Ɩzɩrayɛl nɩɛ bɛ́llɔ́ lɩ́sɛ rɩ́wɔ́ tʋŋ a pá Nyuutɩna Wɩɩsɛ
24
1 Zozie yɩ́rɛ Ɩzɩrayɛl jɩmʋ́ʋ́la ná wuu a hé náŋá mɛ́, Sɩsɛmɛ mɛ́. Ʋ yɩ́rwɔ́ nɩhɩɛ̃́sɛ, ɓa sɩ́dííre, ɓa sarɩ́yadííre, arɩ́wɔ́ kɛŋpʋ́ŋsa, ɓa ko Wɩɩsɛ sɩ́ɛ́. 2 Zozie sɩɛ́ bʋ́lwɔ́ wuu rɩ́ a bʋlɛ́: «Ɩ́ ná Nyuutɩna Wɩɩsɛ, há ká Ɩzɩrayɛl Wɩɩsɛ há sʋ́ʋ́ ná: ‹Tɛ́ŋ oro mí, ɩ́ naabálwa fá ké Ɩfɩratɛ fozeno cɔɔ ná nɔ́ŋɔ, aá ɓaarɛ wɩhʋɔra. Abɩrahaŋ rɩ́ Nahɔɔrɛ áná Tera nɛ́ sɩɛ́ faá tʋŋ ɛ́ ná. 3 Ŋ lɩ́sɩ́wa naabál Abɩrahaŋ, tɔ́ɔ́ ná há mɩŋ Ɩfɩratɛ cɔɔ ná nɔ́ŋɔ; a kánʋ́ mʋ́ gʋɔrɛ Kanaŋ wuu, a pɔ́ʋ́ Ɩzakɛ, a tɩ́ŋʋ́ mɛ́ a a, Abɩrahaŋ duo pul kɩ́ŋkáŋ. 4 Ŋ pí Zakɔbɛ arɩ́ Ezayu a pá Ɩzakɛ. Ŋ pí Seyiir paalɔ, a pá Ezayu, amá Zakɔbɛ rɩ́rʋ́ bɛlɛ ísó a tuwi Ezipiti. 5 Ʋ dáánɛ, káŋ tʋŋ Moyizi rɩ́ Aarɔŋ, a hé wɩɩlawa Ezipiti mí, ká sɩɛ́ zɩŋ lɩ́sɩ́wa. 6 Ɩ́ naabalwa há lɛ́ Ezipiti mí, a mʋ́ a peri Zɔŋkɩwa mʋʋ, Ezipiti nɩɛ lɩ́ɔ́ rɩ́ tórkowa arɩ́ záksɛ, a kiri mʋ́ púwó ráŋ. 7 Ɓa há cáásé a yɩ́rɩ́ŋ, rɩ́ŋ pɛ́wɔ́ mɛ́, ŋ hé bíno, ɩ́ rɩ́ Ezipiti nɩɛ pɛ́kɛ. Ŋ ɔɔ́ mʋʋ ná nyii gíri, a ko tɔ́ Ezipiti nɩɛ mɛ́. Ɩ́ sɩ́ɩ́ náŋ há ɔ́ɔ́ ná, ɓa mɛ́ rɛ́. Ʋ ɛ́ har mɛ́, ɩ́ ha dáánɔ́ wérí, gɩrbétéke sɩɛrʋ. 8 Ʋ ɛ́ har mɛ́, ŋ keníwa a mʋ́ Amoritiwa há ké Zʋrdɛŋ fuo wɩɩsɛ dɩpomi caasɛ́ tɔ́ɔ́. Ɓa isi a yóíwa, ámá ŋ kɛ́sɩ́wɔ́ a héíwa nɛ́sɛ mɛ́. Ɛ́ nɛ́ ɩ́ wólli yo, a láwɔ́ tɔ́ɔ́, bee wɩ́ɛ́ ŋ zɔ́kwɔ́, ɩ́ sɩ́ɛ́. 9 Sɩpɔɔrɛ bio Balakɛ, há ká Mʋwabɛ kuóro, ʋ má ísó yóíwa; a tʋŋ yɩ́rɛ Bɩhɔɔrɛ bio Balaamɛ má tɩɩ, rʋ́ʋ́ ko bʋrɛ héíwa mɛ́. 10 Amá, ŋ wɩ sáŋɛ́ zesi Balaamɛ rɩ́, ɛ́ nɛ́ ʋ hé bárka a pɛ́ɩ́wa, káŋ lɛ́ɩ́wa tá Balakɛ nɛ́sɛ mɛ́. 11 Ɩ́ cáŋ Zʋrdɛŋ fuo daarɛ, a mʋ́ peri Zeriko. Zeriko tɩ́náwa yóíwa, Amoritiwa má yóíwa; Perizitiwa rɩ́ Kananɩɛŋwa rɩ́ Hititiwa rɩ́ Girigazitiwa rɩ́ Hivitiwa arɩ́ Yebusitiwa má ɛ́ tɩɩ. Ŋ kɛ́sɩ́wɔ́ wuu héíwa nɛ́sɛ mɛ́. 12 Ŋ ɔɔ́ dʋmacelwa lɛ́ɩ́wa sɩ́ɛ́, a kiri Amoritiwa kuóre ná bɛllɛ. Ɩ́ tókowíé arɩ́rɩ́wa tóni wɩ wɩ́ɩ́ ɛ́ɛ́ pɛ́ɩ́wa. 13 Ɩ́ wɩ wɩɩla néé, káŋ pɛ́ɩ́wa tɔ́ɔ́; ɩ́ wɩ tɔ́nɛ sɔ́ɛ́, ká ná tɔ́wɩ́ɛla aá zʋ́; ɩ́ wɩ tuuni cɔ́ŋsɛ́, ká ná viinyi arɩ́ ólíívi tuuni aá díwó nɔnɔ.›»14 Ká Zozie baa súúri a bʋlɛ́: «Mʋ́l né mí sɩɛ́, ɩ́ mɔhɔ̃́ rɩ́ɩ́wa fá Nyuutɩna Wɩɩsɛ héwíŋ, ká tʋŋ rɩ́ taŋá arɩ́ nɩcɩ́tɩkɔ́ a pɔ́ʋ́. Ɩ́ tá wɩŋsa ná, ɩ́ naabálwa fa há mɩŋ Ɩfɩratɛ fuo daarɛ́, ɛ́ raá má Ezipiti mí, aá ɓaarɛ, ká tʋŋ aá pá Nyuutɩna Wɩɩsɛ. 15 Amá rɩɩ́wa nɛ́ wɩ có, rɩ́ɩ́wa tʋŋ pá Nyuutɩna Wɩɩsɛ, ɩ́ bɛ́llɛ pi zaa, wɩŋsa ná ɩ́ há sɩ́ ɓaarɛ: wɩŋsa ná ɩ́ naabálwa fa háá ɓaarɛ́ Ɩfɩratɛ fuo daarɛ́, ɛ́ rá má ɓa ná ɩ́ kénnináŋa Amoritiwa háá ɓaarɛ́. Amá ŋ é rɩ́rɩ́ŋ jaa nɩɛ, á sɩ́ tʋŋ pá Nyuutɩna Wɩɩsɛ nɛ́.»
16 Ɛ́ nɛ́ jamáŋ ná sɛ́: «Ŋmɛ́nɔ toó, ráá vɛ́ Nyuutɩna Wɩɩsɛ, ká tʋŋ aá pá wɩŋsa náŋa! 17 Bee wɩ́ɛ́, Nyuutɩna Wɩɩsɛ, á Wɩɩsɛ nɛ́ lɩ́sɩ́rá rɩ́rá naabálwa Ezipiti yomí sɩɛrʋ. Á ɛ̃ wɩ́nyáŋzeŋse ná má ʋ há ɛ́ɛ́ rɛ́: ʋ pɔ́rá mɛ́, á valɛ́ wuu sɩɛrʋ, a pɔ́rá mɛ́, á há tɩ́ŋ nɩɛ ná wuu sɩɛrʋ a daarɛ. 18 Nyuutɩna Wɩɩsɛ nɛ́ lárá sɩ́ɛ́, a kiri nɩɛ wuu duó; ʋ nɛ́ kírí Amoritiwa ná fa há ké tɔ́ɔ́ né mí. Ɛ́ wɩ́ɛ́, á máá ráá tʋŋ pá Nyuutɩna Wɩɩsɛ nɛ́, bee wɩ́ɛ́ ʋ nɛ́ kárá Wɩɩsɛ.»
19 Ɛ́ nɛ́ Zozie bʋl jamáŋ ná rɩ́ a bʋlɛ́: «Ɩ́ waá wóllí tʋ́ŋ pá Nyuutɩna Wɩɩsɛ. Ʋ dʋŋɔ nɛ́ ká taŋá Wɩɩsɛ, ʋʋ́ já rʋ́ʋ́ dʋŋɔ nɛ́ de ɛ́ɩ́wa Wɩɩsɛ. Ʋ wɩ́ɩ́wa kéké rɩ́rɩ́wa wɩ́bɔma wuó nyammɛ. 20 Rɩɩ́wa nɛ́ vɛ́ Nyuutɩna Wɩɩsɛ rɩ́ tá, káá mʋ́ʋ́ ɓaarɛ wɩhʋɔra, ʋ sɩ́ bɩ́rɛ cɩ́nɩ́wa mɛ́, a bɛ́ŋsɩ́wa, ká ɓʋ́ʋ́sɩ́wa tenni, anʋ raá fa wɩ wérí ɛ́ɛ́ pɛ́ɩ́wa.» 21 Amá jamáŋ ná sɛ́: «Aɩ́, á sɩ́ tʋŋ pá Nyuutɩna Wɩɩsɛ nɛ́.» 22 Zozie báá sɛ́: «Ɩ́ nɛ́ sɩɛ́ kɛ́ɩ́wa tɩɩ dáŋsɩ́ɛ́wa, rɩɩ́wa bɛ́llɔ́ lɩ́sɛ, rɩ́ɩ́wa tʋŋ pá Nyuutɩna Wɩɩsɛ.» Ɛ́ nɛ́ ɓa sɛ́: «Óó, á ká dáŋsɩ́ɛ́wa.» 23 «Ɛ́ nɛ́ Zozie sɛ́: «Ɩ́ yo wɩhʋɔra ná wuu há mɩ́nɩ́wa rɩ́ tá, ká vɔ́wɩ́wa tɩɩ cɔ́ Nyuutɩna Wɩɩsɛ, Ɩzɩrayɛl Wɩɩsɛ mɛ́ rɩ́rɩ́wa sɩɛrʋ wuu.» 24 Ɛ́ nɛ́ jamáŋ ná bʋ́l Zozie rɩ́ a bʋlɛ́: «Óó, á có ráá tʋŋ pá Nyuutɩna Wɩɩsɛ, á Wɩɩsɛ nɛ́, ká tɩ́ŋʋ́ sɛ́.»
25 Ɛ́ kal, Zozie bíl nʋtʋmɛ, jamáŋ ná yɩr mɛ́, a bil wádawa rɩ́ kíŋse a pɔ́wɔ́ Sɩsɛmɛ mɛ́. 26 Zozie pʋ́ŋsɛ ɛ́ wɩ́ɛ́ hé Wɩɩsɛ kíŋse kɛnɔ sɩɛrʋ. Ká pi dɔ́wɩ́zeno, a mʋ́ bil tuu ná ɓa háá yɩ́rɛ Sɛɛnɛ, mʋ́l, Nyuutɩna Wɩɩsɛ dɩmɩnɩ́. 27 Zozie baa bʋl jamáŋ ná wuu rɩ́, a bʋlɛ́: «Ɩ́ bel dɔ́wɩ́ né wérí, ʋ nɛ́ sɩ́ árá dáŋsɩ́ɛ́, bee wɩ́ɛ́ ʋ nɛ̃́ wɩ́ɛ́ ná wuu Nyuutɩna Wɩɩsɛ há bʋ́lɛ́ párá. Óó, ʋ nɛ́ sɩ́ ɛ́ɩ́wa dáŋsɩ́ɛ́, a pɔ́ rɩ́ɩ́wa sɩ́ɩ́wa Wɩɩsɛ báásʋ́.» 28 Ká Zozie tá jamáŋ ná, nɛrɔ wuu bɩrɛ mʋ́ ké tíé ná há kɔ́ʋ́ liwe mí.
Zozie sʋʋ wɩ́ɛ́
29 Ɛ́ har mɛ́, Nuŋ bio Zozie, Nyuutɩna Wɩɩsɛ tʋtʋnnɔ, sʋ́wɔ́; ʋ fa kéŋ bɩŋsɛ zɔlɔ rɩ́ fí. 30 Ɓa húú ʋ tíé ná há kɔ́ʋ́ liwe mí, Timinatisera mɛ́, Ɩfɩrayɩŋ dɩtɩ́llɛ, pallɛ dɩhɩ̃́, Gaasɛ paalɔ wɩɩsɛ dɩpomí nágʋɔ caasɛ́. 31 Ɩzɩrayɛl nɩɛ tʋ́mɔ́ a pá Nyuutɩna Wɩɩsɛ, Zozie mɩnɛ́ wuu mí. Ʋ sʋʋ har mɛ́, Ɩzɩrayɛl nɩɛ ha tʋ́mɔ́ pá Nyuutɩna Wɩɩsɛ, nɩhɩɛ̃́sɛ ná má, há ná wɩ́ɛ́ ná wuu Nyuutɩna Wɩɩsɛ há ɛ́ɛ́ pá Ɩzɩrayɛl nɩɛ, ɓa mɩnɛ́ tɛ́ŋ wuu mí.
32 Ɩzɩrayɛl nɩɛ hú Zɔzɛfɛ heŋgbele ná ɓa há pɛ́ɛ́ paa lɛ Ezipiti mí, Sɩsɛmɛ tíé ráŋ ná Zakɔbɛ fa há lɛ́ɛ́ yɔwɛ rɩ́ meéwícááka zɔlɔ, Hamɔɔrɛ há ká Sɩsɛmɛ tɔ́ɔ́ tɩ́na, dunɩɛ rɩ́; ɛ́ tíé ko bɩrmɛ Zɔzɛfɛ dunɩɛ liwe. 33 Aarɔŋ bio Ɩlɩyazaarɛ má sʋwɛ. Ɓa húú dúŋdúóŋ ná ɓa há píé a pɔ́ʋ́ bio Fineya, nyúú ní; Ɩfɩrayɩŋ pallɛ sɩɛrʋ nɛ́, ɓa fa pi ɛ́ dɩhɩ̃́ pɔ́ʋ́.