Manase jɩmʋ́l tíé ɓaalɛ wɩ́ɛ́
17
1 Tíé ɓaalɛ ná, Zɔzɛfɛ bihɔ̃́ Manase jɩmʋ́l nɩɛ há lɛ́ɛ́ nɛ́ nyɛ; Manase má bihɔ̃́ nɛ́ ká Makiri. Makiri má bio ní ká Galaadɛ. Ʋ nɛ́ lá Galaadɛ arɩ́ Basaŋ. Bee wɩ́ɛ́ Makiri ná fa ká lalyóóríbɩbár rɛ́. 2 Manase bɛlɛ náŋa má duó duówa fa kéŋ ɓaalɛ. Ɓa nɛ́ ká: Abɩɛzɛrɛ bɛlɛ, rɩ́ Hɩlɛkɛ bɛlɛ, rɩ́ Asɩrɩyɛl bɛlɛ, rɩ́ Sɛkɛmɛ bɛlɛ, rɩ́ Hɩfɛrɛ bɛlɛ, arɩ́ Semida bɛlɛ. Zɔzɛfɛ bio Manase duo nɩɛ ná há ká heŋbólli ní ɛ́. 3 Selofadi ká Hɩfɛrɛ bio ní, ká a Galaadɛ níhĩ́; Galaadɛ má tɩɩ áná nɛ́ ká Makiri, ká a Manase níhĩ́; Selofadi sɩɛ́ fa wɩ heŋbólli lʋ́lɛ́, tolé dʋŋɔ nʋ́ʋ́ ka. Ɓa yɩra nɛ́ ká: Mala rɩ́ Nua rɩ́ Hogila rɩ́ Milka arɩ́ Tirisa. 4 Tolé nyáŋ nɛ́ ísé, a ko Wɩɩsɛ vʋk'ɔɔsɔ Ɩlɩazaarɛ rɩ́ Nuŋ bio Zozie arɩ́ Ɩzɩrayɛl sɩdííre dɩhɩ̃́, a bʋlɛ́: «Nyuutɩna Wɩɩsɛ fa bʋ́lɔ́ pá Moyizi, rʋ́ʋ́ párá má liwe, á nánʋɔlɔwa tíé sɩɛrʋ.» Ɛ́ nɛ́ ɓa cónníwó nánʋɔlɔwa tíé, a pɔ́wɔ́ anɛ ɛ́ Nyuutɩna Wɩɩsɛ fa há máŋsɛ́. 5 Ɛ́ nɛ́ tɛ ɓa yo bíé, Manase la tíé ɓaalɛ fí, a súúri Galaadɛ arɩ́ Basaŋ há mɩŋ Zʋrdɛŋ fuo wɩɩsɛ dɩpomí caasɛ́. 6 Bee wɩ́ɛ́ Manase tolé lá tíé liwe, anɛ báála há lá ɛ́ nɛ́. Manase duo nɩkáánɛ ná nɛ́ tɛ Galaadɛ tíé. 7 Manase tíé bʋɔ pɔ́ Asɛrɛ mɛ́ nɛ́, ká mʋ́ peri Mɩkɩmɩtatɛ há cáásɛ́ Sɩsɛɛmɛ. Ʋ bʋɔ há pɛ́ Yamɩŋ mɛ́, a mʋ́ ka Ɛŋtapʋa tíé a súúri. 8 Sɩ́sɛ́nyɛ, Manase nɛ́ tɛ Tapʋa dɩtɩ́llɛ, amá Tapʋa tɔ́ɔ́ tɩɩ é há mɩŋ Manase tíé bʋɔ mɛ́, Efirayiŋ bɛlɛ nɛ́ tʋ́ʋ̃́. 9 Bʋɔ ná cɛ́ ɛ́ nɛ́, a mʋ́ lɛ Kanaa fonaa wɩɩsɛ dɩpomí néduu. Ɩfɩrayɩŋ tɔ́nɛ fa kúósí Manase tɔ́nɛ sɩɛrʋ, amá Manase tíé bʋɔ nɛ́ pɛ́ fonaa ná wɩɩsɛ dɩpomí nagʋ́ɔ́ ɛ́, a mʋ́ kéri Mediterane mʋʋ mɛ́. 10 Wɩpomí néduu tíé ná fá ká Ɩfɩrayɩŋ ker ní, ká wɩɩsɛ dɩpomí nágʋɔ tíé má a Manase ker. Manase tíé mʋ́ɔ́ bil mʋʋ ná mɛ́ nɛ́; ɓa bʋɔ nɛ́ ká mʋʋ ná, ká Asɛrɛ mɩŋ wɩɩsɛ dɩpomí nágʋɔ, ká Ɩsakarɛ má mɩŋ wɩɩsɛ dɩpomí. 11 Ɩsakarɛ arɩ́ Asɛrɛ tíé mí, Manase ní ha tɛ Bɛtɩsɩaŋ, Yibileyaŋ arɩ́ tɔ́nɛ ná há kílwó, arɩ́ nɩɛ ná wuu há mɩŋ Dɔɔrɛ mɛ́, Ɛŋdɔrɛ mɛ́, Tanakɛ mɛ́, Megido arɩ́ tɔnɛ́ ná wuu há kílwó, Dɔɔrɛ dɩtɩ́llɛ. 12 Manase duo nɩɛ ná fá wɩ wóllé kiri nɩɛ ná fá ha ké ɛ́ tɔnɛ́ mɛ́, ká Kananɩɛŋwa há ké ráŋ. 13 Rɩ Ɩzɩrayɛl nɩɛ dóé kúó duki Kananɩɛŋwa, ɓa fɩ́kwɔ́ ɓa tʋŋ aá pɔ́wɔ́, amá ɓa wɩ wóllé kírwó ɓa lɛ tɔnɛ́ ná mɛ́.14 Zɔzɛfɛ duo nɩɛ kúó bɔsɛ Zozie a bʋlɛ́: «Beé rí tɛ, ɩ pi tíé ker balá dʋŋɔ nɛ́ a párá, rʋ́ʋ́ árá liwe, ká Nyuutɩna Wɩɩsɛ hé barka párá wérí, á pul?» 15 Ɛ́ nɛ́ Zozie sɛ́: «Rɩɩ́wa nɩɛ nɛ́ púlé, rɩ Ɩfɩrayɩŋ tíé pallɛ ná há kílíwa, nɛ́ múúré a pɛ́ɩ́wa, ɩ́ isi a mʋ́ ɓʋ́ kʋkɔrɔ tíé, a yoo kiri Perizitiwa arɩ́ Rifayitiwa ná há ké ráŋ, ká coki tíé a súúríwa ker mí.» 16 Ɛ́ nɛ́ Zɔzɛfɛ duo nɩɛ ná má sɛ́: «Ʋ ká taŋá, Ɩfɩrayɩŋ pallɛ ná wɩ́rá péré, ká Kananɩɛŋwa ná wuu há mɩŋ típaŋtaŋɩ́ ná mɛ́, ɓa kéŋ zɔ́nɛ hɔɔtórkowa nɛ́. Ɓa rɩ́ nɩɛ ná há mɩŋ Bɛtɩsɩaŋ mɛ́, arɩ́ tɔnɛ́ ná wuu há kílwó, arɩ́ nɩɛ ná há mɩŋ Zizireyel polo ná mɛ́ wuu.» 17 Zozie má baa bʋl pá Zɔzɛfɛ duo nɩɛ: Efirayiŋ rɩ́ Manase, a bʋlɛ́: «Ɩ́ ɓɩɛ́na púló wérí, a ka dóé má kɩ́ŋkáŋ. Ɩ́ wɩ ɓaalɛ balá wuó la. 18 Ɩ́ ɓʋ́ kʋkɔrɔ tíé ná há mɩŋ pallɛ daha, a yoo lɔ́ʋ́ wuu, a tɩ́llʋ́. Kananɩɛŋwa mɩ́lɔ́ ka zɔ́nɛ hɔɔtórkowa a ka dóé má yɔ́ɔ́ rɛ́, ɩ́ sɩ́ wólli kírwó, rɩ́wɔ́ lɛ ráŋ.»