Ɓaalɛ ná Efirayiŋ arɩ́ Manase há lɛ́ɛ́
16
1 Tíé ná ɓa há yó bíé a pii pá Zɔzɛfɛ bɛlɛ, nɛ́ pɔ́ Zʋrdɛŋ fuo ná há mɩŋ Zeriko laka, a ka ɛ́ mʋ́ Zeriko wɩɩsɛ dɩpomí, a caasɛ nyibulé ná, a pɛ́ ɛ́ zɩ́ tɩŋ gɩrbétéke ná, a mʋ́ peri Bɩtɛl paalɔ. 2 Ʋ pɔ́ Bɩtɛl mɛ́, a mʋ́ Luuzi, a caŋ a mʋ́ Atarɔtɛ, a daarɛ mʋ́ Arkitiwa dɩmɩnɩ́ bʋɔ, 3 a bɩrɛ tuwi wɩɩsɛ dɩzʋʋlɩ́, Yafiletitiwa dɩhɩ̃́, a ka ɛ́ mʋ́ mʋ́l rɩ́ Bɛtɩhɔrɔŋ polnaa, a pɛ́ ɛ́ a mʋ́ tɩŋ Gɛzɛrɛ, a mʋ́ kéri Mediterane mʋʋ mɛ́. 4 Zɔzɛfɛ duo nɩɛ Manase arɩ́ Efirayiŋ há lá tíé ná, ʋ ɔ́wɔ́ liwe ní ɛ́. 5 Efirayiŋ bɛlɛ, duó duówa há lá tíé ná nɛ́ nyɛ; ɓa bʋɔ nɛ́ cɛ́ Atarɔtɛ'adarɛ há mɩŋ wɩɩsɛ dɩpomí caasɛ́, a kaa zɛ́ nyúú rí Bɛtɩhɔrɔŋ, 6 a pɛ́ ɛ́ a mʋ́ peri Mediterane mʋʋ; a pɔ́ Mɩkɩmɩtatɛ há mɩŋ wɩɩsɛ dɩpomí nágʋɔ caasɛ́, a kíl mʋ́ Mɩkɩmɩtatɛ wɩɩsɛ dɩpomí caasɛ́, a mʋ́ tɩŋ Tanatisilo, a pɛ́ mʋ́ Yanʋɔ wɩɩsɛ dɩpomí caasɛ́. 7 A lɛ Yanʋɔ mɛ́, a tuwi Atarɔtɛ arɩ́ Naarata, a mʋ́ yakɛ Zeriko mí, a tɩŋ ɛ́ a lɩɩ mʋ́ kéri Zʋrdɛŋ mí. 8 Bʋɔ ná baa pɔ́ Tapʋa mɛ́, a mʋ́ tɩŋ Kanaa fonaa wɩɩsɛ dɩzʋʋlɩ́, a lɛ ráŋ a mʋ́ kéri Mediterane mʋʋ mɛ́. Ɩfɩrayɩŋ jɩmʋ́l tíé bʋɔ nɛ́ ɛ́, ɓa há pɔ́wɔ́, a tɩŋ duó duówa, ʋ ɔ́wɔ́ liwe; 9 a sɩɛ́ súúri tɔ́zeŋsi ná arɩ́ tɔ́wɩɛla ná ɓa há lɩ́sɛ́ Manase tíé mí, a pá Ɩfɩrayɩŋ bɛlɛ. 10 Ɓa wɩ Kananɩɛŋwa ná há mɩŋ Gɛzɛrɛ mɛ́ kíré, arɩ́ zaa wuu Kananɩɛŋwa ha mɩŋ Ɩfɩrayɩŋ nɩɛ sɩɛrʋ. Amá ɓa fɩ́kɩ́wɔ́ mɛ́, ɓa tʋ́tʋŋ anɛ yósi.