Tɔ́nɛ ná ɓa há sɩ́ fá mʋ́ yúóli
20
1 Nyuutɩna Wɩɩsɛ bʋl Zozie rɩ́ a bʋlɛ́: 2 «Bʋl pá Ɩzɩrayɛl nɩɛ, rɩ́wɔ́ lɩ́sɛ tɔ́nɛ ná ɓa há sɩ́ fá mʋ́ a yúyúóli, anɛ ɛ́ ŋ há tɩ́ŋ Moyizi mí a makɛ pɛ́ɩ́wa. 3 Rɩ nɛrɔ nɛ́ wɩ sánɛ́, ká ɓʋ́ʋ́ nɔ́ŋɔ, rʋ́ʋ́ wólli fá mʋ́ a yúóli, rɩ nɛrɔ ná há sʋ́wɛ́ maábinɔ́ŋɔ nɩ́ɩ́ já rʋ́ʋ́ dúú tɛŋbuoró, rʋ́ʋ́ sʋ́ʋ́ ɓʋ́. 4 Rɩ nɩɓʋ́ʋ́rɔ ná nɛ́ fɛ́ɛ́ rɩ́ mʋ́ tɔ́nɛ nyáŋ oro sɩɛrʋ, ʋ mɔhɔ̃́ rʋ́ʋ́ cɛ́ tɔ́ɔ́ ná dánnʋɔ mɛ́ nɛ́, tɔ́ɔ́ ná nɩhɩɛ̃́sɛ sɩ́ɛ́, ká bʋl wɩ́ɩ́ ná ʋ há ɛ́ɛ́ a pɔ́wɔ́. Ɓa nɛ́ sɩ́ ka tɩ́na zʋ tɔ́ɔ́ sɩɛrʋ, a pɔ́ʋ́ dɩhɩ̃́ ɓa sɩɛrʋ, rʋ́ʋ́ mɩŋ ráŋ. 5 Rɩ nɛrɔ ná há sʋ́wɛ́ maábinɔ́ŋɔ háá ja rʋ́ʋ́ dí ɛ́ tɛŋbuoró ʋ mɛ́, rʋʋ nɛ́ kírú har rɩ́ɩ́ ko, ʋ wɩ mɔhɛ̃́ rɩ́wɔ́ kánʋ́ tɛ, bee wɩ́ɛ́ ʋ wɩ ɛ̃ sɩɛrʋ nɛ́, ʋ ɓʋ́ tɩ́na, ʋ fa tóú dɩŋdɔ́ŋ. 6 Ʋ mɔhɔ̃́ rʋ́ʋ́ ké tɔ́ɔ́ ná mɛ́, a kaá já tápʋl ná ɓa há sɩ́ kánʋ́ kaa lɛ jamáŋ sɩ́ɛ́, rɩ́wɔ́ dúú sarɩ́ya, ká rʋ́ʋ́ ké ráŋ, a kaá ja Wɩɩsɛ vʋk'ɔɔsɔ nɔhɔ̃́ ná, háá tʋ́mɛ́ ɛ́ tɛ́ŋ mɛ́, ʋ sʋʋ. Rʋ́ʋ́ sɩɛ́ wólli bɩrɛ mʋ́ʋ́ tɔ́ɔ́, a zʋ́ʋ́ tɩɩ jaa, tɔ́ɔ́ ná mɛ́, ʋ há lɩ́ɛ́ fá.»7 Ɛ́ nɛ́ ɓa lɩ́sɛ Kɛdɛsɛ há mɩŋ Galile mí, Nɛfɩtalɩ tíé, pallɛ daha, a lɩ́sɛ Sɩsɛmɛ há mɩŋ Ɩfɩrayɩŋ pallɛ daha, arɩ́ Kiriyati'arba, ʋ nɛ́ há ká Ɩbɩrɔŋ, a mɩŋ Ziida pallɛ tíé. 8 Zʋrdɛŋ fuo wɩpomí caasɛ́, Zeriko cɔɔ má, ɓa lɩ́sɛ Bɛtɩsɛrɛ há mɩŋ gɩrbétéke sɩɛrʋ, a mɩŋ Rubaŋ jɩmʋ́l nɩɛ típaŋtaŋɩ́ mɛ́; a baa lɩ́sɛ Ramɔtɛ há mɩŋ Galaadɛ mɛ́, Gadɛ jɩmʋ́l nɩɛ tíé mí, a lɩ́sɛ Golaŋ há mɩŋ Basaŋ mɛ́, Manase jɩmʋ́l nɩɛ tíé mí. 9 Rɩ Ɩzɩrayɛl nɩɛ, ɛ́rá má rɩ nɩhʋɔra ná há mɩ́ŋwɔ́ sɩɛrʋ oro rí wɩ sánɛ́ ká ɓʋ́ nɛrɔ, ʋ sɩ́ wólli fá mʋ́ yúóli tɔ́nɛ nyáŋ, ɓa há lɩ́sɛ́ nɔ́ŋɔ sɩɛrʋ, rɩ́ tɛŋbuoró tɩ́na ná háá já rʋ́ʋ́ pi ɛ́ kɩŋ túmú mí, rʋ́ʋ́ sʋ́ʋ́ ɓʋ́, ká rʋ́ʋ́ wólli mɩŋ ráŋ, a mʋ́ peri tápʋl ná ʋ há sɩ́ cɛ́ jamáŋ ná sɩ́ɛ́, rɩ́wɔ́ dúú sarɩ́ya.