́ héwó wɩŋsa mɛ́, a sɩ́wɔ́ ɛ́ wɩ́ŋsa yɩr mɛ́ ŋmɩ́ɛ́sʋ́, a sɩ́wɔ́ sɩ́ɛ́ ɓírmú rɩ́ɩ́ cʋ́ɔ́lɩ́wɔ́. 8 Ɩ́ vɔ́wɩ́wa tɩɩ ɓarɛ Nyuutɩna Wɩɩsɛ, ɩ́ Wɩɩsɛ dʋŋɔ mɛ́ nɛ́, anɩ́ɩ́wa há tʋŋ ɛ́, a ko aá lɛ zaa. 9 Nyuutɩna Wɩɩsɛ ɔ́ɔ́ nɩɛ ɓɩkana, há kéŋ dóé, ɓa fɛ́ɩ́wa sɩ́ɛ́ mɛ́, ká ɩ́ lɔ́wɔ́ dɩtɩ́llɛ; a ko aá lɛ zaa, nɛ́ŋ wuu wɩ wóllé cɩ́nɩ́wa sɩ́ɛ́. 10 Ɩ́ sɩɛrʋ, nɛ́ŋ balá nɩ́ɩ́ kiri dɩ́ŋdɔma bʋ́ɩ́, ɓaá fá, bee wɩ́ɛ́ Nyuutɩna Wɩɩsɛ, ɩ́ Wɩɩsɛ nɛ́ yóé aá pɛ́ɩ́wa, anɛ ɛ́ ʋ há bʋ́lɛ́, a pɛ́ɩ́wa. 11 Ɛ́ wɩ́ɛ́, ɩ́ ka wérí, a cólli Nyuutɩna Wɩɩsɛ, ɩ́ Wɩɩsɛ. 12 Rɩɩ́wa nɛ́ vɔ́ʋ́ tá, ká rɩ́ɩ́wa rɩ́ nɩɛ ná há káánɛ́ a mɩ́nɩ́wa sɩɛrʋ, tʋŋ nʋɔ mɛ́, rɩ́ɩ́wa jɔ́wɔ́ tolé, rɩ́ɩ́wa rɩ́wɔ́ kuosi náŋá mɛ́, 13 ɩ́ zɩŋ rɩ́ Nyuutɩna Wɩɩsɛ, ɩ́ Wɩɩsɛ báá waá a rʋ́ʋ́ kírwó, rɩ́wɔ́ fɛ́ɩ́wa sɩ́ɛ́ mɛ́. Ɓa sɩ́ nɛ báráwa arɩ́ wáyɩwa, a a rɩ́ɩ́wa ná wɩɩla, anɛ vɩllɛ háá fɩ́rɩ́wa daguŋsi mí, ɛ́ raá má anɛ sɔrɛ há tʋ́ɩ́wa sɩ́ɛ́ mɛ́; rɩ́ɩ́wa gúl ká nyɩ́ɩ́kɛ tɔ́wero né Nyuutɩna Wɩɩsɛ, ɩ́ Wɩɩsɛ há píé a pɛ́ɩ́wa mɛ́. 14 Ŋ é, ŋ tápʋlɛ pérí tɛ́sɩ́ɩ́. Mʋ́l né mí, ɩ́ zɩŋ wɩ́ɩ́ né arɩ́rɩ́ɩ́wa sɩɛrʋ wuu, arɩ́rɩ́ɩ́wa dʋma wuu: Nyuutɩna Wɩɩsɛ, ɩ́ Wɩɩsɛ nʋtállɛ ná wuu, ʋ há tɛ́ɛ́ pɛ́ɩ́wa, oro wuu toó, ʋ nʋɔ wɩ súé; ɓa wuu nʋʋsɛ nɛ́ cáásɛ sú wérí. 15 Ɛ́ wɩ́ɛ́, anɛ ɛ́ ʋ há ɛ́ɛ́ ʋ nʋtálwere ná nʋʋsɛ sú, a pɛ́ɩ́wa ɛ́, Nyuutɩna Wɩɩsɛ, ɩ́ Wɩɩsɛ sɩ́ a rʋ́ʋ́ nʋtálbɔma ná má há sɩ́ cɩ́nɩ́wa mɛ́, nʋʋsɛ sú. Ʋ sɩ́ tɩŋ ɛ́ mɛ́, a zɔ́kɩ́wa tenni, rɩ́ɩ́wa nyɩ́ɩ́kɛ tɔ́wero ná mɛ́, Nyuutɩna Wɩɩsɛ, ɩ́ Wɩɩsɛ há píé a pɛ́ɩ́wa. 16 Rɩɩ́wa nɛ́ zɔ́kɩ́wa rɩ́ Nyuutɩna Wɩɩsɛ, ɩ́ Wɩɩsɛ pɛ́kɛ nʋtʋmɛ ná, ʋ há bílé a pɛ́ɩ́wa rɩ́ɩ́wa tɩ́tɩŋ, rɩɩ́wa nɛ́ mʋ́ɛ́ ɓɩ́rmi wɩhʋɔra naŋá sɩ́ɛ́, rɩ́ɩ́ ɓáárɩ́wɔ́, Nyuutɩna Wɩɩsɛ, ɩ́ Wɩɩsɛ cɔ́ɛ́ sɩ́ ísíwa nyúú, rʋ́ʋ́ a rɩ́ɩ́wa nyɩ́ɩ́kɛ tɔ́weró né ʋ há píé a pɛ́ɩ́wa sɩɛrʋ, kɩ́kɛ́lɛ́.»