Levitiwa tɔ́nɛ
21
1 Ɛ́ nɛ́ Levi duo nɩɛ jɩtɩ́náwa isi, a ko vʋk'ɔɔsɔ Ɩlɩazaarɛ rɩ́ Nuŋ bio Zozie arɩ́ Ɩzɩrayɛl nɩɛ jɩmʋ́ʋ́la ná jɩtɩ́náwa dɩhɩ̃́, 2 Silo mí, Kanaŋ tíé, a bʋ́lwɔ́ rɩ́, a bʋlɛ́: «Á Nyuutɩna Wɩɩsɛ tɩ́ŋ Moyizi mí, a bʋl rɩ́ɩ́ párá tɔ́nɛ, ráá zʋ́zʋ́, ká rɩ́wɔ́ kílo árá pʋsɛ dɩdíí.» 3 Nyuutɩna Wɩɩsɛ há mákɛ́ ɛ́, Ɩzɩrayɛl nɩɛ lɩ́sɛ tɔ́nɛ, ɓa tíé mí arɩ́ pʋsɛ dɩdííle, a pá Levitiwa.4 Ɓa há yó bíé, Kehatitiwa duo nɩɛ nɛ́ dí dʋ́ŋdʋ́ʋʋ̃́ ɓaalɛ. Levitiwa ná há ká vʋk'ɔɔsɔ Aarɔŋ bɛlɛ nɛ́, ɓa lɩ́sɛ tɔ́nɛ fí rí botoro, Ziida rɩ́ Sɩmɩɔŋ arɩ́ Bɛŋzamɛŋ duo nɩɛ tíé mí, a pɔ́wɔ́. 5 Kehatitiwa duo nɩkáánɛ ná má tɩ́ŋ bíé ná yoe mí, a la tɔ́nɛ fí ní, Ɩfɩrayɩŋ rɩ́ Daŋ arɩ́ Manase duo nɩɛ fá ná tíé mí. 6 Gɛrsɔŋ duo nɩɛ má tɩŋ bíé ná yoe mí, a la tɔ́nɛ fí rí botoro, Ɩsakarɛ rɩ́ Asɛrɛ arɩ́ Nɛfɩtalɩ jɩmʋ́ʋ́la nɩɛ arɩ́ Manase jɩmʋ́l fá ná há mɩŋ Basaŋ mɛ́, ɓa tíé mí. 7 Merari bɛlɛ, duó duówa má la tɔ́nɛ fí rɩ́ bɛllɛ, Rubaŋ rɩ́ Gadɛ arɩ́ Zabɩlɔŋ jɩmʋ́ʋ́la nɩɛ tíé mí. 8 Ɩzɩrayɛl nɩɛ há yó bíé ná, tɔ́nɛ nyáŋ arɩ́wɔ́ kílo ná pʋsɛ há sɩ́ dídí ní, ɓa pii pá Levitiwa, anɛ ɛ́ Nyuutɩna Wɩɩsɛ fa há mákɛ́, a tɩŋ Moyizi mí.
9 Ziida arɩ́ Sɩmɩɔŋ jɩmʋ́ʋ́la nɩɛ tíé mí, ɓa há pí tɔnɛ́ ná a pá Levitiwa, ɓa pɔ́wɔ́ yɩra. 10 Tɔ́nɛ nyáŋ nɛ́ ɓa pii pá Levi duo ná há lɛ́ Aarɔŋ duo nɩɛ sɩɛrʋ, Kehati duo sɩɛrʋ, bee wɩ́ɛ́ ɓa há yó bíé ná, ɓa nɛ́ la sɩ́ɛ́ a dí. 11 Ɓa pí Kiriyati'arba a pɔ́wɔ́, Arba nɛ́ fa ká Anakitiwa naabál, ʋ nɛ́ ha ká Ɩbɩrɔŋ, arɩ́ dɩhɛ̃́ ná ɓa pʋsɛ há sɩ́ dídí, ʋ mɩŋ Ziida pallɛ tíé mí ní. 12 Amá ɓa pí tɔ́ɔ́ ná baksɛ, arɩ́rʋ́ tɔ́wiisi ná a pá Yefune bio Kalɛbɛ, ɓa ɔ́ʋ́ ker. 13 Ɓa pí Ɩbɩrɔŋ nɛ́, a pá Wɩɩsɛ vʋk'ɔɔsɔ Aarɔŋ duo nɩɛ, ʋ nɛ́ a tɔ́yúóli ná, rɩ nɛrɔ nɛ́ wɩ sánɛ́ ká ɓʋ́ʋ́ nɔ́ŋɔ, ʋ há sɩ́ fá mʋ́ a yúóli, ʋ rɩ́rʋ́ kílo, arɩ́ Libina má rɩ́rʋ́ kílo; 14 Yatiiri, Ɛsɩtɛmʋɔ, 15 Holoŋ, Debiiri, 16 Ayiŋ, Yuta arɩ́ Bɛtɩsɛmɛɛsɛ rɩ́wɔ́ kílo. Tɔ́nɛ ná ká nɛ́mɛ́, ɓa lɩ́sɛ Ziida arɩ́ Sɩmɩɔŋ jɩmʋ́ʋ́la tíé mí, a pɔ́wɔ́. 17 Bɛŋzamɛ duo nɩɛ tíé mí, ɓa pí tɔ́nɛ nyáŋ nɛ́ a pɔ́wɔ́: Gabaɔŋ rɩ́ Geba arɩ́wɔ́ kílo ná ɓa pʋsɛ há sɩ́ dídí, 18 Anatɔtɛ arɩ́ Alɩmɔŋ. Tɔ́nɛ baná arɩ́wɔ́ kílo. 19 Tɔ́nɛ ná wuu ɓa há píé a pá Aarɔŋ duo nɩɛ há ká Wɩɩsɛ vʋk'ɔɔsa, ɓa ká fí arɩ́ botoro ní arɩ́wɔ́ kílo ná ɓa pʋsɛ há sɩ́ dídí.
20 Kehati duo nɩɛ nɩkáánɛ ná há ká Levitiwa, ɓa má duó duówa lá tɔ́nɛ Ɩfɩrayɩŋ jɩmʋ́l nɩɛ tíé mí, a tɩŋ bíé yoe mí. 21 Ɩfɩrayɩŋ pallɛ daha, ɓa pí Sɩsɛmɛ nɛ́ a pɔ́wɔ́. Ʋ ká tɔ́yúóli ní, rɩ nɛrɔ nɛ́ ɓʋ́ʋ́ nɔ́ŋɔ, rʋ́ʋ́ fá mʋ́ yúóli, ʋ rɩ́rʋ́ kílo wuu arɩ́ Gɛzɛɛrɛ má rɩ́rʋ́ kílo wuu, 22 Kibisayimi arɩ́ Betihoroŋ. Ɓa ká tɔ́nɛ baná arɩ́wɔ́ kílo ná, ɓa pʋsɛ há sɩ́ dídí. 23 Daŋ jɩmʋ́l nɩɛ má tíé mí, ɓa pɔ́wɔ́ tɔ́nɛ nyáŋ nɛ́: Eliteke rɩ́ Gibetoŋ arɩ́wɔ́ kílo, 24 Ayalɔŋ arɩ́ Gatɩrɩmɔŋ arɩ́wɔ́ kílo tɔ́nɛ. Ɓa ká tɔ́nɛ baná nɛ́ arɩ́wɔ́ kílo ná, ɓa pʋsɛ há sɩ́ dídí. 25 Manase jɩmʋ́l fá ná nɩɛ tíé mí, ɓa pɔ́wɔ́ Tanakɛ arɩ́ Gatɩrɩmɔŋ. Ɓa ká tɔ́nɛ bɛllɛ nɛ́, arɩ́wɔ́ kílo ná, ɓa pʋsɛ há sɩ́ dídí. 26 Tɔ́zeŋsi nyáŋ fí arɩ́wɔ́ dɩhɛ̃́ ná ɓa pʋsɛ há sɩ́ dídí ní, ɓa pii pá Kehati bɛlɛ náŋa duo nɩɛ. 27 Levitiwa duó duówa ná sɩɛrʋ, Gɛrsɔŋ bɛlɛ lá tɔ́nɛ bɛllɛ, Manase jɩmʋ́l nɩɛ fá ná tíé mí: Golaŋ há mɩŋ Basaŋ mɛ́, há ká tɔ́yúóli, rɩ nɛrɔ nɛ́ ɓʋ́ʋ́ nɔ́ŋɔ, rʋ́ʋ́ fá mʋ́ a yúóli, arɩ́ Bɛɛsɩtɩra. Ɓa ká tɔ́nɛ bɛllɛ nɛ́, arɩ́wɔ́ kílo ná ɓa pʋsɛ há sɩ́ dídí. 28 Ɩsakaarɛ jɩmʋ́l nɩɛ tíé mí, ɓa pɔ́wɔ́ Kɩsɩɔŋ, Dabɩratɛ, 29 Yamuti arɩ́ Ɛŋganimi ní: Ɓa ká tɔ́nɛ baná nɛ́ arɩ́wɔ́ kílo ná ɓa pʋsɛ há sɩ́ dídí. 30 Asɛɛrɛ jɩmʋ́l nɩɛ tíé mí, ɓa pɔ́wɔ́ Mɩsal, Abɩdɔŋ, 31 Hɛlɩkatɛ arɩ́ Rɩhɔbɛ. Ɓa má ká tɔ́nɛ baná arɩ́wɔ́ kílo ná, ɓa pʋsɛ há sɩ́ dídí. 32 Nɛfɩtalɩ jɩmʋ́l nɩɛ tíé mí, ɓa pɔ́wɔ́ Kɛdɛɛsɛ há mɩŋ Galiile mí. Ʋ ká tɔ́yúóli ní, rɩ nɛrɔ nɛ́ ɓʋ́ʋ́ nɔ́ŋɔ, ʋ há sɩ́ fá a mʋ́ yúóli, arɩ́ Hamɔtɩdɔɔrɛ arɩ́ Kartaŋ. Ɓa ká tɔ́nɛ botoro ní arɩ́wɔ́ kílo ná, ɓa pʋsɛ há sɩ́ dídí. 33 Tɔ́nɛ ná wuu, ɓa há píé pá Gɛrsɔŋ duo nɩɛ, ká fí arɩ́ botoro arɩ́wɔ́ kílo ná, ɓa pʋsɛ há sɩ́ dídí.
34 Merari duo nɩɛ, há ká Levitiwa nɩkáánɛ, ɓa lá tɔ́nɛ, Zabɩlɔŋ jɩmʋ́l nɩɛ tíé mí. Ɓa nɛ́ ká Yɔknɩamɛ, Karta, 35 Dɩmɩna arɩ́ Nahalal. Ɓa ká tɔ́nɛ baná nɛ́ arɩ́wɔ́ kílo ná, ɓa pʋsɛ há sɩ́ dídí. 36 Rubaŋ jɩmʋ́l nɩɛ tíé mí, ɓa pɔ́wɔ́ Bɩsɛɛrɛ, Yahasɛ 37 Kɛdɛmɔtɛ arɩ́ Mɛfaatɛ. Ɓa ká tɔ́nɛ baná nɛ́ arɩ́wɔ́ kílo ná, ɓa pʋsɛ há sɩ́ dídí. 38 Gaadɛ má jɩmʋ́l nɩɛ tíé mí, ɓa pɔ́wɔ́ Ramɔtɛ há mɩŋ Galaadɛ mɛ́. Ʋ ká tɔ́yúóli ní, rɩ nɛrɔ nɛ́ ɓʋ́ʋ́ nɔ́ŋɔ, rʋ́ʋ́ fá mʋ́ yúóli, arɩ́ Mahanayimi, 39 Hɛsɩbɔŋ arɩ́ Yazɛɛrɛ. Ɓa ká tɔ́nɛ baná nɛ́ arɩ́wɔ́ kílo ná, ɓa pʋsɛ há sɩ́ dídí. 40 Tɔ́nɛ ná wuu ɓa há yó bíé, a pii pá Meraritiwa duó duówa, há ká Levitiwa nɩkáánɛ, ɓa ká fí arɩ́ bɛllɛ nɛ́. 41 Tɔ́nɛ ná wuu, ɓa há píé a pá Levitiwa, Ɩzɩrayɛl nɩɛ tíé mí, ká mɛɛ́sɛllɛ arɩ́ córí ní, arɩ́wɔ́ kílo ná, ɓa pʋsɛ há sɩ́ dídí. 42 Ɛ́ tɔ́nɛ oro wuu mí, pʋsɛ dɩdíí mɩ́nʋ́ kílo; ɓa wuu fa ká ɛ́ nɛ́.
43 Nyuutɩna Wɩɩsɛ pí tíé ná wuu, ʋ há tá nʋɔ a pá Ɩzɩrayɛl nɩɛ naabálwa, rʋ́ʋ́ sɩ́ pii pɔ́wɔ́, a pá Ɩzɩrayɛl nɩɛ, ʋ ɔ́wɔ́ tɩ́llɛ, ɓa ké ráŋ. 44 Nyuutɩna Wɩɩsɛ pá Ɩzɩrayɛl nɩɛ fɩɛla ɓa kílo wuu mí, anʋ́ fa há tá nʋɔ ɛ́, a pɔ́wɔ́ naabálwa. Ɓa dɩŋdɔ́ŋ wuu wɩ wóllé cákwɔ́ cɛ́. Nyuutɩna Wɩɩsɛ píwó dɩŋdɔma wuu a héwó nɛ́sɛ mɛ́, ɓa wóllíwó. 45 Nyuutɩna Wɩɩsɛ há tá nʋɔ, rʋ́ʋ́ a wɩ́ɛ́ ná wuu a pá Ɩzɩrayɛl nɩɛ, ɓa wuu ní ʋ a; oro wuu toó, ʋ nʋɔ wɩ súé.