Moyizi sʋʋ wɩ́ɛ́
34
1 Ɛ́ nɛ́ Moyizi lɛ Mʋwabɛ típaŋtaŋɩ́ ná dɩhɩ́ a zɛ́ paalɔ ná ɓa háá yɩ́rɛ Nebo, a tɩŋ ɛ́ mʋ́ zɛ́ paalɔ ná ɓa háá yɩ́rɛ Pisga nyúú nyúgbaŋa, a caasɛ Zeriko. Ráŋ nɛ́ Nyuutɩna Wɩɩsɛ mákʋ́ tɔ́ɔ́ ná wuu, a pɔ́ Galaadɛ dɩtɩ́llɛ, ká mʋ́ peri Daŋ tíé. 2 Nɛfɩtalɩ dɩtɩ́llɛ wuu, Ɩfɩrayɩŋ arɩ́ Manaase dɩtɩ́llɛ, a ka Ziida dɩtɩ́llɛ wuu a mʋ́ yakɛ wɩɩsɛ dɩzʋ́ɩ́ mʋʋ ná ɓa háá yɩ́rɛ Mediterane mí. 3 Arɩ́ Nɩgɛvɛ, Zʋrdɛŋ polo, a pɔ́ Zeriko mí, habɛ́ tuuni há mɩŋ ráŋ, a ka ɛ́ mʋ́ yakɛ dɩhɩ̃́ ná ɓa háá yɩ́rɛ Sʋɔrɛ. 4 Ɛ́ nɛ́ Nyuutɩna Wɩɩsɛ bʋl pɔ́ʋ́ bʋlɛ́: «Tíé ná ŋ há tá nʋɔ a pá Abɩrahaŋ, Ɩzakɛ arɩ́ Zakɔbɛ rɩ́ŋ pii pɔ́wɔ́ duo nɩɛ nɛ́ ɛ́. Ŋ ɔ́ɔ́ ɩ nóú rí arɩ́rɩ́ sɩ́ɩ́, amá ŋ waá lo rɩ́ɩ́ zʋ ráŋ.» 5 Ɛ́ nɛ́ Moyizi, Nyuutɩna Wɩɩsɛ tʋtʋnnɔ ná sʋwɛ Mɔabɛ tíé ná mɛ́, anɛ ɛ́ Nyuutɩna Wɩɩsɛ há bʋlɛ́. 6 Nyuutɩna Wɩɩsɛ húú Mʋwabɛ polo ná mɛ́ nɛ́, a caasɛ tɔ́ɔ́ ná ɓa háá yɩ́rɛ Bɛtɩpɔɔrɛ. Amá nɛ́ŋ wuu wʋ́ʋ́ lɛlbule dɩhɩ́ ɛ̃ arɩ́ zaa wuu. 7 Moyizi fa dí bɩŋsɛ zɔlɔ arɩ́ mɛrɛ́ nɛ́ ká sʋwɛ. Ʋ fa ha kéŋ dóé, ʋ sɩ́ɛ́ má fa ha nɩ́ná ráŋ wérí. 8 Ɩzɩrayɛl jamáŋ wí Moyizi yúó tápʋlɛ mɛrɛ́ arɩ́ fí ní a tenni, Mʋwabɛ típaŋtaŋɩ́ ná mɛ́. 9 Nuŋ bio Zozie fa kéŋ zɩ́mɛ́ wérí, bee wɩ́ɛ́ Moyizi fa púú nɛ́sɛ a sákʋ́ mɛ́, a sʋl Wɩɩsɛ pɔ́ʋ́. Ɩzɩrayɛl jamáŋ wuu saŋ Zozie nʋɔ, a tɩŋ wɩ́ɛ́ ná wuu Nyuutɩna Wɩɩsɛ há tɩ́ŋ Moyizi mí a mákwɔ́.10 Moyizi sʋʋ har mɛ́, Wɩɩsɛ wɩ́laabʋ́llʋ́ wuu báá wɩ Ɩzɩrayɛl kúé anɛ Moyizi, ʋ rɩ́ Nyuutɩna Wɩɩsɛ fa háá céŋ náŋá aá bʋl wɩ́ɛ́. 11 Moyizi ní Nyuutɩna Wɩɩsɛ tʋŋ, ʋ mʋ́ Ezipiti tíé a a wɩ́nyɩnɛwa arɩ́ wɩ́nyáŋsɛ, Ezipiti kuóro rɩ́rʋ́ tʋtʋnnɩhɩɛ̃́sɛ rɩ́rʋ́ tíé nɩɛ wuu sɩ́ɛ́. 12 Nɛ́ŋ wuu wɩ dóé wuu wuó makɛ, ɛ́ raá má a a wɩ́ɛ́ ná há sɩ́ a rɩ́ héwíŋ zʋ nɩɛ, anɛ ɛ́ Moyizi há ɛ́ɛ́ Ɩzɩrayɛl jamáŋ wuu sɩ́ɛ́ mɛ́.