Moyizi hé bárka pá Ɩzɩrayɛl jɩmʋ́ʋ́la
33
1 Bárka ná Wɩɩsɛ tʋtʋnnɔ Moyizi há héé pá Ɩzɩrayɛl jamáŋ ká zɩŋ sʋwɛ nɛ́ nyɛ:2 Ʋ sɛ́: «Nyuutɩna Wɩɩsɛ lɛ́ Sinayi paalɔ ná mɛ́ nɛ́ a ko.
A isí Edɔŋ tɔ́ɔ́ mɛ́ anɛ wɩpomí,
ʋ cɛ́ Paraŋ paalɔ́ mɛ́ ká cuoli hóú nɩɛ mɛ́.
Ʋ kóú nɩɛ rɩ́,
málɩkáŋdɔ́ɔ́ tɩ́ŋʋ́ mɛ́.
ʋ kénú wɩ́bile ná há nɩhɩ̃́ níŋ,
a mɩnʋ́ néduu mí,
ʋ kaa ko pɔ́wɔ́.
3 Táŋa, Nyuutɩna Wɩɩsɛ cóú nɩɛ rɛ́:
Ɩ nɩtɩ́llɛ wuu mɩ́nʋ́ nɛ́sɛ mɛ́ nɛ́.
Ɩ sɩ́ɛ́ nɛ́ ɓa wuu ɓírmi, aá zésí wɩ́makɛ́,
4 arɩ́ wɩ́bilé ná Moyizi há mákɛ́,
ɓa ká Zakɔbɛ duo nɩɛ oŋpíŋé rí.
5 Ʋ nɛ́ kúé a Ɩzɩrayɛl jamáŋ kuóro,
tɛ́ŋ ná mɛ́ ɓa sɩ́dííre rɩ́wɔ́ jɩmʋ́ʋ́la wuu há kúé ciki.
6 Nyɛ nɛ́ ʋ bʋl a tɩɩnɛ Rubaŋ duo mí.
Ʋ sɛ́: «Rubaŋ nɩɛ wɩ kaŋ,
amá ɓa sɩ́ mɩŋ ráŋ a kaa mʋ́ wuu.»
7 Nyɛ nɛ́ ʋ bʋl a tɩɩnɛ Ziida duo má mɛ́,
ʋ sɛ́: «Óó Nyuutɩna Wɩɩsɛ, zesi Ziida búŋse,
ká kánʋ́ kóú nɩɛ rɩ́,
ʋ dóé ní ʋ kaa pɔ́ʋ́ tɩɩ mɛ́.
Nyuutɩna Wɩɩsɛ, sáŋʋ́ mɛ́ rʋ́ʋ́ wóllú dɩŋdɔma.»
8 Wɩ́ɛ́ ná ʋ há bʋlɛ́ a tɩɩnɛ Levi duo mí ní nyɛ:
«Ɩ Tumimi arɩ́rɩ́ Urimi ná ɓa há kené bel
a nɩ́ná wɩ́ɛ́ ná, ɩ háá jɛɛ́,
rɩ́wɔ́ a nɛrɔ ná há cóí ɓɩɛ.
Ɩ mɩ́lʋ́ rɛ́ Masa mɛ́, ká jáʋ́ nʋɔ mɛ́ Meriba nyii ná dɩhɩ̃́.
9 Ʋ wɩ lóé rʋ́ʋ́ áná rɩ́rʋ́ maá,
rʋ́ʋ́ maábɛlɛ arɩ́rʋ́ bɛlɛ wɩ́ɛ́ wʋ́ʋ́ mɛ́,
a mɔ wɩ́ɛ́ ná ɩ há mákʋ́,
ʋ duo nɩɛ sáŋɔ́, a tɩŋ nʋtʋmɛ ná má,
ɩ há bílé, ɩ rɩ́wɔ́ pɛ́kɛ.
10 Ɓa nɛ́ sɩɛ́ mákɛ́ wɩ́ɛ́ ná
ɩ háá jɛɛ́, arɩ́rɩ́ wɩ́bilé a pá Ɩzɩrayɛl jamáŋ.
Ɓa nɛ́ sɩɛ́ nyɩkɛ tulaaléwa ɩ sɩ́ɛ́,
ká ɔsɛ vʋk'físi má ɩ koro ná nyúú.
11 Óó Nyuutɩna Wɩɩsɛ, pɛ́wɔ́ mɛ́,
rɩ́wɔ́ wɩ́zɩmɛ súúri,
rɩ́ɩ́ sɩɛrʋ tɔ́rɩ́wɔ́ tʋtʋmɛ́ nyúú.
Yoo díwó dɩŋdɔma a sɩ́ ló rɩ́wɔ́ baa ka dóé.»
12 Bɛŋzamɛ duo má rɩ́, nyɛ nɛ́ ʋ bʋl:
«Nɩɛ ná Nyuutɩna Wɩɩsɛ há cówó nɛ́ nyɛ,
a pɩ́pɔ́wɔ́ tɛŋfɩ́ɛ́l.
Ʋ mɩ́ŋwɔ́ har tɛ́ŋ wuu mí, a pʋ́pɔ́wɔ́ mɛ́.»
13 Zɔzɛfɛ duo má rɩ́, nyɛ nɛ́ ʋ bʋl:
«Nyuutɩna Wɩɩsɛ, a rɩ́ dúóŋ ko wérí a pɔ́wɔ́,
rɩ́ nyii má bul lɛ, rɩ́wɔ́ tíé ka cilo.
14 A rɩ́ oŋparɛ ná wɩpomí há ɛɛ ɓaá ɔsɛ,
rɩ́wɔ́ bɛ́ wérí cana wuu mí.
15 A rɩ́ tésíé pallɛ ná má ka tunɔŋwere,
rɩ́ ɓɩdííle mɩ́ŋwɔ́ dúŋdúóme má mɛ́.
16 Nyuutɩna Wɩɩsɛ, a rɩ́ɩ́ sɩɛrʋ tɔ́rɩ́ nɩɛ nyúú,
a a rɩ́ omo ná wuu há wéró mɩ́ŋwɔ́ tíé mí.
Ɩ nɛ́ fa há mɩŋ túí ná mɛ́,
lo rɩ́ wɩ́ɛ́ nyáŋ wuu tʋŋ Zɔzɛfɛ jɩmʋ́l nɩɛ mɛ́,
ʋ nɛ́ kɔ́ʋ́ maábináŋa sɩ́dííro.
17 Zɔzɛfɛ yɩr lɩ́ɔ́,
ʋ kéŋ dóé anɛ nɔbɩra bio há ká nɔɓala nɛ́,
ʋ nyɩ́sɛ nɩhɩ̃́ baknɔɔ nɛ́,
ʋ nyɩ́sɛ ná nɛ́ ká Manase duo nɩɛ bʋ́ɩ́ ná
arɩ́ Ɩfɩrayɩŋ duo nɩɛ bʋ́ɩ́ fí ná.
Nyɩsɛ ná nɛ́ ʋ sɩ́ kaa kuri duowa hé náŋá mɛ́,
a yíkwó mʋ́ dúníé kíŋkere.
18 Zabɩlɔŋ arɩ́ Ɩsakarɛ duo má rɩ́, nyɛ nɛ́ ʋ bʋl:
«A rɩ́ Zabɩlɔŋ duo nɩɛ díwó dibolé báyɛlɩ́ wér,
rɩ́ Ɩsakarɛ duo nɩɛ má ɓɩɛ pul pɔ́wɔ́, ɓa táŋtɛwa mɛ́.»
19 Ɓa sɩ́ yɩ́rɛ nɩɛ rɩ́wɔ́ ko paalɔ nyúú,
a ɔsɛ vʋka ná há cɛ́rɛ́ pá Wɩɩsɛ,
a tɩŋ ɓɩɛ ná ɓa há sɩ́ ná mʋʋ mɛ́
arɩ́ mʋʋ hɩɛl mʋ́l.»
20 Gadɛ duo nɩɛ má mɛ́, nyɛ nɛ́ ʋ bʋl:
«Wɩɩsɛ sɩ́ hé bárka pá nɛrɔ ná wuu há sɩ́ a rɩ́ Gadɛ tíé jɛ́llɛ kɩ́káŋ.
Gadɛ nɩhɩ̃́ kɩ́ŋkáná nɛ́, aá cɔ́nnɛ nɩɛ vaŋsɛ
ɛ́ raá má aá pʋ́ksɛ nyunni.
21 Ʋ lɩ́sɛ tɔ́ɔ́ dɩhɩ̃́ ná há wéró kɩ́ŋkáŋ nɛ́ ʋ ɔ́ʋ́ ker.
Sɩ́dííro ker ní ʋ tɩ́llɛ,
rɩ Ɩzɩrayɛl jamáŋ sɩ́dííre ní kúé ciki,
ʋʋ́ a wɩ́ɛ́ ná háá tɔrɛ Nyuutɩna Wɩɩsɛ sɩɛrʋ,
arɩ́ wɩ́ɛ́ ná ʋ há sɩ́ kaa dí Ɩzɩrayɛl jamáŋ sarɩ́ya.
22 Daŋ duo má mɛ́, nyɛ nɛ́ ʋ bʋl, ʋ sɛ́:
«Daŋ nɩhɩ̃́ kɩ́ŋkaŋɓʋɔl nɛ́,
a ɓéri lɛ́lɛ́ Basaŋ tíé mí.»
23 Nɛfɩtalɩ duo má mɛ́, nyɛ nɛ́ ʋ bʋl:
«Nyuutɩna Wɩɩsɛ sɩɛrʋ tɔ́rɛ́ Nɛfɩtalɩ nyúú wérí
ʋ sáŋʋ́ mɛ́ kɩ́ŋkáŋ.
Ʋ nɛ́ sɩ́ tɩ́llɛ tíé ná há míŋ wɩɩsɛ dɩzʋ́ɩ́,
arɩ́ wɩɩsɛ dɩpomí nédu rɩ́.»
24 Asɛrɛ duo má mɛ́, nyɛ nɛ́ ʋ bʋl:
«Asɛrɛ nɛ́ ná wér a kɩ́llʋ́ maábináŋa wuu,
a a ʋ maábináŋa cóllú ní,
a a ʋ tíé má ka ólivi nʋʋ kɩ́ŋkáŋ,
25 rʋʋ tɔ́ɔ́ dánnʋzeno ka dóé
anɛ hɔɔ arɩ́ kɔmɔ́,
rʋʋ ka dóé ʋ hiẽso wuu mí.»
26 «Óŋ wuu toó a mɔ́ɩ́wa Ɩzɩrayɛl jamáŋ Wɩɩsɛ,
ʋ há lɛ́ bána nyúú, a tɩŋ duóbána sɩɛrʋ,
rɩ́rʋ́ tʋlɛ́ a ko tuwi pɛ́ɩ́wa mɛ́ ɛ́.
27 Wɩɩsɛ ná há mɩŋ ráŋ deŋdéré ní ká nɛrɔ ná, ɩ́ há sɩ́ fá mʋ́ yúóli,
ʋ dóé ná há waá tenní ní, ʋ kaa pʋ́pɔ́ɩ́wa mɛ́.
Ʋ sɩ́ kíríwa dɩŋdɔma, ká a rɩ́ɩ́wa zɔ́kwɔ́.
28 Ɩzɩrayɛl jamáŋ sɩ́ ké tíé ná há kéŋ tɛŋfɩ́ɛ́l mɛ́,
Zakɔbɛ dunɩɛ sɩ́ ké tɔ́ɔ́ ná há wéró mí,
tíé ná duówero há sɩ́ ko, rɩ́ ɓɩdííle arɩ́ dɩvɛ́ŋ mɩŋ ráŋ.
29 Ɩzɩrayɛl nɩɛ, ɩ́ ná wér.
Duó orí rí nɩhɩ̃́wa, ɩ́ ká nɩɛ Nyuutɩna Wɩɩsɛ há lɛ́ɛ́ tá nɛ́.
Ʋ nɛ́ ká nɛrɔ ná há cúé tɔ́ɩ́wa mɛ́, a sɩ́sáŋɩ́wa mɛ́.
Ʋ nɛ́ kɛ́ɩ́wa lalyooro,
ɩ́ dɩŋdɔma sɩ́ kóíwa rɩ́, anɛ ɓa kéŋwó tɩɩ múúri rí, a sʋ́sʋlɩ́wa,
rɩ́ɩ́wa vɛ ká yoo díwó.