Ɓa cónní pɛnɛ Gɩlgal mɛ́
5
1 Amoritiwa kuóre ná wuu há mɩŋ Zʋrdɛŋ fuo wɩzʋʋlɔ́, arɩ́ Kananɩɛŋwa kuóre ná wuu há mɩŋ Mʋʋ nʋɔ, ɓa há nɩ́ɛ́ rɩ Nyuutɩna Wɩɩsɛ ɔ́ɔ́ Zʋrdɛŋ fuo hɩl, ká Ɩzɩrayɛl nɩɛ daarɛ, héwíŋ cáásɔ́ zʋ́wɔ́ wérí, ɓa báá wɩ baŋcɩpɩrɩ́ kené, rɩ́wɔ́ céŋ yo Ɩzɩrayɛl nɩɛ.2 Ɛ́ tɛ́ŋ mɛ́ nɛ́, Nyuutɩna Wɩɩsɛ bʋl Zozie rɩ́ a bʋlɛ́: «Pa naŋɓácɩllɛ a bɩrmɛ nyúfʋ́ŋsɛ, a baa conni Ɩzɩrayɛl nɩɛ pɛnɛ.» 3 Ɛ́ nɛ́ Zozie bɩrmɛ nyúfʋ́ŋsɛ ná, a kaa conni Ɩzɩrayɛl nɩɛ pɛnɛ, paalɔ daha, ɓa kaá yɩ́rɛ pɛŋkɛnnɛ paalɔ. 4 Wɩ́ɩ́ ná há tɛ, Zozie cónníwó pɛnɛ nɛ́ nyɛ: Nɩɛ ná wuu fa há lɛ́ Ezipiti tíé mí a ko lɛ, báála ná wuu há mɔhɛ̃́ lal mʋ́ɩ́, sʋ́sɛ́ ŋmɛ́nɔ mɛ́ nɛ́, gɩrbétéke mí, ɓa Ezipiti tíé lɩɩ har mɛ́. 5 Nɩɛ ná wuu há lɛ́ Ezipiti mí, fa cónníwó pɛnɛ, amá nɩɛ ná wuu, ɓa há lʋ́l gɩrbétéke sɩɛrʋ, tɛ́ŋ ná mɛ́ ɓa háá va ŋmɛ́nɔ, ɓa nɛ́ fa wʋ́ɔ́ pɛnɛ cónné. 6 Ɩzɩrayɛl nɩɛ fa vá gɩrbétéke sɩɛrʋ bɩŋsɛ mɛɛ́sɛllɛ nɛ́, hálɩ́ báála ná wuu há mɔhɛ̃́ lal yoe, a lɛ Ezipiti mí, sʋ́sɔ́ tenni, bee wɩ́ɛ́ ɓa vɛ́ Nyuutɩna Wɩɩsɛ nʋɔ. Nyuutɩna Wɩɩsɛ fa ŋmɩ́ɛ́sɔ́, rɩ́ ɓa wɩ tíé ná ʋ há tá nʋɔ a párá ánáwa, rʋʋ sɩ́ pii párá, ɓa wʋ́ʋ́ ná rɩ́ɩ́ sɩ́ɩ́. Tíé ná nɛ'ɩ́l rɩ́ tʋʋ háá pal ráŋ. 7 Ɓa nyúú mí ní, Nyuutɩna Wɩɩsɛ a ɓa bɛlɛ la. Ɓa pɛnɛ nɛ́ Zozie conni ɛ́. Ɓa fa há wʋ́ɔ́ pɛnɛ cónné ŋmɛ́nɔ mɛ́. 8 Ɓa há cónníwó wuu pɛnɛ tenni, ɓa ké púl mí, dɩbalá, ɓa pɛnɛ ná fɩɛlɛ. 9 Ɛ́ nɛ́ ká Nyuutɩna Wɩɩsɛ bʋl pá Zozie a bʋlɛ́: «Zaa, ŋ ɔ́ɔ́ hɩɩ̃sɛ ná wuu ɩ́ há néé Ezipiti mí, lɩ́ɩ́wa mɛ́.» Ɛ́ nɛ́ ɓa hé dɩhɩ̃́ ná yɩr: Gɩlgal; ʋ mʋ́l nɛ́ ká “Lɩ́sɛ” arɩ́ zaa wuu, dɩhɩ̃́ ná yɩr nɛ́ ha ɛ́.
Ɩzɩrayɛl nɩɛ dʋ́ŋdʋ́ʋ̃́ Pakɛ ná ɓa há díé Kanaŋ mɛ́
10 Ɩzɩrayɛl nɩɛ há cíkí Gɩlgal mɛ́, cana tápʋlɛ fí arɩ́ baná kal gbaanɛ, ɓa dí Pakɛ cana, Zeriko polo ná mɛ́. 11 Ɓa há dí cana ná tɔ́ɔ́ pʋl nɛ́, ɓa púl dí Kanaŋ tíé ɓɩdííle, sɩbʋ́rtoó dɩpɛ́ŋwa arɩ́ mɩ́halɛ́. 12 Ɩzɩrayɛl nɩɛ há dí tɔ́ɔ́ ná ɓɩdííle, ká tɔ́ɔ́ pʋl, máánɛ yʋ́ksɔ́. Ɛ́ bɩna, Kanaŋ tíé ɓɩdííle ní ɓa dí.
Zozie rí báálɔ há kéŋ tókowí wɩ́ɛ́
13 Tɛ́ŋ ná mɛ́ Zozie há mʋ́ɛ́ a peri Zeriko, ʋ ná báálɔ oro rʋʋ cɩ́nʋ́ sɩ́ɛ́, a fókú tókowí kánʋ́ nɛ́sɛ mɛ́. Ɛ́ nɛ́ ʋ mʋ́ a bɔ́sʋ́: «Ɩ kárá nɔ́ŋɔ nɛ́ yáá, ɩ kárá dɩŋdɔ́ŋ rɛ́>>» 14 Ɛ́ nɛ́ báálɔ ná sɛ́: «Aɩ́, ŋ to oro wuu. Ŋ nɛ́ taŋa ká Nyuutɩna Wɩɩsɛ lalyoore nɔhɔ̃́, ŋ sɩɛ́ nɛ́ kúé.» Ɛ́ nɛ́ Zozie tuwi ɓal, a kánʋ́ sɩ́ɛ́ cú tíé, a zílú ká bɔ́sʋ́ bʋlɛ́: «Ŋ nɔhɔ̄́, líŋbeé rí ɩ jɩ́ja rɩ́ɩ́ pɛ́ɩ́ tʋtʋnnɔ>>» 15 Ɛ́ nɛ́ Nyuutɩna Wɩɩsɛ lalyoore nɔhɔ̃́ ná bʋl pá Zozie a bʋlɛ́: «Kúórí natɔɔsɛ, bee wɩ́ɛ́, dɩhɩ̃́ ná ɩ há cɩ́nɛ́, ʋ ká dɩkísí rí.» Ɛ́ nɛ́ Zozie a ɛ́ ná ʋ há sɛ́.