Tíé ná ha há mɔhɛ̄́ rɩ́wɔ́ la wɩ́ɛ́
13
1 Zozie fa hɩ́ɛ̄́sɔ́ a nɩɩnɛ wérí, ká Nyuutɩna Wɩɩsɛ bʋl pɔ́ʋ́ a bʋlɛ́: «Ɩ hɩ́ɛ̄́sɔ́ rɛ́, a nɩɩnɛ wérí, amá tíé ha zénó, a mɔ rɩ́ɩ́ yoo la. 2 Tíé ná ha há káánɛ́ nɛ́ nyɛ: Filisiti nɩɛ arɩ́ Gesuritiwa tíé wuu, 3 a pɔ́ Sɩɩhɔrɛ fuo ná há mɩŋ Ezipiti tíé bʋɔ mɛ́, a ka ɛ́ a mʋ́ Ɛkɩrɔŋ tíé wɩɩsɛ dɩpomí nágʋɔ, dɩhɩ̃́ ná wuu há ká Kananɩɛŋwa tíé, a ka ɛ́ mʋ́ Filisiti nɩɛ kuóre ná bɔmmʋ́ɔ́ háá bel tɔ́nɛ ná, ɓa háá yɩ́rɛ Gaza, Asɩdɔdɛ, Asɩkɩlɔŋ, Gatɛ arɩ́ Ɛkɩrɔŋ, a súúri Avitiwa mɛ́, 4 há mɩŋ wɩpomí néduu; a baa pi Kanaŋ tíé wuu, a kaa mʋ́ Mehara há mɩŋ Sɩdɔŋ tíé, a pɛ́ ɛ́ a mʋ́ Afeka há mɩŋ Amoritiwa tíé bʋɔ, 5 a pi Gebalitiwa tíé arɩ́ Libaŋ há mɩŋ wɩɩsɛ dɩpomí wuu, a pɔ́ Balgadɛ há mɩŋ Hɛrmɔŋ paalɔ ná wɩɩsɛ dɩpomí néduu, a mʋ́ a peri Lebohamatɛ. 6 «Nɩɛ ná wuu há ké paalɔ nyúú, a pɔ́ Libaŋ mɛ́, a mʋ́ pi Misirefotemayimi tíé wuu a súúri; ɓa nɛ́, ŋ é Nyuutɩna Wɩɩsɛ sɩ́ kiri Ɩzɩrayɛl nɩɛ sɩ́ɛ́. Tíé né ní, ɩ sɩ́ tɩŋ bíé yoe mí, a kaa ɓa Ɩzɩrayɛl nɩɛ, anɛ ɛ́ ŋ há mákɩ́, rʋ́ʋ́ ɔ́wɔ́ liwe. 7 Kánʋ́ a ɓaa pá Ɩzɩrayɛl jɩmʋ́ʋ́la káánɛ ná nɛ́mɛ́, arɩ́ Manase jɩmʋ́l fá ná, rʋ́ʋ́ ɔ́wɔ́ tɩ́llɛ.»Ɓa ɓá Zʋrdɛŋ fuo wɩɩsɛ dɩpomí caasɛ́ tíé
8 Rubaŋ jɩmʋ́l nɩɛ rɩ́ Gadɛ jɩmʋ́l nɩɛ arɩ́ Manase jɩmʋ́l nɩɛ fá ná, Nyuutɩna Wɩɩsɛ tʋtʋnnɔ Moyizi, fa lá sɩ́ɛ́ pi Zʋrdɛŋ fuo wɩɩsɛ dɩpomí caasɛ́ tíé ná nɛ́, a pɔ́wɔ́, ʋ ɔ́wɔ́ liwe. 9 Ɓa tíé bʋɔ nɛ́ pɔ́ Aroyɛɛr há mɩŋ Arnɔŋ fonaa ná nʋɔ, a tɩŋ tɔ́ɔ́ ná ɓa háá yɩ́rɛ Dɩbɔŋ há mɩŋ polo ná sɩ́sɩ́ɛ́nʋ́wa, a pi Madɩba tíé wuu a mʋ́ peri Dɩbɔŋ, 10 arɩ́ tɔ́nɛ ná wuu Amɔrɩɛŋwa kuóro Sɩhɔŋ há mɩŋ Hɛsɩbɔŋ mɛ́ ká bíbel, a ka ɛ́ kaa mʋ́ʋ́ rɩ́ Amonitiwa bʋɔ, 11 a baa pɔ́ Galaadɛ mɛ́, a kaa mʋ́ peri Gesuuri arɩ́ Maaka tíé, a pi paalɔ ná ɓa háá yɩ́rɛ Hɛrmɔŋ wuu arɩ́ Basaŋ wuu, a ka ɛ́ a mʋ́ peri Salɩka; 12 a ka Basaŋ kuóro Ɔgɛ, há ká Rifayitiwa nɩkáánɛ ná fa há ké Asɩtarɔtɛ arɩ́ Edireyi mí, ká bíbel tíé ná wuu súúri. Moyizi nɛ́ fa yóé dí nɩɛ nyáŋ, ká lɔ́wɔ́ tíé. 13 Ɩzɩrayɛl nɩɛ fa wɩ Gesuritiwa arɩ́ Maakatitiwa é kíré, arɩ́ zaa wuu ɓa é ha mɩŋ Ɩzɩrayɛl nɩɛ sɩɛrʋ.
14 Moyizi fa wɩ tíé ɓɛ́ɛ́ pá Levi jɩmʋ́l é, bee wɩ́ɛ́ ɓa nɛ́ ɔ́sɛ́ vʋka a físi níŋ mí, aá pá Nyuutɩna Wɩɩsɛ há ká Ɩzɩrayɛl nɩɛ Wɩɩsɛ, ʋ nɛ́ kɔ́wɔ́ liwe, anɛ ɛ́ Nyuutɩna Wɩɩsɛ há bʋ́lɛ́ pɔ́wɔ́. 15 Tíé ná Moyizi há píé pá Rubaŋ duo nɩɛ, duó duówa, ʋ ɔ́wɔ́ ker ní nyɛ: 16 Ɓa tíé bʋɔ nɛ́ pɔ́ Aroyɛɛr há mɩŋ Arnɔŋ fonaa ná nʋɔ, a baa tɩŋ tɔ́ɔ́ ná há mɩŋ fonaa ná sɩ́sɩ́ɛ́nʋ́ arɩ́ típaŋtaŋɩ́ ná wuu, a kaa mʋ́ Madɩba, 17 a tɩŋ ɛ́ mʋ́ Hɛsɩbɔŋ tɔ́nɛ ná wuu há mɩŋ dɩpaŋtaŋɩ́ mɛ́: Dɩbɔŋ rɩ́ Bamɔtɩbaal rɩ́ Bɛtɩbaalmɩɔŋ, 18 rɩ́ Yatɩsa rɩ́ Kɛdɛmɔtɛ rɩ́ Mɛfaatɛ, 19 rɩ́ Kiriyatayimi rɩ́ Sɩbɩma rɩ́ Sɛrɛtɛsaharɛ há cɛ́ dúŋdúóme ná há mɩŋ polo ná mɛ́, 20 rɩ́ Bɛtɩpɔɔrɛ, arɩ́ Pɩsɩga paalɔ curtuwé, arɩ́ Bɛtɩyɛsɩmɔtɛ; 21 tɔ́nɛ ná wuu há mɩŋ tíé dɩpaŋtaŋɩ́ mɛ́, arɩ́ Amɔrɩɛŋwa kuóro Sɩhɔŋ há ké Hɛsɩbɔŋ mɛ́, ká bíbel tíé ná wuu. Moyizi ní fa yóé dí Sɩhɔŋ rɩ́ Madɩaŋ sɩ́dííre nyáŋ wuu: Evi, Rɩkɛŋ, Suuri, Huuri arɩ́ Reba, ɓa wuu fa ké kuóro Sɩhɔŋ tíé ná mɛ́ nɛ́, a mɩ́nʋ́ nɛ́sɛ mɛ́. 22 Ɓa ɛ́ nɩɛ Ɩzɩrayɛl nɩɛ há ɓʋ́ʋ́sɛ lal ná mɛ́, nɔ́ŋɔ nɛ́ ká Bɩɔrɛ bio Balaamɛ, ʋ nɛ́ faá vʋrɛ́ ɛ́. 23 Rubaŋ bɛlɛ tíé bʋɔ nɛ́ ká Zʋrdɛŋ fuo nʋɔ wɩzʋʋlɔ́ rɩ́; tɔ́zeŋsi arɩ́ tɔ́wiisi nyáŋ wuu ní, ɓa pii pá Rubaŋ duo nɩɛ, a tɩŋ jaá jaáwa, ʋ ɔ́wɔ́ liwe.
24 Tíé ná cɔɔ nɔ́ŋɔ, Moyizi há píé pá Gaadɛ jɩmʋ́l duo nɩɛ, ʋ ɔ́wɔ́ ker ní nyɛ: 25 Yazɛrɛ dɩtɩ́llɛ, tɔnɛ́ ná wuu há mɩŋ Galadɛ mɛ́, arɩ́ Amonitiwa tɔ́ɔ́ fá, a kaa mʋ́ lɛ Aroyɛɛr há mɩŋ Raba sɩ́ɛ́, 26 a cɛ́ Hɛsɩbɔŋ mɛ́, a kaa mʋ́ Ramatɛmisipa, arɩ́ Betoniŋ, a baa cɛ́ Mahanayimi mí a kaa mʋ́ Debiiri tíé, 27 a zʋ́ Zʋrdɛŋ polo, a ka Bɛtɩharaŋ rɩ́ Bɛtɩnɩmɩra rɩ́ Sʋkɔtɛ arɩ́ Safɔŋ, há ká Hɛsɩbɔŋ kuóro Sɩhɔŋ tíkáánɛ, a súúri Zʋrdɛŋ fuo ná wɩɩsɛ dɩpomí, a kaa mʋ́ yakɛ Kɩnɩrɛtɛ mʋʋ ná mɛ́. 28 Tɔ́zeŋsi ná rɩ́ tɔ́wiisi nyáŋ wuu ní, ɓa pii pá Gaadɛ jɩmʋ́l duo nɩɛ, ɓa ɔ́wɔ́ liwe.
29 Tíé ná cɔɔ nɔ́ŋɔ Moyizi fa há píé pá Manase jɩmʋ́l duo nɩɛ fá ná, ʋ ɔ́wɔ́ ker ní nyɛ: 30 ɓa tíé bʋɔ pɔ́ Mahanayimi mí, a ka Basaŋ wuu a súúri, Basaŋ kuóro Ɔgɛ há tɛ tíé ná wuu, arɩ́ káŋpámáwa ná wuu há ké Yayiiri há mɩŋ Basaŋ mɛ́, tɔnɛ́ mɛɛ́sɩbotoro; 31 a ka Galaadɛ fá ná, arɩ́ Asɩtarɔtɛ arɩ́ Edireyi, há ká kuóro Ɔgɛ tíé tɔ́zeno Basaŋ mɛ́. Dɩhɩ̃́ ná ɓa há píé pá Manase bio Maaka bɛlɛ fá, duó duówa nɛ́ ɛ́.