Dɔ́wʋ́ɔ́ fí rɩ́ bɛllɛ wɩ́ɛ́
4
1 Tɛ́ŋ ná mɛ́ jamáŋ wuu há cáŋ Zʋrdɛŋ fuo ná a daarɛ tenni, Nyuutɩna Wɩɩsɛ bʋ́l Zozie rɩ́ a bʋlɛ́: 2 «Ɩ́ lɩ́sɛ báála fí rɩ́ bɛllɛ jamáŋ ná sɩɛrʋ, jɩmʋ́l wuu bál balá. 3 Ɩ́ bʋl nyɛ pɔ́wɔ́, a bʋlɛ́: Ɩ́ pa dɔ́wʋ́ɔ́ fí rɩ́ bɛllɛ Zʋrdɛŋ fuo ná sɩ́sɩ́ɛ́nʋ́wa, ráŋ ná Wɩɩsɛ vʋk'ɔɔsa ná fa há cɩ́nɛ́, a kaa mʋ́ ráŋ ná ɩ́ há sɩ́ cɔ zaa tɩ́taŋ.» 4 Ɛ́ nɛ́ Zozie yɩ́rɛ nɩɛ ná fí rɩ́ bɛllɛ ná, ʋ fa há lɩ́sɛ́ Ɩzrayɛl nɩɛ sɩɛrʋ, jɩmʋ́l wuu sɩɛrʋ bál balá, 5 a bʋl pɔ́wɔ́ a bʋlɛ́: «Ɩ́ ko la Nyuutɩna Wɩɩsɛ, ɩ́ Wɩɩsɛ nʋtʋmɛ dáka ná sɩ́ɛ́, a caasɛ Zʋrdɛŋ fuo sɩ́sɩɛrʋ. Ráŋ, ɩ́ nɛ́ŋ wuu pi dɔ́wɩ́ balá, a sakʋ́ vapar mɛ́, rɩ́wɔ́ cesi Ɩzɩrayɛl jɩmʋ́ʋ́la ná nʋɔ, 6 a makɛ rʋ́ʋ́ ɛ́ a malla ɩ́ sɩ́sɩɛrʋ. Cíé, rɩɩ́wa bɛlɛ nɛ́ bɔ́sɩ́wa a bʋlɛ́: ‹Dɔ́wʋ́ɔ́ nyáŋ mʋ́bʋɔ nɛ́ beé ɩ́ rɩ́>>› 7 Rɩ́ɩ́wa bʋl pɔ́wɔ́ a bʋlɛ́: ‹Tɛ́ŋ ná mɛ́ Nyuutɩna Wɩɩsɛ nʋtʋmɛ dáka ná fa háá daarɛ́, Zʋrdɛŋ fuo nyii cɩ́nɔ́. Táŋa, nʋtʋmɛ dáka ná fa háá daarɛ Zʋrdɛŋ fuo ná, nyii ná fa háá palɛ́, cónnó a cɛ́ dɩbalá. Dɔ́wʋ́ɔ́ nyáŋ nɛ́, sɩ́ a rɩ́ Ɩzrayɛl bɛlɛ líliisi ɛ́ wɩ́ɩ́, a kaá mʋ́ wuu.» 8 Ɛ́ nɛ́ Ɩzrayɛl nɩɛ ná tʋŋ ɛ́ ná, Zozie fa há mákwɔ́. Ɓa pá dɔ́wʋ́ɔ́ fí rɩ́ bɛllɛ Zʋrdɛŋ fuo ná sɩ́sɩɛrʋ, a cesi Ɩzɩrayɛl jɩmʋ́ʋ́la ná nʋɔ, anɛ ɛ́ Nyuutɩna Wɩɩsɛ fa há mákɛ́ pá Zozie. Ɓa cɩ́ɩ́nɩ́wɔ́ a kaa mʋ́wɔ́ púl, a bil ráŋ. 9 Zozie má tɩɩ pá dɔ́wʋ́ɔ́ fí arɩ́ bɛllɛ, a cɔ́ŋsɛ Zʋrdɛŋ fuo ná sɩ́sɩ́ɛ́nʋ́wa, ráŋ ná tɩɩ, Wɩɩsɛ vʋk'ɔɔsa ná fa há cɩ́ɩ́nɛ nʋtʋmɛ dáka ná a cɛ́; ɛ́ dɔ́wʋ́ɔ́ ha mɩŋ ráŋ a ko aá lɛ zaa.10 Wɩɩsɛ vʋk'ɔɔsa ná háá cɩ́ɩ́nɛ nʋtʋmɛ dáka ná, cɛ́ Zʋrdɛŋ fuo ná sɩ́sɩ́ɛ́nʋ́wa ɛ́ nɛ́ wuu, jamáŋ ná a wɩ́ɛ́ ná wuu Nyuutɩna Wɩɩsɛ fa há mákɛ́ pá Zozie, a tɩŋ Moyizi mí, a bʋlʋ́ máŋsɛ pɔ́wɔ́. Ká nɩɛ ná wuu a kɩ́kɛ́lɛ́ a caŋ fuo ná a daarɛ. 11 Ɓa wuu há cáŋɛ́ a daarɛ, Nyuutɩna Wɩɩsɛ nʋtʋmɛ dáka ná arɩ́ vʋk'ɔɔsa ná mʋ́ɔ́ la jamáŋ ná sɩ́ɛ́. 12 Ɛ́ nɛ́ Rubaŋ duo nɩɛ rɩ́ Gadɛ duo nɩɛ arɩ́ Manase duo nɩɛ fá ná, vɔ́wɩ́wɔ́ lal cɩksɛ, a la Ɩzrayɛl bɛlɛ sɩ́ɛ́, anɛ ɛ́ Moyizi fa há mákwɔ́. 13 Lalyoore pérí bʋ́ɩ́ mɛɛ́sɛllɛ, a pa lalyóórícɩksɛ a la Nyuutɩna Wɩɩsɛ sɩ́ɛ́, a caasɛ Zeriko polo, rɩ́wɔ́ yo lal. 14 Ɛ́ kal, Nyuutɩna Wɩɩsɛ súúri Zozie tíŋ kɩ́ŋkáŋ, Ɩzɩrayɛl nɩɛ sɩ́ɛ́ mɛ́, ɓa zílú ʋ hiẽsó wuu mí, anɛ ɛ́ ɓa fa háá zíl Moyizi.
15 Ɛ́ nɛ́ Nyuutɩna Wɩɩsɛ bʋl Zozie rɩ́ a bʋlɛ́: 16 «Bʋl pá vʋk'ɔɔsa ná há cɩ́ɩ́nɛ nʋtʋmɛ dáka ná, nʋtʋmɛ kɛnɔ há mɩ́nʋ́ sɩɛrʋ, rɩ́wɔ́ ko lɛ́ Zʋrdɛŋ fuo ná mɛ́.» 17 Ɛ́ nɛ́ Zozie bʋl vʋk'ɔɔsa ná rɩ́ a bʋlɛ́: «Ɩ́ ko lɛ Zʋrdɛŋ fuo ná mɛ́.» 18 Vʋk'ɔɔsa ná há cɩ́ɩ́nɛ Nyuutɩna Wɩɩsɛ nʋtʋmɛ dáka ná, naasɛ há de nʋɔsɛ gíŋgiŋí mí tenni, rɩ fuo ná báá bɩ́rɔ́ sú a waalɛ, anɛ ɛ́ ʋ fa há nɩhɛ̃́. 19 Dʋ́ŋdʋ́ʋ̃́ cana tápʋlɛ fí kal nɛ́, Ɩzrayɛl jamáŋ ná caŋ Zʋrdɛŋ fuo ná lɛ, a mʋ́ ké tɔ́ɔ́ ná ɓa háá yɩ́rɛ Gɩlgal mɛ́, a mɩŋ Zeriko tíé wɩɩsɛ dɩpomí.
20 Ɛ́ nɛ́ Zozie a ɓa pa dɔ́wʋ́ɔ́ ná fí arɩ́ bɛllɛ, ɓa há pɛ́ɛ́ Zʋrdɛŋ fuo ná sɩɛrʋ, a cɔ́ŋsɛ Gɩlgal mɛ́. 21 Ká bʋl pá Ɩzrayɛl bɛlɛ, a bʋlɛ́: «Rɩɩ́wa duo nɩɛ nɛ́ cíé bɔ́sɩ́wa anɛ dɔ́wʋ́ɔ́ nyáŋ mʋ́bʋɔ nɛ́ beé, 22 ɩ́ bʋl pɔ́wɔ́ anɛ Ɩzrayɛl nɩɛ vá tíhɩlɩ́ mɛ́ nɛ́, a caŋ Zʋrdɛŋ fuo sɩɛrʋ a lɛ. 23 Nyuutɩna Wɩɩsɛ, ɩ́ Wɩɩsɛ nɛ́ ɛ́ɛ́ Zʋrdɛŋ fuo ná hʋ́ʋ̃́sɩ́wa sɩ́ɛ́, ká, ɩ́ daarɛ, anɛ ʋ fa há ɛ́ɛ́ Zɔŋkɩwa mʋʋ nyii hʋ́ʋ̃́sɛ, ká, á daarɛ ɛ́. 24 Ʋ a wɩ́ɛ́ nyáŋ wuu, rɩ́ dúníé nɩɛ wuu zɩŋ rʋ́ʋ́ nɛ́ kéŋ dóé. Rɩ́ ɛ́ a rɩ́ɩ́wa fɩ́fá Nyuutɩna Wɩɩsɛ, ɩ́ Wɩɩsɛ, a zízílú tɛ́ŋ wuu mí.»