Ɓa ɓá Zʋrdɛŋ fuo wɩzʋʋlɔ́ caasɛ́ tíé
14
1 Kanaŋ tíé mí, dɩhɛ̄́ nyáŋ nɛ́ ɓa kaa ɓa, a pá Ɩzɩrayɛl nɩɛ, ɓa ɔ́wɔ́ liwe. Vʋk'ɔɔsɔ Ɩlɩazaarɛ, rɩ́ Nuŋ bio Zozie arɩ́ Ɩzɩrayɛl jɩmʋ́ʋ́la ná jɩɩsɛ sɩ́dííre ní kené ɓa, a pɔ́wɔ́. 2 Anɛ ɛ́ Nyuutɩna Wɩɩsɛ fa há bʋlɛ́ pá Moyizi, ɓa yó bíé ní, a ka tíé ná a ɓaa pá Ɩzɩrayɛl jɩmʋ́ʋ́la nɛ́mɛ́ arɩ́ fá ná. 3 Moyizi fa lá sɩ́ɛ́ a ka Zʋrdɛŋ fuo wɩɩsɛ dɩpomí caasɛ́ tíé ná, a ɓaa pá jɩmʋ́ʋ́la ná bɛllɛ arɩ́ fá. Amá ʋ wɩ tíé ɓɛ́ɛ́ a pá Levitiwa ná há mɩ́ŋwɔ́ sɩɛrʋ. 4 Zɔzɛfɛ bɛlɛ ká jɩmʋ́ʋ́la bɛllɛ nɛ́; ɓa nɛ́ ká Manase arɩ́ Efirayiŋ. Ɓa wɩ Levitiwa tíé wuu pɛ́ɛ́, rɩ tɔ́nɛ ná ɓa há sɩ́ zʋ́zʋ rɩ́wɔ́ kílo dʋŋɔ raá, Moyizi há píé pɔ́wɔ́, ɓa pʋsɛ díí rɩ́wɔ́ cɩksɛ wɩ́ɛ́. 5 Ɩzɩrayɛl nɩɛ ɓá tíé ná, anɛ ɛ́ Nyuutɩna Wɩɩsɛ há mákɛ́ pá Moyizi. 6 Tápʋl oro, Ziida duo nɩɛ náŋa ísó a ko Zozie rí Gɩlgal mɛ́. Yefune bio Kalɛbɛ há ká Keniziti, ʋ bʋl Zozie rí a bʋlɛ́: «Ɩ líísí wɩ́ɩ́ ná wɩ́ɛ́ Nyuutɩna Wɩɩsɛ fa há bʋ́lɛ́ a pá Moyizi, Wɩɩsɛ báálɔ, a mʋ́ tɩ́ɩ́nɩ́ŋ rɩ́rɩ́ mɛ́, Kɛdɛsɩbarnɩa mɛ́ rɛ́? 7 Ŋ fa kéŋ bɩŋsɛ mɛɛ́sɛllɛ nɛ́, ká Nyuutɩna Wɩɩsɛ tʋtʋnnɔ Moyizi tʋ́mɩ́ŋ, ŋ lɛ Kɛdɛsɩbarnɩa mɛ́, a mʋ́ kɩ́ɛ́lɛ tɔ́ɔ́ ná. Ŋ bɩ́rɔ́ ko bʋ́lɩ́ŋ sɩɛrʋ taŋá nɛ́, a pɔ́ʋ́. 8 Káŋ rɩ́rɩ́ŋ maábináŋa ná há mʋ́ɛ́, ɓa bɩrɛ a pi héwíŋ ní, a hé nɩɛ ná mɛ́. Ŋ é tɩ́ŋ Nyuutɩna Wɩɩsɛ, ŋ Wɩɩsɛ arɩ́ sapʋmmɩ́ nɛ́. 9 Ɛ́ nɛ́ Moyizi tá nʋɔ ɛ́ tápʋl a bʋlɛ́: ‹Tíé ná ɩ há píí naa a nʋɔsɛ, ʋ sɩ́ ɛ́ɛ́ rɩ́rɩ́ɩ́ bɛlɛ liwe, a kaá mʋ́ wuu. Bee wɩ́ɛ́, ɩ tɩ́ŋ Nyuutɩna Wɩɩsɛ, ŋ Wɩɩsɛ arɩ́ sapʋmmɩ́ nɛ́.› 10 Nyuutɩna Wɩɩsɛ há bʋ́l ɛ́ a pá Moyizi, a pɔ́ ɛ́ mɛ́ ká kaa ko mɔ nyɛ mɛ́, ʋ bɩŋsɛ mɛɛ́sɛllɛ arɩ́ bɔmmʋ́ɔ́ nɛ́, Nyuutɩna Wɩɩsɛ há lóé ŋ ka mɩɩsɛ, rɩ Ɩzɩrayɛl nɩɛ haá baarɛ gɩrbétéke sɩɛrʋ. Zaa, ŋ bɩŋsɛ mɛɛ́sɩbaná arɩ́ bɔmmʋ́ɔ́ nɛ́ nyɛ. 11 Ká ŋ ha kéŋ dóé, anɛ tɛ́ŋ ná mɛ́ Moyizi há tʋ́mɩ́ŋ; ŋ ha duokí, anɩ́ŋ tésíé mí; ŋ ha wúóló a mʋ́ lal ká bɩrɛ aá ko. 12 Zaá pi pallɛ há kíl dɩhɩ̃́ né a páŋ, anɛ Nyuutɩna Wɩɩsɛ fa há bʋ́l ɛ́ a páŋ. Ɩ má tɩɩ nɩ́ɔ́ rɩ́ Anakitiwa ná há mɩŋ ráŋ dúókó, a sɔ zeŋe a kɛ́rwɔ́ tɔ́nɛ. Rɩ Nyuutɩna Wɩɩsɛ nɛ́ mɩ́nɩ́ŋ har, ŋ sɩ́ yo a kírwó, anʋ́ há bʋ́l ɛ́.»13 Ɛ́ nɛ́ Zozie sʋl Wɩɩsɛ a pá Yefune bio Kalɛbɛ, ká pi Ɩbɩrɔŋ a pɔ́ʋ́, ʋ ɔ́ʋ́ liwe. 14 Ɩbɩrɔŋ ká Yefune há ká Keniziti bio Kalɛbɛ liwe ní, arɩ́ zaa wuu; bee wɩ́ɛ́ ʋ tɩ́ŋ Nyuutɩna Wɩɩsɛ, Ɩzɩrayɛl nɩɛ Wɩɩsɛ arɩ́ sapʋmmɩ́. 15 Ɩbɩrɔŋ yɩr nɛ́ fa ká Kɩrɩyatɛ'arba, Anakitiwa nɩduo oro yɩr rɛ́ fa ká Arba, ɓa pii hé pɔ́ʋ́. Ʋ ɛ́ har mɛ́ nɛ́, tɔ́ɔ́ ná nɩɛ sɩɛ́ fɩɛlɛ lal yóé mí.