Ɩzɩrayɛl nɩɛ yóó dí Zeriko
6
1 Ɛ́ tɛ́ŋ mɛ́, ɓa fa tɔ́ Zeriko dánnʋzeŋsi wuu ní ɓáŋ ɓáŋ arɩ́ hɔduoru, a tɩŋ Ɩzɩrayɛl nɩɛ wɩ́ɛ́. Nɛ́ŋ fa wɩ tɔ́ɔ́ ná mɛ́ wuó lɛ, nɛ́ŋ má fa wɩ wuó zʋ. 2 Ɛ́ nɛ́ Nyuutɩna Wɩɩsɛ bʋl Zozie rɩ́ a bʋlɛ́: «Ná, ŋ pí Zeriko rɩ́rʋ́ kuóro, arɩ́rʋ́ lalyoore a héí nɛ́sɛ mɛ́ nɛ́. 3 Tápʋ́l wuu, ɩ rɩ́rɩ́ lalyoore wuu, ɩ́ isi a kíl tɔ́ɔ́ ná naasɩ́ balá. Ɩ́ a ɛ́ tápʋlɛ balgo. 4 Ɩ́ lo rɩ́ vʋk'ɔɔsa balpɛ pa penyɩ́sɛ, a la nʋtʋmɛ dáka ná sɩ́ɛ́. Tápʋlɛ balpɛ kal, ɩ́ vaa kíl tɔ́ɔ́ ná naasɩ́ balpɛ, ká rɩ́ vʋk'ɔɔsa múmu nyɩ́sɛ ná. 5 Rɩɩ́wa nɛ́ nɩ́ɛ́ rɩ ɓa mú nyɩ́sɛ ná aá tuuri, nɩɛ ná wuu mɔhɔ̃́ rɩ́wɔ́ cáási kɩ́ŋkáŋ kɩ́ŋkáŋ. Rɩɩ́wa nɛ́ á ɛ́, zeŋ ná há kíl Zeriko, sɩ́ ɓal, ká rɩ́ɩ́wa nɩɛ wuu de zʋ tɔ́ɔ́ ná, nɛrɔ wuu mʋ́mʋ́ʋ́ sɩ́ɛ́ há cáásɛ́ ráŋ ná.» 6 Ɛ́ nɛ́ Nuŋ bio Zozie yɩ́rɛ Wɩɩsɛ vʋk'ɔɔsa, a bʋl pɔ́wɔ́: «Ɩ́ pí Nyuutɩna Wɩɩsɛ nʋtʋmɛ dáka ná, ká a rɩ́ɩ́wa náŋa balpɛ má pa penyɩ́sɛ, a lɔ́ʋ́ sɩ́ɛ́.» 7 Ká bʋl pá jamáŋ ná má bʋlɛ́: «Ɩ́ va! Ɩ́ kíl tɔ́ɔ́ ná. Rɩ́ báála ná há vɔ́sɛ́ lalyóórícɩksɛ, la Nyuutɩna Wɩɩsɛ nʋtʋmɛ dáka ná sɩ́ɛ́.»8 Zozie há mákɛ́ ɛ́, jamáŋ ná tʋ́ŋ ɛ́ nɛ́. Vʋk'ɔɔsa ná balpɛ há kéŋ penyɩ́sɛ ná, lá Nyuutɩna Wɩɩsɛ nʋtʋmɛ dáka ná sɩ́ɛ́, aá múwó nyɩ́sɛ. Ká Nyuutɩna Wɩɩsɛ nʋtʋmɛ dáka ná tɩ́ŋwɔ́ har. 9 Báála ná há vɔ́sɛ́ lalyóórícɩksɛ sɩɛ́ la vʋk'ɔɔsa ná háá mu nyɩ́sɛ sɩ́ɛ́, ká nɩkana ná tɩŋ nʋtʋmɛ dáka ná mɛ́. Ɓa valɛ́ tɛ́ŋ wuu mí, ɓa dé múmu nyɩ́sɛ ná nɛ́. 10 Zozie fa bʋ́lɔ́ pá nɩɛ ná bʋlɛ́: «Ɩ́ pɔ́ rɩ́ɩ́wa sɩ́ ballɩ́ cáású, a sɩ́ ló rɩ́ɩ́wa liŋó lɛ, a sɩ́ wɩ́ɛ́ má bʋ́lʋ́, séé tápʋl ná ŋ há sɩ́ pɛ́ɩ́wa ŋmɛ́nɔ, ɛ́ nɛ́ ɩ́ sɩ́ wólli cáási.» 11 Ɛ́ nɛ́ ɓa sɩɛ́ ka Nyuutɩna Wɩɩsɛ nʋtʋmɛ dáka ná, a lɩɩ kíl tɔ́ɔ́ ná naasɩ́ balá, ká bɩrɛ mʋ́ cɔ́wɔ́ púl mí.
12 Ɛ́ nɛ́ tɔ́ɔ́ pʋl Zozie isi cɩ́cʋɔ fól, vʋk'ɔɔsa má pi Nyuutɩna Wɩɩsɛ nʋtʋmɛ dáka ná. 13 Vʋk'ɔɔsa ná balpɛ há kéŋ penyɩ́sɛ ná balpɛ, la dáka ná sɩ́ɛ́ aá va ká múmúwó nyɩ́sɛ. Báála ná má há vɔ́sɛ́ lalyóórícɩksɛ lɔ́wɔ́ sɩ́ɛ́, ká nɩkana ná má tɩŋ har, a tɩŋ Nyuutɩna Wɩɩsɛ nʋtʋmɛ dáka ná mɛ́; ɓa vɩ́va, ká vʋk'ɔɔsa múmu nyɩ́sɛ ná. 14 Tápʋlɛ bɛllɛ kal, ɓa báá kíl tɔ́ɔ́ ná naasɩ́ balá, ká bɩrɛ kówó púl. Ɓa á ɛ́ nɛ́ tápʋlɛ balgo. 15 Tápʋlɛ balpɛ kal, ɓa baa isi tɩ́tapʋlla, a kíl tɔ́ɔ́ ná ɛ́ tɩɩ, naasɩ́ balpɛ. Ɛ́ tápʋl dʋŋɔ nɛ́, ɓa kíl tɔ́ɔ́ ná naasɩ́ balpɛ. 16 Ɓa háá kíl ɛ́, balpɛ nyúú mí, vʋk'ɔɔsa múwó nyɩ́sɛ ná, ɛ́ nɛ́ Zozie bʋl pá jamáŋ ná bʋlɛ́: «Ɩ́ cáási ballɩ́, bee wɩ́ɛ́ Nyuutɩna Wɩɩsɛ pí tɔ́ɔ́ ná héíwa nɛ́sɛ mɛ́! 17 Tɔ́ɔ́ ná rɩ́ onni ná wuu há mɩ́nʋ́ sɩɛrʋ, ɩ́ zɔ́kwɔ́ wuu, Nyuutɩna Wɩɩsɛ ɓɩɛ nɛ́. Hácɔrmɔ Rahabɛ ná rɩ́rʋ́ jaa nɩɛ dʋŋɔ nɛ́ sɩ́ káánɛ, bee wɩ́ɛ́ ʋ nɛ́ kéŋ nɩɛ ná á há tʋ́mɛ́, ɓa mʋ́ lʋɔrɛ kɩ́ɛ́lɛ tɔ́ɔ́ ná, a féŋsi. 18 Amá ɩ́ pɔ́ɩ́wa tɩɩ mɛ́ wérí! Ɩ́ lɩ́sɩ́wa nɛ́sɛ, onni ná há mɔhɛ̄́ rɩ́ɩ́wa zɔkɛ mɛ́, rɩ ɛ́ raá, ɩ́ sɩ́ lɔkɛ wɩ́ɛ́ a wáásɩ́wa tɩɩ. Rɩɩ́wa oro pí ɓɩɛ ná oro, ɛ́ sɩ́ pɔsɛ wɩhála hé Ɩzɩrayɛl nɩɛ púl mí, rɩ́wɔ́ zɔ́kɩ́wa wuu. 19 Salmɛ, wárɛ arɩ́ onni ná wuu ɓa há kéŋ kɔmɔ́ ɛ́rá má hɔɔ a a, Nyuutɩna Wɩɩsɛ nɛ́ tɩ́wɔ́. Ɓa mɔhɔ̃́ rɩ́wɔ́ zʋ́ʋ́ ɓɩɛ sɩɛrʋ nɛ́.» 20 Ɓa mu nyɩ́sɛ ná. Jamáŋ ná há nɛ́ nyɩ́sɛ ná mui, ɓa cáási ballɩ́ kɩ́ŋkáŋ, ɛ́ nɛ́ Zeriko zeŋe ná de ɓallɛ, ɓuuu. Ká nɩɛ ná de zʋ tɔ́ɔ́ ná, nɛrɔ wuu sɩ́ɛ́ há cáásɛ́ ráŋ ná, a yoo dúú. 21 Ɓa ɓʋ́ omo ná wuu há wómmó a mɩŋ tɔ́ɔ́ ná sɩɛrʋ: báála rɩ́ háála rɩ́ heŋbiisi arɩ́ nɩhɩɛ̄́sɛ, nɛsɛ rɩ́ pieŋse arɩ́ kokúsi.
22 Zozie bʋl pá báála ná bɛllɛ há mʋ́ɛ́ kɩ́ɛ́lɛ tɔ́ɔ́ ná bʋlɛ́: «Ɩ́ zʋ hácɔrmɔ ná jaa, a kánʋ́ rɩ́rʋ́ jaa nɩɛ wuu, rɩ́wɔ́ ko lɛ, anɩ́wa há ŋmɩ́ɛ́sɛ ɛ́ a pɔ́ʋ́.» 23 Ɛ́ nɛ́ bápʋɔsɛ́ ná há mʋ́ɛ́ lʋɔrɛ kɩ́ɛ́lɛ tɔ́ɔ́ ná, ɓa zʋ, a ka Rahabɛ rɩ́rʋ́ áná, rɩ́rʋ́ maá rɩ́rʋ́ maábɛlɛ arɩ́ nɛrɔ ná wuu há kɔ́ʋ́ nɛ́ŋ, a ko lɛ. Ɓa kánʋ́ rɩ́rʋ́ nɩɛ ná wuu ko lɛ, a lo ɓa ké Ɩzɩrayɛl nɩɛ pul har. 24 Ɛ́ har mɛ́ nɛ́ sɩɛ́, ɓa nyɩkɛ tɔ́ɔ́ ná arɩ́ omo ná wuu há mɩ́nʋ́ sɩɛrʋ, ká pa salmɛ rɩ́ wárɛ arɩ́ kɔmɔ́ rɩ́ hɔɔ ɓɩɛ, a kaa mʋ́ hé Nyuutɩna Wɩɩsɛ jaa cɩksɛ sɩɛrʋ. 25 Zozie wɩ hácɔrmɔ Rahabɛ, rɩ́rʋ́ jaa nɩɛ arɩ́ nɛrɔ ná wuu há kɔ́ʋ́ nɛ́ŋ ɓʋ́ɛ́, bee wɩ́ɛ́ Rahabɛ nɛ́ fa kéŋ nɩɛ ná bɛllɛ Zozie há tʋ́mɛ́, ɓa mʋ́ a lʋɔrɛ kɩ́ɛ́lɛ Zeriko tɔ́ɔ́ ná, a féŋsi. Ʋ duo nɩɛ ha mɩŋ Ɩzɩrayɛl nɩɛ sɩɛrʋ, arɩ́ zaa wuu.
26 Ɛ́ tɛ́ŋ mɛ́ nɛ́ Zozie ŋmɩ́ɛ́sɛ, a bʋlɛ́: «Nɛrɔ ná wuu háá já rʋ́ʋ́ bɩrsɔ Zeriko, rɩ́ Nyuutɩna Wɩɩsɛ ɓʋsɛ tɩ́na pʋ́sɛ. Ʋ bihɔ̄́ nɛ́ rʋ́ʋ́ kaa bil tɔ́ɔ́ ná mʋ́l; rʋʋ nɛ́ sɔ́ɛ́ tenni, ʋ bio ɓɩwie má nɛ́, rʋ́ʋ́ kaa hé tɔ́ɔ́ ná bonni.
27 Nyuutɩna Wɩɩsɛ fa mɩŋ Zozie har wérí, ʋ yɩr lɛ tɔ́ɔ́ ná wuu mí.