Nɩɛ ná Zozie há tʋ́ŋ Zeriko mí arɩ́ Rahabɛ wɩ́ɛ́
2
1 Ɛ́ nɛ́ Nuŋ bio Zozie cɛ́ Sitiimi mí ká tʋŋ nɩɛ bɛllɛ, rɩ́wɔ́ mʋ́ lʋɔrɛ kɩ́ɛ́lɛ Kanaŋ tíé, arɩ́ tɔ́ɔ́ ná ɓa háá yɩ́rɛ Zeriko. Ɛ́ nɛ́ nɩɛ ná mʋ́, a zʋʋ cɔ hácɔrmɔ oro ɓa háá yɩ́rɛ Rahabɛ, jaa mɛ́. 2 Ɛ́ nɛ́ ɓa bʋl pá Zeriko kuóro, rɩ́ Ɩzrayɛl nɩɛ náŋa kówó tɔ́ɔ́ tɩ́taŋ, rɩ́wɔ́ lʋɔrɛ kɩ́ɛ́lɛ ná ɓa tɔ́ɔ́ kéne. 3 Ɛ́ nɛ́ ʋ tʋŋ nɩɛ Rahabɛ rɩ́ a bʋlɛ́: «Lɩ́sɛ báála ná há kúé mɩ́nɩ́ jaa mɛ́, bee wɩ́ɛ́ ɓa kúó rɩ́wɔ́ kɩ́ɛ́lɩ́rá tɔ́ɔ́ ná wuu ní a nárá kéne.» 4 Ɛ́ nɛ́ Rahabɛ kɛsɛ báála ná bɛllɛ féŋsi, ká bʋlɛ́: «Wɩ́táŋa, báála fa kóŋ jaa é rí, amá ŋ wɩ ráŋ ná ɓa há lɩ́ɛ́ ɛ̃. 5 Ɓa sɩ́ col ní, ká ɓa zɩŋ tɔ́rá tɔ́ɔ́ dánnʋzeno gbaanɛ. Ŋ wɩ ŋmɛ́ŋsɛ ná ɓa há tɩ́ŋɛ́ ɛ̃, ɩ́ kíríwó har, ɩ́ sɩ́ wóllíwó pu.»6 Amá ʋ fa kéŋ nɩɛ ná zɛ́ féŋsú jaa luso nyúú ní, sikele ʋ fa há bílé mʋ́bʋɔ. 7 Ɛ́ nɛ́ kuóro nɩtʋmɛ́ ná kiri tɩ́ŋwɔ́ har, ká ɓa ka tɔ́ɔ́ danʋzeno tɔ́. Ɓa kíríwó har a mʋ́ pi ŋmɛ́nɔ ná háá mʋ́ Zʋrdɛŋ fuo ráŋ ná ɓa há zʋ́ɛ́ aá lɛ́. 8 Ká rɩ́ báála ná zɩŋ pɛ́ dóŋ tɩ́taŋ, Rahabɛ ísó zɩ́ŋwɔ́ rɩ́ luso ná nyúú, 9 a bʋ́lwɔ́ rɩ́ bʋlɛ́: «Ŋ ɩ́ɔ̃́ rɩ́ Nyuutɩna Wɩɩsɛ pí tɔ́ɔ́ né a pɛ́ɩ́wa rɛ́. Ɩ́ wɩ́ɛ́ má tɩɩ ɔ́ɔ́ héwíŋ zʋ́rá. Nɩɛ ná wuu há mɩŋ tɔ́ɔ́ né mí, ɓa yʋ́ɔ́rɔ́ rɛ́, a tɩ́ŋɩ́wa wɩ́ɛ́. 10 Á nɛ́ ɛ́ Nyuutɩna Wɩɩsɛ há ɛ́ɛ́ Zɔŋkɛwa mʋʋ nyii hʋ́ʋ̃́sɛ, tɛ́ŋ ná mɛ́ ɩ́ há lɛ́ Ezipiti mí, arɩ́ ɛ́ ná ɩ́ há ɓʋ́ Amɔrɩɛ̃wa ná há mɩŋ Zʋrdɛŋ fuo wɩpomí nágʋ́ɔ́ rɩ́, ɓa kuóre ná bɛllɛ ɓa háá yɩ́rɛ Sɩhɔŋ arɩ́ Ɔɔgɛ, a zɔ́kwɔ́ ɓɩɛ wuu mɩ́ɛ́ mɩ́ɛ́. 11 Á há nɛ́ wɩ́ɛ́ ná, á mʋ́ʋ́nɔ́ rɛ́, nɛrɔ wuu naasɛ yʋɔrɛ a tɩ́ŋɩ́wa wɩ́ɛ́. Nyuutɩna Wɩɩsɛ, ɩ́ Wɩɩsɛ nɛ́ ká bána rɩ́ Wɩɩsɛ a mɩŋ nyúú rí, ʋ nɛ́ ká ɛ́ Wɩɩsɛ a mɩŋ tíé nyúú rɛɛ́. 12 Ŋ sɩɛ́ sʋ́lɩ́wa, sɩ́sɛ́nyɛ ɩ́ ŋmɩ́ɛ́sɛ páŋ, Nyuutɩna Wɩɩsɛ yɩr mɛ́, rɩ́ɩ́wa sɩ́ makɛ sawér páŋ jaa nɩɛ anɩ́ŋ há mákɛ́ sawér a pɛ́ɩ́wa ɛ́. Ɩ́ páŋ malla pʋmmɩ́, 13 háá makɛ́ rɩɩ́wa sɩ́ lóŋ áná rɩ́rɩ́ŋ maá, rɩ́rɩ́ŋ nánʋɔlawa, rɩ́rɩ́ŋ maábɛlɛ arɩ́wɔ́ nɩɛ wuu, a sɩ́rá ɓʋ́ʋ́sʋ́.» 14 Ɛ́ nɛ́ báála ná bʋl pɔ́ʋ́ bʋlɛ́: «Ɩ́ mɩɩ̃sɛ sɩ́ árá mɩɩ̃sɛ. Rɩɩ nɛ́ wɩ wɩ́ɩ́ ná á há kúé ráá a wɩ́ɛ́ bʋ́lɛ́ pá nɩɛ, á sɩ́ kánɩ́ wérí arɩ́ taŋá, tɛ́ŋ ná mɛ́ Nyuutɩna Wɩɩsɛ há sɩ́ pi tíé né a hérá nɛ́sɛ mɛ́.»
15 Háálɔ ná jaa fa pɛ́llɛ zenaa ná ɓa há sɔ́ɛ́ kɛ́rwɔ́ tɔ́ɔ́ mɛ́ nɛ́, ɛ́ nɛ́ ʋ pi ŋmɛ́ŋ a tá ʋ tɩŋ tókóró lɛ, ɓa tɩ́ŋʋ́ mɛ́ a tuwi. 16 Ʋ bʋl pɔ́wɔ́ a bʋlɛ́: «Ɩ́ mʋ́ féŋsi paalɔ nyúú, rɩ́ nɩɛ ná háá kíríwa har sɩ́ɩ́wa ná. Ɩ́ féŋsi ráŋ, a peri tápʋlɛ botoro, rɩ́ nɩɛ ná háá jɛ́ɩ́wa, bɩrko jaa, ká rɩ́ɩ́wa sɩɛ́ pííwa ŋmɛ́nɔ a col.» 17 Báála ná má bʋl pɔ́ʋ́ a bʋlɛ́: «Ŋmɔ́ɔ́ né, ɩ há ɛ́ɛ́ á bil pɛ́ɩ́, á wʋ́ʋ́ kíŋŋí tá: 18 wɩ́ɩ́ ná há mɔhɛ̄́ rɩ́ɩ́ a nɛ́ ká, raá nɛ́ kúé zʋ tɔ́ɔ́ né, ɩ pi gepúfɩɛmɔ né a vɔwɛ tókóró ná mɛ́, ɩ há ɛ́ɛ́ á tɩŋ ráŋ tuwi. Lo rɩ́ɩ́ áná rɩ́rɩ́ maá rɩ́rɩ́ maábɛlɛ arɩ́rɩ́ jaa nɩɛ wuu mɩ́nɩ́ jaa sɩɛrʋ. 19 Rɩ ɓa oro lɛ́ dɩjɛlɔ, rɩ wɩ́ɩ́ ɔ́ʋ́, ʋ tɩɩ nɛ́ jɔ́ʋ́ sʋʋ. Á wɩ́ɩ́ raá. Rɩ nɩɛ ná há mɩ́nɩ́ jaa sɩɛrʋ oro mí ní, ráá pi wɩ́ɩ́ ɔ́ʋ́ mɛ́, á má nɛ́ tɛ wɩ́ɩ́. 20 Amá rɩɩ nɛ́ bʋ́l wɩ́ɩ́ né há mɩ́ŋrá pɛ́kɛ rɩ́ɩ́ pá nɩɛ, ká ná, ŋmɔ́ɔ́ ná ɩ há ɛ́ɛ́ á bil, ʋ wɩ́rá dí.» 21 Háálɔ ná sɛ́: «Ŋ sáŋɔ́, rɩ́ ɛ́ tʋŋ.» Ʋ tɔ́wɔ́ ɓa col kɔ́ʋ́ pi gepúfɩɛmɔ ná a vɔwɛ tókóró ná mɛ́. 22 Ɓa há lɩ́ɛ́, ɓa zɛ́ paalɔ daha a féŋsi ráŋ, tápʋlɛ botoro. Ká nɩɛ ná háá kíríwó har, ɓa pi ŋmɛ́nɔ a bel wuu, ɓa wʋ́ɔ́ néé, ká bɩr ko Zeriko. 23 Ɛ́ nɛ́ báála ná bɛllɛ lɛ paalɔ ná daha a ko tuwi, a daarɛ fuo ná, a mʋ́ Nuŋ bio Zozie rɩ́, a bʋl wɩ́ɛ́ ná wuu há péríwó, a pɔ́ʋ́. 24 Ɓa bʋ́lɔ́ pá Zozie a bʋlɛ́: «Nyuutɩna Wɩɩsɛ cáásɔ́ pi tɔ́ɔ́ ná wuu, a hérá nɛ́sɛ mɛ́ rɛ́. Héwíŋ zʋ́ nɩɛ ná wuu há mɩŋ tɔ́ɔ́ ná mɛ́, a tɩ́ŋrá wɩ́ɛ́.»