Akaŋ á wɩ́bɔmɔ, ɓa bɛ́ŋsʋ́
7
1 Nyuutɩna Wɩɩsɛ fa há bʋ́lɛ́ pá Ɩzɩrayɛl nɩɛ, rɩ́wɔ́ sɩ́ óŋ wuu pí Zeriko ná há mɔhɛ̄́ rɩ́wɔ́ zɔkɛ mɛ́, ɓa wʋ́ʋ́ nʋɔ ná tɩ́ŋɛ́. Jaáá, báálɔ oro ɓa háá yɩ́rɛ Akaŋ vɔ́ɔ́ ká pa onni náŋa. Akaŋ áná nɛ́ fa ká Karmi, Karmi má áná nɛ́ ká Zabidi, Zabidi má áná nɛ́ ká Zera. Zera ká Ziida jɩmʋ́l nɛrɔ nɛ́. Ɛ́ nɛ́ Nyuutɩna Wɩɩsɛ cɔ́ɛ́ wɛ Ɩzɩrayɛl nɩɛ nyúú. 2 Zozie sɩɛ́ cɛ́ Zeriko mí, ká tʋŋ báála, ɓa mʋ́ tɔ́ɔ́ oro ɓa háá yɩ́rɛ Ayi, ʋ lɛ́l Bɛtavaŋ nɛ́, a mɩŋ Bɩtɛl wɩɩsɛ dɩpomí. Ʋ sɛ́: «Ɩ́ mʋ́ a kɩ́ɛ́lɛ tɔ́ɔ́ ná.» Ɛ́ nɛ́ nɩɛ ná mʋ́ kɩ́ɛ́lɛ Ayi tɔ́ɔ́ ná. 3 Ɓa há bɩ́rɛ́ ko Zozie rɩ́, ɓa bʋ́lɔ́ pɔ́ʋ́ bʋlɛ́: «Sɩ́ ló rí nɩɛ ná wuu mʋ́ a yo Ayi tɩ́náwa. Lo rí nɩɛ bʋ́ɩ́wʋllɛ ɛ́rá má bʋ́ɩ́toro mʋ́ a yówó, bee wɩ́ɛ́ tɔ́ɔ́ ná nɩɛ wɩ kaŋ, sɩ́ ló rí nɩkana ná wuu bɔ́lwɔ́ tɩɩ, a mʋ́ ráŋ.» 4 Ɛ́ nɛ́ nɩɛ peri bʋ́ɩ́toro mʋ́ rɩ́wɔ́ yo Ayi, Ayi tɩ́náwa kírwó ɓa bɩrɛ fá. 5 Ɓa ɓʋ́ʋ́sɛ Ɩzɩrayɛl nɩɛ mɛrɛ́ arɩ́ fí arɩ́ balgo. Ayi tɩ́náwa ná pɔ́wɔ́ tɔ́ɔ́ dánnʋɔ mɛ́, ká kírwó ɛ́ hálɩ́, a mʋ́ yakɛ Sebarimi mí, a ɓʋ́ náŋa há zɛ́ dúŋdúóŋ nyúú curi aá tuwi. Ɛ́ nɛ́ héwíŋ zʋ Ɩzɩrayɛl nɩɛ, ɓa wuu mʋʋnɛ. 6 Ɛ́ nɛ́ Zozie kánʋ́ gɛnnɛ kɩɩsɛ ká tuwi ɓal, a kánʋ́ sɩ́ɛ́ cú tíé, Nyuutɩna Wɩɩsɛ nʋtʋmɛ dáka ná sɩ́ɛ́, a pɛ́ ráŋ ɛ́, wɩɩsɛ zʋ. Ɩzɩrayɛl nɩhɩɛ̄́sɛ má a ɛ́ tɩɩ, a lɔkɛ kuŋkulo bʋ́kwɔ́ nyunni.7 Ɛ́ nɛ́ Zozie bɔsɛ bʋlɛ́: «Áá! Nyuutɩna Wɩɩsɛ, beé rí tɛ, ɩ káŋrá a caŋ Zʋrdɛŋ fuo a ko lɛ rɛɛ́, rɩ́ɩ́ pírá hé Amoritiwa nɛ́sɛ mɛ́, rɩ́wɔ́ ɓʋ́ʋ́sɩ́rá>> Á fa mɔhɔ̃́ ráá ké Zʋrdɛŋ fuo ná cɔɔ nɔ́ŋɔ nɛ́. 8 Óó Nyuutɩna, ŋ́ sɩ́ɛ́ bʋl rɩ́ beé, Ɩzɩrayɛl nɩɛ nɛ́ bɩ́rɛ́ aá fɔ́wɔ́ dɩŋdɔma sɩ́ɛ́ nyɛ>> 9 Rɩ Kananɩɛŋwa arɩ́ tɔ́ɔ́ ná nɩɛ náŋá nɛ́ nɛ́ wɩ́ɩ́ né, ɓa sɩ́ isi a ko kílrá, a ɓʋ́ʋ́sɩ́rá wuu, ráá yɩr yʋ́ksɛ tíé nyúú. Beé rí, rɩ́ɩ́ sɩɛ́ a, rɩ́ɩ́ yɩzeno ná sɩ́ yʋ́ksʋ́>>»
10 Ɛ́ nɛ́ Nyuutɩna Wɩɩsɛ bʋl pá Zozie: «Isi, beé rí tɛ ɩ pɛ́ bambú nyɛ>> 11 Ɩzɩrayɛl nɩɛ á wɩ́bɔmɔ: ɓa zɔ́kɛ́ nʋtʋmɛ ná ŋ há bílé pɔ́wɔ́, rɩ́wɔ́ tɩŋ. Ɓa pá onni ná náŋa ŋ há sɩ́ rɩ́wɔ́ sɩ́ pá; ɓa gá onni, a pii féŋsíwó cɩksɛ sɩɛrʋ. 12 Ɛ́ nɛ́ tɛ Ɩzɩrayɛl nɩɛ báá wʋ́ɔ́ dɩŋdɔma wo ɛ́, ká bɩrɛ fá, a tɩŋ ɓa háá ɓʋ́ʋ́sɩ́wɔ́ wɩ́ɛ́. Ŋ báá wɩ́ɩ́wa har wuó cɛ́, rɩɩ́wa nɛ́ wɩ onni ná wuu ŋ há sɩ́ɩ́wa zɔkɛ, ká ɓa mɩ́nɩ́wa rɩ́ zɔ́kɛ́. 13 Sɩɛ́ mʋ́ a mʋ́ʋ́rɛ nɩɛ ná busunnu tá. Bʋl pɔ́wɔ́, rɩ́wɔ́ mʋ́ʋ́rɩ́wɔ́ tɩɩ, a cíé kóŋ sɩ́ɛ́, bee wɩ́ɛ́ ŋ é Nyuutɩna Wɩɩsɛ há ká Ɩzɩrayɛl Wɩɩsɛ, ŋ kéŋ wɩ́ɩ́ rɛ́, rɩ́ŋ bʋl pɛ́ɩ́wa: Onni ná ŋ há sɩ́ɩ́wa zɔkɛ, náŋa mɩ́nɩ́wa rɩ́. Ɛ́ wɩ́ɛ́, ɩ́ waá wóllí yóó díɩ́wa dɩŋdɔma, rɩ́ɩ́wa nɛ́ wɩ ɛ́ onni lɩ́sɛ́ tá. 14 Bʋl pɔ́wɔ́, cɩ́cʋɔ rɩ́wɔ́ ko lɩɩ cɛ́ jɩmʋ́l jɩmʋ́lwa. Jɩmʋ́l ná ŋ há sɩ́ lɩ́sɛ, ɓa sɩ́ ko lɛ duówa. Duo ná má ŋ há sɩ́ lɩ́sɛ, ɓa sɩ́ ko lɛ jaáwa. Jaa ná ŋ há sɩ́ lɩ́sɛ, ɓa nɩɛ sɩ́ ko lɛ nɛ́ŋwa. 15 Nɛrɔ ná wuu rɩ́, ɓa há sɩ́ ná onni ná, ŋ há sɩ́ rɩ́wɔ́ zɔkɛ, ɓa sɩ́ nyɩ́kʋ́ rɩ́rʋ́ ɓɩɛ wuu. Bee wɩ́ɛ́, tɩ́na zɔ́kɩ́ŋ nʋtʋmɛ, a hé hɩɩ̄sɛ pá Ɩzɩrayɛl nɩɛ wuu.» 16 Ɛ́ nɛ́ Zozie isi cɩ́cʋɔ fól, a ka Ɩzɩrayɛl nɩɛ wuu a lɩɩ cɛ́: jɩmʋ́l jɩmʋ́lwa. Ɛ́ nɛ́ ɓa lɩ́sɛ Ziida jɩmʋ́l. 17 Ʋ baa a Ziida jɩmʋ́l nɩɛ ko lɛ, ʋ lɩ́sɛ Zera duo nɩɛ; ʋ baa a Zera duo nɩɛ ná má ko lɛ, ʋ lɩ́sɛ Zibdi jaa. 18 Zozie a Zabdi jaa nɩɛ ko lɛ balá baláwa, ɛ́ nɛ́ ɓa ka Akaŋ. Akaŋ áná nɛ́ ká Karmi, Karmi má áná nɛ́ ká Zabdi, Zabdi má áná nɛ́ ká Zera, a lɛ Ziida jɩmʋ́l, ʋ nɛ́ ɓa lɩ́sɛ. 19 Ɛ́ nɛ́ Zozie bʋl Akaŋ rɩ́ a bʋlɛ́: «Ŋ bíí, ŋŋ́ sʋ́lɩ́, pá Nyuutɩna Wɩɩsɛ píŋ, ʋ nɛ́ ká Ɩzɩrayɛl Wɩɩsɛ, ká bʋl taŋá. Makɛ wɩ́ɩ́ ná ɩ há zɔ́kɛ́ a páŋ, sɩ́ píí féŋsíŋ.» 20 Ɛ́ nɛ́ Akaŋ sɛ́: «Taŋá nɛ́, ŋ nɛ́ ɛ́ɛ́ zɔkɛ Nyuutɩna Wɩɩsɛ, há ká Ɩzɩrayɛl Wɩɩsɛ mɛ́. Wɩ́ɩ́ ná ŋ há ɛ́ɛ́ nɛ́ nyɛ: 21 Dɩŋdɔma onni ná há mɔhɛ̄́ ráá zɔkɛ sɩɛrʋ, ŋ ná Babɩlɔŋ tɩ́náwa gɛyɩr oro rí, a pi, arɩ́ meéwícááka zɔwɛllɛ, a súúri salmɛ píŋ há pérí kííló fá mɛ́. Onni nyáŋ nɛ́ ŋ ná, ɓa hɩɛŋ kánɩ́ŋ, ŋ pa. Ɓa nɛ́ ŋ pii húŋ táŋtɛ jaa sɩɛrʋ, meéwícááka ná mɩŋ mʋ́bʋɔ.» 22 Ɛ́ nɛ́ Zozie tʋŋ nɩɛ ɓa fá zʋʋ táŋtɛ ná sɩɛrʋ, a ná onni ná rɩ ɓa hú ráŋ, meéwícááka ná mɩŋ mʋ́bʋɔ. 23 Ɛ́ nɛ́ ɓa pa onni ná wuu, táŋtɛ ná sɩɛrʋ, a kaa lɛ Zozie arɩ́ Ɩzɩrayɛl nɩɛ wuu rɩ́, a kaa jɛrɛ Nyuutɩna Wɩɩsɛ sɩ́ɛ́. 24 Ɛ́ nɛ́ Zozie arɩ́ Ɩzɩrayɛl nɩɛ wuu ka Zera bio Akaŋ, a pa meéwícááka ná rɩ́ gɛrɔ ná arɩ́ salmɛ ná, a kɛ́sʋ́ heŋbólli, ʋ tolé, ʋ nɛsɛ, ʋ kokúsi rɩ́rʋ́ pʋwɩɛla, a cúnnú táŋtɛ, a pa onni ná wuu ʋ há kené, a kaa tuwi butuo oro ɓaá yɩ́rɛ Akɔɔrɛ. 25 Ráŋ nɛ́ Zozie bɔ́sʋ́: «Beé rí tɛ, ɩ hérá wɩɩlá né mí nyɛ>> Nyuutɩna Wɩɩsɛ má sɩ́ hé wɩɩla pɛ́ɩ́ zaa.» Ɛ́ nɛ́ Ɩzɩrayɛl nɩɛ wuu pa dɔ́wʋ́ɔ́ a yósíwó ɓʋ́ʋ́sɛ, ká nyɩ́kwɔ́ rɩ́wɔ́ ɓɩɛ wuu. 26 Ká sɩɛ́ pa dɔ́wʋ́ɔ́ a cʋɔrɛ Akaŋ nyúú, arɩ́ zaa wuu dɔ́wʋ́ɔ́ ná ha mɩŋ ráŋ. Ɛ́ nɛ́ tɛ ɓa hé dɩhɩ̃́ ná yɩr Akɔɔrɛ polo. Ɛ́ har mɛ́ nɛ́ Nyuutɩna Wɩɩsɛ cɔ́ɛ́ sɩɛ́ pɔrɛ.