Ɩzɩrayɛl nɩɛ yóó dí wɩɩsɛ dɩpomí nágʋ́ɔ́ kuóre
11
1 Hasɔɔrɛ kuóro Yabiŋ, há nɩ́ɛ́ rɩ Ɩzɩrayɛl nɩɛ yóó dídí ɛ́, ʋ tʋ́mɔ́ pá Madoŋ kuóro Yobabɛ, a tʋŋ pá Simiroŋ arɩ́ Akɩsafɛ kuóre, 2 arɩ́ kuóre ná wuu há mɩŋ wɩɩsɛ dɩpomí nágʋɔ tɔ́nɛ ná mɛ́, pallɛ há kílé, a mɩŋ Araba Kɩnɔrɔtɛ wɩɩsɛ dɩpomí néduu, arɩ́ Sefeela mɛ́ arɩ́ Dɔrɛ wɩɩsɛ dɩzʋʋlɩ́ tɔ́nɛ ná; 3 a bʋl pá Kananɩɛŋwa há mɩŋ wɩɩsɛ dɩpomí arɩ́ wɩɩsɛ dɩzʋʋlɩ́ arɩ́ Amoritiwa, Hititiwa, Perezitiwa arɩ́ Yebusitiwa há mɩŋ dɩhɩ̃́ ná pallɛ há kílé, arɩ́ Hivitiwa ná há lɛ́l Hɛrmɔŋ paalɔ, a mɩŋ Misipa tíé mí. 4 Ɓa wuu lɛ arɩ́wɔ́ lalyoore wuu, arɩ́ zɔ́nɛ rɩ́wɔ́ tórkowa ɓɩkana; ɓa lalyoore fa káŋ, anɛ fuo nʋɔ hɩɛla. 5 Kuóre nyáŋ wuu kúó hé náŋá mɛ́, a ŋmɔwɛ buk Meromi nyibulé ná dɩhɩ̃́, rɩ́wɔ́ yo Ɩzɩrayɛl nɩɛ. 6 Ɛ́ nɛ́ Nyuutɩna Wɩɩsɛ bʋl Zozie rɩ́ a bʋlɛ́: «Sɩ́ ló rɩ́ nɩɛ nyáŋ héwíŋ kánɩ́, bee wɩ́ɛ́ cíé tɛ́ŋ né mí, ŋ sɩ́ kɛ́sɩ́wɔ́ hé Ɩzɩrayɛl nɩɛ nɛ́sɛ mɛ́, rɩ́wɔ́ ɓʋ́ʋ́sɩ́wɔ́. Ɩ sɩ́ cónníwó zɔ́nɛ nagáŋpole, a gbɛ́rkɩ́wɔ́, ká nyɩ́kwɔ́ zɔ́nɛ tórkowa.» 7 Ɛ́ nɛ́ Zozie rɩ́rʋ́ lalyoore giŋ, a mʋ́ úríwó mí, a yówó Meromi nyibulé ná dɩhɩ̄́. 8 Nyuutɩna Wɩɩsɛ kɛ́sɩ́wɔ́ a hé Ɩzɩrayɛl nɩɛ nɛ́sɛ mɛ́. Ɓa kiri ɓʋ́ʋ́sɩ́wɔ́ ɛ́, a mʋ́ peri tɔ́zeno ná ɓa háá yɩ́rɛ Sɩdɔŋ, a mʋ́ Mɩsɩrɔfɔtɩmayimi, a tɩŋ ɛ́ mʋ́ Misipa polo ná há mɩŋ wɩɩsɛ dɩpomí, a ɓʋ́ʋ́sɩ́wɔ́ wuu, nɛ́ŋ balá má wɩ káánɛ́. 9 Zozie ɔ́wɔ́ ɛ́ ná Nyuutɩna Wɩɩsɛ há mákʋ́ nɛ́. Ʋ cónníwó zɔ́nɛ nagáŋpole, ká nyɩ́kwɔ́ zɔ́nɛ tórkowa má.Zozie yóó dí Hasɔɔrɛ
10 Zozie bɩrɛ mʋ́l ná tɩɩ tɩɩ mɛ́, a mʋ́ Hasɔɔrɛ a yoo dúú rɩ́rʋ́ kuóro wuu a ɓʋ́ʋ́. Ɛ́ tɛ́ŋ mɛ́ Hasɔɔrɛ nɛ́ fa ká tɔ́nɛ ná wuu sɩɛrʋ tɔ́zeno ɓa tɩ́tɩŋ. 11 Nɩɛ ná wuu há mɩŋ tɔ́ɔ́ ná mɛ́, ɓa wuu ní ɓa ɓʋ́, a zɔ́kwɔ́ wuu. Ɓa oro wuu wɩ káánɛ́, ká nyɩkɛ Hasɔɔrɛ wuu. 12 Zozie yóó dí tɔ́zeŋsi nyáŋ wuu, rɩ́wɔ́ kuóre wuu ní, a ɓʋ́ʋ́sɩ́wɔ́ wuu, a zɔ́kwɔ́ wuu anɛ ɛ́ Nyuutɩna Wɩɩsɛ tʋtʋnnɔ Moyizi fa há mákɛ́. 13 Tɔ́nɛ ná ɓa há sɔ́ɛ́ dúŋdúóme nyúú, Ɩzɩrayɛl nɩɛ wʋ́ɔ́ é nyɩ́kɛ́, Hasɔrɛ dʋŋɔ nɛ́ Zozie nyɩkɛ. 14 Onni ná wuu há mɩŋ tɔ́nɛ nyáŋ mɛ́ nɛ́, Ɩzɩrayɛl nɩɛ pa, a kɛ́sɩ́wɔ́ nɛsɛ súúri. Amá ɓa ɓʋ́ nɩɛ ná wuu há mɩŋ tɔ́nɛ ná mɛ́, ɓa wɩ lóé rɩ́ oŋhiēsí wuu káánɛ. 15 Nyuutɩna Wɩɩsɛ há mákɛ́ wɩ́ɛ́ ná pɔ́ʋ́ tʋtʋnnɔ Moyizi, ɓa tɩɩ nɛ́ Moyizi má makɛ pá Zozie, ʋ a. Wɩ́ɛ́ ná wuu, Nyuutɩna Wɩɩsɛ há mákɛ́ pá Moyizi, ɓa wuu ní Zozie a, ʋ wʋ́ɔ́ oro wuu cóké tá.
Zozie yó tɔ́káánɛ
16 Zozie yóó a la tíé né wuu ní, tɔnɛ́ ná pallɛ há kílé: Nɩgɛɛvɛ, rɩ́ Gosaŋ tíé wuu, rɩ́ Sefeela arɩ́ Araba, arɩ́ Ɩzɩrayɛl paalɔ arɩ́wɔ́ polnaasɛ wuu. 17 A pɔ́ paalɔ ná ɓa háá yɩ́rɛ Halakɛ, há mɩŋ Seyiri caasɛ́, a kaá mʋ́ Balgadɛ há mɩŋ Libaŋ polo há lɛ́l paalɔ ná, ɓa háá yɩ́rɛ Hɛrmɔŋ, dɩhɛ̄́ nyáŋ kuóre wuu ní, ʋ yoo kɛsɛ, a ɓʋ́ʋ́sɩ́wɔ́ wuu. 18 Zozie fa yó kuóre nyáŋ a dáánɛ wérí. 19 Hivitiwa ná há mɩŋ Gabaɔŋ mɛ́, ɓa dʋŋɔ nɛ́ lóé ɓa rɩ́ Ɩzɩrayɛl nɩɛ tʋŋ nʋɔ mɛ́. Tɔ́nɛ́ ná náŋa há káánɛ́, ɓa mʋ́ɔ́ yówó wuu ní, a díwó. 20 Nyuutɩna Wɩɩsɛ nɛ́ fa ɛ́ɛ́, tɔ́nɛ ná ka dɩlhɔɔ, a yúyo Ɩzɩrayɛl nɩɛ ɛ́, a makɛ rʋ́ʋ́ tɩŋ ɛ́ mɛ́, a caasɛ zɔ́kwɔ́, a ɓʋ́ʋ́sɩ́wɔ́ nɩɛ wuu, ká sɩ́wɔ́ susu fá, anɛ Nyuutɩna Wɩɩsɛ fa há mákɛ́ ɛ́ pá Moyizi. 21 Ɛ́ tɛ́ŋ mɛ́ nɛ́, Zozie bɩr mʋ́, a zɔkɛ Anakitiwa ná há mɩŋ tɔ́nɛ ná pallɛ há kílwó, a pɔ́ Ɩbɩrɔŋ mɛ́ rɩ́ Debiiri arɩ́ Anabɛ, a ka ɛ́ mʋ́ Ziida tíé, pallɛ há kíl tɔ́nɛ ná, arɩ́ Ɩzɩrayɛl tíé, pallɛ há kíl tɔ́nɛ ná. Zozie zɔ́kɛ́ ɛ́ dɩhɛ̃́ nɩɛ arɩ́wɔ́ tɔ́nɛ wuu. 22 Anakɛ duo nɛrɔ wuu báá fa to Ɩzɩrayɛl nɩɛ sɩɛrʋ. Gaza rɩ́ Gatɛ arɩ́ Asɩdɔdɛ dʋŋɔ mɛ́ nɛ́ ɓa mɩŋ. 23 Zozie lá tíé ná wuu ní, anɛ ɛ́ Nyuutɩna Wɩɩsɛ fa há mákɛ́ pá Moyizi. Zozie kaa ɓa a pá Ɩzɩrayɛl nɩɛ, a tɩŋ jɩmʋ́lwa mɛ́. Ɛ́ nɛ́ ká tíé ná nɩɛ sɩɛ́ hiēsi lal mɛ́.