Ɓaalɛ ná Sɩmɩɔŋ jɩmʋ́l há lɛ́ɛ́
19
1 Sɩmɩɔŋ jɩmʋ́l nɩɛ duó duówa má nɛ́ ká bʋllɛ nɩɛ, a pi ɓaalɛ. Ɓa tíé ɓaalɛ fa mɩŋ Ziida tíé sɩ́sɩɛrʋ nɛ́. 2 Tɔ́nɛ nyáŋ nɛ́ fa mɩ́ŋwɔ́ tíé mí: Bɛrsɩba rɩ́ Sɛba rɩ́ Molada, 3 Hatɩsarɩsʋɔl, Baala, Ɛsɛŋ, 4 Ɛltɔladɛ, Betul, Hɔrma, 5 Sɩkɩlagɛ, Bɛtɩmarkabɔtɛ, Hasarisusa, 6 Bɛtɩlɩbahɔtɛ arɩ́ Sarʋhɛŋ. Tɔ́zeŋsi fí rí botoro ní arɩ́wɔ́ tɔ́wɩɛla. 7 Ɛŋrɩmɔŋ, Ɩtɛɛrɛ arɩ́ Asaŋ. Tɔ́zeŋsi baná arɩ́wɔ́ tɔ́wɩɛla. 8 Tɔ́wɩɛla ná há kílwó ní pɛ́ ɛ́, a mʋ́ peri Balatɛbɛɛrɛ há ká Rama, a mɩŋ Nɩgɛɛvɛ mɛ́. Sɩmɩɔŋ jɩmʋ́l nɩɛ duó duówa há lá tíé ná, ʋ ɔ́wɔ́ liwe ní ɛ́. 9 Ziida jɩmʋ́l tíé ní, ɓa fa coki a pá Sɩmɩɔŋ duo nɩɛ, ʋ ɔ́wɔ́ ker ɛ́. Bee wɩ́ɛ́ Ziida duo nɩɛ tíé fa zénó, a kɩ́llɩ́wɔ́ háá ja ɛ́. Ɛ́ nɛ́ tɛ Sɩmɩɔŋ jɩmʋ́l nɩɛ lɔ́wɔ́ tíé ker, ʋ mɩŋ Ziida tíé sɩ́sɩɛrʋ.Ɓaalɛ ná Zabɩlɔŋ jɩmʋ́l há lɛ́ɛ́
10 Bíé ná yoe mí, Zabɩlɔŋ jɩmʋ́l nɩɛ duó duówa má nɛ́ dí botoro nyúú ɓaalɛ. Ɓa tíé ná ɓa há lɛ́ɛ́, ʋ ɔ́wɔ́ liwe, ʋ bʋɔ nɛ́ pɛ́ ɛ́, a mʋ́ peri Saridi. 11 Ʋ pɩ́nɔ́ mʋ́ wɩzʋʋlɔ́ caasɛ́, a mʋ́ Marala, a mʋ́ yakɛ Dabasɛtɛ mɛ́, ká ka ɛ́ mʋ́ tɩŋ fonaa ná há pálɛ́ tɩŋ Yɔknɩaŋ wɩɩsɛ dɩpomí. 12 Ʋ nɛ́ báá pɔ́ Saridi cɔɔ nɔ́ŋɔ, ká bɩ́rɛ mʋ́ wɩɩsɛ dɩpomí caasɛ́, a ka ɛ́ mʋ́ Kɩsɩlɔtɛtabɔɔrɛ tíé, a tɩŋ Dabɩratɛ, a bɩrɛ zɛ́ Yafɩa. 13 Ʋ nɛ́ ha cɛ́ ráŋ, a tɩŋ wɩpomí caasɛ́, a mʋ́ Gatɩhɩfɛɛrɛ arɩ́ Ɛtɩkasɛŋ, a ko lɛ Rɩmɔŋ ká baa gʋrɛ a caasɛ Neya. 14 Ráŋ nɛ́ bʋɔ ná cɛ́ ká gólli mʋ́ wɩpomí nágʋɔ caasɛ́, a mʋ́ Hanatɔŋ, a mʋ́ tenni Yɩfɩta'Ɛl polo mí. 15 Tɔ́nɛ ná há súúré ní ká: Kata, Nahalal, Simiroŋ, Idala arɩ́ Beteleyɛmɛ. Tɔ́zeŋsi fí arɩ́ bɛllɛ arɩ́wɔ́ tɔ́wɩɛla. 16 Tɔ́zeŋsi nyáŋ arɩ́wɔ́ tɔ́wɩɛla wuu, Zabɩlɔŋ jɩmʋ́l duó duówa nɩɛ liwe ní ɛ́.
Ɓaalɛ ná Ɩsakaarɛ jɩmʋ́l há lɛ́ɛ́
17 Ɓa báá há yó bíé ná, Ɩsakaarɛ jɩmʋ́l nɩɛ duó duówa má nɛ́ dí baná nyúú mí ɓaalɛ. 18 Ɓa tíé bʋɔ nɛ́ ká Zizireyel a ka tɔ́nɛ nyáŋ a súúri: Kɛsʋlɔtɛ, Sʋʋnɛmɛ, 19 Hafarayimi, Sɩɔŋ, Anaharati, 20 Rabiti, Kɩsɩɔŋ, Ɩbɛsɛ, 21 Rɛmɛtɛ, Ɛnɩganɩmɛ, Ɛnɩhada arɩ́ Bɛtɩpasɛsɛ. 22 Ʋ bʋɔ ná mʋ́ɔ́ a yakɛ Tabɔrɛ rɩ́ Sahasɩma arɩ́ Bɛtɩsɛmɛsɛ mɛ́ nɛ́, a mʋ́ tenni Zʋrdɛŋ fuo mí. Ɓa ká tɔ́zeŋsi fí arɩ́ balgo ní arɩ́wɔ́ tɔ́wɩɛla. 23 Tɔ́zeŋsi nyáŋ arɩ́wɔ́ tɔ́wɩɛla ná wuu , Ɩsakaarɛ jɩmʋ́l nɩɛ duó duówa nɛ́ tɩ́wɔ́.
Ɓaalɛ ná Asɛrɛ jɩmʋ́l há lɛ́ɛ́
24 Ɓa báá há yó bíé ná, Asɛɛrɛ jɩmʋ́l nɩɛ duó duówa má nɛ́ dí bɔmmʋ́ɔ́ nyúú mí ɓaalɛ. 25 Ɓa tíé bʋɔ nɛ́ ká Hɛlɩkatɛ a ka tɔ́nɛ nyáŋ a súúri: Hali, Betaŋ, Akɩsafɛ, 26 Alamɛlɛkɛ, Amadɛ arɩ́ Mɩsal. Ʋ wɩzʋʋlɔ́ caasɛ́ mʋ́ɔ́ a yakɛ Karmɛl arɩ́ Sɩhɔrɛlɩbɩnatɛ mɛ́ nɛ́. 27 Ʋ nɛ́ ha bɩ́rɛ́ mʋ́ tɩŋ wɩpomí caasɛ́, a mʋ́ Bɛtɩdagɔŋ rɩ́, a mʋ́ yakɛ Zabɩlɔŋ arɩ́ Yɩfɩta'ɛl polo mí, ká tɩŋ wɩpomí caasɛ́ nágʋɔ, a mʋ́ Bɛtɩ'ɛmɛkɛ arɩ́ Nɛhɩɛl a mʋ́ kéri Kabul há mɩŋ nágʋɔ rɩ́, 28 a baa lɩɩ tɩŋ Ɩbrɔŋ, Rɩhɔbɛ, Hammɔŋ arɩ́ Kanaa, a pɛ́ ɛ́ a mʋ́ peri Sɩdɔŋ zeno. 29 Ɛ́ bʋɔ nɛ́ báá bɩ́rɛ́ a caasɛ Rama, a pɛ́ ɛ́ a mʋ́ Tiiri tɔ́zeno ná ɓa há sɔ́ zeŋ kɛ́rɛ, ká gʋrɛ a caasɛ Hosa, a ko lɛ Mediterane mʋʋ ná há mɩŋ Mahalɛbɛ rɩ́ Akizibi mí. 30 A súúri Uma rɩ́ Afɛkɛ arɩ́ Rɩhɔbɛ. Ɓa ká tɔ́zeŋsi mɛrɛ́ arɩ́ bɛllɛ arɩ́wɔ́ tɔ́wɩɛla. 31 Tɔ́zeŋsi nyáŋ arɩ́wɔ́ tɔ́wɩɛla wuu, Asɛrɛ jɩmʋ́l nɩɛ liwe ní ɛ́, a tɩŋ duó duówa.
Ɓaalɛ ná Nɛfɩtalɩ jɩmʋ́l há lɛ́ɛ́
32 Ɓa báá há yó bíé ná, Nɛfɩtalɩ jɩmʋ́l nɩɛ duó duówa má nɛ́ dí balgo nyúú mí ɓaalɛ. 33 Ɓa tíé bʋɔ nɛ́ lɛ́ Hɛlɛfɛ arɩ́ sɛɛnɛ ná há mɩŋ Sananimi mí, a mʋ́ tɩŋ Adamɩnɩkɛbɛ arɩ́ Yabɩnɩɛl, a mʋ́ tɩŋ Lakumi, a mʋ́ kéri Zʋrdɛŋ fuo mí. 34 Ʋ bʋɔ ná nɛ́ ha pɩ́nɛ́ a bɩ́rɛ mʋ́ wɩzʋʋlɔ́ caasɛ́, a tɩŋ Azɩnɔtɛtabɔrɛ, a ko lɛ Hʋkɔkɛ. Ʋ nɛ́ mʋ́ɛ́ a yakɛ Zabɩlɔŋ há mɩŋ wɩɩsɛ dɩpomí néduu, ká Asɛrɛ mɩŋ wɩzʋʋlɔ́ caasɛ́ a mʋ́ yakɛ Ziida mɛ́; Zʋrdɛŋ fuo ná má mɩŋ wɩɩsɛ dɩpomí caasɛ́. 35 Tɔ́zeŋsi ná ɓa há sɔ́ zeŋe a kɛ́rɛ nɩ́ ká: Sidiimi, Sɛɛrɛ, Hamatɛ, Rakatɛ, Kɩnɛrɛtɛ, 36 Adama, Rama, Hasɔɔrɛ, 37 Kɛdɛsɛ, Edireyi, Ɛŋhasɔɔrɛ, 38 Ɩrɔŋ, Mɩgdalɛl, Hɔrɛmɛ, Bɛtɩ'anatɛ arɩ́ Bɛtɩsɛmɛsɛ: Tɔ́zeŋsi ká fí arɩ́ nɛ́mɛ́ arɩ́wɔ́ tɔ́wɩɛla. 39 Tɔ́zeŋsi nyáŋ arɩ́wɔ́ tɔ́wɩɛla wuu, Nɛfɩtalɩ jɩmʋ́l nɩɛ liwe ní ɛ́, a tɩŋ duó duówa.
Ɓaalɛ ná Daŋ jɩmʋ́l há lɛ́ɛ́
40 Ɓa báá há yó bíé ná, Daŋ jɩmʋ́l nɩɛ duó duówa má nɛ́ dí balpɛ nyúú mí ɓaalɛ. 41 Ɓa tíé ná bʋɔ tɔ́nɛ nɛ́ nyɛ: Sora, Ɛsɩtahɔl, Ɩrɩsɛmɛsɛ, 42 Saalabiŋ, Ayalɔŋ, Ɩtɩla, 43 Ɩlɔŋ, Timina, Ɩkɩrɔŋ, 44 Ɛltɛkɛ, Gibetoŋ, Baalatɛ, 45 Yehudi, Benebaraki, Gatɩrɩmɔŋ, 46 Yarɩkɔŋ fonaa arɩ́ Rakoŋ arɩ́ Jafa kíle tíé ná wuu. 47 Daŋ duo nɩɛ há sɩ́ a ɛ́, a lɔ́wɔ́ tíé, rʋ́ʋ́ ɔ́wɔ́ óŋ, ʋ ɛ́ ká wɩ́dúó wérí, a pɔ́wɔ́. Ɛ́ nɛ́ ɓa mʋ́ a yo Lɛsɛmɛ nɩɛ, a ɓʋ́wɔ́ wuu, ká lɔ́wɔ́ tíé a ké. Ɓa há ké Lɛsɛmɛ mɛ́, ɓa píwó naabál Daŋ yɩr a hé pá dɩhɩ̃́ ná. 48 Tɔ́zeŋsi nyáŋ arɩ́wɔ́ tɔ́wiisi wuu, Daŋ jɩmʋ́l nɩɛ liwe ní ɛ́, a tɩŋ duó duówa.
Ɓaalɛ ná Zozie há lɛ́ɛ́
49 Tɛ́ŋ ná mɛ́ ɓa há kéŋ tíé ná, a ɓaa tenni, a pɔ́wɔ́ tɩɩ, Ɩzɩrayɛl nɩɛ pá Nuŋ bio Zozie má tíé, ɓa sɩɛrʋ, ʋ ɔ́ʋ́ liwe; 50 anɛ Nyuutɩna Wɩɩsɛ há mákɛ́ ɛ́. Zozie fa sʋ́ʋ́ ja tɔ́ɔ́ ná ɓa háá yɩ́rɛ Timinatisera, há mɩŋ Ɩfɩrayɩŋ pallɛ daha nɛ́. Ɛ́ nɛ́ ɓa pii pɔ́ʋ́, ʋ ɔsɛ sɔ tɔ́ɔ́ ná, a kénú mí. 51 Tíé ná vʋk'ɔɔsɔ Ɩlɩazaarɛ, arɩ́ Nuŋ bio Zozie, arɩ́ Ɩzɩrayɛl jɩmʋʋla jɩtɩ́náwa há yó bíé Silo mí, Nyuutɩna Wɩɩsɛ sɩ́ɛ́, Ceme táŋtɛ jaa ná dánnʋɔ mɛ́, a kaa ɓáwɔ́ nɛ́ ɛ́. Ɛ́ ná ɓa há ɛ́ɛ́, a ka tíé ná ɓaa tenni, ʋ nɛ́ ɛ́.