Ɩzɩrayɛl nɩɛ cáŋ Zʋrdɛŋ fuo lɛ
3
1 Tɔ́ɔ́ há pʋ́lɛ́ cɩ́cʋɔ fól, Zozie rɩ́ Ɩzrayɛl nɩɛ ná wuu ísí Sitiimi mí, a mʋ́ peri Zʋrdɛŋ fuo nʋɔ, a cɔ ráŋ a dɩ́dɛllɛ rɩ́wɔ́ caŋ fuo ná lɛ. 2 Tápʋlɛ botoro kal, ɓa sɩ́dííre ísó a gʋɔrɛ púl sɩɛrʋ, 3 a bil nʋɔ né a pá nɩɛ a bʋlɛ́: «Rɩɩ́wa nɛ́ ná vʋk'ɔɔsa ná há ká Levitiwa, rɩ ɓa pí Nyuutɩna Wɩɩsɛ, ɩ́ Wɩɩsɛ nʋtʋmɛ dáka ná cɩ́ɩ́nɛ, ʋ mɔhɔ̃́ rɩ́ɩ́wa ísíwa dɩkéni, a tɩ́ŋʋ́ har. 4 Ɛ́ nɛ́ rɩ́ɩ́wa zɩŋ ŋmɛ́nɔ ná, ɩ́ há sɩ́ tɩŋ, bee wɩ́ɛ́ ɩ́ ha wɩ ŋmɛ́nɔ né píé ná. Ɩ́ mɩŋ dɩbólí, a lo rɩ́ɩ́wa rɩ́ Wɩɩsɛ nʋtʋmɛ dáka ná pɛ́kɛ peri kííló balá. Ɩ́ pɔ́ rɩ́ɩ́wa háá pérú.» 5 Ɛ́ nɛ́ Zozie bʋl pá jamáŋ ná a bʋlɛ́: «Ɩ́ mʋ́ʋ́rɩ́wa busunnu, bee wɩ́ɛ́ cíé, Nyuutɩna Wɩɩsɛ sɩ́ a wɩ́nyáŋsɛ ɩ́ sɩ́sɩɛrʋ.» 6 Ʋ bʋl pá Wɩɩsɛ vʋk'ɔɔsa má, a bʋlɛ́: «Ɩ́ cɩ́ɩ́nɛ Wɩɩsɛ nʋtʋmɛ dáka ná, a la jamáŋ ná sɩ́ɛ́.» Ɛ́ nɛ́ ɓa pii cɩ́ɩ́nɛ a lɔ́wɔ́ sɩ́ɛ́.7 Ɛ́ nɛ́ Nyuutɩna Wɩɩsɛ bʋl Zozie rɩ́ a bʋlɛ́: «Zaa, ŋ sɩ́ púl a a rɩ́ɩ́ ka tíŋ kɩ́ŋkáŋ, Ɩzɩrayɛl nɩɛ wuu sɩ́ɛ́ mɛ́, rɩ́wɔ́ zɩŋ rɩ́ŋ mɩ́nɩ́ har anɩ́ŋ fa há mɩŋ Moyizi har ɛ́. 8 Bʋl nyɛ pá vʋk'ɔɔsa ná haa cɩ́ɩ́nɛ nʋtʋmɛ dáka ná, rɩ́ ɓa nɛ́ mʋ́ɛ́ peri Zʋrdɛŋ fuo, rɩ́wɔ́ cɛ́ fuo ná nʋɔ nyii sɩɛrʋ.» 9 Ɛ́ nɛ́ ká Zozie bʋl Ɩzrayɛl bɛlɛ rɩ́, a bʋlɛ́: «Ɩ́ peri rɛɛ́ a zesi wɩ́ɛ́ ná Nyuutɩna Wɩɩsɛ, ɩ́ Wɩɩsɛ há sɩ́ bʋl. 10 Ná ɛ́ ná ɩ́ há sɩ́ zɩŋ rɩ́ Wɩɩsɛ ná há wómmó mɩ́nɩ́wa sɩɛrʋ, rʋ́ʋ́ ɓɩɛ́na sɩ́ kiri Kananɩɛ̄wa rɩ́ Hititiwa rɩ́ Hivitiwa rɩ́ Perezitiwa rɩ́ Girigazitiwa rɩ́ Amɔritiwa arɩ́ Yebuzitiwa ɩ́ sɩ́ɛ́. 11 Ɩ́ bel ná, Nyuutɩna Wɩɩsɛ nɛ́ há tɛ tíé wuu, ʋ nʋtʋmɛ dáka ná sɩ́ lɛ́ɩ́wa sɩ́ɛ́, a kánɩ́wa caŋ Zʋrdɛŋ fuo ná lɛ. 12 Mʋ́l né mí, ɩ́ lɩ́sɛ báála fí arɩ́ bɛllɛ, Ɩzrayɛl jɩmʋ́ʋ́la ná sɩɛrʋ, jɩmʋ́l wuu nɛ́ŋ balá.» 13 Tɛ́ŋ ná mɛ́ Wɩɩsɛ vʋk'ɔɔsa ná háá cɩ́ɩ́nɛ Nyuutɩna Wɩɩsɛ, tíé wuu Nyuutɩna nʋtʋmɛ dáka ná, naasɛ há sɩ́ zʋ Zʋrdɛŋ fuo nyii ná sɩɛrʋ, nyii ná há pálɛ lɛ nyúú rí aá ko sɩ́ coki, a cɛ́ anɛ gíŋgiŋí.»
14 Jamáŋ ná sɩɛ́ isi púl mí, rɩ́wɔ́ caŋ Zʋrdɛŋ fuo lɛ; Wɩɩsɛ vʋk'ɔɔsa ná háá cɩ́ɩ́nɛ nʋtʋmɛ dáka ná sɩɛ́ la sɩ́ɛ́. 15 Ɓɩɛ kʋsɛ́ tɛ́ŋ wuu mí, Zʋrdɛŋ fuo ná sú ní, a wáálʋ́ kílo wuu. Tɛ́ŋ ná mɛ́ Wɩɩsɛ vʋk'ɔɔsa ná háá cɩ́ɩ́nɛ nʋtʋmɛ dáka ná, há mʋ́ɛ́ peri Zʋrdɛŋ fuo, ɓa naasɛ tɩ́kɛ́ nyii ná mɛ́; 16 nyii ná há pálɛ́ lɛ nyúú rí aá tuwi fuo ná, coki ká wuu hé náŋá mɛ́, a cɛ́ anɛ gíŋgiŋí, a pɛ́ a mʋ́ dɩbólí, a lɛ tɔ́ɔ́ ná ɓa háá yɩ́rɛ Adama, a mɩŋ Sarɩtaŋ tíé laka. Ká nyii ná há pálɛ́ aá tuwi Araba mʋʋ ná ɓa háá yɩ́rɛ Mʋsʋwɩ́, ʋ má coki ɓóŋ. Ɛ́ nɛ́ jamáŋ ná sɩɛ́ wólli a caŋ Zʋrdɛŋ fuo, a daarɛ mʋ́ Zeriko sɩ́ɛ́. 17 Wɩɩsɛ vʋk'ɔɔsa ná háá cɩ́ɩ́nɛ Nyuutɩna Wɩɩsɛ nʋtʋmɛ dáka ná zʋ́ɔ́ cɛ́ tíhɩlɩ́ mɛ́ ɛ́ nɛ́, Zʋrdɛŋ fuo ná sɩ́sɩɛrʋ, ká Ɩzrayɛl nɩɛ wuu va tíhɩlɩ́ daha, a caŋ Zʋrdɛŋ fuo a daarɛ, ká nyii wʋ́ɔ́ naasɛ mɛ́ tɩ́kɛ́. Ɓa cɛ́ ɛ́ nɛ́, ká nɩɛ ná wuu caŋ Zʋrdɛŋ fuo a daarɛ tenni.