Gabaonitiwa nyɩ́sɛ́ Zozie
9
1 Kuóre ná wuu há mɩŋ Zʋrdɛŋ fuo wɩzʋʋlɔ́ rɩ́, arɩ́ kuóre ná náŋá há mɩŋ pallɛ nyunni, rɩ́ polnaasɛ mɛ́ arɩ́ Mʋzeno ná nʋɔ, a ka ɛ́ mʋ́ peri Libaŋ, ɓa nɛ́ wɩ́ɩ́ ná há ɛ́ɛ́ wɩ́ɛ́. Ɛ́ nɛ́ Hititiwa, Amoritiwa, Kananɩɛŋwa, Perezitiwa, Hivitiwa arɩ́ Yebusitiwa kuóre, 2 ɓa wuu isi ko pɛ́ náŋá mɛ́, rɩ́wɔ́ yo Zozie arɩ́ Ɩzɩrayɛl nɩɛ.3 Gabaɔŋ nɩɛ há nɛ́ wɩ́ɩ́ ná Zozie há píé a Zeriko arɩ́ Ayi mí, 4 ɓa já lɩ́ŋ nɔ́ŋɔ, ɓa há sɩ́ tɩŋ a mʋ́ nyɩ́sʋ́. Ɓa ísó a kɛsɛ kokúsi a cɩ́ɩ́nɛ ɓɩdííle arɩ́ bɔ́tɔ́kɔŋsa arɩ́ dɩvɛ́ŋ pukɔŋsa, ɓa há nyɛ́rɛ́ nyɛ́rɛ́, a mʋ́ʋ́ rɩ́, 5 ká de su gɛkɔŋsa, a hé natɔɔkɔ́ŋsa ɓa há nyɛ́rɛ́ nyɛ́rɛ́. Dɩpɛ́ŋwa ná má ɓa há pɛ́ɛ́ wuu ní hɩ́lɛ́ ká nyʋ́ksɛ má. 6 Ɓa sɩɛ́ mʋ́ Zozie rí, ɓa púl mí Gɩlgal mɛ́, a bʋl pɔ́ʋ́ rɩ́ Ɩzɩrayɛl nɩɛ a bʋlɛ́: «Á lɛ́ dɩbólí rí a ko, áá já ráá rɩ́rɩ́wa bil nʋtʋmɛ nɛ́.» 7 Ɛ́ nɛ́ Ɩzɩrayɛl nɩɛ bʋl pá Hivitiwa: «Rɩɩ́ gbé, ɩ́ dɩkéni mɩ́ŋrá laka nɛ́. Ɛrɛ́ rɛ́ sɩɛ́, á rɩ́rɩ́wa sɩ́ wólli tʋŋ bil nʋtʋmɛ>>» 8 Ɛ́ nɛ́ nɩɛ ná bʋl Zozie rí bʋlɛ́: «Á kɛ́ɩ́ tʋtʋnna nɛ́.» Ɛ́ nɛ́ Zozie baa bɔ́sɩ́wɔ́ bʋlɛ́: «Áŋwa rɛ́ kɛ́ɩ́wa, nɛɛ́ rɛ́ ɩ́ lɛ>>» 9 Ɓa bʋl pɔ́ʋ́ a bʋlɛ́: «Ɩ tʋtʋnna lɛ́ dɩbólí rí, á nɛ́ Nyuutɩna Wɩɩsɛ, ɩ Wɩɩsɛ wɩ́ɛ́ nɛ́ a ko. Á nɛ́ wɩ́ɛ́ ná wuu, ʋ há ɛ́ɛ́ Ezipiti mí, 10 arɩ́ wɩ́ɛ́ ná wuu ʋ há ɛ́ɛ́, Amoritiwa kuóre ná bɛllɛ há mɩŋ Zʋrdɛŋ fuo wɩɩsɛ dɩpomí rɩ́, Hɛsɩbɔŋ kuóro Sɩhɔŋ arɩ́ Basaŋ tíé kuóro Ɔgɛ, nɛrɔ ná háá bel Asɩtarɔtɛ mɛ́. 11 Á nɩhɩɛ̄́sɛ arɩ́ nɩɛ ná wuu há mɩ́ŋrá tɔ́ɔ́ mɛ́ nɛ́ sɛ́ ráá la ɓɩdííle, a kaa va ŋmɛ́nɔ a kóíwa rɩ́, a bʋl pɛ́ɩ́wa, ráá kɛ́ɩ́wa tʋtʋnna nɛ́, ɩ́ lo ráá rɩ́rɩ́wa bil nʋtʋmɛ.» 12 Tápʋl ná á há ísé párá ɓɩɛ ráá kóíwa rɩ́, á dɩpɛ́ŋwa nyáŋ fa ha lʋ́ŋ, amá ɩ́ bel ná mʋ́l né mí, ɓa wuu ní hɩ́lɛ́ a nyʋ́ksɛ. 13 Tɛ́ŋ ná mɛ́, á há hé dɩvɛ́ŋ pure nyáŋ mɛ́, ɓa wuu fa ká ɓɩfɛ́lɛ́ rɛ́, amá ɩ́ bel ná mʋ́l né mí, ɓa wuu ní lúnné. Á gɛnnɛ arɩ́rá natɔɔsɛ má wuu ní kɔ́sɛ́, a tɩŋ ŋmɛ́ŋbolo ná á há válɛ́ wɩ́ɛ́.» 14 Ɛ́ nɛ́ Ɩzɩrayɛl nɩɛ wɩ Nyuutɩna Wɩɩsɛ bɔ́sɛ́, ká la nɩɛ ná ɓɩdííle. 15 Ʋ ɛ́ har mɛ́, Zozie rɩ́ Gabaɔŋ nɩɛ bíl tɛŋfɩ́ɛ́l nʋtʋmɛ, a pá náŋá, ɓa tɩŋ ɛ́ mɛ́ a ná waana. Ɩzɩrayɛl nɩhɩɛ̄́sɛ má tá nʋɔ pá nɩɛ ná, rɩ́ ɓa wʋ́ɔ́ wɩ́bɔ́ŋ wuú a.
16 Ɓa rɩ́ Gabaɔŋ nɩɛ ná há bíl nʋtʋmɛ ná pá náŋá ɛ́, ʋ tápʋlɛ botoro kal nɛ́ Ɩzɩrayɛl nɩɛ nɛ, rɩ nɩɛ ná kɔ́wɔ́ kénnináŋa nɛ́ a mɩ́ŋwɔ́ sɩɛrʋ. 17 Ɩzɩrayɛl nɩɛ vá tápʋlɛ botoro ní ká mʋ́ ná nɩɛ ná tɔ́mɩnɛ́. Ɛ́ tɔ́nɛ nɛ́ nyɛ: Gabaɔŋ, Kefira, Bɩrɔtɛ arɩ́ Kiriyatiyarimi. 18 Nyuutɩna Wɩɩsɛ, Ɩzɩrayɛl Wɩɩsɛ yɩr mɛ́ nɛ́, Ɩzɩrayɛl sɩ́dííre tá nʋɔ a pá nɩɛ ná, rɩ́ ɓa wʋ́ɔ́ wɩ́bɔ́ŋ wuú a, ɛ́ wɩ́ɛ́ ɓa wʋ́ɔ́ ɓʋ́ʋ́sɛ́. Ɛ́ nɛ́ Ɩzɩrayɛl nɩɛ ná wuu ŋmaami wɩ́ɛ́, ɓa sɩ́dííre ná rɩ́. 19 Ɛ́ nɛ́ sɩ́dííre ná wuu bʋl pá jamáŋ ná: «Á kéŋ Nyuutɩna Wɩɩsɛ, Ɩzɩrayɛl Wɩɩsɛ yɩr nɛ́ a tá nʋɔ pɔ́wɔ́, ɛ́ wɩ́ɛ́ á wʋ́ɔ́ wɩ́ɩ́ wuu wuó a. 20 Á mɔhɔ̃́ ráá lo rɩ́wɔ́ ka mɩɩsɛ. Ráá nɛ́ zɔ́kɛ́ nʋɔ ná há mɩ́ŋrá rɩ́wɔ́ pɛ́kɛ, Nyuutɩna Wɩɩsɛ sɩ́ dí cɔ́ɛ́ á nyúú, a bɛ́ŋsɩ́rá.» Ná ɛ́ ná á há sɩ́ ɔ́wɔ́: 21 «Á sɩ́ lo rɩ́wɔ́ ka mɩɩsɛ, amá ɓa nɛ́ sɩ́ a nɩɛ ná há sɩ́ cúcónnírá daasɛ, ká a nyii má aá párá nɩɛ wuu.» Wɩ́ɩ́ ná sɩ́dííre ná há vʋ́ʋ́rɛ́ nɛ́ ɛ́. 22 Ɛ́ nɛ́ Zozie yɩ́rɛ Gabaonitiwa ná a bɔ́sɩ́wɔ́: «Beé rí tɛ, ɩ́ nyɩ́sɩ́rá, a bʋl rɩ́ɩ́wa lɛ́ dɩbólí, jaáá ɩ́ mɩ́ŋrá laka tɩɩ nɛ́>> 23 Sɩ́sɛ́nyɛ, ɩ́ zʋ́ wɩɩla. Ɩ́ sɩ́ a yósí a nɛ́ cúconni daasɛ, a cɩ́cɩ́ɩ́nɛ nyii, a kaa mʋ́mʋ́ Wɩɩsɛ jaa.» 24 Ɛ́ nɛ́ ɓa bʋl pá Zozie: «Á a ɛ́, bee wɩ́ɛ́, á nɛ́ ɛ́, Nyuutɩna Wɩɩsɛ, ɩ Wɩɩsɛ há bʋ́lɛ́ pɔ́ʋ́ tʋtʋnnɔ Moyizi, rʋ́ʋ́ sɩ́ pi tíé ná wuu a pɛ́ɩ́wa, ká kiri nɩɛ ná wuu há mɩŋ tíé ná mɛ́. Héwíŋ fa kéŋrá, ɛ́ nɛ́ tɛ á tɩ́ŋrá mɩɩsɛ wɩ́ɛ́, a a ɛ́. 25 Á mɩ́nɩ́wa nɛ́sɛ mɛ́ nɛ́ mʋ́l né mí. Ɩ́ árá wɩ́ɩ́ ná wuu, ɩ́ há có.» 26 Ɛ́ nɛ́ Zozie lɔ́wɔ́ tá Ɩzɩrayɛl nɩɛ nɛ́sɛ mɛ́, ɓa wʋ́ɔ́ ɓʋ́ʋ́sɛ́. 27 Ɛ́ tápʋl nɛ́ Zozie a Gabaonitiwa, a nɩɛ ná há sɩ́ cúconni daasɛ, ká a nyii pɩ́pá Ɩzɩrayɛl nɩɛ, ká pɛ́ zʋ́zʋ Nyuutɩna Wɩɩsɛ koro ná há mɩŋ ráŋ ná, dɩhɩ̃́ ná Nyuutɩna Wɩɩsɛ há sɩ́ lɩ́sɛ. Ɓa tʋtʋmɩ́ nɛ́ ɛ́, arɩ́ zaa wuu.