Ɓa kéŋ tíkáánɛ ná a ɓa jɩmʋ́ʋ́la ná káánɛ
18
1 Ɛ́ nɛ́ Ɩzɩrayɛl nɩɛ wuu ko hé náŋá mɛ́ Silo mí, a ciki Céme táŋtɛ jaa ráŋ. Ɓa fa yóó a la ɛ́ tɔ́ɔ́ má rɛ́. 2 Ɩzɩrayɛl jɩmʋ́ʋ́la balpɛ nɛ́ fa ha káánɛ́, á wʋ́ɔ́ tíé ɓaalɛ lɛ́ɛ́ rʋ́ʋ́ ɔ́wɔ́ liwe. 3 Ɛ́ nɛ́ Zozie bɔsɛ Ɩzɩrayɛl nɩɛ a bʋlɛ́: «Ɩ́ɩ́ já rɩ́ɩ́wa dáánɛ mɔ ɛ́rɛ́ rɛ́, ká sɩɛ́ isi la tíé ná Nyuutɩna Wɩɩsɛ, ɩ́ ánáwa Wɩɩsɛ, há píé pɛ́ɩ́wa? 4 Ɩ́ lɩ́sɛ báála botoro jɩmʋ́l wuu sɩɛrʋ, rɩ́ŋ tʋ́ŋwɔ́ rɩ́wɔ́ zʋ tɔ́ɔ́ ná, a kɩ́ɛ́lɛ a ná ɛ́ ná, ɩ́ há sɩ́ kánʋ́ a ɓaa pá jɩmʋ́l wuu, ká bɩrɛ ko bʋl páŋ. 5 Ɓa sɩ́ kánʋ́ a ɓa dɩhɛ̃́ balpɛ. Ziida duo nɩɛ sɩ́ mɩ́ŋwɔ́ dɩhɩ̃́, wɩɩsɛ dɩpomí néduu caasɛ́ tíé, rɩ́ Zɔzɛfɛ duo nɩɛ má mɩ́ŋwɔ́ dɩhɩ̃́, wɩɩsɛ dɩpomí nágʋɔ caasɛ́ tíé mí. 6 Rɩɩ́wa nɛ́ mʋ́ɛ́ rɩ́ɩ́ kɩ́ɛ́lɛ tíé ná, rɩ́ɩ́ ná ɛ́, ɩ́ há sɩ́ kánʋ́ a ɓa dɩhɛ̃́ balpɛ, rɩ́ɩ́ kóó bʋ́l páŋ, ŋ sɩ́ yo bíé, a kaa ɓɛ́ɩ́wa, Nyuutɩna Wɩɩsɛ, á Wɩɩsɛ sɩ́ɛ́. 7 Amá Levitiwa wɩ ɓáálɛ wuu kené ɩ́ sɩɛrʋ, bee wɩ́ɛ́, Nyuutɩna Wɩɩsɛ vʋka ɔsɛ́ nɩ́ kɔ́wɔ́ má liwe. Gadɛ rɩ́ Rubaŋ duo nɩɛ arɩ́ Manase duo nɩɛ fá ná, ɓa ná ɓaalɛ Zʋrdɛŋ fuo wɩɩsɛ dɩpomí caasɛ́, ʋ ɔ́wɔ́ liwe. Nyuutɩna Wɩɩsɛ tʋtʋnnɔ Moyizi tɩɩ nɛ́ fa píé pɔ́wɔ́.» 8 Báála ná há lɩ́ɛ́ rɩ́wɔ́ mʋ́ a kɩ́ɛ́lɛ tɔ́ɔ́ ná, Zozie bʋ́l nyɛ nɛ́ a pɔ́wɔ́, ʋ sɛ́: «Ɩ́ mʋ́ a kɩ́ɛ́lɛ tíé ná, a ná ɛ́ ɩ́ há sɩ́ kánʋ́ a ɓa, a ko bʋl páŋ. Ŋ sɩ́ yo bíé Silo mí rɛɛ́ Nyuutɩna wɩɩsɛ sɩ́ɛ́, a kaa ɓɛ́ɩ́wa.» 9 Ɛ́ nɛ́ báála ná mʋ́ a kɩ́ɛ́lɛ tíé ná, ɓa há sɩ́ kaa ɓa, a pʋ́ŋsɛ tɔ́nɛ ná má há mɩŋ ráŋ, arɩ́ ɛ́ ɓa há sɩ́ káŋwɔ́ ɓa dɩhɛ̃́ balpɛ, a hé kɛnɔ mɛ́, a kaa bɩrɛ ko púl ná, Zozie rɩ́, Silo mí. 10 Ɛ́ nɛ́ Zozie yo bíé Silo mí, Nyuutɩna Wɩɩsɛ sɩ́ɛ́, a ka tíé ná a ɓa, a pá Ɩzɩrayɛl nɩɛ, a tɩŋ duo wuu lɛɛ mʋɔsɔ.Ɓaalɛ ná Bɛŋzamɛ jɩmʋ́l há lɛ́ɛ́
11 Ɓa há yo bíé ɛ́, Bɛŋzamɛ jɩmʋ́l nɩɛ duó duówa nɛ́ lá sɩ́ɛ́ a pi ɓaalɛ. Ɓa tíé ní mɩŋ Ziida duo nɩɛ, arɩ́ Zɔzɛfɛ duo nɩɛ tíé pɛ́kɛ. 12 Ɓa tíé wɩɩsɛ dɩpomí nágʋɔ bʋɔ pɔ́ Zʋrdɛŋ fuo mí ní, a pɛ́ ɛ́ mʋ́ Zeriko wɩɩsɛ dɩpomí nágʋɔ caasɛ́, a pɛ́ ɛ́ a mʋ́ wɩzʋʋlɔ́ caasɛ́, a mʋ́ pallɛ há kíl dɩhɩ̃́ ná, a ko lɛ Bɛtavaŋ gɩrbétéke mí. 13 Ʋ lɛ́ ráŋ mɛ́, a tɩŋ ɛ́ mʋ́ Luzi, a tɩŋ Luzi wɩɩsɛ dɩpomí néduu caasɛ́, ʋ nɛ́ ká Bɩtɛl, a baa pɛ́ ɛ́ a tuwi Atarɔtɛ'adaarɛ, a tɩŋ pallɛ ná há mɩŋ mʋ́l rɩ́ Bɛtɩhɔrɔŋ wɩɩsɛ dɩpomí néduu caasɛ́. 14 A lɛ Bɛtɩhɔrɔŋ paalɔ ná há mɩŋ wɩzʋʋlɔ́ rɩ́, a caasɛ wɩɩsɛ dɩpomí néduu; bʋɔ ná baa bɩ́rɛ, a ko lɛ Kɩrɩyatɛbaalɛ, ʋ nɛ́ ha ká Kiriyatiyarimi má, há ká Ziida nɩɛ dɩhɩ̃́. Ʋ wɩzʋʋlɔ́ caasɛ́ bʋɔ nɛ́ ɛ́. 15 Ʋ wɩɩsɛ dɩpomí néduu bʋɔ má nɛ́, pɔ́ Kiriyatiyarimi há mɩŋ wɩɩsɛ dɩzʋʋlɩ́, a tɩŋ ɛ́ a ko lɛ Nafɩtʋɔ nyibʋɔnnɛ ná mɛ́. 16 Bʋɔ ná báá pɛ́ ɛ́ nɛ́ a tuwi paalɔ tɩŋa, a caasɛ Hɩnɔŋ polo ná, a tɩŋ Rifayitiwa polo, wɩɩsɛ dɩpomí nágʋɔ caasɛ́. Ʋ nɛ́ ha tɩ́ŋ ɛ́, a tuwi Hɩnɔŋ polo, a pɛ́ ɛ́ mʋ́ tɩŋ Zebuzitiwa dɩhɩ̃́ wɩɩsɛ dɩpomí néduu tíé dɩcurí, a pɛ́ ɛ́ a tuwi Ɛŋrɔgɛl. 17 Ʋ nɛ́ bɩ́rɛ́ a gʋrɛ ɛ́, a mʋ́ wɩɩsɛ dɩpomí nágʋɔ, a pɛ́ ɛ́ mʋ́ Ɛŋsɛmɛsɛ, a ha tɩŋ ɛ́ mʋ́ Gɩlɩlɔtɛ, a caasɛ dɩhɩ̃́ ná ɓa háá yɩ́rɛ Adumimi, a tɩŋ ɛ́ mʋ́ tuwi Rubaŋ bio Bɔhaŋ dɔ́wɩ́ dɩmɩnɩ́. 18 Ʋ bʋɔ nɛ́, ha tɩ́ŋ ɛ́ a mʋ́ Araba wɩɩsɛ dɩpomí nágʋɔ, a pɛ́ ɛ́ a mʋ́ tuwi Araba. 19 Ʋ báá tɩ́ŋ ɛ́, a mʋ́ Bɛtɩhɔgɩla wɩɩsɛ dɩpomí nágʋɔ, a tɩŋ ɛ́ ko lɛ Mʋsʋwɩ wɩɩsɛ dɩpomi nagʋɔ, Zʋrdɛŋ fuo nyii dɩpalmʋ́ɩ́, wɩɩsɛ dɩpomí néduu. Ʋ wɩɩsɛ dɩpomí néduu bʋɔ nɛ́ ɛ́. 20 Zʋrdɛŋ fuo ná nɛ́ ká tíé ná wɩɩsɛ dɩpomí caasɛ́ bʋɔ. Bɛŋzamɛ jɩmʋ́l tíé ker, a tɩŋ duó duówa bʋɔ há tɩ́ŋ ɛ́, cɔɔ́ wuu a kíl ní ɛ́.
21 Tɔ́nɛ ná Bɛŋzamɛ jɩmʋ́l nɩɛ duó duówa há tɩ́wɔ́ nɛ́ nyɛ: Zeriko, Bɛtɩhɔgɩla, Ɛmɛkɩkɛzɩsɩ, 22 Bɛtɩ'araba, Semarayimi, Bɩtɛl, 23 Aviimi, Para, Ofira, 24 Kefari'amonayi, Ofini arɩ́ Geba. Tɔ́zeŋsi fí arɩ́ bɛllɛ nɛ́ arɩ́wɔ́ tɔ́wɩɛla. 25 Gabaɔŋ, Rama, Bɩɩrɔtɛ, 26 Misipe, Kefira, Mosa, 27 Rɩkɛŋ, Yɩrpɩɛl, Tarala, 28 Sela, Ɩlɛfɛ, Zebuzitiwa tɔ́ɔ́ nɛ́, ʋ nɛ́ ha ká Zerizalɛmɛ, Gibeya arɩ́ Kiriyati. Tɔ́zeŋsi fí arɩ́ baná arɩ́wɔ́ tɔ́wɩɛla. Bɛŋzamɛ jɩmʋ́l nɩɛ duó duówa há lá tíé ná, ʋ ɔ́wɔ́ liwe ní ɛ́.